升晒，仲有乜好買（五之四）—戲肉，講有錢新我會買乜。當然同我本身坐咗乜有關。順便講埋5月講座啲推介，表現還不錯。 (Patreon)

如果有新錢，除咗定期買開嘅嘢外，我會買乜

新錢多買新興市場，少買美股。唔係我「睇淡美股，睇好新興市場」。

檢討下5月講座話買嘅嘢，表現都不錯，冇點你

照計，應該跑贏美股同港股　—　但你睇晒咁多隻先係。你揀著輸嘅冇計

檢討下，5月講嘅，有啲升咗，仲買唔買得？

講埋有乜好買：美國舊經濟股，價值股，騰訊阿里巴巴，高息股

價值股ETF嘅IWD，入面有乜？

Facebook都係價值股？係喎！

唔止，Facebook又同時係增長股！價值同增長，唔係二元對立

至於我買咗乜價值股或舊經濟股？都公開下

1. 呢個「升晒，仲買唔買得」系列，去到尾二。第一篇講過「覺得貴時應該點做」，第二篇，畀返啲具體例子你，見到例如美國科技股，從來冇點「平」過。而唯一平過嘅Facebook，你當時多數唔敢買，因為覺得「平可以再平」，「盈利不停跌」，「無底深潭」。上一篇，即係第三篇，再補充講市盈率，同你介紹左咩係PEG，仲有一啲非量化嘅指標。最重要嘅係，你買乜，好取決於你已經買咗乜。所以我亦公開部份我買咗嘅嘢。

如果有新錢，除咗定期買開嘅嘢外，我會買乜

2. 呢篇就講，如果有新錢，除咗定期買開嘅嘢外（都佔咗好多），我會買乜

3. 好啦，呢張slide，5月頭長橋嘅講座，其實冇乜新嘢。我再十強調最重要係最頂，第二重要係中間。最低啲冧把最不重要。

新錢多買新興市場，少買美股。唔係我「睇淡美股，睇好新興市場」。

4. 嗰日都有人問，4321。我話我嘅新錢，例如如果有一天夾到埃汾太去台灣拎返嗰600萬台幣，我會買EMXC IDEV VOO 2800，大約4321咁比例。

5. 有人奇怪做乜我買咁多EMXC，係咪十分睇好新興市場。係咪睇淡美股港股。錯！！！！

6. 唔該唔該，都話睇你本身買咗乜！我已經一大堆港股美股，唔使再好多VOO 2800了。我冇乜港股美股以外嘅嘢，所以新錢買EMXC IDEV

7. 掉轉，如果你剛開始投資，乜股都冇買，就梗係唔係咁啦！應該美股為主啦。見到分別冇？！（有時真係畀啲人吹脹，睇一半唔睇一半唔緊要，但唔好自作聰明然後之後嚟抽秤我）

檢討下5月講座話買嘅嘢，表現都不錯，冇點你

8. 然後睇下，貼多次上次講嘅一啲「仲有乜好買」—留意，差不多全部係我冇嘅嘢（再睇一次大原則！！）。所以我冇話蘋果唔好，但我已經買咗唔少嘛小朋友。（我買咗乜？上篇貼過）

9. 咁即係同你檢閱下，啲戰績都OK架！

10. 好粗略咁計下，由當日到而家。內銀，跌啦，我當建行，跌7%左右。坡國銀行，冇乜點郁，打個和。但台積電，計美股（你買到台灣股咩？），升25%。阿里巴巴，升11%。AMD，呢度都有寫過，勁咯，升35%。日本股，視乎你計日經定東證，就升6%/11%，豪畀你，計6%

11. 拉勻啦喎。平均12%。咁其實相當不錯，同期標普指數升7%，恒指要跌。但差過QQQ咁咯（係咪想有人同我講日圓跌咗冇計？我懶查，你自己計吧。但相信最多由12%變11%，或者10%。真的，唔好浪費時間落啲唔重要嘅嘢度。）

照計，應該跑贏美股同港股　—　但你睇晒咁多隻先係。你揀著輸嘅冇計

12. 呢度我第一萬次強調一樣嘢：total portfolio，同埋，到底咩叫「啱」同「錯」。講白啲，你大可以在個講座錄一段音，然後話埃汾點你買內銀股，結果跌，條友唔識。

13. 係喎，不過其他嘢你完全冇提冇買咁解。

14. 你網上見到嘅好多嘢，甚至你自己諗嘅好多嘢，都係咁。即係瞎子摸象。講到尾，成副身家就係你嘅戰績。而我Facebook有貼過，呢排我嘅美股都係跑贏大市（其實唔難，多科技股就得），甚至港股都係（不過都仲係輸錢）。咁其實點都唔係失禮。「但你自己all in 買內銀就梗係你嘅問題啦」

檢討下，5月講嘅，有啲升咗，仲買唔買得？

15. 最後真係戲肉，買乜好。AMD之類，我覺得已經相當貴。照舊，「貴可以再貴」，亦唔等於唔會再升。不過天地良心，我有新錢，我都未必會買。反而台積電，我有新錢，我都仲敢買

16. 嘩唔驚打仗呀？唔驚。我又唔係成副身家買晒。Total loss我都冇驚過。見到分別未？見到點解要分散未？而唔係「有啲問題」，隻嘢就唔會相對地都唔係貴到痴線啦。

17. 至於坡銀呢啲，純粹係滿足下話題。講真，你有冇見過我買過？咁多年唯一　一隻坡股，「牛奶公司」，其實好多係香港生意。至於咩「新加坡搶晒香港啲生意」，你可以睇下UOB同DBS，至少今年啲股價，係麻麻地（但DBS之前好多年都好強勢，就後話，所以你睇人人講「新加坡好好景」先去買，亦係蚊瞓）

18. 仲有扯開一句講，同好多小朋友嘅直覺唔同，有冇諗過，「金融中心」嘅股市，未必係掂？未講甚麼「紐倫港」前，即係你當2004年前（大約），東京係亞洲金融中心啦係咪？但你見日本股之前表現點？同樣地，英國股市，都係麻麻地。新加坡亦都係。你可以諗下，紐約係特例，定係普遍例子（而根本2000-2010美股都迷失十年，難道嗰時紐約就唔係金融中心？呢啲網上垃圾，睇少啲為妙）

19. 好啦，仲有乜好買。其實都係幾樣嘢：

講埋有乜好買：美國舊經濟股，價值股，騰訊阿里巴巴，高息股

20. 美國嘅舊經濟股，或者價值股，中資科技股（有錢賺嗰啲），高息股，日本股，that’s it．又，唔好又嚟問我「咁即係XXX買唔買得」—全世界四五十個股市，成萬間公司，你覺得我可以提幾多間？我冇提嘅唔代表唔得。但你覺得我可以識幾多公司？

21. 美股舊經濟股或價值股，我估比較易理解。因為唔少人都怕高追啲科技股，明嘅，係貴的。我都唔會加倉，頂多得閒買QQQ

22. 但即係買乜？就好大學問。講真，「我都唔係好肯定」。因為相當大鑊嘅係，舊經濟股亦唔見得點平。

23. 但你真係要睇嘅，最簡單，睇IWD入面嘅持股。或者再簡單啲，「買IWD」

價值股ETF嘅IWD，入面有乜？

24. 但你睇IWD嘅持股，都可以嚇你一驚。「呢啲都係價值股？」。係。

25. 有堆銀行藥廠或者healthcare，唔意外啦，但好似好少讀者鍾意買。我都冇乜，但我有JP Morgan，同埋有極少量嘅Merck（仲有少少Roche，但唔係美股）。石油股，我就向來唔鍾意，但當然唔代表你不能買。有巴郡，唔意外啦。甚至有Walmart都唔係好奇怪（不過留意，你睇佢啲市盈率都唔平）

Facebook都係價值股？係喎！

26. 比較神化嘅，係你會見到Facebook！係！Facebook係價值股！舊年11月已經走咗入去，嗰時都已經有寫過。一隻Big Tech變咗價值股，夠晒神奇。事後睇返，都係個幾強嘅signal。當然，仲有Cisco（不過呢兩隻唔係舊經濟股，只係價值股，唔係同一個概念）

27. 可能會有讀者問，到底呢個IWD嘅選股準則係乜？這個嘛，其實都嚴謹嘅，有量化嘅，不過太煩，有機會再解。但真係唔係任佢講，都係有數計。

唔止，Facebook又同時係增長股！價值同增長，唔係二元對立

28. 如果你覺得Facebook原來入咗IWD，係價值股，都唔夠震憾。咁畀一個更加mind blowing嘅事實你：Facebook，亦都同樣係IWF入面嘅持股！去到第廿幾大。

29. 即係乜？即係佢又係價值股，又係增長股！死未！

30. 但其實有何不可？同好多人心諗唔同，Growth 同 Value，並唔係二元對立。至少在IWD IWF（即係羅素指數）嘅準則下，一間公司，可以同時有兩種特質。所以可以同時入兩個指數，比重唔同。

31. 亦所以，啲人成日拗「呢隻係價值股定增長股」，浪費人生。諗嘢唔好咁非黑即白。甚至乎，到底係熊市反彈定牛市，呢啲問題都係一樣。你見好多人就只係鍾意拗嘢。

32. 上面只講「價值股」，咁同「舊經濟股」又唔係完全一樣。但講到尾，可以睇下科技股以外嘅東西，得閒慢慢再研究

至於我買咗乜價值股或舊經濟股？都公開下

33. 至於我自己買咗嘅，都有唔少。VISA，SPGI（標普環球，係咪好耐冇聽我講？其實創咗一年新高），SCI（殯儀嘢，之前亦一年新高），Nike，迪士尼，BlackRock，JP Morgan，聯合利華（UL），Costco等等。你計埋其他股市，仲有LVMH，愛馬士等等。不過，都好似冇乜邊隻特別平。

34. 冇架，你睇標普指數都20倍預期市盈率，邊有好平嘅嘢。其實又合理，都話標普指數都升到超過一年新高啦。

35. 之前你又唔買！

36. 當然仲有其他股市，但，唔好搞咁多嘢，買ETF吧。IDEV，EMXC。或者遲下我會講下日本股，反正做咗啲功課。但，唔想諗嘅，咪EWJ或者HEWJ。

37. 結果都係要拖到第五篇，但真係會完了。最後一篇，講埋港股。我只會買兩樣嘢。第一，大型科技股，即係得兩間，騰訊阿里巴巴。第二，高息股。但好多人對高息股都有誤解，所以又講多啲。