有關借錢投資（四）—真係要借，借孖展借到幾多先安全。借孖展貴，Mox就要個個月還，咁有冇兩全其美？有！借日圓孖展，Carry Trade。咁但，借日圓孖展有匯率風險。咁有冇三全其美？都有！買日本股。仲有終極問題：「既然股市長期回報8-10%，咁係咪長期借5厘息都有著數冇得輸？」 (Patreon)

之前只講券商斬你倉，都未計你自己驚到自斬

而家孖展息貴，唔抵做。但真係要做嘅，留意下做幾大。

升嘅，梗係借得越盡越好。但be practical，借到幾多先安全？

大原則：唔好搞到要補孖展或被人斬。咁幫你計下，咩水平先安全

借Mox做定期唔得，因為個個月要還。咁如果借孖展做定期呢？你話呢？

平息就要個個月還，孖展唔使個個月還但就貴息。咁有冇兩全其美？有！

Carry Trade：做日圓孖展，咪又低息，又唔使個個月還。

不過Yen carry trade有乜風險？你話呢？如果咁著數，大行瞓身做啦

順便講埋，舊年都有人問carry trade拆倉風險。但，邊擔心得更多？

狼來了：舊年聖誕都估拆倉，啲人估日圓大升，日本股美股死。結果？

有冇又唔使個個月還，又低息，又唔怕匯率風險？有！就係借日圓買日本股！

雞同蛋：「我都冇日本股，點借日圓孖展？」

你話你估匯率好準？日圓一定冇得升？扯，咁你使鬼買股票咩。

最後思考：股市長期回報有8-10%，咁其實我長期借5厘，係咪都著數？

1. 下篇先講美國通脹，或者議息，或者美股，呢篇講埋個「借錢投資」先，應該算係完，雖然最尾嗰條問題可能都要開半篇，甚至一篇講。

2. 第一篇講咗Mox嗰個特平offer，開定冇壞。用呢條link．https://mox.com/zh/invite?code=29CGWB。我既開戶碼：29CGWB。第二篇講咗做孖展會畀人斬嘅問題（但你借Mox不等於做孖展），第三篇講咗啲借Mox「套息大法」嘅問題，你要個個月還嘛。然後到上一篇，講咗半篇有關券商孖展，101嘢。

之前只講券商斬你倉，都未計你自己驚到自斬

3. 留意，上篇我只係講券商幫你斬。至於你自己嘅心理狀態我都未計，呢啲在第二篇討論過，自己搵返睇。由「而家斬就仲有少少剩」去到「再跌就負資產直頭要爭佢錢」之間，好多人都會「止蝕」，包括當年嘅我　—　然後就見到個市好快反彈返。照計我都已經好忍得痛，我都頂唔住，我建議你唔好太高估自己嘅忍痛能力

而家孖展息貴，唔抵做。但真係要做嘅，留意下做幾大。

4. 順手講埋，首先而家孖展息唔平（聯儲局加咗咁多次息），所以我不認為你應該去做。不過真係做嘅，你都最好留意下個水平（拿，呢啲就「風險管理」啦！）

5. 即係點？即係，你去留意下，借幾多。當然好廢地講，升嘅，你梗係借得越盡越好。但，神聖嘅五個字，「如果你錯呢？」。

升嘅，梗係借得越盡越好。但be practical，借到幾多先安全？

6. 個宗旨，你應該盡量避免畀人斬。亦即係，啲嘢跌落嚟，你都應該唔使畀人斬。問題嚟啦喎，「咁我點知啲嘢會跌幾多」?

7. 答案，呢啲就可以睇歷史。你大約用返三十年一遇吧。

大原則：唔好搞到要補孖展或被人斬。咁幫你計下，咩水平先安全

8. 講具體啲，標普指數，都一個月跌亖成啦。所以你理應該預呢種情況會發生，甚至預到有機會跌五成，亦即係你唔好超過呢個水平。

9. 如果個股嘅，更加危險。Nvidia Facebook之類，都可以高位跌七成。亦都所以，你要分散。

10. 不過我可以話你知，2008年後，我都冇畀人追過孖展。實情我唯一做孖展都係舊年在IB，咁我係做得好細嘅，可能七八十萬貨先做廿萬咁。

11. 順手幫你諗埋。之前講過，啲「套息大法」，借2厘Mox拎去做定期或者買領展，係唔work嘅。好簡單，因為你個個月要還

借Mox做定期唔得，因為個個月要還。咁如果借孖展做定期呢？你話呢？

12. 好啦，咁孖展，唔使個個月還喎。拎去做定期又得唔得？買美債呢？

13. 答案：「得，不過會蝕錢」。因為常識都話你知，你嘅孖展，冇乜可能平過銀行定期存款，或者美債。

14. 咁你話，你搵到啲10厘回報嘅嘢，買落去得唔得？得。不過，呢個世界上係冇穩穩陣陣10厘回報嘅。

15. 所以，係咁架啦，世界嘅嘢，邊有兩全其美。平息嘅，就要個個月還。唔使個個月還嘅，就貴息。

平息就要個個月還，孖展唔使個個月還但就貴息。咁有冇兩全其美？有！

16. 不過，有冇啲平息，但又唔使個個月還嘅？

17. 有！

18. 係乜？

19. 就係：借Yen孖展！

Carry Trade：做日圓孖展，咪又低息，又唔使個個月還。

20. 好簡單啫，你睇IB嘅孖展息，日圓孖展，1厘半左右。

21. 咁，就一次個滿足你兩個願望啦：夠低息，而又唔使個個月還！

22. 咁你心諗，仲唔發達？一於借去做定期，「1.5厘成本收4.5厘定期息」，「冇風險鎖佢3厘息」。

23. 咁但不過，照舊，有冇咁美好嘅嘢？銀行做到甩碌，一年先食到1.5厘嘅息差。仲要出糧交租，仲要有壞帳。「點解唔學你咁借1.5厘日圓然後存去同業度？」—　任何你諗啲咩絶世發財好橋時，最好諗下點解其他人冇去做。

24. 事實上，話冇人做咩？亦唔係。大把人做，做咗好多年。Carry Trade 嘛。真係大把人做，大行都會做（但同你估嘅唔同，銀行自己嘅炒賣係好小心嘅，而當然銀行借日圓嘅成本低過你上IB好多）

25. 實情好多人都一早諗到，借平嘅日圓，然後去買澳元甚至阿根廷披索。或者借嚟轉做港紙做定期存款，或者借去買領展，blah blah blah．甚至可能有人以為，「股市一年有8-10%回報，我借1厘日圓，穩陣」

不過Yen carry trade有乜風險？你話呢？如果咁著數，大行瞓身做啦

26. 照計你好易估到問題在邊。首先當然係日圓加息，但呢個未必好致命，反正你可以到時平倉。

27. 真正最致命嘅，當然係「匯率風險」！

28. 當你借日圓去做港紙定期咁話，息就賺到，又唔使個個月還。不過，如果日圓忽然間大升，就麻煩了。因為你還嘅錢會多咗。

29. 固然，之前一兩年，你去做呢啲操作，十分好賺。因為日圓仲要跌，變相你借日圓嘅人，還少咗錢。

30. 不過，呢啲位就真係話你知，「過去不代表將來」。反正都寫過，匯率嘅嘢，好少長期單邊上（但呢度講嘅長期講三五七年啦，甚至十年八年）。

31. 亦唔好低估咗匯率可以輸幾多。首先，既然日圓可以一年跌兩三成，掉轉亦都有機會一年升兩三成。

32. 咁你會話，股票都一年可以升跌兩三成啦。不過，啲人做親呢啲嘢，都係借錢嘛！往往高槓杆。日圓升兩三成，就可以好大件事（實情你見啲人炒外匯，個個都玩槓杆，因為「正股」波幅唔夠大。證據？咪話日圓一年內跌三成已經係N年一遇，但股市一年內跌三成，成日都見啦）

順便講埋，舊年都有人問carry trade拆倉風險。但，邊擔心得更多？

33. 亦都因為啲人個個做槓杆，借到盡，舊年聖誕日本央行忽然疑似轉鷹（將個國債浮動區間拉濶咗），先引起唔少恐慌。驚呢啲Carry Trade全部要unwind，環球金融市場大震云云。

34. 呢度亦都順帶一講，十分重要。嗰時都有讀者問，怕唔怕啲Carry Trade要平倉，震散晒啲嘢？我一如以往嘅答法：唔驚，亦冇得擔心咁多。事實上，你睇分析（例如上面嗰篇），就肯定係「直線思維」　—　日圓息口上升啦，日圓升啦，咁啲carry trade要輸錢，要平倉，就要沽晒啲嘢。沽日股沽美債沽美股，全球股災，玩完。

35. 不過，我從來都唔驚呢啲嘢，亦冇得驚。呢啲都要驚嘅，咁你真係全年都冇一日可以買股票。有通脹驚通脹，冇通脹驚衰退。仲有，即使真係unwind拆倉，又係嗰句，借問聲同啲基本因素有乜關係？冇嘅，根本大跌先係最好嘅買入機會。

36. 而最後結果呢？日本股大跌？冇噃，升到癲。美股大跌？冇噃，升到癲。點解？因為日圓不升反跌　—　你最初去「擔心」拆倉，又錯失幾多機會？

37. 呢個例子，係好好咁示範咗兩樣我成日講嘅嘢：第一，直線思維嘅問題。第二，成日擔心呢樣擔心嗰樣，就永遠搵唔到大錢。有啲風險根本係你嘅機會

狼來了：舊年聖誕都估拆倉，啲人估日圓大升，日本股美股死。結果？

38. 其實一路都有人估，日本遲早會退出呢個零息政策，亦都估遲早日圓會大升。冇錯係狼來了，講咗好多年都未見。但你話在未來幾年會出現，我唔會意外　—　到時可能又會引發啲震蕩。但，呢啲係機會，唔係風險。

39. 講返正題，照計好明顯知道，借外幣去買其他嘢，無論你買乜都好，都一定有個「匯率風險」。我買股就唔會理呢啲，因為我夠長期，睇嘅回報亦都夠大。但你套息，只係執一兩厘嘅，真係個匯率郁少少你就倒輸啦。

有冇又唔使個個月還，又低息，又唔怕匯率風險？有！就係借日圓買日本股！

40. 亦即係話，借Mox之類，就個個月要還。券商孖展呢？就唔使個個月還，但貴息。借日圓孖展呢？就唔使個個月還，又低息，不過有匯率風險。

41. 咁有冇三全其美嘅做法？有！係乜？相信你都估到，就係買日本股！！！

42. 咁著數嘅嘢，有冇人咁做？畢菲特咪咁做！

43. 巴郡咪發日圓債（又平息又唔使個個月還）。然後拎去買返日本股，呢啲就currency matching , natural hedge．其實領展買商場都係咁，買新加坡嘢，咪發坡紙嘅債。

44. 個效果好簡單啫，如果日圓升嘅，你還嘅錢係多咗（以港紙計），但你堆日本股換做港紙計又多咗嘛。掉轉亦一樣，日圓趺嘅，你啲日本股咪蝕匯水，但你還錢還少咗嘛。

45. 咁所以，係咪應該借日圓買日本股？答案都係，一半半。始終，我係唔建議借錢買股票嘅，有機會再詳細講。但，先係未來錢係唔好嘅，借錢亦都會上癮。仲有，如果跌呢？特別要講，富貴嘅都仲可以借錢，冇錢嘅反而唔好借（係咁奇怪的，但世界就係咁。因為銀行落雨收遮，唔需要借錢嘅人，銀行就好想佢借。需要借錢嘅人，銀行就唔係好想借，遲下再解）

46. 不過，始終息低。如果你話做美金孖展買美股，同日圓孖展買日本股，就好似後者比較可取了。特別係好多人都冇乜買日本股，分分鐘仲可以幫你分散返。

雞同蛋：「我都冇日本股，點借日圓孖展？」

47. 最後一個問題，可能有人問，「雞同蛋」，我都冇日本股，何來可以做到日圓孖展？

48. 咁證明你冇乜認真聽書。我唔敢100%肯定，但如果我冇記錯，你冇日本股，都可以做日圓孖展嘅。都話「統一購買力」。你有其他股票，券商畀額你。然後你明明戶口冇錢，但走去買日本股。咁你咪會爭佢日圓。就即係做咗日圓孖展咯。

49. 咁你話，唔買日本股得唔得？都話唔鼓吹，但你問我做唔做到，係做到嘅。例如點？例如本身你係做開美金孖展嘅，爭佢美金。咁照計你可以在個券商戶口換外幣，用日圓換啲美金返嚟，你由爭佢美金，變咗爭佢日圓。

50. 好處係乜？就當然係慳咗息。壞處呢？咪「匯率風險」。你咁做咪即係借日圓然後買美股做carry trade—其實亦都即係變相賭埋日圓匯價。但我都講過了，我冇乜見人估匯價估得準，估中嘅都係運氣啫，好難長期贏到大錢。

你話你估匯率好準？日圓一定冇得升？扯，咁你使鬼買股票咩。

51. 當然你可以話我唔識，你係日圓專家，唔會錯。不過，如果睇日圓咁準嘅，咁你使鬼買股票咩，咪成副身家去賭日圓咪得！

52. Why not？你話你唔會錯嘛。定係諗真啲，其實你會錯？

53. 我諗個結論係：借錢買股票都係唔好，孖展就更加唔好（息高）。不過如果真係想嘅，似乎借日圓買日股，就好過借美金買美股。

54. 但，千萬唔好話「埃汾教人借日圓買日本股」—　我自己都冇做，何來教你？

最後思考：股市長期回報有8-10%，咁其實我長期借5厘，係咪都著數？

55. 不過，最後畀樣嘢你諗下，我都未必好肯定。但可能會有人咁諗：喂，咁既然股票長升，一年8-10%，「咁我借1.5%嘅日圓長期買日股，冇得輸喎」。又甚至係，「既然股票長升，一年8-10%，咁我就算借IB美金港紙上到5厘6厘，長期都冇得輸喎」

56. 你可以諗下，呢個想法有乜問題？定其實冇乜問題？我傾向覺得係有問題，但都唔敢100%肯定。有機會討論下。