埃汾八隻持倉創新高後反思（三）—Rebalancing，其實係指乜先？應唔應該做？仲有星期六又有實講座 (Patreon)

買唔買得？梗買得。但買乜股？都可以有啲指引畀你嘅

買唔買得？梗買得。但買乜股？都可以有啲指引畀你嘅

星期六又有免費實體講座

Rebalancing：我就唔會嘅

Rebalancing，有好多種，你講邊樣先？

股票倉有得佢自由生長，唔做Rebalancing，會有乜後果？

我認為，分散，在input時做就夠了，唔使再人為搞佢

分下到底係市場氣氛好所以你隻嘢跑出，定真係有盈利支持

但，唯一一種人應該做Rebalancing：退休，或冇乜收入嘅人

1. 港股又升，美股又升，大家當然開心。但幾時都好，個問題唔係「仲買唔買得」—當然買得，問題係點解之前唔買？（特別係美股）。至於買乜，亦係唔難答。

2. 如果嫌話叫你買ETF太行貨嘅，咁畀兩個方向你。第一，分散！你堅持唔買港股，全部美股唔買其他嘢，都唔緊要（雖然我係你會至少買啲歐洲或日本或其他新興市場）．但，即使你全部美股，都留意下你啲公司嘅行業。如果太集中嘅，咪新錢拎去買其他嘢。

3. 第二，其實你平時總係應該有一啲心水股。可能之前你冇錢，或者之前未跌你嫌貴，又或者之前未升你嫌未有動力（兩種人都有，甚至有啲人可以同時有呢兩種性格，唔出奇）。咁，你就去買嗰啲。我覺得總好過你見到有啲嘢忽然跌落嚟然後仆入去（但你之前冇諗住買，只係見減價）。又或者你見到有啲嘢升咗多人講你又仆入去。

4. 最後快講，領展業績。係OK的，要買嘅可以買。5.7厘息咁滯，而且應該保持到。之後先詳細講（但可能要下星期先，在泰國用碌下費事開個Excel眼都花）

星期六又有免費實體講座

5. 呀仲有，星期六又會有個實體免費講座。今次係華泰證券贊助，仲有靚女主持。下午兩點至四點，正路都會超時。中環。

6. 內容？尋找十倍股。我會講多啲「護城河」，即係「點搵下一隻Nvidia」，嗰啲會升　十倍嘅股票，有乜共通點。當然大路嘅市況，揀股都會講。但唔會講日本股，因為佢地冇日本個股買賣。除咗市況，揀股之類，今次

7. 仲有，唔會重覆返上次長橋講座嘅內容，一定所有嘢由頭整過。嚟過我講座唔止一次嘅，都會見到我每次都重新整。但當然，既然都係我呢一個人，咁總會有啲核心嘢你係之前聽過。

8. 報名呢度。

9. 另外，照舊，你有免費講座聽，當然係因為有人代你畀咗錢。所以可以的話開個華泰嘅戶口吧，反正有著數拎。都係嗰句，多啲人開，我就易啲再爭取多啲呢啲講座

10. 預告定，仲有一個嚟緊，講日本股。都係免費，不過冇實體，網上直播，六月二十左右，到時再話你知。應該唔使登記，叫埋老豆老母老婆老公仔女一齊睇（點解搞網上唔搞實體？因為佢地嘅主意，咁佢出錢佢話事。我本人就都係鍾意實體的）。

11. 呢個系列叫做「埃汾八隻持倉創新高後反思」，星期五晚又再升啦下。我覺得幾時都係反思重要過不停問之後會點。系列第一篇講咗好多人買過好股，但坐唔穩。點解？仲有好多人對市況嘅理解根本係錯嘅，仲妄想去估將來。第二篇講「有錢就買」，同埋「估值好緊要」嘅看似矛盾（簡單答案：前者override後者，除非你忽然一日多咗一千幾百萬）

Rebalancing：我就唔會嘅

12. 今篇再講一啲相關嘅嘢，亦好似有讀者問，Rebalancing．呢樣嘢亦幾有趣。不過我自己，就係唔會做嘅。

Rebalancing，有好多種，你講邊樣先？

13. 首先講下，一如以往，搞清楚定義。我呢度指嘅，係stay invested之下嘅Rebalancing，即係可能你年尾或得閒無事會走去沽咗啲嘢—但係去買其他嘢。

14. 我地唔係討論你隻嘢年尾升咗三成然後你去「食糊」。呢種之前已經講過，一般都唔建議。如果你即時轉去買其他嘢都仲還好（咁就係stay invested啦）。你沽咗佢拎現金嘅，咁，差不多注定你唔會買到10倍股。

股票倉有得佢自由生長，唔做Rebalancing，會有乜後果？

15. 講返，如果股票組合由得佢自由生長，唔做rebalancing，會有乜後果呢？一般嚟講，往往你就會end up係幾隻股票佔你組合嘅大多數。好合理啫，因為總有啲會大升（一隻都冇就檢討下），又有啲大跌咁。即使你真係每月定額咁做，玩得幾年，都可能幾隻佔咗大部份。絶對正常。

16. 又或者，再簡單啲。你過去十年，一路都係個個月一半錢買美股，一半買港股嘅。咁你肯定會end up個倉係六七成（甚至更多）係美股的。因為升得多。

17. 咁於是嚟啦喎，「埃汾話唔好太集中喎」，咁我係咪應該年年保持返一半一半，沽咗啲美股佢？

18. 答案係：好難講，但我就唔會。

19. 當然呢個例子你會見到明顯唔應該，年年沽晒啲美股走去買返港股，肯定笨。但只係呢個例子比較極端。

我認為，分散，在input時做就夠了，唔使再人為搞佢

20. 不過一般嚟講，我都唔會太過建議咁樣做。你嘅「分散」，可能在input時做都己經夠了。之後總會係幾隻大嘢佔咗大部份的。

21. 呀仲有，如果真係想「平衡」啲。我都一路講個做法　—　咪用新錢。你唔一定要好strict，但適度地做。例如最簡單，我以往買得太多個股，咁我呢一年好似都話希望指數ETF比重佔返重啲。但我都冇走去沽咗啲微軟蘋果Nvidia，然後去買QQQ VOO嘅。我只係呢一年嘅新錢，咪少買個股，慢慢就戥勻返。你應該對你買嘅股票有信心，唔係升少少又沽走跌少少又覺得唔掂，同結婚差不多。

22. 當然，亦係冇得兩全其美。但我感覺上，太過嚴格去rebalancing，等於cut the winner．雖然股市有一定嘅mean reversion，但你組合入面跑出嗰啲股票，照計亦好大機會係因為盈利支持嘅。

分下到底係市場氣氛好所以你隻嘢跑出，定真係有盈利支持

23. 再講得白啲，如果只係市場氣氛好而炒起嘅，令到佢佔你組合比重升咗好多嘅，咁可能估值都過貴，你re balance咗佢可能都OK。但如果佢係因為盈利一路升所以佔你組合多嘅，就似乎唔應該沽咗啲好股。

24. 不過，「講就易」，實際上點分？都有啲難分。雖然又唔係完全分唔到嘅。因為一般都係兩樣都有啲，例如Nvidia明顯又有氣氛又有盈利。但之前喪炒嗰啲咩meme股，你自己都知係垃圾，鬥傻之嘛。所以你話係咪分唔到？又唔係完全分唔到

25. 我嘅建議，都係唔使簡單複雜化啦。太多美股科技股嘅，新錢咪買多啲VOO，甚至其他嘢。

但，唯一一種人應該做Rebalancing：退休，或冇乜收入嘅人

26. 但，如果你係退休入士，或冇乜收入，就可能真係要做Rebalancing 啦。原因好簡單啫。首先，既然你後生時係100%股，去到老時可能去到六成甚至更少嘅股票 – 咁，中間有個過程嘛！只要你啲股票表現唔係太差，呢個過程，未必能夠你退休幾年前用新錢買晒債券能夠做到。

27. 仲有，你退休後，慢慢降低比例又好，甚至維持住都好—如果用我上面嘅講法，就用新錢。但退休就係冇新錢嘛！

28. 講白啲，可能你真係會諗，明明我想60股票40債。但退休兩年，但股票狂升，變咗80股20債。咁係咪好似應該沽咗啲股票，買返啲債？我覺得係OK嘅，一半半咁。即係如果講3% rule，你每年都要沽啲嘢出嚟做洗用嘛。一般情況下，啲人建議都係跟比例，「即係你嗰3%都係六成嚟自沽股票四成嚟自沽債」。咁但在呢啲情況，你話我就全部3%都沽股票，去「自然」地戥返勻，我覺得都係OK嘅。相反操作亦一樣，例如股票大跌，玩到變咗50股50債，咁你能啲開支只係嚟自沽債，自然地平衡返少少。甚至沽咗啲債去買返股票，都係可以嘅（但亦唔係完全一定要，一半半啦）

29. 點解又好似「矛盾」？大佬呀，因為你退休人士，就冇咗「用新錢去戥勻」呢個動作嘛。

30. 結論；你嘅平衡，應該在input時做。做得好嘅，其實照計唔應該真係會側埋一邊得太多。真係側埋一邊嘅，咪用新錢買其他嘢。地理上係，行業上都係。咁但，唯一例外嘅，就係你將近退休，慢慢wind down啲股票比重。或者退休後，維持返你心目中嘅股債比例，唔好太失衡咁。因為退休就冇新錢了。當然，你反正每年都要沽啲貨，可以在沽股票定債多啲去做到少少平衡嘅。

好簡單啫其實，你睇我有冇得閒無事走去做Rebalacing？有冇見Nvidia升咗一倍我沽咗佢買其他嘢（甚至 「增捋」現金？）。冇丫嘛。咁我嘅想法，好明顯啦