Mox 即時借，2厘息唔使，唔使糧單，有冇咁著數？ (Patreon)

Mox 即時借，2厘息唔使，唔使糧單，有冇咁著數？

大原則：唔好借錢投資，唔好借嚟消費

我自己嘅一手體驗係OK嘅

照計Mox等於蝕畀你，仲要有現金回贈

望過冇伏，真係做到。但要借夠85萬，同埋借足49個月

乜證明都唔使，2厘息借到成球嘢，係有吸引力嘅

順手金融101，畀埋個還款表你，同你一齊研究

APR同月平息嘅分別

點解供樓開頭大部份只係還息

開戶詳情

1. TLDR：Mox 「即時借」，2 厘唔使嘅私人貸款，應該即時批核，免糧單。應該值得望下

Mox 即時借，2厘息唔使，唔使糧單，有冇咁著數？

2. 呢篇講Mox嘅低息貸款offer．當然，大原則，唔好借錢投資，買樓除外。呢篇可能都講多少少點解唔好借錢投資。以前解過唔好借錢投資，啲友又話埃汾你夠買樓，「矛盾喎」，真係煩到一個點。以前已經解過個分別。仲有，我買樓時係可以full pay的（嗰時三百萬有找），只係我冇咁做啫

大原則：唔好借錢投資，唔好借嚟消費

3. 亦都當然，唔好借錢消費。冇剩錢已經係大問題，仲要洗突，當然唔好。

4. 呢篇應該唔算完全廣告文。但我申報你知，我冇收Mox任何金錢或非金嘅利益。不過如果你去開戶，我係會有回贈嘅，你都有500蚊獎賞（開戶後簽500蚊卡數就得了）。至於你開咗戶後借唔借錢，借咗幾多，借咗唔還（聽聞有啲人借完走去英國），都係同我完全無關嘅。

5. 開戶詳情最尾講，但，用呢條link．https://mox.com/zh/invite?code=29CGWB

6. 我既開戶碼：29CGWB

我自己嘅一手體驗係OK嘅

7. Mox係Virtual Bank，大股東渣打，仲有電訊盈科，同埋攜程。我平時都有用，覺得係OK的。點開戶唔慢慢教，照計幾容易，足不出戶在屋企就搞掂。而且，佢應該從來冇拎過我糧單。如果我冇記錯，開嗰時我都已經冇返工。親身用過，冇乜伏冇乜投訴。

8. 至於呢個「即時借」，我亦有用過。其實舊年年尾佢地做promotion，好似借1萬蚊，就送個Now（股東嘛）嘅世界盃pass咁，反正我都要買，點計都有so（1萬蚊一年息咪幾百咯）。亦真係手機按幾個掣，唔使糧單，即時批，即時收到錢。然後你好似傳統私人貸款咁每個月還。

9. 當然提提你，準時還款，一遲就罰得好甘，點都唔值。

10. 仲有，以上只係我嘅經歷。我好記得冇畀過糧單佢，但佢係咪照批畀你，或者批咁多畀你，或者批咁嘅息畀你，就答你唔到。當然仲有啲讀者唔在香港嘅，開唔開到，我都唔敢講（但應該至少要有個地址證明同香港身份證）

11. 仲有，佢話「特選客戶」，咁你新客即時開，做唔做到，我都唔敢包。可能因為我都開得耐？因為我之前還款記錄好／定個個都係特選？（但佢應該唔理你收入或資產的）。但，開咗戶先又冇壞嘅，又唔使錢，仲可以拎佢500蚊現金獎賞。可能之後有其他好嘢呢。

照計Mox等於蝕畀你，仲要有現金回贈

12. 好啦，主菜。2厘息（其實係1.87厘），聽落點都吸引，至少呢一刻係。之後會唔會減到零息答你唔到啦。

13. 呀仲有，佢會畀返4500蚊現金回贈你的（假設你借夠85萬啦），應該7月底前就畀你。計埋呢舊，個息就再低啲，可能去到1.7厘咁上下。但下面我計數都會當係1.87厘

14. 而我基本上可以話你知，Mox應該係要蝕畀你（未計你走數嘅風險添），至少呢刻係。有數得計，銀行綜合資金成本，而家2厘樓上。Virtual Bank只會更高。齋資金成本都蝕畀你，未計員工出糧。咁做乜咁好死？主要都係搶客。

15. 係咪真的呢？應該係真。我冇借到（仲諗緊，可能都係唔借），但至少我剛剛click入去個app，都仲係做到呢個價。照計按個掣就搞掂。

望過冇伏，真係做到。但要借夠85萬，同埋借足49個月

16. 當然有少少魔鬼細節。伏就冇嘅，hidden cost都冇嘅。但，你要借得大，借得長先得（點解？因為銀碼太細太短，真係行政費都蝕畀你）。

17. 我望過，你要做到2厘樓下，至少要借85萬。另外，至少要攤49個月還，48個月都不能。你可以更長，60個月都得，咁咪每個月還少啲，但總利息開支又多啲咁解。

18. 你借唔夠85萬，或者揀48個月或以內嘅，我望過要去到四五厘息，就冇意思了。

19. 呀仲有，提早還，係要罰息的。一般提早還都冇乜著數。

乜證明都唔使，2厘息借到成球嘢，係有吸引力嘅

20. 首先，乜證明都唔使，可以篤幾個掣即時借到成球嘢，都係個幾大嘅誘惑。但，還得起先好借。我相信，都只係適合啲比較富貴嘅讀者（雖然我好多讀者都好富貴，否則我唔會寫呢篇文）。即係學生哥或者剛出嚟做嘢兩萬蚊人工嘅，就唔好搞了。

21. 不過話說回頭，85萬，分49個月，一個月還18000，如果結左婚嗰啲一齊還嘅，又唔算極誇張，供層樓咁咯。你攤到最長嘅，攤五年，一個月15000。就睇你有幾富貴了。

順手金融101，畀埋個還款表你，同你一齊研究

22. 順手金融101，畀埋個還款表你。其實你申請時都有，網上你都搵到，但梗係畀埋隻Excel你玩原汁原味，順手可以解下啲基本嘢。

23. 呢個例子，就係我cap圖真實個案，85萬，分49個月。1.87厘。留意有埋現金回贈，但我冇計落去，有啲煩。總之計埋的話你個息再低少少，而個現金回購你差不多即時拎到嘅

24. 首先，我一路講幾多息，都係講APR。任何情況下你都應該講APR，因為只有呢個東西先可以公平地比較。香港啲私人貸款之類，好多時有啲唔同玩法，免供幾期呀，回贈呀咁，或者同你講「月息」呀咁。但任何廣告同文件，都一定要寫明APR（有時要啲細字先見到）。

25. 咁「月平息」又係乜（我諗起鄧月平）？會同你再解。

26. 望下，85萬，你總還款，就係883,220。所以你總利息開支，就係33,320。即係「平均」一個月680利息開支。680除返85萬，個「月平息」就係0.08%

27. 好似好低？錯。咁你以為個年息就係0.08 %X 12即係0.96%？梗唔係，咪講咗APR係1.87%。咁你話，「月平息」有乜意思？答案係：冇。只係財仔用嚟昆啲數學唔好嘅人，等佢以為好平，亦因為咁法例先要你寫明APR．

APR同月平息嘅分別

28. APR同「月平息」點換算？答案係：居然冇一條好簡單嘅式！要睇年期。但一般，大約APR係月平息X 22.8咁上下

29. 再講返，總還款，就係883,220。留意，同供樓一樣，會幫你整到每期還款一樣（除咗最尾一期爭少少）。所以，每期還嘅錢，就係88萬3千3除49，即係18027

30. 咁你就會見到以下個還款表，實情完全唔難計，你自己整都得。我知網上有大把，但自己整一次你先了解到成件事。

31. 其實個計法好簡單，每一期，睇你爭銀行幾多錢。然後計返你爭幾多息。就係你爭佢幾錢，乘個APR，除12（一個月一次嘛）。例如呢度，最頭就係85萬 x 1.87% 除12，即係1,324蚊。呢度就係還息，剩返嘅係還本。所以還本係18,027減1324，即係16,702。

32. 留意因為你還咗本，爭銀行嘅數細咗，所以下一期，你只係爭佢85萬減16,702，即係833,298。咁所以，之後個月嘅利息開支，又會細咗，變相你「還本」又會多咗。

33. 如是者，重覆49次，最尾還完（多數四捨五入會令最尾一次有少少唔同）。

34. 你可以留兩點。第一，咁多期嘅利息開支，加埋，就當然係返33,320，但並唔會係個個月680。你見開頭好多，最尾好少。點解？因為你個本越嚟越細

點解供樓開頭大部份只係還息

35. 呢度亦都解釋咗，好多人都知嘅現象：「供樓開頭大部份只係還息」。講到好蝕底咁，其實只係數學現象。因為你開頭爭佢舊錢係最大嘛！而你每個月還款係不變的，所以開頭「還本」嘅部份一定係少。

36. 理論上，你要設計到開頭還好多本都得架！但你咪會變咗開頭供得好多錢！而數人都唔會想咁，都係想個個月一樣金額。

37. 仲有，你發垷，供樓的話，呢個「開頭好大舊係還息」嘅現象更加明顯的。點解？因為攤得長！

38. 條數點計？好易計啫，同一個銀碼，同一個息口的話。咁你當我開頭幾期嘅利息開支，係同個還款年期無關的，係咪？例如呢個例子，都係85萬 x 1.87% 除12

39. 問題係，你攤長嚟還，咁每期嘅供款就細咗的。亦即係，個利息開支佔你總供款嘅比例，又會大咗咯。

40. 例如呢個例子，首先因為還款年期短，二來息又低，所以你見一個月還18000蚊，還息只係1300，佔好少的。但你攤開幾十年，又唔同情況。

41. 好啦，金融常識講完。下篇先講實戰，到底借嚟做乜？點解唔好借去買股票？唔係借去買股票仲有乜用？之後解

42. 下面有開戶同優惠詳情。再講一次，你開咗發現做唔到個offer，唔借，都係冇任何問題嘅。但當然你要消費滿500蚊你拎到嗰500獎賞（其實等於免費）

開戶詳情

🥳於Mox開戶賺取HKD500現金獎賞

快來體驗嶄新的銀行服務——Mox，由渣打銀行全力策動的虛擬銀行，為你帶來全新的理財體驗！

1️⃣ 2023年7月5日或以前開立Mox戶口並輸入我的邀請碼

29CGWB

2️⃣ 在開戶時或開戶後，申請Mox Credit賺取奬賞

3️⃣ 開戶後30日內以Mox Credit累積消費滿HKD500或以上，即可獲取HKD500^ 💰。

立即到Apple App Store或 Google Play Store搜尋Mox Bank並下載Mox app啦！了解更多：https://mox.com/zh/invite?code=29CGWB

借定唔借？還得到先好借！

^受推廣條款及細則約束