升晒，仲買唔買得？有乜好買？（四之三）—點判斷平貴？PEG，VIX，少年股神。仲有公開我持倉（部份）。應該買乜？幾時都係睇你已經買咗乜 (Patreon)

定律：樂觀時太樂觀，悲觀時太悲觀

幾多倍叫貴，永無答案，同一隻股票都未必可比。嫌煩嘅？買指數會好啲

增長消化估值。而實務上多數係盈利升估值升，盈利跌估值跌，雙殺

點解會咁？你可以估下

另一個角度理解市盈率：兼講PEG

蘋果微軟30倍PE，但何來有30%增長？

都係唔知點先叫平？係正常的。咁不如，睇VIX．甚至睇非量化指標

再講一次，好睇你本身買咗乜。咁我公開埋我買咗乜

1. 好啦，今次呢個「升晒，仲買唔買得」系列，去到第三篇。四篇會完晒。之前第一篇，講過「覺得貴時應該點做」，上篇，即係第二篇，畀返啲具體例子你，見到例如美國科技股，從來冇點「平」過。而唯一平過嘅Facebook，你當時多數唔敢買，因為覺得「平可以再平」，「盈利不停跌」，「無底深潭」

2. 見到冇？事後睇返，當然唔係咁。但嗰刻你好多時咁諗，因為「好多人」會咁講。你自己亦會驚。講到尾，都係自己問題。所以點解檢討緊要過預測—好多人都唔信，但你唔檢討，嚟多次Facebook單位數市盈率，你一樣唔會買。

定律：樂觀時太樂觀，悲觀時太悲觀

3. 而至少你應該學到一個定律：多數，淡時又睇得太淡，好時又睇得太好。記住啦。

4. 畀冧把之前，關於上篇，仲可以有少少補充。

5. 照計大家都知，冇可能有一個數字話畀你知，幾時叫平幾時叫貴，都係估估下。否則呢個世界唔使有交易所，根本唔使有買賣，大家計同一條數。亦不能話呢隻30倍貴嗰隻10倍就平，更不能話你應該買後者（或前者）。甚至同一隻嘢，都未必而家10倍就抵，因為以前30倍

幾多倍叫貴，永無答案，同一隻股票都未必可比。嫌煩嘅？買指數會好啲

6. 世界就唔係咁簡單。嫌煩嘅？咁又唔使「放人曲奇餅罐」咁消極。嫌煩嘅，買指數。況且，指數一般會比較「易計」—即係例如比較可以將唔同時間嘅估值放埋一齊比，或者真係見到有個區間。你真係唔會見到標普指數去到100倍市盈率，或者去到5倍（但個股就會）。

增長消化估值。而實務上多數係盈利升估值升，盈利跌估值跌，雙殺

7. 另外，上次講「時間消化估值」，其實係「增長消化估值」。道理不太難明。今日30億市值，1億盈利，30倍市盈率，唔似平。但下年3億盈利，市值股價不變，咪變咗10倍市盈率，平

8. 實際上，好多時去到下年就唔止10倍市盈率，即係可能市值升到90億，3億純利，依然係30倍市盈率，但估值3倍。

9. 亦即係話，盈利一路增長，如果股價不變，可以拉低個市盈率。而實務上，好少股價不變，盈利一路增長，股價一路上。

10. 但如果冇增長，甚至倒退，甚至輸錢，就好難睇。

11. 呢啲就係股市嘅特色，以前寫過。升時，盈利又升，但估值又升，所以往往可以升好多倍。原本1億盈利10倍市盈率，之後3億盈利大家肯畀30倍，一來一回市值爭9倍。但，掉轉嘅情況都係，de rating，盈利一路跌，估值同時跌，隻嘢可以跌六七成以上

點解會咁？你可以估下

12. 順帶一提，多數係咁樣一齊行。盈利升估值升，盈利跌估值跌。一係雙升，一係雙殺。你可以即時諗下點解，下一段答你。

13. 好簡單，因為人係跟紅頂白，兼且短視。今日公司唔掂，咪覺得永遠唔掂（Facebook），掉轉亦係。所以你捉得到逆向去做，「即係舊年11月買Facebook」 ，就發。

另一個角度理解市盈率：兼講PEG

14. 仲有另一樣嘢，漏咗講，可能都有人聽過「PEG」，即係「PE/G」，市盈率除增長。當然，唔係「萬能」（要萬能嘅你買萬能膠啦），股市冇呢回事。但亦係初學者理解咩叫「貴」嘅一個方法。

15. 因為頭先講過，你一路增長，市盈率會拉低。咁如果你市盈率20倍，年年盈利增長30%，股價年年升15%（舉例），市盈率都係越嚟越低。相反，市盈率30倍，但盈利年年增長得10%，你會越嚟越貴，去到某個位多數會不敵地心吸力。

16. 所以，啲人係可以睇下，個市盈率同個增長，係咪相配。十分十分粗略地講，你有30倍市盈率嘅，最好你有返30%盈利增長。亦即係話，市盈率高過增長（純利增長%），十分好。低過嘅，唔多好。即係，PE/G高過一嘅，貴。PE/G低過一嘅，平。

蘋果微軟30倍PE，但何來有30%增長？

17. 咁你隨便拎啲美股公司嚟睇，都會見到，似乎啲PEG多數都高過1吧？上篇講咗，蘋果微軟呢啲，30倍市盈率。但，盈利邊有增長30%？

18. 不過，上面呢啲就齋理論，中間仲涉及好多好多好煩嘅細節嘢。例如拎邊個市盈率（預測？咁2023？定2024？），邊個純利（一季？一年？），有排煩。仲有啲債息呀，呢樣嗰樣嘅影響。

19. 況且，例如盈利負增長，但市盈率總唔會變負數

20. 不過又話說回頭，又不能話呢啲學術嘢完全離地冇用。因為你都係諗呢個問題：如果間公司30倍市盈率，但之後年年盈利單位數增長，咁冇話唔得，你股價都單位數升咪得。但如果仲要年年升30%，咁你啲市盈率，好快去到50倍？100倍？總有個位會跌落嚟。

21. 大約係咁思考。

都係唔知點先叫平？係正常的。咁不如，睇VIX．甚至睇非量化指標

22. 最後，你發現搞咗一大輪，「都係好似唔知想點」。咁即係幾多倍叫平？幾多倍叫貴？再講一次，冇答案。唔係我冇答案，而係永世都唔會有答案。股市就係不確定。

23. 況且，我都未同你講「炒預期」呢回事。市盈率之類，應該睇預期，而家你應該係睇2024（2023年7月都嚟緊啦喎）。但，你未必好易睇到市場預期係幾多（雖然美股會易啲，都唔難找到）。

24. 咁畀少少有建議性啲嘅嘢你。其實，我覺得與其睇市盈率之類。不如，都係返返基本步，咪就係「別人恐懼時我貪婪」。都係真的，人人都驚時，啲嘢就唔會點貴（雖然我講過，呢樣嘢對大市比較適合。你啲公司盈利大倒退，或啲產品死晒，畀人狂掟，就未必係「恐懼」）

25. 咁，之前咪畀過個rule of thumb，睇VIX咯。例如話高過30，就真係開始會平—再講一次，一定有例外，唔使舉例子挑戰我，一定有，否則個個贏錢，否則個個29時已經飛入去，根本唔會見30。不過大體上，似乎易過你自己計市盈率。

26. 仲有，亦可以睇啲「非量化」嘅指標。呢啲就各師各法。包括以前嘅「迫爆證券行」指標，少年股神指標，書店暢銷書指標，seminar有幾多人去嘅指標，有幾多人退訂Patreon嘅指標（唔係講笑，舊年10月11月就係重災區），有幾多人搞股票班，有幾多人嚟鬧我，呢啲全部都係指標。舊年10月11月，真係著晒燈的。

27. 當然呢啲都唔係咁易掌握，事後睇就易。況且好難量化。但又掉轉頭，太量化嘅指標，又未必好，因為畀啲「假安全感」你，以為一到嗰個位就飛入去。

28. 所以投資都係兩三分科學，七八分藝術。

再講一次，好睇你本身買咗乜。咁我公開埋我買咗乜

29. 貼多次呢張5月頭嘅長橋slide

30. 好啦，講咗咁多。總之一句，科技股貴。唔係唔買，但我而家只買QQQ（之前台積電AMD有寫，有叫你地買，但我冇買，因為都係想買返多啲ETF）．

31. 然後再再再再再再講一次大原則：係睇你本身坐住乜。本身好多科技股嘅，新錢就諗其他嘢吧，頂多買少少QQQ。但本身冇科技股，甚至全港股嘅，當然可以買QQQ

32. 再四強調架啦，唔好聽一半唔聽一半，然後之後又嚟話「我聽你咁講」。

33. 而亦正係因為我本身太多個股，先會買QQQ。你唔係我嘛。再睇一次大原則！

34. 順手，呢度公開埋我部份嘅美股持股（太多，貼唔晒，但之後都會講啲）。但呢啲都係一係今年比較勁，或者我賺得比較多嘅公司。「咁Paypal嗰啲就唔貼啦」（認真，近排好返啲）

35. 當然仲有，ETF嘅，每個月買緊VOO QQQM EMXC IWD VB IDEV，寫過多次。跟唔跟隨你，但我係做緊呢啲嘢（VOO咪即係SPY，QQQM咪即係QQQ，呢啲就係我話，買返多啲指數）

36. 港股嘅，就係以上呢啲，差不多全部話晒你知了。多數我都仲有每個月買少少，意思意思。唔失禮架，今年都唔使輸錢。

37. 日本股嘅？Webinar講咗啦。呢度貼埋畀你又點話。留意日本股我今年跑輸大市嘅，但你計一年就差不多。況且都睇你計日經定東證。不過你問我，買HEWJ/EWJ算啦。點解我唔買？因為冇咁多錢。靠大家支持下我啦唏。

38. 下篇，最後一篇，就講埋如果我有新錢，會買乜。