投資心魔一堆（一篇完）：標指納指一年新高，但，點解之前又唔買？買完股票，輸錢，點算？點解唔等到低位先買？低位買100萬貨，同低位坐100萬貨，到今日嘅回報係一樣嘅。但點解啲人覺得唔同？ (Patreon)

標指連升5個星期，納指直頭連升8個星期。仲有人要講「熊市反彈」

呢一段嘅錢，非常易賺。但你有冇買？

「我跟你買，輸錢，點算？」

你想捉到低位買高位沽嘅，祝你好運。但就算捉到，你買得幾多？

唔該，唔好咁貪心。你捉到幾年高低位嘅，就勁過畢菲特了

你可以睇下，Nvidia賺10倍嗰個，有冇人叫佢「低位」買？

一個盲點：低位買Nvda執300%。但難道我坐住，就唔係賺300%？

我唔使「買落去」，我坐住過，一樣分享到個升浪回報

「咁早買咪蝕晒咯」

「唔買都唔好沽」

你可能偶然撈嘅時機好過我，但銀碼細好多，咁又有何用？

又再講返啲舊嘢

舊年第四季唔敢買都正常。但今年呢？等乜？

時機唔係唔重要，係十分重要！但太難捉到，所以不如唔好去捉

1. 呢篇可能再講少少心法思考嘢，講下啲常見嘅心魔。之後寫返多啲個股，同埋快手幫個第一季回顧埋尾（希望）。「然後就可以寫第二季回顧」。但，其實頭兩季分別唔係太大。

2. 亦係可以睇返我在經濟一周寫嘅文，attach咗畀你。普遍都寫得相當垃圾（冇稿費係咁上下），不過呢篇冇咁垃圾。除咗答咗你地最想問嘅「我未買咁而家買乜好」外，當然仲有係不停要強調，值1億嘅問題：

3. 「之前你又唔買？」

標指連升5個星期，納指直頭連升8個星期。仲有人要講「熊市反彈」

4. 市況非常好，標指連升5個星期，納指直頭連升8個星期。仲有人要講「熊市反彈」，非常搞笑。但升市正係呢一段，啲錢最好賺，因為大把人唔信，啲嘢亦唔係太過貴　—　到升晒，個個飛入去時，往往就水尾（雖然好難事前判斷）

呢一段嘅錢，非常易賺。但你有冇買？

5. 但請你反省，你買咗未？冇嘅，點解之前唔買？任你買喎。唔去諗清楚自己嘅弱點（亦係人性嘅弱點，唔使自責），你只會不停咁輸錢。

6. 差不多半年，而其實同第一季嘅情況差不多。納指同標指，兩者都升到超過1年高位。歐洲股近排差啲，但今年都雙位數升幅，日本就更唔使講（雖然日圓跌）。連港股都有啲起色。

7. 納指100仲強，QQQ今年升40%。唔止，根本你買標普指數，低位都升返27%，今年升16%。

8. 然後記唔記得，之前公海仲大把人懶醒，同我拗乜鬼「炒減息落空」「熊市反彈」。但你見我使唔使同佢拗？

9. 你知道，去到呢個位，我一定同你講一句嘢：之前叫你買又唔買？

10. 我並非賴皮，而係十分認真地叫你檢討（可能下次講座用呢句嘢做題）。你可以諗下，點解之前你冇買。如果冇錢嘅，當然冇計，唔通去偷去搶？唯有打好份工搵多啲錢。但有錢，而冇買嘅，你就可以諗下點解。否則你只會不停犯錯。你唔使答我，唔使話畀人知。但問下自己。咁然後諗下，點解會錯失咗。

「我跟你買，輸錢，點算？」

11. 而相當好笑嘅係，有啲讀者甚至會抱怨，喂，我跟你買邊隻邊隻輸咗錢喎。咁當然係有咁嘅事，有啲可能我冇買，就貴客自理。但有啲我都有買，咁可能你買得貴我買得平，亦可能我都會輸錢。

12. 但，輸錢有何問題？唔輸得錢的？唔輸得錢嘅，請你唔好買股票了。照舊，放晒啲錢入保險箱吧。我其他贏得多就夠啦，咁你又有冇買？

13. 當然，你話成個倉都輸錢有冇？都有見過，但好短暫（因為我有啲係好平買嘅）。固然冇人想輸錢，但呢個世界唔會理你「想唔想」—寫過了，承受風險根本就係股市回報嘅代價。正係佢有咁嘅波幅，先會有高啲回報。呢啲嘢在risk and return寫過，你有冇睇？

14. 不過，我係明白嘅。因為有啲人嘅心態，都係有問題的。佢地想像嘅投資係：應該在個低位度，我叫你「好啦大家全部瞓身落去啦」。然後在個高位度「好啦大家走頭」。

你想捉到低位買高位沽嘅，祝你好運。但就算捉到，你買得幾多？

15. 我想講嘅係，如果你有咁嘅期望，相信都係賺唔到大錢嘅。好簡單，根本不可能，做到嘅都只係運氣。唔好講個股，普通指數，一年高低位，平均都四五成。即係你年年捉到高低位嘅，根本好快勁過畢菲特。但你有冇見過有咁嘅人？

16. 況且，大家都知道個問題啦，舊年10月嗰啲時間，叫你都唔敢買啦。你可睇返，舊年10月，我會唔會叫你唔好買？有冇叫你沽晒佢？肯定冇。你嚟PM問我買唔買得，我一定話買得的。

唔該，唔好咁貪心。你捉到幾年高低位嘅，就勁過畢菲特了

17. 問題係啲人會覺得，「喂你都唔係最低位叫人買」，甚至係「喂你成日都叫人買架啦」，所以就覺得「唔準」。至少肯定同佢地想像中嘅「低位叫你買高位叫你沽」好唔同（你做到嘅，話我知，我訂你Patreon）

你可以睇下，Nvidia賺10倍嗰個，有冇人叫佢「低位」買？

18. 個盲點在邊？個盲點係，你根本唔使做到呢樣嘢。之前Nvidia 10倍嘅讀者（而家11倍了），佢使唔使靠呢樣嘢？係唔使嘅。我都有唔少賺幾倍嘅股票，使唔使有人教我「拿呢個位你買啦」，亦係唔使嘅！

19. 好多人會覺得，你要某個位叫咗人買，然後佢有跟，咁佢先係賺到錢　—呢度，係忽視咗一個好大嘅盲點！我本身都100% invested架嘛！

一個盲點：低位買Nvda執300%。但難道我坐住，就唔係賺300%？

20. 即係點？即係又係一個好奇怪嘅心理（留意，唔係你笨唔係你廢，呢個係人性，所以要克服）：即係佢會覺得，我拎10萬，舊年低位買Nvidia，而家升返300%，就賺30萬　—　但，難道我舊年低位坐咗10萬Nvidia，我而家就唔係賺30萬嗎？兩者有乜分別？但一般人總係覺得，好似低位買落去，舊錢多啲咁。

我唔使「買落去」，我坐住過，一樣分享到個升浪回報

21. 另一個角度睇，舊年低位到而家，我嘅美股倉，就係彈返三四成啦（好多咩？其實同指數差不多！）。難道呢啲錢就臭嘅？我係冇乜點特別買個股，因為一早100% 買晒落去啦嘛。

22. 呢個三四成回報，同你舊年低位買落去，係一樣的。但，就會有人覺得，我冇叫你買　—　我坐住晒，咪就係買咗咯！

23. 都係寫得有啲亂，但希望大家明白我想表達乜。美股低位升三成，咁我美股倉就係多咗三成。有幾難明呢？我唔使「買」先會升三成的。

用上面Nvidia嘅例子，即係人地唔使舊年300蚊跌到100蚊時買，因為佢係40蚊買的嘛，然後一樣坐住啲貨食到100蚊上400蚊個浪。

「咁早買咪蝕晒咯」

24. 當然會有人質疑，咁但，埃汾你太早買晒，你啲Facebook咪蝕價咯。係，你低位計係賺200%。但，埃汾唔係低位買嘛，咁當然我隻Facebook同我成本比較，冇賺200%。

25. 點解唔等到低位先買呢？你話呢？如何事先知嗰個係低位？

26. 況且，以前都寫過好多次，等待，都係有成本嘅。你等等等等到世紀疫情一個月跌三成都好，但啲價都係不如你早幾年一早買落。

27. 舊文寫過，好多人不停想去等，要等到股災跌三成先買　—　但個盲點係，隻嘢可能係升咗幾倍先跌三成。你以為買平咗，其實係買貴咗呀。仲未計可能跌三成你又唔敢買喎

「唔買都唔好沽」

28. 當然，仲有最重要嘅一句：唔買都唔好沽。你見幾次跌市我都係同你講呢句，都真係差不多次次靈驗（可能港股唔係啦下）。你可以諗下，你自己走去沽咗嗰啲，錯失咗幾多錢。我當你早早買，平手走都好，但你即係錯失咗Facebook之後嘅200%升幅　—　其實，兩個決定比較下（走同唔走），你咪又係少咗200%回報　—　當然更大鑊嘅係，沽咗，往往你係會唔敢買返，直到佢升咗好多先再買，然後好易摸頂買貴貨

29. 順帶一提，如果呢個情況，當初沽咗Facebook，買咗其他嘢，情況就會好好多。所以你真係要「調整組俉」都好，頂多係換馬，一隻換去另一隻，一個市場換去另一個市場。100% invested，應該冇乜錯

你可能偶然撈嘅時機好過我，但銀碼細好多，咁又有何用？

30. 再講一次，我低位坐住100萬貨，而家升四成。同我低位拎100萬落去，而家回報四成，金錢回報係一樣嘅。況且，幾時都係嗰個問題：風聲鶴淚嗰時，你係咪敢100%買晒落去？定只係拎少少出嚟撈？但我就可以100%買晒落去。到頭嚟，計百份比回報，你可能高過我。但計銀碼，邊個回報高啲？

又再講返啲舊嘢

31. 當然了，好煩氣都講，永遠最好買股票嘅時機，都係事後先望到。當時你真係覺得絶對唔應該買的，係咪？

舊年第四季唔敢買都正常。但今年呢？等乜？

32. 不過，我想補充嘅係：舊年10月11月唔敢買，但今年，任你買啦。點解都仲係冇買？

33. 我可以話你知，「冇買」，先係好多人最大嘅問題。而家啲嘢隻隻低位彈成個開甚至兩個開，你先諗住飛入去買　—　唔係唔得，但個margin of safety又低好多咯。等咩？又唔知等到幾時喎。甚至你等佢跌兩成，但可能佢係升一倍先跌兩成，根本你買得仲貴咗。

34. 當然亦有可能係，你買完，隻嘢即時跌兩成（有幾出奇？），然後又嚟問我：「我聽你講話買得，而家跌咗兩成，點好？」　—　見到個問題在邊未？

35. 所以，都真係唔係玩膠。「之前你又唔買？」，都真係所有人應該反思嘅問題，包括我。

時機唔係唔重要，係十分重要！但太難捉到，所以不如唔好去捉

36. 用一句成日講嘅嘢sum up：時機唔係唔重要，係十分重要！但太難捉到，所以不如唔好去捉。我唔使做到best timing，只要唔好係worse timing就得。

37. 仲有，最好就壞消息買，但真係好難。所以，次好就係冇乜消息時買。最差就係乜？就係全部好消息時買。實務上呢？無論好壞消息定冇消息，照買。有錢就買。

38. 我啲幾倍股，全部係咁碌出嚟嘅。你話唔得？咁你有冇贏到幾倍先？（當然，我有啲股票係輸錢嘅，輸好多嘅都有。所以拉勻就唔係幾年幾倍回報啦）

39. 你見我提議嘅做法，都真係唔係咁複雜。有錢，就盡量拎去買股票。時機分散，地區分散，行業分散。唔知買乜？咪買指數。最緊要買得夠大。咁變相你買指數都夠，就唔會咁易出現啲一年drawdown 八成嘅情況

40. 希望大家都係檢討下，「點解之前又唔買」。否則真係永無止境，你只會在啲嘢升咗好多之後先嚟問我點算。點解之前平嗰時唔買？因為驚。但唔覺得搞笑？升咗你反而唔驚？

41. 如果你有做足嘅，照計過去大半年嘅回報，應該相當不錯—除非你全部晒晒一兩隻嘢，或者全部買晒港股啦。