埃汾八隻持倉創新高後反思（一）—大把人買過好股，但係咪坐得穩？點解唔得？ (Patreon)

大把人買過好股，但係咪坐得穩？點解唔得？

根本唔使咩「專業知識」：人人都識蘋果微軟Nvidia後，仲可以升多十倍

我當你買SPY，「大落後」，都升10%

有買，照計冇乜問題，頂多問「使唔使沽啲」。冇買嘅，就問自己出乜問題

「驚加息」「驚通脹」「驚衰退」。「熊市反彈」「牛皮市」

「只係炒AI」—下？Netflix又AI？FB又AI？日本股德國股又AI？

「只係由大公司頂住個市」—咁你想點？係咪代表就會大跌？

齋升大股，就市寬唔夠。細股支持，就話藍燈籠。乜都升，就話發癲。

唔好講納指，唔講納指100，但標指都升升10%

1. 呢兩篇文係星期三晚寫嘅，不過因為有啲事未出到。會有啲散，但我認為幾重要。成堆科技股升到一年甚至歷史新高，又畀你反思下

2. 另外，我知Nvidia跌返4%，再講一次，呢堆嘢係星期三晚寫嘅，同埋，即使Nvidia跌返10%我都係寫一樣嘢嘅。你睇好多人就係畀個股價牽住走，甚至思考。升10%佢諗一樣嘢，跌10%佢又覺得個世界唔同咗。

大把人買過好股，但係咪坐得穩？點解唔得？

3. 市況好似叫做幾好，至少美股係，至少科技股係啦下（星期三晚回返少少啦下，但唔通回返1-2%我嘅諗法就會完全唔同？寫嘅嘢就完全冇意思？戒咗呢種「只係望今日」嘅心態）。

4. 咁就易寫。但，都係同大家講返啲基本嘅思考問題。明報篇文（我又attach多次）講嘅嘢好明顯：大把人買過好股，N年前大把人買過騰訊（包括我），大把人買過蘋果。Nvidia亦都幾年前己經家傳戶曉（我都識，仲唔係家傳戶曉？）

5. 仲有，你可以思考一下：你根本唔使有乜嘢「內幕」，你唔使係行內人知道間公司好勁（反正而家呢啲嘢都一定會傳到所有人都知）。人人識iPhone識Nvidia時，股價都仲係可以升多10倍。關鍵係其他嘢，主要係你自己嘅心理。

根本唔使咩「專業知識」：人人都識蘋果微軟Nvidia後，仲可以升多十倍

6. 其實冧把，就唔使多，個人覺得已經太多。我買嘅已經多，講嘅更多（但我亦要開talk　出post，呢個係一個concern，所以留意我買乜好過。舊文有貼過，近一年都冇乜變，同埋我講親啲公司都會講我有冇買）

7. 你會見到我Facebook有講，「八大王王在上」。組合入面，8間公司創咗一年新高：Palantir（買咗少少），Netflix，Facebook，SalesForce，Microsoft，ASML。當中Nvidia同蘋果應該係歷史新高（不過蘋果好似要調整返啲除淨）

8. 「咁，你話我個Patreon有冇用」。之前仲要有啲讀者不停冷嘲熱諷，我係唔知咩心態的。

我當你買SPY，「大落後」，都升10%

9. 唔想咁煩嘅？你買隻QQQ，一樣一年新高。今年都升三成啦！我當你買隻SPY，係大落後呀，「只係」升10%。但，好失禮？

有買，照計冇乜問題，頂多問「使唔使沽啲」。冇買嘅，就問自己出乜問題

10. 不過亦正經，你有買嘅，就冇乜問題，可能你嘅問題只係「使唔使沽啲」（短答案：一般唔使）。咁你冇買嘅，首先當然係檢討下點解你乜都冇買。否則永遠都唔會進步。你不停咁再去捽我，叫我「喂講啲未升嘅」，都係冇乜用的　—　況且，上個月咪講NetFlix AMD咯，仲唔滿意？

11. 不過，真係大把嘢值得你思考嘅。

「驚加息」「驚通脹」「驚衰退」。「熊市反彈」「牛皮市」

12. 首先，你可以諗下，應該唔係好耐之前，都仲好多人講「驚衰退」，「驚加息」（甚至驚打仗）。話「炒減息不斷落空」，「上落市」，「熊市反彈」嘅，好似都唔係好耐之前。仆街丫，蘋果差不多歷史新高，仲係「熊市反彈」—所以你見我真係講過好多次，呢啲討論真係浪費生命。

13. 仲有，每年例牌有人講，「Sell in May」，其實一般亦係浪費時間。固然你睇股市有一定嘅季節性，但往往差別微不足道，不太值得你去費神去捉。記唔記得，5000個交易日中，錯過最好10個，足以令你回報減半？

「只係炒AI」—下？Netflix又AI？FB又AI？日本股德國股又AI？

14. 仲有，重覆講十萬次，多數人就多數係錯。而我唔止係講預測。預測錯好正常。問題係，好多人連現在，甚至過去發生乜嘢，個narrative都係錯嘅。

15. 證據？好簡單，你一定聽過好多人講，「只係炒AI」，係咪？甚至有人話泡沫，好似2000年科網股咁。sounds so smart，但絶對係錯嘅。

16. 的確，近期人人都講（升咗咪人人講）嘅熱點，Nvidia，當然係受惠於AI。AMD呢？你都可以話間接係（傳微軟資助佢嘛，雖然否認咗）。台積電（唔算好強啫）ASML你都仲可以話係。我畀到盡，你話Palantir，Google Microsoft都係，都算。

17. 但，Facebook 新高，又A乜Q嘢I？SaleForce又AI？NetFlix又AI？你真係唔好諗住答我話「咩呀Facebook會用AI做算法賣廣告」，「NetFlix會用AI推薦你睇乜戲」（用咗十年都有，至少）。

18. 如果你打算咁解嘅，咁其實所有股票升都可以係「因為AI」的。香港地，幼稚園揀學校都話AI啦。睇下你個寶貝仔時辰八字幫佢揀間風水好呀（唔好笑，真係有個科學園項目，嗰時係聲稱「AI幫你睇下你應該學邊款外語」，流到一個點）

19. 見到冇？唔係升AI。係升科技股呀！原因可以慢慢拗。但你話「升AI」，個理解已經好錯。其實係升Big Tech．而我從來冇離棄過Big Tech．Facebook一日跌三成我都係咁啦。一年前多啲之嘛。

「只係由大公司頂住個市」—咁你想點？係咪代表就會大跌？

20. 當然了，亦都會有啲人會講，「升勢只係集中在啲大股」，「市寬」好窄（講個名詞就型啲）。只由少數股份帶動，「升市唔全面」

21. 係咪事實？其實，「拗太耐又係浪費人生」。你講「市寬」，係窄嘅。升市唔係好全面，係真嘅。咁但，咁代唔代表就「冇說服力」。我就唔敢講。

22. 其實你睇返，「標普指數過去幾十年都只係由啲大成份股帶動」，因為細公司會死，或者踢出指數。指數，本身就係大公司，亦係超大公司比重佔多。係咪集中升幾隻就代表好快玩完，我就唔敢講，有機會睇多啲數字。我唔敢話一定唔係，但至少唔似一定係。

齋升大股，就市寬唔夠。細股支持，就話藍燈籠。乜都升，就話發癲。

23. 好資深嘅讀者，應該睇我FB文會聽過個故事。十幾年前，我有個舊同事，cynic到不得了，所有升市佢都話「假嘅」。嗰時我地未睇咁多美股啦，講港股。升匯控中移動呢？佢就話只係夾高兩隻，「假到丫」。其他嘢夾高大市呢？「中移動匯控都唔升，只係靠啲藍燈籠，冇說服力」。到乜都升呢？「個市都痴線嘅，雞犬皆升」。

24. 見到冇？你要「懷疑」嘅，永遠都可以「懷疑」。不過現實唔等人，數字唔呃人。

25. 升勢係咪無以為繼，我就唔知。不過，關於「只係升啲Big Tech」，其實用以下好簡單嘅數字就反駁到（呀仲有，其實ASML Netflix都唔算Big Tech吧）

唔好講納指，唔講納指100，但標指都升升10%

26. 好簡單，我地唔講納指，唔講納指100。齋講標普指數，咁的確表現落後好多。

27. 有幾差？「今年升得10%」

28. 大家應該聽我講過，歷史平均，標普指數一年都係10%左右。半年唔到，除咗平時全年嘅平均（當然不代表下半年一定升）。點都唔係叫做「差」

29. OK ，我知啲人想反駁乜。「標普指數入面都唔少科技股」—咁但，咁反駁，咪好似我以前個同事咁咯。咁我地一向講大市都係講標普指數架啦，佢係唔少科技股，有何問題呢？個大市就係科技股佔多嘛！點解一定要「唔計」？重要嘅係，拉勻晒，計埋非科技股相對落後嘅表現，標普指數都仲係升嘛。指數當然計大股，大股就係科技股，有何問題呢？可能你會話「無以為繼」，呢個有機會研究下，唔敢講實。但，肯定唔可以話係「只係升嗰幾隻AI」

30. OK，你堅持要講，「唔計啲科技股，表現都仲係差」嘅。咁，畀多個fact你。喂，日本股市德國股市法國股市今年都升10%啦（扣埋匯率了），又升AI呀？

31. 你見你聽到嘅好多嘢，連「描述」現在同過去，都往往係錯嘅。咁即係，講呢啲嘢嘅人，對將來，可以有幾掌握呢？