有關借錢投資（三）：孖展101　—　同場講埋今晚美股CPI，同埋星期三議息 (Patreon)

多謝星期六有去華泰講座嘅讀者。呢場講座堪稱史上最好（有重溫）

下星期有免費日本股講座，線上直播的，唔使報名了

美國今晚出通脹數字，肯定大幅回落了

不過唔好數字靚仔，但市跌，又去問點解，又去驚

5月時個個以為最後一次加息，我都以為係，結果錯。但又點？市照升

星期三唔會加息，但會出經濟數據預測。就知係咪停加息

續講借錢投資：孖展101

券商孖展：幫到啲急要用錢嘅人，例如我

每逢大跌市，就梗係殺晒啲做孖展嘅人，然後個市先反彈

有人爆煲畀人斬倉，就係入市之時啦

1. 懷住相當悲痛嘅心情同大家講，原本寫好嘅兩篇文，冇咗。又要由頭寫過。時間都唔係最大問題，但個感覺相當差的。但無論如何，會密啲出文，追返之前嘅進度。雖然個第一季回顧寫到第二季完都未完晒，但我依然覺得係有用嘅。況且，都解釋過，我完全唔著重時間性，但讀者你著重嘛。所以有時有啲突發嘢要寫咗先，我六月先嚟寫SVB你咪更加鬧（反而六月仲寫第一季回顧都係OK的，我覺得。有乜問題？）

多謝星期六有去華泰講座嘅讀者。呢場講座堪稱史上最好（有重溫）

2. 順手十分多謝上星期六有去華泰講座嘅讀者。我個人覺得係咁多次講座中我講得最好嘅，你可以問返有去嘅讀者，會感受到我嘅「火」。對你地有福嘅係，應該之後YouTube可以足版重溫，出咗我再話你知。雖然我係反對嘅，因為似乎對啲有去嘅讀者唔多公平。同埋，咁搞法，下次可能冇人報名。固然係免費，但人地付出咗時間。不過始終我受人錢財，華泰話點咪點。

3. 照舊，最好去華泰開返個戶口，呢期啲獎勵都OK，等我同佢有個交代。當然係因為佢代你出咗錢，你先有免費講座聽。之後可能仲會冋另一間券商一齊搞。

下星期有免費日本股講座，線上直播的，唔使報名了

4. 仲有，下星期二（6月20）會有個專講日本股嘅講座。呢個就線上嘅，而且完全免費，有興趣到時去聽，或者事後重溫都應該有。就係同Tasty Money小炒王梁心欣一齊（我會去佢度），時間係夜晚。

美國今晚出通脹數字，肯定大幅回落了

5. 快手講返，美國今晚（星期二）會出CPI數字，今次亦係相當關鍵（好似呢句嘢都寫過多次）。想知數字嘅，上次係按年升4.9%，街估升4.1%，Trading Economics （TE）估4.3%。留意，係估極速回落嘅，會去到兩年幾最低。好大原因同商品格價有關，之前升，而家跌，一來一回個效應就好明顯。

6. 如果睇按月嘅，上次係升0.4%，街估升0.2%，TE估升0.3%。

7. 不過，核心通脹依然係比較頑固（所以仲未減息）。上次係5.5%，街估5.3%，TE估5.4%。如果數字符合街估，甚至更低，照計會對股市幾好

不過唔好數字靚仔，但市跌，又去問點解，又去驚

8. 不過，唔好忘記啲嘢都升咗唔少，同時間股市幾日甚至一兩個月嘅走勢，其實都冇乜解釋。所以唔好啲數字出咗靚仔，但個市跌，又問點解。要解當然可以事後解，但一般唔係你要好擔心嘅嘢。

9. 記住，睇大方向。記得5月時，大家都覺得係最後一次加息，係咪？我都咁覺得。點知，之後又好似唔係喎。

5月時個個以為最後一次加息，我都以為係，結果錯。但又點？市照升

10. 好啦，但個重點係乜？重點係，個市繼續升！仲要科技股升得多。點解釋？係好難解釋的。所以你亦唔需要為自己（或者我）「估錯」去介懷。而你估啱又點？即係你估到唔係最後一次，埃汾同全世界都太樂觀，但又如何？如果你走去覺得「市場對停加息太樂觀」，走去沽晒啲股票，甚至沽空，必然十分痛苦。

11. 所以，股市真係唔係直線思維的。你問我，債息升，我當然估科技股跌。但結果唔係（你可以參考下呢篇文）。

12. 所以你見我多數都係不變應萬變，有錢就買，係有原因嘅。唔敢講話係回報最大嘅方法（最大嘅方法係時光機，舊年10月你借10倍孖展瞓身買Nvidia），但我提倡嘅，應該係最易實行，而又回報OK嘅方法

星期三唔會加息，但會出經濟數據預測。就知係咪停加息

13. 一不離二，咁順手講埋議息。星期三就出結果。今個月照計點都係唔會加息嘅，不過照舊，睇會後言論。因為而家嚟講，主流係估7月會加息。

14. 呀仲有，不經不覺到6月，今次議息，會後亦都會出經濟數據預測，基本上會話埋你知嚟緊半年嘅加息路徑了。

續講借錢投資：孖展101

15. 講返個借錢投資嘅系列。第一篇講咗Mox嗰個特平offer，無論如何，開咗先係冇壞嘅，簽滿500蚊佢回贈返500蚊畀你，唔使申請貸款，第時啱價或有需要先用。用呢條link．https://mox.com/zh/invite?code=29CGWB。我既開戶碼：29CGWB。

16. 第二篇講咗做孖展會畀人斬嘅問題（但你借Mox不等於做孖展），第三篇講咗啲「套息大法」，「借2厘Mox去做4厘定期」，甚至「借2厘Mox買6厘領展」嘅問題—貸款個個月要還嘛，你啲錢拎去做定期買領展，點還？

17. 今篇會繼續講孖展，因為原來有讀者都唔係太認識，咁即管講下。熟悉嘅讀者，可能可以skip，或者思考下同唔同意我講法

18. 大原則，借錢投資，都睇你借乜，幾多厘息，買乜，要點還錢。Mox之類嘅installment loan，你要個個月還，就唔使諗咩拎去做定期或者買高息股了，甚至拎去買股票都窄窄地（個個月要還喎），好可能只係用去冚卡數或其他負債

19. 我甚至聽到有人話想拎嚟幫補首期，其實都冇話唔得。不過首先，首期都要借嘅，係咪真係應該買樓？另外，應該大家都知，到你買樓時，申請按揭，係要報返呢舊嘢，會影響你壓力測試。「不過如果你買英國樓可能就唔使」（not legal opinion，畀人拉唔好怪我）

20. 好啦，咁有冇啲唔使個個月還嘅？係有嘅。除咗銀行批條 line，批循環貸款比你之外，最常見就係券商嘅孖展。差不多間間都有，爭在你有冇開通。個人覺得，開定冇壞嘅

21. 點解間間有？因為係佢地財路。唔通靠你嗰幾十蚊佣金咩—亦都因為咁，券商一定係周圍宣傳，引誘你去做孖展的。

22. 有讀者唔知點玩法，咁都好簡單啫。首先，你要有貨。冇貨免問，冇貨想借錢嘅，搵銀行或財仔（或者Mox）．

23. 例如我在券商度買咗100萬貨（又或者你在第間轉入去都得），咁佢就自動有個額畀你，唔使額外申請，十分方便。例如可能畀多50萬嘅額你咁。唔用，就有事啦。

24. 用咗呢？就每日計息，都均真。計幾多息？間間唔同。但而家你預港紙同美金，可能都係六厘七厘咁上下，貴唔貴就你自己衡量（介紹返，美股一年都係8-10%回報咋下）

25. 順帶一提，一般嚟講，券商都係會玩「統一購買力」，即係唔會港股只能借港紙，美股只能借美金。總之你所有嘢，佢就夾埋同你計，你鍾意借乜都得。

26. 點用？你可以用嚟買股票。咁就好玩，因為你新買嘅股票，又令你在佢度嘅貨總值多咗，個額又會再大咗。於是乎，可以咁樣一路叠上去，槓杆槓杆再槓杆

27. 唔止，如果啲嘢升咗，原本值100萬，後來值120萬，你又可以買多啲貨。買完啲貨返嚟又升，又買多啲　—　呢個過程，在升市之中，係好爽的，你可以好快咁碌到自己個倉好大　—　但到跌市時就唔係太好玩了。

券商孖展：幫到啲急要用錢嘅人，例如我

28. 另外，除咗可以買股票外，你亦可以拎現金出嚟！變相即係拎啲股票按倉去借錢。咁呢個，對於啲急要用錢嘅人，係十分有用嘅，我都用過。固然六七厘息唔係平，但你可能用一兩個月啫（嗰時我係做手術但保險未賠）。咁你又冇理由走去借個一年嘅貨款嘛。

29. 所以對我嚟講，有用嘅反而唔係拎去層層叠買股票，而係應急現金呀。有人問我100% invested，有意外要用錢點算。呢個就答到你。

30. 不過，一般嚟講，你拎現金嘅額，就點都細過你可以再買股票嘅額。諗下都合理，前者你啲錢拎走咗，後者你啲貨仲在佢度，風險唔同。

31. 利息點畀？都好簡單，每日計，有用到咪計，冇用嘅唔計。然後一個月扣一次。咁你話，使唔使還？唔使。本固然唔使還，息都可以唔使還，一路碌上去咯。所以對某啲人嚟講，係幾吸引嘅，因為好似唔使還咁。不過，碌碌下就越碌越大了。

32. 好啦，講咗美好嘅嘢，講啲冇咁美好嘅。跌落嚟，就好係嘢了。詳細計算，就不解啦。但如果你借到盡晒嘅，咁你啲貨一跌，佢就自然會call你孖展，細個睇啲港產片或TVB劇，啲友就係畀人call補倉（因為炒期指，原理一樣）

33. 補倉或call孖展，即係點？即係叫你入錢。咁當然你要就班水。但除非你搵到親友幫拖，否則九成你都未必有錢（否則開頭做乜借孖展？貪息平？）。

每逢大跌市，就梗係殺晒啲做孖展嘅人，然後個市先反彈

34. 咁然後呢，除非你啲貨忽然大升。否則，就唔係咁開心了，就會幫你「斬倉」，forced sales。將你啲貨不問價咁沽晒出街，填返你條數，直到你個水平變返正常為止。

35. 信不信由你，每次大跌市，往往都係要斬到呢啲人一頸血。到呢啲借得最盡嘅人，斬晒出嚟，個市就會回升。亦係畢菲特講嘅，潮退就知邊個冇著泳褲。其實好合理，因為斬孖展，一定係不問價斬（券商斬你之嘛，使乜同你就住），所以多數係股災之中最後插得最勁嗰下。

有人爆煲畀人斬倉，就係入市之時啦

36. 例子？例如個韓仔基金畀人斬，或者啲內房債畀人斬（追孖展，咪要沽股票）。

37. 最後一提，呢一類型嘅「股災」，其實最唔驚，往往係入市機會。因為只係有人畀人不問價狂沽，明顯係會沽過籠的。不過呢個亦只係理論，實行起上嚟有點難　—　點解？因為，呢啲人搞到爆煲，就當然係先有一個大跌市先嘅。