第一季回顧（十一）—金價，根本任你講。3年前，我估通脹，去買金。之後甚至仗都打埋。但金價冇上過水。直到近排，因為估息口見頂，金價就升　—但息口見頂，係因為通脹回落！咁即係，通脹時金會升？定通脹落時金價會升？根本任你講。嘥氣。 (Patreon)

第一季回顧（十一）—金價。

回顧：直線思維嘅危險

你識背晒冧把，不等於你就識股票，係咪？

樓？自住一層。商品？只有少量GLDM．比特幣？有ETF

黃金，係冇增長，又冇現金流嘅

再講一次，股票secular，匯率cyclical

商品呢？一半半。Nominal  term就secular, real term 就cyclical

第一季回顧（十一）—金價。

而家嘅2000蚊金價，扣除通脹，都未返到十年前嘅位，更唔好同70年代比

點解2020年8月我買金？好合理丫，通脹嘛　—估中喎，但金唔升

明明估中晒啦喎！又通脹，又打脹！但結果股票跑贏三成幾！

事後你可以解，因為加息。但，因為通脹買金，又好合理啫？

之後打仗添呀。最初咪升咗陣，然後3月到10月，跌足兩成！

金價已經應該係好簡單嘅嘢，都可以出咁多問題。直線思維嘅嘢

金價嘅嘢：一句，3年前我買金。之後有近N年最勁嘅通脹，仲打埋仗。但金價坐到而家先打個和，美股升咗近四成。所以，都係買股票吧

1. 呼，繼續我嘅第一季回顧。我知7月都嚟緊。係，咁但中途我又有寫其他嘢的。況且，除咗日股美股強者更強，港股弱者更弱外，呢兩個月相對地唔係好大變化。

2. 以後可能每年，每半年，甚至每一季都講下。不過之後唔使講咁長，因為有啲基本嘢講過就唔再講。所以如果好得閒嘅，可以睇返之前嗰十篇（！）。

3. 第一篇開場白，第二篇強積金同港股，第三篇美股，第四篇歐洲，同埋所謂嘅匯率風險，第五篇亞洲，日韓台灣星馬泰。第六篇印度印尼越南金磚四國，包埋一大堆環球ETF。第七同第八講開第一季債市，同埋債ETF。第九篇講咗一堆我買或有留意嘅股票ETF。

回顧：直線思維嘅危險

4. 第十篇係比較重要嘅，講明明第一季成堆嘢都係「通脹見頂　停加息　債息落　美金落」—但偏偏新興市場就唔多掂。從而話你知，「直線思維」係可以出好多問題嘅。以往次次見到「通脹見頂　停加息　債息落　美金落」，都有利新興市場，但偏偏今次好似係已發展市場仲勁。

5. 仲有，個十分陽春嘅Excel（2023Q1），我已經搞咗個進化版。唔係完全，但你可以睇下呢個Monitor（Excel名），Desktop開個Excel識得自動拎data的，手機應唔識。下次就會用呢個講，靚仔啲。

你識背晒冧把，不等於你就識股票，係咪？

6. 之前嗰十篇，講晒世界各地股市，債市（主要講美國），匯率。講埋環球股市ETF，仲有一大堆股票ETF，債嘅ETF。即係個2023Q1 Excel，最左同最右邊嘅都講晒。

7. 剩返乜？中間嘅嘢，個股。照計唔會講好耐，況且講得太耐就有排都埋唔到尾。

8. 不過，第九篇講過ARKK KRE，第十篇講到啲新興市場ETF。仲有啲嘢未講嘅。係乜？就係股市債市匯市（再講一次，外匯唔係投資）以外嘅嘢。即係乜？加密貨幣，商品，樓。

9. 因為呢啲東西，我估不少讀者熟過我，所以就快講。不過，不幸地，咁並不代表你特別叻，或者叻過我。我在Facebook經常講「司機的知識」嘅故事（By the way，呢篇就係Good Read），有個小朋友條條巴士路線都識，知邊用乜車，停幾多個站，咁唔通我就變咗佢讀者訂佢寫嘅嘢？你睇電視嘅財演（well），個個冧把都記得係邊間公司，就代表識嘢？（你見我上次講座，我連道指大約幾多點都唔係好肯定。我為甚麼要記得呢樣嘢呢？）

樓？自住一層。商品？只有少量GLDM．比特幣？有ETF

10. 加上，我買得唔多。樓就自住啫，咁都可以講幾句，雖然長期讀者一定知我會講乜。商品投資近乎係冇，不過呢個Patreon一開，就係講黃金ETF，我亦買咗GLDM，不太多，可能就快沽（你好少聽我講會沽貨，因為我仲爭IB錢）。至於其他商品係冇嘅。至於加密幣？呢度有提過買BTCC.B，比特幣ETF，都係輸錢中（但今年當然不錯）．然後美國都應該會出比特幣ETＦ了（之前要買加拿大嘢）

11. 不如先講下黃金，我用GLDM嘅圖算，反正跟金價跟得相當足。正如我提過，係呢個Patreon剛開時買，即係2020年7月8月左右。成本38蚊左右，而家剛好回家。中途最多輸過15%左右，結果都守得雲開見月明。但呢個唔係重點。

黃金，係冇增長，又冇現金流嘅

12. 有人以為「總之間公司成長，咁你買貴咗都好，好多時坐住就可以回家」—聽聞呢個講法嘅基礎，係啲公司（或你買個指數）背後盈利有增長，但黃金係唔會產生任何盈利或現金流嘅。

13. 當然你亦可以話，不停咁印錢，最後購買力都係會跌，會反映返在呢啲嘢上。係定唔係？「睇你有幾長命啦」。

再講一次，股票secular，匯率cyclical

14. 呢度可以講兩樣嘢。第一，之前講過，之後都會再講。商品，外匯，股票嘅分別。似乎好多人都係唔明嘅，舊文寫過，你可以去重溫。你睇一兩年就冇得講，但睇長期嘅，匯率多數係cyclical 嘢，好難不停單邊大上，最簡單你搵個美匯指數圖嚟睇。股市呢，就應該係　secular嘅，你見美股歐股都係創歷史新高，你鍾意睇MSCI World Index都得。

15. 背後，當然係有原因。匯率本身不能創造任何嘢，你一路太貴就會有啲嘢拉返你落嚟，你印錢人地又會印。股市呢，企業盈利係一路成長嘅，特別係指數，汰弱留強。

商品呢？一半半。Nominal  term就secular, real term 就cyclical

16. 但，商品呢？就好可能係，一半半。即係點？即係，只會跟通脹升。扣除通脹，應該就cyclical（股市呢？咪提過，一般8-10%，未計通脹，當然係跑贏通脹）

17. 你鍾意可以計下，搵經通脹調整嘅金價，唔難計，甚至網上會有圖畀你，但唔知準唔準，我冇double check

而家嘅2000蚊金價，扣除通脹，都未返到十年前嘅位，更唔好同70年代比

18. 例如呢個，你會見到，而家嘅2000蚊金價（佢個圖去到2020年，但而家都係差不多2000蚊），扣除通脹，都未到2011嘅位，更唔好同70年代比。或者你睇圖嘅上半截，金價嘅走勢，同普通消費物價，係好接近嘅

19. 呢個圖仲神經，由1700年代計起。你特別可以見到，1970年後，廢除金本位制，先開始狂升。但整體，似乎都都只係跟通脹升。

點解2020年8月我買金？好合理丫，通脹嘛　—估中喎，但金唔升

20. 另外一樣嘢想講，2020年8月，點解我會買金？好簡單，見印咗咁多銀紙，覺得會通脹，就買金保值。留意，當時唔係「避險」，疫情大爆發嘅股災已完，當時標普指數已經彈返去疫情嘅位。

21. 同樣地，金價都升咗唔少。結果？摸晒頂。差不多我一買完後，就見咗頂，坐足兩年半，已經升回家。順帶一提，雖然啲人話舊年股災，但標普指數而家都仲係比我買金當日，升咗35%！

22. 但重點唔係「早知當初買SPY更好」，唔係我接近歷史高位時買，亦唔係之後一路跌我都冇理。

明明估中晒啦喎！又通脹，又打脹！但結果股票跑贏三成幾！

23. 重點又係個直線思維。大家諗下，當時我有冇諗錯？我買嘅原因，就係因為覺得「印咗咁多錢實通長」—結果有冇發生？有呀！我中到應一應。但又如何？呢個例子好值得你思考

24. 特別留意，2020年，根本都未見通脹，講都未必有人講。通脹升溫係2021年嘅事，然後開始爭論係咪短期現象。

事後你可以解，因為加息。但，因為通脹買金，又好合理啫？

25. 係呀，我買完金後，通脹係不停升呀，但金一路跌。「事後」你咪可以解返，哦，因為加息。但，最初講「通脹買金」，又好言之成理喎。

26. 其實你諗真啲，「通脹升金會升」同埋「加息不利金價」—兩種講法，放埋一齊，根本係唔相容的！通脹，又點會唔加息呢？

27. 類似嘅問題，遲下講油價一樣。打仗又話油價會升，之後就話經濟差所以油價跌。唔通開頭打仗時就冇估到經濟差？

28. 可見好多講法，都係事後解。仲有，直線思維，只係拎住某一點，唔睇其他嘢。只睇通脹（話會有利金價），唔理通脹會加息（然後不利金價）

之後打仗添呀。最初咪升咗陣，然後3月到10月，跌足兩成！

29. 更好笑嘅係，去到舊年俄羅斯打烏克蘭啦，OK，地緣政治風險，金價升過一排　—然後？打咁耐，跌足咁耐，3月到10月，跌足兩成，

30. 更更搞笑嘅係，到通脹回落（正係舊年10月嘅事），金價就不停強勢，近排屢創新高了。我卒之回家了，原因，「原來話估減息」。咁到底，係通脹對金價有利，定通脹回落先對金價有利？任你講

31. 見到冇？事後講理由，一定易。但當時我講嘅「通脹買金」，應該大把人信，唔少讀者都有買，「一齊坐艇」。正如舊年3月你同人講「打仗買金」，一樣大把人信，一樣有排坐。今日人地同你講「減息買金」，一樣言之成理。可惜好多嘢嘅走勢，就唔係睇你係咪言之成理。

32. 幸好乜？幸好，我只係買咗少少。我多數嘢都仲係買股。而買股之中，又比較多係指數ETF。如果我買晒金，你估我過去兩年心情如何？怕且麻麻地吧

金價已經應該係好簡單嘅嘢，都可以出咁多問題。直線思維嘅嘢

33. 金價suppose係好簡單嘅嘢，有晒歷史，啲「if A then B」都可以出咁多問題。

34. 可能你話你係黃金專家，隨你。但上面我講嘅，亦係N咁多年大家對黃金嘅講法，你見，根本都係解釋唔到的　—　事後就得。

35. 最後補一筆，事後你可能發現。其實在我買金之前，即係2020年第二季，金價已升唔少。同樣地，在烏克蘭打仗前，金價已經升唔少。係咪有啲「聰明錢」，就好難答你了。不過你真係見到，資產格價，可以領先「事實」好多。

36. 至於第一季金價嘅升勢？其實都係好簡單，似乎同科技股一樣，估唔再加息，唔再銀根緊。

37. 吹脹嘅係，唔再加息正係因為通脹跌。咁即係「通脹跌金升」。但，最初好多人都以為（包括我），「通脹升就買金保值」。邊樣先係？你事後計，可能講得通。

38. 但我依然相信2020年中叫人買金好多人都落搭，因為「美國印銀紙實會通脹買金保值」，你睇，印銀紙會通脹呢部份我都中晒。但又如何？正如舊年2月叫人買金好多人會信，「政治不穩買金」，但係咪咁簡單？

39. 幸好，我只係買咗少少。所以你又不能話我錯晒，一直我都係叫人，你頂多買5%，甚至更少。叫做預備下啲「黑天鵝」事件。「結果仗都打埋　通脹升到幾十年新高」，先勉強打個和。

40. 呢篇應該值得大家細心諗下。你嘅「直線思維」，就唔係幾好玩。雖然你又諗下，其實到最低位，我都只係輸17%左右啫，濕濕碎。

41. 即係好唔好買金？不如畀個極短嘅答案你：你冇千幾兩千萬身家嘅，forget it．有嘅，咁你買返幾十萬，冇話唔得嘅。

42. 下篇講石油，同埋加密貨幣。雖然冇乜好講，特別係前者。