升晒，仲買唔買得？有乜好買？（三之一）—　如果擺明覺得泡沫呢？都仲買股票？短答案：是的。仲有，記住，買乜，好視乎你本身渣住乜。 (Patreon)

都係講返「買唔買得」「幾時買」，以及「買乜」三大問題

幾時唔買得？近乎冇

咁如果擺明覺得泡沫呢？都仲買股票？短答案：是的。

3000點升到6000點，然後回三成。你話泡沫，咁你係咪股神？

Feel到泡沫時，應該點做？唔買？No。反手沽空？No

大原則兩個。一，多數人係買得太少股票。二，好睇你本身買咗乜。

點解同樣睇文，有啲人贏錢，有啲人輸錢？

點解同一隻嘢，有人贏錢，有人輸錢？

1. 快手講多次，星期二晚8點有日本股講座直播，免費，線上，唔使報名。上Tasty money 睇就得。應該有足本重播嘅。

2. 另外，想買日本水嘅，寶盛Boom戶口應該OK（而佢地亦都有港股美股），因為真係唔係太多券商可以直接買日本股，而IB個介面係幾難用嘅。可以試下Boom，會送你500蚊現金，入你戶口，理論上你開完可以拎走（不過要入1萬蚊先開到戶）。開戶link在呢度

都係講返「買唔買得」「幾時買」，以及「買乜」三大問題

3. 正題。雖然「之前叫你買又唔買？」或者「之前你又唔買？」係終極大問題，不過都真係講得有啲多。似乎講啲「心法」嘢有啲多。

4. 咁都應該轉一轉，又同你講返你最關心嘅問題：仲買唔買得？幾時買？買乜好？

5. 頭兩個問題，資深讀者應該知道，問嚟冇乜意義。買唔買得？梗買得。幾時都買得。咁幾時買？答埋啦，幾時都買得。

幾時唔買得？近乎冇

6. 可能有啲會認真問，咁有冇時間係我會叫人唔好買股票嘅呢？答案係，近乎冇，我亦都冇任何時間會唔買股票。

7. 我認為，有錢你就應該買股票。所以咩時間唔應該買？冇錢嗰時。聽落好廢，until你見到有啲人係冇錢都要做孖展去買股票，咁就唔好。

8. 呢度亦可以講返之前「借錢投資」嘅少少follow up。非常搞笑，住嘅樓，你地會講「負擔比率」。咁買股票，你又唔睇呢樣嘢？直白啲講，你兩三萬蚊人工，可能身家十萬八萬，但走去坐100萬貨（孖展嘛），當然係大大超過你負擔能力，輸錢就固然甘，但贏錢都唔使太開心，因為輸錢都因贏錢起。

9. 不過話說回頭，我的讀者好富貴，有啲十幾萬人工，甚至千萬身家，但買得一百萬股票嘅，就係太少了。

咁如果擺明覺得泡沫呢？都仲買股票？短答案：是的。

10. 然後有人問，咁如果泡沫嗰時呢？擺明好貴都仲買？當然之前啲meme股發夢股遍地之時，係sense到「泡沫」嘅，我都有寫。

11. 問題係，我就唔會因為「覺得泡沫」而唔買，事實都係照買。點解？因為首先，「萬一我錯呢？」。大把天才2009年已經話泡沫，講到而家。唔講咁遠嘅，疫情股災後，2020年4月嗰轉反彈，N咁多人話「脫離實體經濟」，結果美股創埋新高，升穿埋疫情前嘅位。就算你話之後回返都好，好多嘢仲係遠超過當疫情前嘅位—蘋果微軟都歷史新高啦。正如今次，一樣大把人話「熊市反彈」，你係應該忽略呢啲人。

3000點升到6000點，然後回三成。你話泡沫，咁你係咪股神？

12. 亦即係，以前都講過嘅問題。可能3000點你覺得泡沫，睇死佢跌。然後佢升到6000點，跌3成，你覺得自己好叻，「都話會股災」。問題係跌完三成仲有4200點。你覺得自己好叻，其實有幾叻？你笑嗰個傻仔，3000點坐上嚟，「高位又唔走」，「白白輸三成都唔止蝕」　—　但佢身家都係多過你四成！

13. 而其實，呢個咪係美股之前發生嘅事！

14. 況且，好多時，「擺明係泡沫」，都係事後先知嘅。好多「擺明」嘅事，都係咁。人係好識得選擇性遺忘的動物。

15. 天地良心，至少事後，你係應該知道乜嘢叫泡沫嘅，係咪？嗰時一街股神，大把人鬧返我轉頭覺得我唔識嘢，回塘，保守（笑死未？我100%買晒都有人話我太保守）。照計至少事後睇，你應該係知道咩叫「癲癲地」—雖然身在其中未必知，同埋亦估唔到個頂。估頂亦都會出現上面講嘅3000點升多一倍然後跌三成仲係升咗四成嘅問題。

16. 不過想強調，至少事後，應該feel到。事後你都feel唔到嘅，咁好危險，你練多啲基本功先吧，你連最基本水平都未夠，好危險。

Feel到泡沫時，應該點做？唔買？No。反手沽空？No

17. 咁真係啲嘢好貴時，你都feel到時，應該點做？唔買？唔會咯。反手造淡？痴線咩。嗰時我叫你嘅做法，就會同而家差不多。

18. 咁總有啲嘢，係會落後啲嘅。總有啲嘢，係冇咁貴嘅。亦都總有啲嘢，係防守性重啲嘅。固然落後嘅未必一定追到，平嘅未必一定之後唔跌。但即係，至少避免咗太高追啲發夢股嘅風險。

19. 況且，之後你會睇到，一隻兩隻未必準，但一般嚟講，平啲估值嘅嘢，係真係跌少啲嘅。即時畀個例子你：你見同係科技股，蘋果微軟，都跌得少過Nvidia Netflix啦（當然會有例外，我知，唔使同我拗。講咗十萬次，唔係自然科學實驗）

大原則兩個。一，多數人係買得太少股票。二，好睇你本身買咗乜。

20. 仲有，再講落去之前，都要拎返呢張powerpoint出嚟講。5月6號嗰次講座。你當然係留意下半張，但重點係上半張。

21. 大原則兩個。第一個好簡單，我目測多數人，都係買得太少股票，而唔係買得太多。所以，如果十五十六，唔知買唔買好，就買吧。唔難理解

22. 但第二呢個我要再四再五強調，亦係好多人嘅盲點。難聽啲講句，佢地去怪人，怪我。但最應該怪係自己。

23. 一切嘅嘢，都好視乎你本身買咗乜（當然仲有你有幾錢人工，有幾多頭家要養，老豆有冇兩層樓留畀你之類）。

24. 因為好多人，問嘢就係：「我買呢隻呢隻，得唔得」—　我鬼知你其他嘢買乜？你100萬身家90萬現金10萬港股嘅，你問我QQQ買唔買得，梗係買得。但你10萬身家做咗幾倍槓杆全部買Big Tech問我好唔好加埋QQQ，就梗係唔好。見到分別冇？

25. 講英文型啲，就係應該total portfolio咁去睇。你啲決定，唔係單一嘅。甚至我都未講，你幾時買，買幾多之類。

點解同樣睇文，有啲人贏錢，有啲人輸錢？

26. 所以你真係見到，同樣係我我嘅文，點解有啲人要不停鬧，又話「我聽你講買呢隻輸錢」，但有啲人就會感恩，聽我講買邊隻嘢贏錢。

點解同一隻嘢，有人贏錢，有人輸錢？

27. 甚至乎，同一隻嘢，都有啲人輸錢，有啲人贏錢。亦都好睇你咩時間去「鬧」或「讚」我。好簡單，Nvidia，我當200蚊時叫你買（假設啫，事實我100蚊買咗）。然後升到330，跌到100蚊，咁你梗係鬧啦，仆街死財演啦，累我摸頂買330又唔叫我走。但如果你係坐到今日嘅，你嘅講法又唔同啦。咁簡單之嘛。

28. 不過你要我總結一句：講到尾，贏輸嘅責任，只有一個人，就係你自己。你贏錢，最後最叻嘅都係你。你輸錢，最大問題當然都係你。照計呢啲應該小學雞都明。咁大個人，係應該為自己嘅決定負少少責任嘅。我有冇拎支槍要你買Paypal呢？冇嘛。況且，「我自己都買埋」。仲有，「其他你又唔講？」

29. 明明話唔講咁多心法，又講足一篇。但放心，下一篇即時出埋，有埋冧把。有埋講我而家渣住乜。點解？你睇多次25段咯，total portfolio。到我講而家「我會買乜」，呢個決定都係同我已經買咗乜有關嘛。你唔知我買咗乜，又點去理解？人地飲杯水就去做地盤，但之前人地食咗好多嘢嘛。你又坐低飲杯水，然後去到地盤冇力，就話人點你呃你。