美股700點港股700點，搞乜？又話冇說服力？。仲有，埃汾八隻持倉創新高後反思（二）—「估值好重要」，同埋「有錢就買」，係咪完全矛盾？點解嗰時LVMH新高我都買？ (Patreon)

又話6月加息，忽然又唔加了。好混亂？係！點估？冇得估！

「只靠AI股」下話？而家道指跑贏納指了，咁滿意未？

「泡沫」嘅嘢，好難掌握嘅。

即使6月加息預期重燃嗰時，債息升，科技股都照升。點解？唔知。

到真係債息回落呢？就升舊經濟股。所以，唔好直線思維

「你講啲嘢矛盾」—有時係你理解唔夠。但有時真係矛盾。因為世界係咁

唔好睇我講乜，睇我做乜。我話100%股票，stay invested，有冇變過？

假矛盾：「估值好重要，高追易中伏」「但又應該有錢就買股票」

等估值低，又要等幾耐？錯失幾多嘢？最後調整仲貴過你當年飛入去

2009年後，美股升足咁多年，差不多冇調整。你要等幾耐？

「你買LVMH時都係歷史新高喎，估值都貴」

你2020年股災撈底好叻？但人地師奶09-16年個個月買，一定平過你

又話6月加息，忽然又唔加了。好混亂？係！點估？冇得估！

1. 近排都係有啲各種問題，遲咗出文。趁我上機前出返，另外在泰國期間應該都會出到文嘅。

2. 我知市況好返，港股又700點美股又700點，可能聽日會再講多啲。但亦畀你見到，市場嘅嘢，兩三日啲人想法就唔同晒。Nvidia 破頂後，一度係回軟嘅，啲人又會覺得泡沫爆。甚至一路講嘅「只係靠AI頂住個市」，完全係錯。

3. 簡單嚟講，都係同第一季嘅大調差不多，乜都係睇美國利息走向。最奇怪係近期關於6月議息，幾日前先話重燃機會，停加息夢碎。但幾日後又見到，聯儲局官員又好似放鴿，而家似乎係估6月14應該唔加息。

4. 於是乎呢，債息又回落（記唔記得之前講債息升但科技股狂升有啲奇怪？結果係債息回返落去），美金又回落，人民幣又強。然後就港股美股齊歡喜。

5. 混亂？係！。點估？冇得估。所以，其實你真係唔使跟得太貼。

6. 講返，呢個系列係叫做：「埃汾八隻持倉創新高後反思—大把人買過好股，但係咪坐得穩？點解唔得？」。就係Nvidia 破頂後我想大家諗嘅嘢。第一篇係星期三晚寫嘅。嗰篇同你講咗，啲人質疑個升市唔夠「實淨」，只由少數股份帶動，甚至話「只係靠AI」，我覺得幾多餘。

「只靠AI股」下話？而家道指跑贏納指了，咁滿意未？

7. 而家你見到了，連啲舊經齊股都走強（道指升700點呀下，跑贏納指）。咁夠說服力未？但之前質疑嘅，又會錯失了。啲嘢升到成年新高，你都冇買，仲要質疑一大輪，升晒先買，當然係摸頂　—　然後跌兩成又驚，又「止蝕」。點搵大錢？

8. 市場係唔會欠任何人「解釋」嘅，記住。你覺得集中幾隻升冇說服力？咁咪升埋其他。

「泡沫」嘅嘢，好難掌握嘅。

9. 另外，有啲人會講「泡沫」。呢樣嘢，其實亦同估值差不多，極之難掌握到。只能大約sense到。而多數都係事後好耐好耐你先可以「肯定」。Nvidia由330蚊跌到100蚊，一般人都覺得係「泡沫」爆破。但之後又上返400蚊。咁到底300蚊係咪泡沫？定只係「買得太早」（當然買得太早都可以出問題的）。

10. 更加有趣嘅係，你見近排，市場都在講通脹回落速度不如預期。似乎都係。5月加息，原本多數人（包括我）都以為係最後一次。早兩日講講下，可能6月又要加多次（而家又話唔會了）。

即使6月加息預期重燃嗰時，債息升，科技股都照升。點解？唔知。

11. 但最奇特嘅係乜？即市6月加息預期重燃嗰時，股市照升。照升都算，仲要係升科技股喎，估你唔到。仲要係明明10年債息係咁升，3.7厘啦（近兩日又回返），美匯又強（近兩日又回返）。但偏偏美股照升，仲要係升科技股，點估？最奇特係，到債息回落嚟呢？主力就升舊經濟股。

到真係債息回落呢？就升舊經濟股。所以，唔好直線思維

12. 呢種教訓，亦係成日同大家分享嘅：唔好直線思維。好多嘢，就係「唔知點解」。固然你可以覺得「唔係好理性」，但，都不代表實啱。好多你同我學嘅嘢，可能都只係在一個特定時空適用（冇錯，又要講羅素雞，自己搵舊文）。永遠冇包生仔，冇話美匯回落新興市場就一定強，冇話債息升股市就實跌（雖然理論上應該係咁）

13. 咁所以你問我，啲科技股，都仲係唔算好值博，特別係你買個股。

14. 但講到尾，都係睇你嘅組合。你成手都係嘅，就梗係唔好再買啦。我知日日升好似好爽，但如果之後跌呢？相反，你冇乜科技股嘅，而家你再買QQQ，我又唔覺得有問題。我都仲買緊。

「你講啲嘢矛盾」—有時係你理解唔夠。但有時真係矛盾。因為世界係咁

15. 總會有人覺得，喂，「你講啲嘢矛盾」。冇法，現實就係咁。你鍾意做辯論隊嘅，隨便你，你可以搵返每篇文出嚟鞭屍。幾月幾日你講咁，幾月幾日你又講另一樣嘢。

16. 咁我都係人，可能我會諗錯，或者畀讀者影響咗我嘅想法，或者畀大市影響咗我想法。甚至同一個問題，你用乜字眼問，可能我答案都會唔同。我答一句嘢，你點演繹亦會唔同。可能我會改變主意。甚至唔同時空有唔同想法（即係，講「我愛你」嗰刻係真心嘅）。

唔好睇我講乜，睇我做乜。我話100%股票，stay invested，有冇變過？

17. 但我唯一可以保證嘅係：「講嗰刻真係真心嘅」。咁如果你都仲唔滿意嘅，教你一樣嘢好簡單。你對朋友對所有人都係咁啫，唔好睇佢講乜，睇佢做乜。

18. 即係例如以前好多讀者問我呢隻呢隻股票，呢隻點呢隻點，我都會話OK，往往你仲熟過我。但，我又有冇買呢？可能我都冇十分認真睇。所以個含金量係低的。你應該睇我買咗嘅嘢，咁而我買咗咩股票，大家都好清楚。

19. 仲有舉多個例，例如呢個100% invested嘅信念，有錢就拎去買股票嘅信念，一般又唔止賺又唔止蝕嘅信念，買股票唔睇升定跌呢啲。你見我咁多年，有冇口不對心？你有冇見我沽晒啲股票等股災？有冇見我升10%跌10%沽貨走人?

假矛盾：「估值好重要，高追易中伏」「但又應該有錢就買股票」

20. 但除咗「真矛盾」，仲有好多，係「假矛盾」。你以為係「矛盾」，其實根本唔係真係咁矛盾。

21. 例如好簡單，有關「估值好重要」vs「幾時都應該買股票」。唔止一個讀者留言講，「估值好重要，高追易中伏」「但又應該有錢就買股票」。好似好矛盾。

22. 都唔係真係咁矛盾嘅。你有錢就買股票，但不等於你會「不停高追」嘛。我都會高追摸頂，但唔係「每一次」「每一隻」都摸頂。呢個亦係我一路堅持唔會坐太多現金嘅好處。但當然，你話忽然泡沫爆前夕忽然間你遠房三叔公留咗三千萬畀你嘅，就會係有問題，呢種問題我亦寫過。

23. 當然，如果你不幸地全部錢在高位買隻嘢，最後佢一沉不起，都係會出現嘅。所以？咪叫你唔好太多個股。公司會死，大藍籌都會死。但成個股市唔會一沉不起。OK你話港股，咁港股係特例定普遍例子？咁你真係驚你買嘅股市一沉不起，簡單，咪買多幾個股市！唔會個個都衰足咁多年啩？

24. 所以，分散係十分重要的。有咗分散，根本好多問題你就唔會有。

等估值低，又要等幾耐？錯失幾多嘢？最後調整仲貴過你當年飛入去

25. 另外，係冇兩全其美嘅方法的。估值高，但你等等等，要等到平，等到其時呢？舊文肯定寫過，你個標準太鬆，又會太早衝入去。你個標準太嚴，就十世都唔見一次。人生嘅嘢，全部都係咁。太求其又錯失真命天子，太揀擇又孤獨終老。（幸好，股票係可以分散嘅）

26. 呢度又畀個例子你（順便送埋個Excel畀你，呢個可以自動拎data畫埋圖）。SPY，即係標普指數啦下

27. 好多時，你等等等等等，係會錯失好多機會嘅。

2009年後，美股升足咁多年，差不多冇調整。你要等幾耐？

28. 呢度由2009年睇下，美股差不多升足咁多年。勉強去到2018年，先有個大調整（在個圖都唔係好睇到）。仲有係2020年2月3月嘅疫情大股災。

29. 2020年3月你夠膽入市嘅，很好，別人恐懼時你貪婪。但係咪好smart？聽落好似係。但你係咪贏最多錢？似乎未必係。

30. 因為即使2018年個調整，甚至係2020年世紀疫情，都冇跌穿2016年（甚至2017嘅位），呢個就係股市嘅特性，當然背後前題亦因為有盈利支持。

「你買LVMH時都係歷史新高喎，估值都貴」

31. 呢度亦都解釋咗有讀者問，唔係喎，「你買LVMH時都係新高喎」，你又話估值重要，矛盾喎。點解唔等平啲先買？「上面嗰段咪答咗」，等等等，等到幾時？

32. 仲有，新高不一代表係趣貴。雖然LVMH嗰時都幾貴—但至少唔係成100倍市盈率，甚至冇盈利，唔算發癲地貴。Nvidia相當相當貴了，但因為都真係有啲盈利，所以我都唔敢講實。其實永遠都冇得講實，但你見2021年嗰啲發夢股，就出晒事。唔跌嗰時你梗係話唔使睇估值。跌嗰時，咁講真有時有盈利甚至好好盈利嘅都會跌一大截。「但到翻生嗰時就唔係了」。你睇Nvidia可以100蚊上返嚟，都係因為啲盈利冇走樣。

你2020年股災撈底好叻？但人地師奶09-16年個個月買，一定平過你

33. 固然好難掌握，可能事後先知。但你可以睇返美股2009-2018年，你等大調整，根本等極都等唔到。2018年我當你去買，或者2020年3月你去買，以為自己好醒，股神啦—　但扯，個師奶合理眼在09-16年慢慢買嘅，一定買得仲平過你啦。你有幾醒？

34. 以上仲要係假設你捉到咋喎，捉唔到嘅，仲大鑊。又或者2020年3月，跌10%你飛入去，跌到10%你又止蝕，亦都一切化為烏有，左一巴右一巴添。所以，我係唔會求在最低位入市，根本不可能。我甚至唔介意在最高位買—　但你唔好所有嘢都係最高位買。

35. 仲有大把嘢講，下篇講下 rebalancing