升晒，仲買唔買得？有乜好買？（最終回）—香港高息股雜談 (Patreon)

日本股講座重溫

Boom開戶優惠加碼

「舊經濟」不等於增長慢，增長慢又不等於股價一定落後

Domino Pizza同Google同期上市，但咁多年後，佢嘅股價仲跑贏Google

港股，我就買騰訊阿里巴巴

另外，睇高息股。匯控中移動今年跑出，絶對唔奇

內銀，咪有人民幣跌嘅風險。長建又驚英鎊跌。領展又驚港紙爆，想點？

快講香港人病態收息文化，同埋高息ETF

預告：借1.5厘日圓孖展，去買3厘4厘日本股，有冇得諗？

日本股講座重溫

1. 快手跟進，上次個日本股講座，我自覺講得不錯。可惜唔係我一個人講晒。無論如何，足本重溫，呢度。但遲下我都會再講，不過可能等七月？因為你都知，大把嘢未寫。本Patreon一向有多冇少，我其實懷疑有冇人係睇得晒的。

Boom開戶優惠加碼

2. 另外，照舊了，Boom日本股開戶優惠。加碼添呀。留意真係送現水，你可以拎走，連沽股票呢個步驟都慳返（之前有啲券商送股票嘛）。原本係送500，而家可以額外送多100。不過，開戶途徑要填Webinar先有額外100，否則只係原本500。又，當然要填埋我個名IvanLi做referral code，不過應該自動幫你填咗。

3. 都係嗰句，未開就開返個，反正有錢拎，而可能你都有一日想買日本股。佢地好似仲買到韓股台股，但我未試。而亦真係有佢地贊助你先有免費嘢聽，所以最好開到下戶等我有得交差。

4. 呢個「升晒，仲買唔買得」系列，卒之去到最尾。第一篇講過「覺得貴時應該點做」，第二篇，畀返啲具體例子你，例如美國科技股，從來冇點「平」過。而唯一平過嘅Facebook，你當時多數唔敢買。第三篇，再補充講市盈率，同你介紹左咩係PEG，仲有一啲非量化嘅指標。最重要嘅係，你買乜，好取決於你已經買咗乜。所以亦公開部份我買咗嘅嘢。第四篇，上一篇，講咗有乜好買，講咗啲美國舊經濟股同價值股。

5. 另外，我會留意BlackRock（我已買）。懶嘅，睇呢度。我遲下都會寫。

「舊經濟」不等於增長慢，增長慢又不等於股價一定落後

6. 我想補充一句，好多好多人，特別係男仔，都有種偏見，以為「舊經濟股」即係負面，即係增長慢過新經濟股。首先呢個未必，但仲有，盈利增長慢，未必股價增長都慢　—　呢個又係一大迷思。問題係，你有冇睇埋估值？

Domino Pizza同Google同期上市，但咁多年後，佢嘅股價仲跑贏Google

7. 以前寫過篇好有趣嘅文（自己搵舊文吧，2021年5月尾6月頭），Domino Pizza同Google同期上市，但咁多年後，佢嘅股價仲跑贏Google．你講創意講賺錢，Google已經差不多係最強嘅一間科企，更唔好講一大堆呃飯食冇錢賺嘅。

8. 同樣地，阿里巴巴上市後，增長係高過Google-但上市估值拎得太貴，所以股價表現反而差。

9. 今年科技股股價又翻生，但又唔諗下，舊年你買科技股嗰啲，好多都嚇到「止蝕」了。咁你睇麥當勞可口可樂，就真係冇好似Nvidia Facebook咁高位低跌七八成的。麥當勞同可口可樂，舊年甚至冇乜點跌過！跑贏堆科技股一大截。即使係疫情股災嗰時，兩隻都只係跌三四成，同大市差不多。

10. 仲唔信嘅？你睇我其中一隻賺得最多錢嘅股票，正係SCI，殯儀股，完全唔high tech

11. 所以，記住分散。唔知咩叫分散嘅，就VOO IDEV EMXC，港唔港股隨你

港股，就買騰訊阿里巴巴

12. 至於港股，就仲簡單。固然有啲人完全唔買，我覺得未必好，但亦唔會阻止你或者同你拗。咁但，你唔買港股，都可以唔使全部美股嘅，仲有其他市場。

13. 但港股嘅，我只睇兩種東西。一係，就大科企，講白啲就係比較有錢賺嘅。即係騰訊阿里巴巴。原因？都冇乜特別，你都估到都係嗰幾味。始終個估值同美國拉得太遠，而政策係可能一路鬆綁嘅。你見近排啲中資科網大佬都又個個出現返，可能習大大都覺得之前勒得太緊

14. 咁大家知啦，中國嘅嘢：一放就亂，一亂就收，一收就死，一死就放

15. 但再講一次：重點係因為我唔多中資科技股，只係得騰訊。阿里巴巴未有嘅（呢排會開始買），京東美團都近乎冇（只係得騰訊派嗰啲）—咁你自己滿手都已經係京東小米嘅，就梗係諗買其他嘢啦。

另外，睇高息股。匯控中移動今年跑出，絶對唔奇

16. 另一種，亦不用多講。高息股。原因亦好簡單，息口應該見頂。事實你見今年港股啲高息股一般OK。特別係匯控同中移動，都好大程度因為派息。

17. 不過都講過，唔係你走去睇報價睇幾多厘息。你要嘅10厘都有。問題係，之後幾年派唔派到？有啲行業本身大上大落，今年有，下年就冇。派到嘅6厘，好迥忽然派唔到嘅9厘

18. 咁高息股嘅，都係嗰啲啦。匯控中移動講咗。仲有領展，長江基建。呢排甚至中電（2）都彈咗上嚟。

內銀，咪有人民幣跌嘅風險。長建又驚英鎊跌。領展又驚港紙爆，想點？

19. 咁你可以話內銀股都係呢種，不過咪再多啲人民幣貶值嘅風險咯（中移動都有），係存在架喎，要冇風險嘅放曲奇餅罐啦。仲有，內銀都有些少（但應唔係好大）補充資本嘅壓力，又唔係未供過股（不過都係少嘅）。咁但，正係咁，咪會啲息再高啲。

20. 驚人民幣風險嘅，咁咪領展（823）咯，但就會低啲息。咁驚香港玩完，冇人租公屋商場嘅，咁咁長江基建（1038）啦，全球嘢。「又話驚匯率風險」，咁想點？

21. 不過認真講，都真係分散幾隻。特別嗰啲想「收息」嘅。忽然一隻唔派息，甚至供股，咁就你坐喺度，失晒預算。

22. 應該答得清楚啦？如果係我，新錢就買美國價值股，舊經濟股，騰訊阿里巴巴，香港高息股，或者日本股。

23. 不過真係記住，以上嘅講法，都同我本身坐住啲嘢有關。你乜科技股都冇嘅，就梗係買下QQQ。

快講香港人病態收息文化，同埋高息ETF

24. 最後都補充多兩句，香港人嘅「收息文化」，絶對係病態。當然以前就諗咩買樓收租，而家好少人諗啦。但其實，呢個又係迷思，以往啲人都係因為樓價有得升。或者你用三十年前買美孚新村嘅樓價計租金回報，梗係高啦。而家你買樓，大家都知租金回報相當低，都未同你計管理費呀，翻新呀，中間未必個個月租得出呀之類。

25. 然後啲人諗埋各種妙想天開嘅收息大法，最後多數都係出事收場。因為我講過，係冇無驚無險8厘息呢回事嘅。我真係唔明啲人做乜咁萌塞，同佢講又唔信，其實佢自己都明，但硬係仲覺得可以好懶聰明地搵到啲絶招，「而大戶係唔知嘅」。大佬，你估真係眾專家無言，大行無言咩。

26. 以上講嘅咩領展，中移動，長江基建，內銀，全部都有風險！冇風險你放曲奇餅罐，唔好嚟問我。但偏偏啲人寧願聽大話，十分好笑。風險在邊？唔派息啦，減派息啦，供股啦

27. 就算長江基建上市咁多年年年加派息，你見股價高位近80蚊，而家40蚊咋。呢間唔係賊啦啩？唔係外國制裁啦啩？唔係大陸假嘢啦啩？但你係在頂位一注買晒嘅，關人鬼事咩（雖然話說回頭，你收息都幫補返唔少嘅）。所以講咗十九幾次，分段，分散。唔好又嚟問我「以為穩陣嘢都跌一半，點算」—　因為你覺得我老點你嘛，你鍾意一注獨贏嘛，關我鬼事。我啲長江基建有錢賺呀！你買就輸錢。呢個咪分別。

28. 而所以我可以順手講埋，你見香港都有啲高息ETF，我好似從來都冇推介。有機會可以細寫，但應該有好多讀者都留意到：我係唔鍾意買主題ETF嘅。即係我會買指數ETF，但你話咩「通脹受惠股ETF」，「AI ETF」，我差不多全部唔買。因為太多古惑嘢

29. 簡單一句，佢個揀股準則，越「機械化」越好。SPY QQQ 之類，根本個ETF照單執藥。IWD就價值股指數，唔係大盤指數，但都叫做比較「睇公式」。你去到咩「AI ETF」呢啲，任條友揀　—　而基金經理有幾醒，大家應該有眼睇。要信基金經理揀嘅，我不如自己揀？

30. 你見幾隻香港高息ETF，其實表現都係有啲參差。3070升8%，靚仔。3145都有6%，還好。3110冇升跌，差啲咯。因為唔多唔少，呢啲東西，都會跌入嗰種「見9厘息」就買入去嘅陷阱。而你見我唔係叫你揀最高息嘅買，係揀「派到」嘅

31. 但話說回頭，佢地始終ETF，咁都唔會隻隻一齊出事嘅。所以，總好過你自己去揀啲九厘十厘嘅嘢。

預告：借1.5厘日圓孖展，去買3厘4厘日本股，有冇得諗？

32. 呀仲有最後，之後可能你提我，或者你諗定。之前講過，借日圓孖展，又平又唔使個個月還，但你拎去買香港高息股，匯率係個好大問題。

33. 不過，其實，你借日圓孖展，然後買返日本當地嘅高息股。有冇得諗呢？答案係，Yes and No，有機會探討下。

34. 即係諗下，我借1.5厘嘅IB日圓孖展，去買返啲3厘4 厘嘅日本股（如有），咁係咪真係冇匯率風險呢？你可以諗下。

35.