升晒，仲買唔買得？有乜好買？（三之二）- 講講估值嘅嘢。美股唔平，特別係科技股。但其實，有冇平過？好似冇。不過就有一隻Big Tech鏳經平過。六個月前嘅事。但，「之前你又唔買」？ (Patreon)

固然升咗好多可以再升，但有啲嘢真係比較貴

何謂平定貴？真係世間一大難提。況且，係一個動態嘅過程

問題係，好多科技股，真係從來都冇平過

「港股夠平啦，咪又係咁頹」

最好就係又平又有增長。有冇咁嘅嘢？有。「之前你又唔買？」

實戰：睇下點解話啲嘢貴

蘋果而家，30倍市盈率左右。不過，最平嗰時又幾多？

「時間消化估值」—貴唔等於唔買得，唔等於沽咗佢

有冇Big Tech平過？有！舊年嘅Facebook！

Facebook 舊年單位數市盈率喎。但，當時你又冇買喎。咁當然有原因

Momentum vs mean reversion，邊樣真？

但，我點估到佢啲盈利會反彈？答案：係估唔到的。估到就根本唔會跌

「如果盈利一路跌，幾平都唔買」「如果盈利不停升，幾貴都買」—如果。

不過事後諗，人地幾十億用戶，收入點會真係咁快玩完？

最後，可以睇埋price to sales

最後一句：升嗰時，就過度樂觀。跌嗰時，就過度悲觀。像極了人生

好快講返，今晚（星期二）八點Tasty money 日本股Webinar，免費直播。好肯定嘅係，呢啲講座，唔會講到好多嘢。但我就準備咗啲有用資料，呢度會遲下再寫。不過可能等到七月，因為啲第一季回顧都未埋尾，好好醜醜快搞掂佢

1. 今次呢個系列第二篇，三篇會完。之前第一篇，講過「覺得貴時應該點做」

2. 好，認真。而家買唔買得，梗係買得。幾時買得？聽日咪買得。但而家買乜好？就要認真啲研究。

固然升咗好多可以再升，但有啲嘢真係比較貴

3. 因為大家都知，美股升咗好多（特別係科技股）。日本股都升咗唔少。固然，升咗好多可以再升好多（Steve Jobs死後蘋果再升咗幾十倍），但，的確美股，係有啲貴嘅，特別係科技股。

4. 咁就死啦，點算好呢。當然第一樣嘢，請你再諗下，「之前你又唔買？」。你唔檢討呢樣嘢，永遠冇人幫到你。

5. 但，而家買乜好？買啲冇咁貴嘅嘢咯。

何謂平定貴？真係世間一大難提。況且，係一個動態嘅過程

6. 何謂平定貴，都真係世界難題，好難去界定，我都答你唔到。不過又掉轉頭講，冇絶對標準，又唔等於絶對冇標準。

7. 照計美股，特別係啲科技股，點都唔係叫好平（雖然再講一次，貴唔代表不能再升。又講白啲，如果佢啲盈利真係升幾倍，咪貴都變平）

問題係，好多科技股，真係從來都冇平過

8. 一個更深嘅問題就係，其實科技股，甚至美股，都冇乜點樣真係「平」過。之前計過數啦，Nvidia，點計都50倍預測市盈率，冇乜可能叫做平。

「港股夠平啦，咪又係咁頹」

9. 然後另一個更更深嘅問題係，「港股夠平啦，咪又係平足咁多年」。又好似係。雖然港股係咪真係平？都可以拗下。但至少某啲嘢係相當平，至少好多嘢唔係貴。不過，係冇乜增長。

最好就係又平又有增長。有冇咁嘅嘢？有。「之前你又唔買？」

10. 都係合理嘅，平總係有原因，貴又總係有原因。所以，最好就係平得嚟又增長好。有冇咁著數嘅嘢？係有的。幾時？「咪舊年11月嘅美股」「之前你又唔買？」

實戰：睇下點解話啲嘢貴

11. 事實上，成堆美國科技股，呢幾年我都冇乜覺得點平過。不如講數字。蘋果，29000億市值，過去十二個月，242+300+207+194=943億盈利，30倍市盈率。再講一次，冇客觀標準，但我好難接受係「平」。

蘋果而家，30倍市盈率左右。不過，最平嗰時又幾多？

12. 但反而今年年頭低位，120蚊左右，19000億市值。用返當時嘅過去十二個月盈利，207+194+250+346=997億盈利，大約19倍，咁我會覺得，「比較合理」，但都唔係叫好平，至少我心中唔係。

13. 微軟嘅情況，都差不多。呢兩隻，即使係一年低位，我都唔覺得叫「好平」，亦係企得好硬嘅兩隻科技股。正係因為個「護城河」夠深　—　你想像到，疫情，衰退，甚至打仗，對微軟都係冇乜影響嘅。對Goolge Facebook嘅廣告，影響就大啲了。

「時間消化估值」—貴唔等於唔買得，唔等於沽咗佢

14. 唔好自作聰明，蘋果微軟貴，我冇走去沽咗佢。況且，資深讀者聽過一句嘢，我好一排冇提，叫做「用時間消化估值」—亦係上面講嘅，你啲盈利有得升嘅，你今年嘅40倍，之後咪會拉返低啲。

15. 我買LVMH同愛馬士時，都係歷史新高，都唔係平。但之後有增長，就還好。

16. 但個前題係盈利有得升，大升更好。倒退嗰啲，甚至冇盈利嘅，就往往係殺估值時重災區，無險可守，一路跌但都冇平過。跌兩成，但盈利又跌一半，市盈率仲貴咗。所以點解話盈利好重要，雖然耐唔耐有人話畀你知唔使理　—　你睇兩日咪唔使理。但睇兩日嘅，不如去賭波。

有冇Big Tech平過？有！舊年嘅Facebook！

17. 邊隻真係有「平」過？有！就係舊年Facebook．至少事後睇係。又畀個案件重演你。

18. Facebook 係舊年跌市重災區之一，仲係唯一一隻Big Tech跌得咁勁．半年前（只係半年前咋！），90蚊。重點唔係而家290蚊（說好了的Facebook 玩完）。重點係，90蚊嗰時，估值有幾平（或者「有幾貴」？）

19. 睇圖，佢嘅季度盈利。留意，90蚊時係11月頭．你冇得未卜先知。所以睇嗰一刻你睇到嘅最近四季盈利。就係44+67+75+103億，即係289億。咁當時市值幾多億？都好易計。而家290蚊，7200億市值。當時90蚊，就係2300億市值。

Facebook 舊年單位數市盈率喎。但，當時你又冇買喎。咁當然有原因

20. 2300億市值，289億盈利。8倍市盈率唔夠！喂，5大Big Tech之一喎！幾十億用戶嘅公司喎！單位數市盈率，點睇，都叫平，係咪？

21. 你睇落去之前，可以諗下。

22. 好啦，睇多次個圖。時光倒流，你會見到，啲盈利一路跌。但即使我用最近嗰季嘅44億去計，年度化，一年都176億盈利。2300億市值，都只係13倍市盈率，點都係平。提提你，上面講蘋果微軟，最低都冇低過20倍

23. 你試下代入返嗰時嘅心情，再諗下，咁平點解你都唔買？

24. 不過睇到呢度，聰明嘅你，應該諗到一個問題。

25. 首先，好多人係升咗就興奮，跌咗就驚。呢啲就死症，不能完全克服，但要明白有呢種問題。而最好嘅克服方法就係定期買，有錢就買，唔睇股價買。

Momentum vs mean reversion，邊樣真？

26. 另外，之所以升咗就追，跌咗就驚，唔多唔少因為好多人以為係momentum，升開一路升，跌開繼續跌。咁呢個，就真係好睇你睇幾耐。幾日，可能momentum。但你睇長少少嘅，我以前都貼過，多數係mean reversion　—指數大跌後，下年多數好。例子？今年咪係！背後亦都有原因，咪就因為估值。跌又過籠，升又過蘢。你總唔會見到美股升到幾百倍市盈率，或者跌到兩倍市盈率。

27. 但當然，仲有一個更深層嘅理由，你夠聰明一定諗到。

但，我點估到佢啲盈利會反彈？答案：係估唔到的。估到就根本唔會跌

28. 就係：大佬，我當時點知佢之後兩季盈利反彈呀！

29. 的確如此，而家我事後驗屍，你就見到舊年第三季盈利見底。但當時，你問我，埃汾你點知？答案係，唔知！

30. 哲學少少諗，必定係咁嘅。如果你一早知盈利會反彈，咁根本個股價就唔會跌！正係好多人都唔肯定，甚至以為盈利一定唔會升返，先會冇人買，先會咁平。

31. 然後你先有機會買—記住啦，多數人，多數都係錯。仲有，投資嘅嘢，你啱係冇用嘅。人地錯，你啱，而佢地之後改正，你就有錢搵啦。

32. Successful investing is having everyone agree with you……….. later. – 活學活用呀

「如果盈利一路跌，幾平都唔買」「如果盈利不停升，幾貴都買」—如果。

33. 甚至再悲觀啲嘅，我都識教你講。個純利高位腰斬咗一半嘛，嗰時新聞都係咁寫。原本高位103億，最新得返44億。「嘩，之後再一半咪得返20億，得返10億，到時10倍市盈率又變返40倍」

34. 的確如此 – 如果一路不停減半的話

35. 正如另一個方向睇，有啲人將Nvidia嘅收入升幅，不停咁推上去。今季70億，下季110億，咁樣一季一季加上去，好快上月球。但你明知係唔會嘅。

36. 但的確，當時點會知道Facebook盈利嗰一季就見底呢？係唔知的！

37. 亦都根本係，永遠唔會知。如果真係知嘅，嗰兩日就反映晒了。股市係咁運作的。例如Facebook如果好似Nvidia咁，畀定個下一季嘅指引你，咁就有數計，有數計就兩日升晒上去了。

38. 至於點樣判斷Facebook當時係會一沉不起，定係會反彈，就另一門學問（留意我講收入盈利，唔係股價先，股價仲難估，雖然收入盈利彈返，股價多數跟住）—或者話，直頭係藝術。不能言傳，只能意會。

不過事後諗，人地幾十億用戶，收入點會真係咁快玩完？

39. 不過至少事後客觀地睇，真係咁令人意外咩？Facebook嘅用家數字，你一路睇到。係飽和甚至有啲跌（但你計埋IG Whatsapp未？），但肯定唔係一季跌幾成。有咁嘅用戶，其實啲廣告收入，好難真係倒水咁跌吧？（相反，啲發夢股就另一回事）

最後，可以睇埋price to sales

40. 呢度應該去到最後一樣嘢。有人留意到，我啲Excel Model，比較少美股，多數係港股。原因首先係美股啲業績比較複雜，唔係好user friendly．公司自己出嘅就好啲，但又會好多one off item

41. 所以，雖然盈利先係一切，有收入冇盈利都係把托。但話說回頭，你見正係因為咁原因，啲人講美股業績，好多時又講收入又講盈利，甚至講收入多過盈利。因為收入嘅波動真係冇咁大，亦都冇咁多one off嘢。

42. 所以呢，其實你亦可以用Price to sales去睇估值嘅。不過，Price to sales幾多叫平幾多叫貴，更加難估，因為仲涉及你有冇錢賺。例如智能手機市場，蘋果收入market share 一路都唔大，但差不多得佢一間賺晒啲錢，profit market share曾經去到超過100%（點解可以大過100？因為其他人蝕！）

43. 咁睇返Facebook先，286+322+277+289＝1174億收入，而家7200億市值，即係6倍price to sales．低位呢？舊年11月，277+289+279+337＝1182億收入，當時2300億市值。2倍多啲！

44. 蘋果呢？而家29000億市值。收入係948+1172+901+830=3850億，即係7.5倍price to sales．年頭低位呢？19000億市值。901+830+973+1239 = 3943億，即係5倍左右

45. 固然，不同公司不能一齊比較，同一間公司唔同時間，高增長時間同低增長時間，都未必能直接比較，冇得計死數，藝術嚟嘛。不過計完旨在講乜？Facebook單位數市盈率，大家易理解係「平」。但去到price to sales呢？原來等於2倍咁滯，就唔好以為單數位price to sales都係好平

46. 而如果你好夠聰明，「其實price to sales 乘返個net profit margin咪市盈率」

47. 真抱歉，明明話直講冧把，講少啲心法。但都係講足兩篇。下篇就真係冧把了。不過我估呢篇「心法」大家都唔會覺得悶嘅，因為有真實數字，有數計。

最後一句：升嗰時，就過度樂觀。跌嗰時，就過度悲觀。像極了人生

48. 然後你諗返，當時Facebook真係好平。點解當時唔買？實有原因，主要都係驚。但，經過呢個例子，不妨諗下：跌市時，係咪將啲嘢諗得太悲觀？一間幾十億用戶，而冇流失嘅公司，會唔會真係不停輸錢？

49. 一個rule of thumb就係：多數，升嗰時，啲人就太樂觀，以為啲發夢股點有前景，點包閉。但跌嗰時，就過度悲觀，以為啲公司玩完，蘋果冇創意，Facebook已死。

50. 真相，就多數係兩者之間。亦所以，股市升又升過籠，跌又跌過籠。像極了人生。