Nvidia 策略：未買嘅好唔好買？嫌貴想買咩位買好？買咗嘅又點好？ (Patreon)

6月10日免費講座

Nvidia？人人講啦。升晒嘛。但，我唔止一早講，仲一早買。見到分別冇？

由呢件事本身，你已經見到好多人嘅投資盲點

我有埋Nvidia嘅陽春Excel一個，但完全唔重要。

嚟嚟去去兩個問題啫：未買嘅，買唔買得。買咗嘅，沽唔沽好

理論上，有冇貨，同點睇隻股票，好似冇關。但你係人，唔係理論

未買，應唔應該買？唔應該啦。我冒住之後佢升多幾倍你嚟鬧我嘅危險講

「110蚊時你又唔買？」—認真反省下點解。

第一季20億純利。OK我知下一季110億收入，咁純利幾多？全年呢？

「車，貴可以更貴，幾多倍市盈率先叫貴丫？」。都冇定律

「可能佢純利可以季季一個開呢」—一個字：國際象棋棋盤

「未買，想買，回到咩位先好買？」—答到你就好咯。但，「舊年又唔買？」

當你舊年想買，300蚊跌到200蚊飛入去。之後再輸一半，又頂唔頂到？

買咗又點好？下篇講。但，其實你睇我點做咪知

讀者買咗10倍股，你有冇試過？

1. 原定回返帶講「第一季回顧」，不過幾日冇出文，又累積咗啲問題，又有啲嘢值得講，就呢篇講咗市況先。

6月10日免費講座

2. 另外，6月10號個免費講座，已定實。合作券商係華泰，仲有美女主持（自己入去睇吧）。星期六，兩點半開始四點完。兩點鐘話有茶點招待，唔好問我係乜茶點，唔知。地點係中環中心。中環嗰個，唔係灣仔嗰個。遲下會日日賣廣告，報名呢度。內容當然同上次5月嗰個唔同，Powerpoint一定由頭整過。不過，大原則嘅嘢，就唔會變嘅。5月叫你stay invested，6月都會係。

3. 又，唔使擔心「免費嘅最貴」，我唔會昆你。因為好簡單，我唔係免費講，華泰代你畀咗錢我啫。咁當然佢會希望你開戶了，我都希望你開，又有著數拎。不過佢總唔會落閘唔畀你走嘅。

Nvidia？人人講啦。升晒嘛。但，我唔止一早講，仲一早買。見到分別冇？

4. 首先少不免講Nvidia，你見人人講。串啲講句，我一早預咗，我寫明報專欄都知一定人人講　—　因為升咗。

由呢件事本身，你已經見到好多人嘅投資盲點

5. 只係由呢件事本身，你已經見到好多人嘅問題在邊：升咗先嚟關心。雖然呢個係人性，但你要去克服佢（最簡單方法當然係唔好睇咁多股市，有錢就入市）。

6. 同樣嘅現象，你見而家人人都講日本股了。但埃汾真係差不多係最早講最早買嘅人吧。又，嚟緊仲傾緊個日本股講座，但未落實，有消息話你知。咁就真係專講日本股（雖然我估佢唔介意你問其他嘢嘅）。你仲可以估下係邊間，提示唔係IB。

我有埋Nvidia嘅陽春Excel一個，但完全唔重要。

7. 有關Nvidia業績，可能我會呢兩日再講多多啲。你鍾意亦可以睇埋Attachment個Excel，不過真係全不重要。你更加唔使同我討論你對AI有乜睇法，或者你朋友對行業有乜睇法。

8. 呢個亦係好多人唬盲點，我讀電腦所以點點點，我做工程師所以點點點。但做麥當勞嘅買麥當勞發咗達未？得你一個識AI？你肯定你叻過啲分析員？

9. 詳情，你可以睇我明報篇文

10. Attach埋畀你啦，又，逢星期一買份只係睇我都抵啦。10蚊都嫌貴，想點呢？

11. 正經，你地訂得我Patreon，都唔多唔少覺得「資訊有價」，都唔係貪平嘅cheap人。所以我估你地好多係覺得「唔方便」（咁訂網上咯，亦都好似係六七百蚊），「睇唔晒」—但都真係冇問題的，你偶然睇下都夠，一日睇到幾篇都夠。而我甚至唔係同你講咩「要支持傳媒工作者」，我係出於自己（同埋你）嘅利益。Be a smarter person

嚟嚟去去兩個問題啫：未買嘅，買唔買得。買咗嘅，沽唔沽好

12. 講返，attach埋你都懶睇嘅。咁你地都係問嗰幾個問題嘅啫。未買，而家仲應唔應該買？買咗，又點？升咗好多喎。使唔使食糊（應該好多人知我最憎呢個詞，最好唔好當面同我講，我會O嘴的）。都係呢兩大問題啦

理論上，有冇貨，同點睇隻股票，好似冇關。但你係人，唔係理論

13. 留意，學術上，「冇貨應該點」同「有貨應該點」，好似應該係同一個問題。個答案，好似係同你有冇貨唔關事喎？讀過少少書嘅，會覺得，扯，問你之後覺得個股價點之嘛，同問嗰個有冇買有乜關係？

14. 甚至，你聽到啲電視機「財演」（我都做過），第一句就問個師奶，「買咗貨未」。我師傅都成日恥笑嗰啲友，我問你隻股票點睇，同我有冇買有乜關係呢？

15. 不過，呢度我就不同意我師傅了。當然係有關係。首先，因為你係人，你有貨同冇貨，對你嘅心理已經爭好遠。你上晒岸退咗休然後雷曼爆煲時問你點睇股市，同埋你坐住成副身家做埋孖展去分析，都己經係兩回事。你係公務員個個月等出糧，定係你做金融自己唔睇個客都日日打嚟問，對你嘅分析亦都爭好遠（所以我一路都話，非金融工作嘅人，投資好過做金融。潛台詞即係：你想做金融工嘅，一定R到高一截人工先好做。否則完全唔抵）

16. 另外，以前都講過。你應唔應該買，當然好睇你自己本身買咗乜啦。你問我而家好唔好買QQQ（舉例），你一隻科技股都冇嘅，當然值得買。成手都係嘅，就未必了。呢啲都係成日講嘅基本嘢。

未買，應唔應該買？唔應該啦。我冒住之後佢升多幾倍你嚟鬧我嘅危險講

17. 不過答返最簡單嘅問題：如果未買Nvidia嘅，而家應唔應該買？答案：唔應該。原因？好簡單。貴。固然貴可以再貴，我唔敢包話下年唔會再升幾倍。但，天地良心，你問我，我就唔會而家買

「110蚊時你又唔買？」—認真反省下點解。

18. （不過現實係：我一早買咗。我並非挑機或串嘴，但真係你問自己一句：點解之前你又唔買？唔好話我知半年前你唔識呢隻股票，或者幾千蚊港紙你都冇。半年前110蚊時你又諗乜？當然冇人估到而家會升到400蚊（估到個個發達）。但，你學到嘅係，反省。唔好以為自己「判斷」好叻。如果真係成日睇錯嘅，就多啲分段，甚至多啲買指數算。總好過次次400蚊買100蚊沽）

第一季20億純利。OK我知下一季110億收入，咁純利幾多？全年呢？

19. 計數。第一季純利，20億。我知，股票炒將來，我清楚過你。公司話下季收入去到110億（業績講的）嘛。畀你四成純利率好未？（史上未見過，第一季係28%），44億純利，畀夠你50億（史上最叻一季純利只係剛剛30億）。年度化，一年200億純利。近10000億市值，都仲50倍市盈率。你話呢？

「車，貴可以更貴，幾多倍市盈率先叫貴丫？」。都冇定律

20. 當然，兩樣嘢。你可以質疑，幾多市盈率先叫貴幾多先叫平。呢個真係永無答案。不過，提你一樣好重要嘅嘢：Nvidia已經係間10000億市值嘅公司。有冇一間公司可以去到咁大仲維持50倍市盈率？好似唔係好覺。可能只有Amazon（呢間比較奇怪）。即使你話維持到咁嘅市盈率，上升空間又有幾多？你見蘋果微軟Google之類，都係三十幾倍，仲要低位都升返成五六成。

「可能佢純利可以季季一個開呢」—一個字：國際象棋棋盤

21. 第二，你可以質疑。我計200億盈利唔準。佢今季70億收入，下季就110億。今季20億純利，下季50億（我好樂觀嘅假設）　—　可能之後每季都可以咁上呢！咁就好快上太空（我諗起呢個國際象棋嘅故事）

22. 問題係，得唔得？我唔敢話一定冇可能。但再講一次，呢間己經係10000億市值嘅公司。唔係話冇得升幾倍，但，個純利可唔可能咁無止境升？

23. 以上，就係點解同你講，未買嘅，唔好買。

「未買，想買，回到咩位先好買？」—答到你就好咯。但，「舊年又唔買？」

24. 未買，但想買，回到咩位先買？呢個不幸地，係好難答到你嘅。因為，你睇半年前110時嘅慘況就知。嗰時唔好話買股票，你聽我講股票都冇心機啦，有啲人直頭話股市不景，unsub咗Patreon（其實咩邏輯？輸錢，唔爭在嗰100啦。話冇心機聽任何股票嘅嘢的話，其實真係跌市你先要聽，相反發癲大升市，你自己亂揀都贏錢啦。又一人性嘅弱點）

當你舊年想買，300蚊跌到200蚊飛入去。之後再輸一半，又頂唔頂到？

25. 假想實驗，舊年，330蚊跌到落200蚊，夠誇張啦？你覺得應該買啦。你今日睇，200蚊買 very good 添，一年贏一倍（無限project你好快就變首富）。但，之後200蚊跌到110蚊，你又係咪忍得住唔「止蝕」？

26. 所以？係冇答案嘅！咩位買？有錢咪買。有錢但又嫌呢隻貴？埃汾話太貴買好易中伏喎。都真係的。咁你搵其他嘢買，總有啲嘢，係你有興趣，而又唔係十分極之貴。

27. 又或者，真係做得到嘅，咪股災先時買。但等股災又可能錯失好多機會呀下，而亦唔擔保你撈底隻嘢唔會最後爆煲（例如SVB）—所以真係股災買貨嘅，仲諗咁多咩，SPY QQQ啦！公司會死，個指數唔會死嘛。（正如有人問我，美國真係「玩出火」（而家好似傾成了），咁買乜。當然買SPY QQQ啦，仲慢慢諗咩）

買咗又點好？下篇講。但，其實你睇我點做咪知

28. 但，買咗嘅又點好？讀者問得「持貨策略」，我相信即係買咗（否則你用字就唔係好啱了，冇買嘅，持乜？）。

29. 咁都易答嘅。宥幾難答？因為，我都買咗嘛。咁你見我點做，你咪知我建議點。咁你有冇見我沽丫？

讀者買咗10倍股，你有冇試過？

30. 買咗嘅？咪有得佢。我係一股都唔會沽的。你見我Facebook都有貼，有個讀者贏十倍。十倍喎，你試過未？但佢靠嘅係乜？係定力。

31. 驚唔驚跌返？驚架。但你要唔驚嘅，「塞錢啲落曲奇餅罐」。Day one已經話你知，你嘅回報係嚟自承受風險（但點可以減低？咪長線持有。）

32. 驚會跌返？咁你點解你唔驚佢會升多幾倍？

33. OK，但你話，聽我上面講，好似講到空間好似幾有限。「咁可能我錯呢」。

34. 詳細情況，下篇文講。

35. 但最後一個聽落好廢但好有用嘅建議：驚嘅，真係要take profit嘅（雖然我唔會）。咁我當你賺咗100%，咪沽一半，然後剩返嗰啲有得佢，最好睇少啲。跌到零你都冇輸到錢，萬一再升更不得了。

36. 乜話？你冇贏到100%？咁take 乜鬼profit？贏嘅股票，你贏得兩三成（甚至更少）。咁到你輸時點算？

37. 呀讀者一隻贏10倍，咁佢就可以其他股票輸錢啦。呢個道理，好似寫過多次。但有活靈活現嘅例子，又唔同講法。

38. 我隻Nvidia 贏300%，都未諗沽。留意舊年係一度變到水底咁滯，但我都冇理過。股票，唔係不停咁出出入入嘅。