［加多兩次息，又如何？］日本股開戶優惠，美國經濟數據，聯儲局議息。點解估啱估錯根本唔係最重要？ (Patreon)

下星期二晚日本股講座，免費，網上直播，唔使報名

Boom開戶買日本股，送500蚊現金。

美國通脹回落到4%，已經減半。但股市早早升晒，唔使等而家

議息後放鷹喎！加多兩次息。幾時加？

不過，估錯晒又如何？對你投資嘅影響係乜？可能冇乜

你啱定錯唔重要，甚至啱幾多次都唔重要—最重要係贏幾多

跟風輸錢係人生必經，所以早早投資就最好

下星期二晚日本股講座，免費，網上直播，唔使報名

1. 呼，首先講返，下星期二有日本股講座。照舊免費，不過只限網上直播，所以唔使報名，到時去睇就得。6月20日，夜晚8點在小炒王梁心欣Tasty Money直播．我會上對佢地度。

2. 我在Facebook Page都有講，今次同Boom寶盛合作（日資公司喎），想睇佢地官方介紹今次講座就呢度

Boom開戶買日本股，送500蚊現金。

3. 另外，亦都做緊開戶優惠。經我嘅referral，可以拎500蚊現金。現金呀下！我唔100%肯定，但應該係你開戶後，就會存入你個戶口。咁似乎理論上你係可以拎返出嚟嘅。不過你開戶都要入1萬蚊港紙先開到嘅，但理論上，開完戶，月尾你應該可以拎晒啲錢走。

4. 但話說回頭，香港可以直接Trade日本股嘅券商，極之咁少。大家知我用開IB，不過IB個介面的確係比較…… 難用嘅。所以我估如果你想買日本股，可以開返個Boom

5. 開戶link在呢度，留意佢已經幫你填埋個referral code．咁一貫作風，我自己都開一個。但仲未開得成，開掂咗再同你分享。開戶過程可以全網上搞掂，應該唔會太複雜。填form可以用電腦，交文件（身份證副本之類）就要用返佢地手機app．另外，你要轉1萬蚊港紙入去先可以開通個戶口（但似乎冇話唔可以轉返出嚟）。

6. 另外提一提你，「相信大家風險承受能力都好高，又好有經驗」。因為如果你開戶時填冇乜經驗又承受唔到風險，就會有啲嘢買唔到的，相當麻煩。

7. 到我開得成再同大家分享。不過要講一句，之前我都有用Boom網站啲數據（主要係新股），做得幾好的。望落個app介面都好用

8. 開戶link呢度

美國通脹回落到4%，已經減半。但股市早早升晒，唔使等而家

9. 快手講返，星期二晚，美國出咗通脹數據，相當不錯。Headline inflation 回落到4%，跌到2021年4月以嚟嘅低位。上次係4.9%，街估4.1%。唔止回落得好快，仲要係低過預期。按月嚟睇，CPI就升0.1%，上次升0.4%，街估升0.2%，出嘅數字亦係低過預期。

10. 核心CPI依然都係幾頑固（所以可能今年都未見減息），升5.3%，上次係5.5%，市場預期都係5.3%。

11. 出咗通脹數字後，美股固然升，但唔係好多。不過，一早升晒啦。我諗，最明顯嘅啟示，大家可以講一次：股市梗係炒預期。記唔記得舊年，仲有好多人話通脹仲係好高，有排都未減息？但，過去大半年，美股都極之強勢。呢段就係最易賺錢嘅時期（其實最易係今年，舊年最尾兩個月你係會驚嘅）。

12. 到你真係「確認」通脹回落（而家headline figure同高峰比係一半），就乜都升晒了—唔敢話冇得再升，亦唔係話而家唔應該買。但你見到，頭一浸，就永遠係啲人懷疑之下升。萬試萬靈。所以，真係唔使點解出面啲「多數人」講乜。

議息後放鷹喎！加多兩次息。幾時加？

13. 然後，接住落，係星期三晚嘅聯儲局議息。唔加息就人人預咗，不過會出埋個局方嘅經濟預測，同埋大家睇會後講嘢。我在Facebook post 都有快手講咗。

14. 份經濟預測在呢度，不過你睇上面呢一個圖都已經夠

15. 冇心機睇嘅，好快話你知，鷹鷹地，今年再加多兩次息。留意之前估5月已經停。

16. 睇詳細，都好快講完，最重要都係睇返同3月時嘅預測比，有乜變動。首先，局方對今年經濟增長預測上調咗，說好了嘅衰退一路都冇出現，經濟相當不錯。但留意之後兩年嘅預測就下調咗少少，亦有可能因為今年基數高咗。

17. 失業率方面呢，今年嘅預測固然調低咗。但連下年同後年嘅失業率預測，都再調低咗。千萬唔好去鑽牛角尖，走去問或者走去諗，「點解未來兩年下調咗經濟增長預測，但失業率預測都調低」「經濟差唔係應該失業率升咩」—　數據幾時都係會打交的，唔係好似你理論實驗咁，全部嘢都指向同一個方向。

18. 況且，失業率同經濟，都唔係同步。唔好咁牛角尖，唔好咁直線思維。否則呢，「經濟差企業盈利受壓人人冇錢買股票股市一定跌」「經濟好會加息影響估值股市一定又跌」。真係唔好笑，有啲人啲思維就係咁上下。

19. 戲肉，通脹預測。其實冇乜大變，今年headline PCE（聯儲局唔係睇CPI）預測，仲要調低咗！之後兩年不變。睇核心PCE呢？今年預測調高少少，之後兩年不變。

20. 即係點？即係暫時革命尚未成功，呢一刻嘅核心PCE仍未令聯儲局放心。所以，就繼續落下藥。「但之後兩年就會搞掂架啦，同之前劇本一樣」

21. 變相你睇到最後嘅息口預期，好明顯了。留意，而家係5-5.25，中間位5.125，即係5.1厘。呢個亦係局方3月時指引嘅年底水平，所以大家都估5月已經加完。

22. 但當然，移動龍門啦，而家話今年會加到5.6厘喎（亦即係5.5-5.75），即係加多兩次。果然好似加極都未到頂。不過股市冇事喎

23. 好啦，呢兩次加息，幾時加？又係睇CME嘅時間。

24. 見到，好多人估7月加多次（5月先有人估7月減息！話咁快啲預期轉晒，爭好遠）。

25. 不過，9月就似乎估停加息了。而家5-5.25嘛，7月加多次咪5.25-5.5，咁你見9月冇乜人估再加上去了

26. 咁又話今年加多兩次？剩低一次呢？正路嘅答法，就話你知，年尾再加多次。即係5月加，6月停，7月加，9月停，之後又加咁。有晒節奏。

27. 但認真地答你：實際上，就係到時先算啦。到9月時又出過份經濟預測啦！剩低嗰次仲加唔加，都有啲疑問　—　但亦有可能最後又唔止兩次。3個月嘅通脹數字，就影響加息路徑。

不過，估錯晒又如何？對你投資嘅影響係乜？可能冇乜

28. 但最後我想講嘅係：呢啲嘢你需要知，需要學　—　但其實對你判斷市場走勢，未必好有用。

29. 昨晚未睇議息結果，我就瞓著咗。語音版助手Whatsapp我話「股災了」，媒體話議息後道指跌400點—其實只係1%。仲要收市已經收復唔少，納指好似倒升添。明明話加多兩次息，但科技股就係唔散，仲要升（好似星期四晚仲升緊），好難估。

30. 呢度去到最尾一樣嘢。好多人，不停咁執著於「啱」「錯」。甚至用呢啲嘢去判斷其他人講嘅嘢「準唔準」。

31. 我想講嘅係：唔使太過認真。只有一樣嘢先重要：就係結果。你次次啱，但贏唔到錢，咁有乜用？又係咪真係「啱」？

你啱定錯唔重要，甚至啱幾多次都唔重要—最重要係贏幾多

32. 個重點，唔係你啱定唔啱（況且都可以搬龍門），甚至唔係你啱嘅時間多唔多　—　用賭波嘅比喻，估100場波，你中六七成，完全唔難丫。例如過去廿年歐聯決賽，七八成都係熱門嗰隊贏。不過，問題嚟啦喎，你走去場場買，即使你多數情況都估啱（例如七八成）—都唔等於你會賺錢！

33. 亦即係索羅斯嘅名句：重點唔係你啱嘅次數多過錯，而係啱嗰時你贏幾多（所以同樣地，一隻10倍股可以頂好多隻輸錢，可惜呢樣嘢講咗幾萬次啲人都唔明，因為佢地都未見過10倍股）

34. 唔講咁虛，講實例。舊年年頭甚至年中，我有冇估到聯儲局下半年會夠膽一次加0.75？多數人都估唔到，我當然都估唔到，你問我我都答你唔會。

35. 同樣地，5月多數人都估係最後一次加息，我都估係。但結果，又錯。

36. 最後，我有冇預到聯儲局會6月停，但之後又再加？都係冇！估唔到，好似以前冇試過

37. 我估錯晒喎，但又如何？但我照樣食晒呢個升浪。相反，你「估啱」，可能就覺得會重手加息，股市冇運行，科技股死硬。

38. 咁你話，到底估啱估錯，係咪十分重要嘅嘢？甚至乎，你諗真啲，咩叫「估啱」？估中但贏唔到錢，仲係咪叫估啱？你以為一路加息股市就冇運行。咁你係估中一路加息，但結果股市照升。咁你算唔算啱？

39. 記住，唯一重要嘅，就係睇結果。但當然，要睇比較長期嘅結果。短期嘅，往往只係運氣，或者夠喪就得。2020年疫後嗰期，你借埋錢做槓杆買發夢股，一定賺得多架　—　但可唔可以因為咁就覺得嗰啲小朋友好叻？（可惜有啲人係真係咁當）

40. 所以睇結果，就睇長期，路遙先知馬力。特別係，跌市時唔會點輸大錢，就係好嘅往績。例如我嘅情況，就算係有交代。當然你可以話，你放晒曲奇餅罐咪唔會輸錢　—　但我係有OK嘅回報嘛。

跟風輸錢係人生必經，所以早早投資就最好

41. 最後贈多句，跟紅頂白，係人性，好難避免。啲人忽然短期賺好多錢，多數你都會覺得佢叻，你又瞓埋一份。呢啲東西雖然我成日批評恥笑，但明顯我都做過　—　呢啲就係成長必有嘅階段啦！

42. 所以講真的，應該早早開始投資。早啲交過學費，你就會明。後生時輸晒啲錢，都仲有得翻身。況且後生時，有得畀你蝕嘅錢亦唔會多（除非你借錢啦下）。受過啲教訓，自然就會成長。