Nvidia 業績前講「持貨策略」＋MMF系列最後感想。「我唔睇好股市所以泊住啲錢收住幾厘息」嘅討論。 (Patreon)

6月又有免費講座

Nvidia星期三晚出業績，持貨策略？

公司由330跌到110又升返上320，一年半嘅事。唔通有新發明咩？

OK，你話食正AI浪。但，Facebook SalesForce都係咁走勢。又AI？

升咗嘅，又驚跌返落嚟化為烏有所以想獲利呀可？但點解你唔驚佢再升？

如果出完業績大跌，又買唔買得？

MMF系列—後記。其實買唔買得過？好過存款咯。但why not neither？

呀重有，「估股市跌，所以收住幾厘息好過輸錢」

又貼多次呢個圖，5000個交易日，錯過最好嘅10個，回報得返一半

「點解用2021」 - 咁你咪自己計其他時間咯！

咁我最好嘅十日飛入去咪得咯！邊使搞咁多嘢。

「如果避得開最差10日，咪仲勁？」—咁點解要stay invested？

MMF系列應該完咗（第一篇，第二篇，第三篇，第四篇，第五篇，第六篇）。仲有兩篇备外篇講強積金，但不趕，可能去泰國先出（可能6月2號先去，因為6月1領展出業績請食飯，我唔係貪佢餐飯，係去問下嘢。我嘅個個月飛要斷纜了，唔好在Facebook踢爆我）．

不過，上篇講咗，仲有個關於MMF嘅結論，我呢篇下半篇會講。上半篇講Nvidia．我個人覺得，今次呢篇亦係寫得相當好，請剪存。

之後佛誕放假，可能休息幾日冇文，星期二繼續。幫你數埋，今個月已經出咗廿篇文，有啲仲寫到好長（包括呢篇），絶冇斬開呃件數。而今個月到而家都只係18個工作日。我知極無聊，我都覺得無聊，但真係有位讀者好似工廠監工咁嚟嘈我。

而我自覺呢個月嘅文，有量又有質，FRB，聯邦基金利率見頂，債務上限，日本股，MMF。唯一你可以挑剔就係有啲長氣，但呢個應該永遠改唔到的了。原因？解過了，再解又變咗長氣。

6月又有免費講座

1. 首先預告下，6月10日應該會又有個實體講座，都係星期六下午。大會問我1200-1400定1400-1600好，我揀1400-1600，如果好多人反對我就改1200-1400。照舊免費。照舊係券商贊助。之後再賣廣告，但上次長橋個開戶都唔係極理想，希望大家支持下一間合作伙伴，反正有著數拎。多得佢地贊助先有免費講座咋下。至於時間地點，我多數係冇乜say嘅，畢竟人地出場地　出埋嘉賓費畀我。

Nvidia星期三晚出業績，持貨策略？

2. 提一提，Nvidia星期三收市後會出業績。對我嚟講，係non event。出完再升固然好，出完大跌10%甚至20%我亦唔care（Facebook之前出完一業績一日跌25%我都冇理）。

3. 固然我可能會同你講下業績嘅重點（但多數都未必得閒講，都話仲有大把嘢寫）。但最後，你發現呢啲嘢唔係最重要嘅—　唔係唔重要，對你理解公司好重要。但同「股價」真係關係唔係最大。

4. 講乜？好簡單，2021年11月，公司股價330蚊。舊年10月，股價110蚊。而家，310蚊。一年半嘅事，跌七成，再升返近200%，係因為乜？

公司由330跌到110又升返上320，一年半嘅事。唔通有新發明咩？

5. 其實咪又係嗰間公司，咪又係嗰啲嘢！唔好忘記，佢仲要係一間超級巨企。唔係一間細公司發明咗隻新藥，或者搵到個大油礦咁。一路都係同一間公司，一路都係做嗰啲嘢。

OK，你話食正AI浪。但，Facebook SalesForce都係咁走勢。又AI？

6. 你會講，唔係喎，AI浪潮，今年先爆發，熱炒，「係未見即時好多盈利但埃汾話炒預期嘛」（呢個講法係啱嘅）。OK，但你見，根本連 Facebook SalesForce嘅股價走勢，都係咁上下。Facebook SalesForce又AI浪潮？唔好想當然，人講乜你就信。

7. 於是你見到，任何一間公司股價，係有好多「非技術」因素（我呢度指科技工程技術，唔係技術走勢嗰啲技術）影響。呢啲因素，無以名之，有人叫「sentiment」，畢菲特信徒嘅講法叫「市場先生嘅心情」。

8. 你亦可以叫「宏觀因素」，畢竟大家都知，成堆嘢（特別科技股）嘅走勢同呢兩年加息減息嘅預期好大關係，而唔係公司忽然有乜大突破，亦唔係因為AI熱（之前Google一樣勁跌又話被微軟追趕，然後又升返又話冇事）。你間公司盈利點，就次要。當然盈利差估值高就狂瀉跌得多啲，但盈利好估值低亦未必可以唔跌。

9. 所以有讀者問，Nvidia持股策略，我當然都係叫佢持有。跌七成我都冇驚過，你驚乜？真係唔放心嘅？咁以前寫過，「斬邊留邊」，你賺到100%嘅，咪沽一半，拎返個本，立於不敗之地，剩低嗰啲可以唔使再睇，當bonus．

10. 我就100蚊樓下買嘅，驚都冇驚過，斬邊留邊都唔使。唔通舊年10月去打靶？你話，咁你當時點知會升返？答案：唔知架！話知肯定係呃你，股市邊有得肯定。但，股市長線係升嘅，有核心競爭力嘅公司（「護城河」呀小朋友，當然呢個係一個好深嘅課題，甚至不能量化），總會升返啩？咁唔係隻隻升返，但照計都會升啩？

升咗嘅，又驚跌返落嚟化為烏有所以想獲利呀可？但點解你唔驚佢再升？

11. 乜話？你冇試過有股票升到100%？咁你功力未夠，同埋肯定係太冇耐性。我有一大堆股票升100%甚至更多（當然亦有輸錢嘅）。未升夠100%，我諗都唔會諗take profit．你驚跌返？咁點解你唔驚佢升多幾倍？而你揀嘅股票，應該係會長遠升的吧？

如果出完業績大跌，又買唔買得？

12. 至於你話未買嘅，如果跌落嚟買唔買？呢類問題，你都知我畀唔到個你好滿意嘅答案你。我嘅答案一定係，之前又唔買？而家升返近歷史高位，當然唔係好值博。咁但，都有讀者問過，「你買LVMH時都係歷史高位喎」，是的，所以歷史高位你當然都可以買，但唔好到時一買完跌兩三成又嚇走—因為佢亦可能升多一倍先跌兩三成。仲有，如有掙扎，其實都係買吧。但記住分散。

13. 呀當然仲有，佢唔會無緣無故咁忽然大跌兩三成。會嘅，一定有「壞消息」。冇嘅，市場都會作到有。市場冇作嘅，你自己都會疑神疑鬼。咁你就要克服呢啲「壞消息時照買」嘅壓力啦。因為冇壞消息，唔會點跌。唔跌，你又唔敢買。呢啲都係永恒嘅問題。到頭嚟你真係發現，唔好搞咁多嘢，有錢，想買，咪買。我都話我買股票連嗰日升定跌都唔會睇。

14. 有機會寫篇番外篇，可能放medium。因為會寫其他無關嘅嘢，同埋會有粗口。本人係嚴格保持Patreon唔離題唔講粗口的，「即使你覺得離題嘅都唔係離題」（即係呢度我唔會忽然講講下股票變咗講飲食）

MMF系列—後記。其實買唔買得過？好過存款咯。但why not neither？

15. 最後，其實都係返返最開頭嘅結論。買唔買得過？風險，就真係近乎冇嘅。咁同你你做銀行存款，或者啲錢放住唔用，照計MMF點都係更好嘅選擇。但你問我，當然我會話：為甚麼要放在銀行存款？

16. 計return，近乎無風險，好似5厘息，聽落就好吸引（但其實，收得幾耐？一年？）。咁所以啲人咪衝晒入去咯。啲人人衝入去嘅嘢，好少完全冇原因嘛，啲投資泡沫，多數唔會完全冇ground，正如啲假新聞往往都唔係全假，先有人信

17. 而放心嘅係，真係冇乜伏。唔會好似啲表面高息股咁可能股價大跌呀，之後派唔到呀咁，又唔會好似內房債咁爆煲或者重組。

18. 唯一嘅問題就係：你嗰5厘息，收得幾耐先？當然你話估今年都唔減息，咁你今年甚至下年收到3厘4厘，應該都係OK合理嘅估計。咁但，「咪即係同你做定期咁上下咯」（但佢嘅靈活性比定期好），咁係咪十分值得飛身入去嘅東西呢？

呀重有，「估股市跌，所以收住幾厘息好過輸錢」

19. 咁你話「你估股市會跌」，收幾厘息好過輸錢，就冇得講。但首先，「其實你買嘅股票應該係升多過跌嘅」（否則我唔係好明你投資嚟做乜）。另外，咁你即使話呢排MMF表現好，但美股德法日本今年都升10%啦。你啲MMF，有冇可能長期跑得贏股市？應該冇乜可能。

20. 咁你當然可以話，我而家收住兩三厘息先。「到減息嗰時我先飛入去買股票」，咁冇話唔得嘅。甚至你話等股災先買都仲得添。不過，太過著重去time the market，多數都未必有好結果。

21. 你亦可以諗下，你嘅「覺得股市唔掂」，有幾大信心，往績又有幾準。甚至應該年頭都好多人咁諗，結果5月未元美股歐洲日本都升咗10%．「你覺得會跌」，但all due respect，我諗冇人走去沽空下話？即係其實，你都對自己嘅「覺得會跌」唔係好有信心啫（你可以比較下：我覺得會升，我就100%買落去，邊個信心大啲？）。所以其實你唔係「覺得會跌」，你係「唔係好知點」—而呢個係好正常嘅。不過要克服呢種心態。

22. 亦都諗下，其實無數咁多人，都係因為「覺得股市唔好」，所以錯失好多投資機會。都唔好講舊年10月咁極端。但有邊年唔係「好唔明朗」？周街股神覺得冇風險嗰時，先最大風險，至少事後見到係咁。

23. 而照計冇乜人反對嘅係，你唔投資嘅，必定輸死畀通脹（否則你唔會睇我嘅文啦）。咁所庂，你去買MMF，本質上都冇乜分別，輸少啲咁咯。

24. 所以，有錢，點解唔買？一般嘅答案係，「等個好啲嘅時機」。咁你可以睇返19-23段。我一般見到，啲人都係錯失時機居多。早知沙士買淘大，早知2020年3月買，早知2022年10月買。但當時你一樣嚇死（我都嚇死，但我可以堅持照買）。

25. 當然仲有最簡單嘅定律，股市，係長升嘅。OK你話港股唔係，但港股都只係近廿年可能唔係，港股係特例定普遍現象？事實上，樂觀者必勝，長淡必死。冇人因為長淡而發到達。你同我講 The Big Short？OK，鄧小平日日煲煙都好長命添。仲有，人地都唔係長淡。

又貼多次呢個圖，5000個交易日，錯過最好嘅10個，回報得返一半

26. 重覆貼多次呢個圖。之前貼過類似嘅圖，總有人唔信服，話唔update，「過去唔代表將來」「羅素雞」「可能聽日美股清零」。

27. 好，今次數字update啲。2002-2021年，滿意未？二十年，5000個交易日。你錯過咗最好嘅10個，年度回報由9.5%變成5.3%，亦即係1萬蚊變6萬2，定係1萬蚊變2萬8嘅分別。10 out of 5000日喎，500舖行開一舖，兩年入面miss咗一日，已經回報冇咗一半。你真係afford到？

28. （順手留意，9.5%，magic number，嗰時寫Risk and return都有提，股市長期回報就係8-10%左右。咁應該有人聽過，近十幾年美股嘅回報係超乎地高嘅，不過其實2000-2010嗰十年就係相當差的，所以拉勻，都係唔夠10%。如果你只揀2010-2021就應該超過10%。都話平時啲文好有用，環環相扣）

「點解用2021」 - 咁你咪自己計其他時間咯！

29. 順手答埋一啲人對上面呢個圖嘅質疑或反駁。比較低層次嘅會講個time frame，做乜用2021—正如之前舊版本嘅圖都有人咁質疑，十分煩膠（sorry）．但可以話畀你知，啲時間搬前搬後，分別唔會太大。即時最尾嗰年股災，你影響嘅都只係1萬蚊係咪變6萬2咁多—但對於「錯失10日賺少好多」呢樣結論，應該完全唔會變。

30. 而其實，你係大可以自己用其他time frame的。但我知，你冇咁得閒嘛。咁好合理，所以你當然要搵啲好嘅source嚟睇，所以點解早排（其實耐唔耐我就講一次）同你講media literacy，都係有關的。你想減肥，但日日食薯片，好似我咁，邊幫到你？（講笑啫，我食少咗好多薯片，都瘦咗唔少。雖然最好嘅減肥時機應該係廿年前，但第二好就係今日）

咁我最好嘅十日飛入去咪得咯！邊使搞咁多嘢。

31. 仲有，會有人問。咁我試下捉呢10日咪得。但照舊，近乎係不可能嘅。其中一個原因，睇圖，以前都試過。因為最好回報嘅日子，往往就同最差嗰啲日子隔得好近，甚至係連住。你好難事前去「分析」到（不過你夠膽在每個大跌日後買，就可能有唔錯嘅回報，有機會開篇新文講）。

「如果避得開最差10日，咪仲勁？」—咁點解要stay invested？

32. 仲有一個比較有趣嘅問題：「如果我係避開最差嘅十日呢」—咁當然你嘅回報會好好多。於是乎你會問，扯，「咁我唔 stay invested，固然可能miss咗最好嘅十日，但可能我又避開最差嘅十日呢？計落未必蝕底」

33. 對於呢個問題嘅答案，其實都係統計兼數學嘢：股市呢，係升多過跌嘅。升嘅日子可能只係五成多啲，但日積月累拉埋，就係你見到股市升N倍嘅原因。

34. 以上種種，係我對於「我唔睇好股市所以keep cash」嘅睇法。

35. 仲有一樣：都有啲人真係會等股災先入市，而又說到做到。點捉股災，都唔係咁難，例如你睇指數高位跌四成呀，或者睇「傳媒封面指標」之類。

36. 不過舊文都有講，就算你真係做到，都仲有兩個問題：首先，當中你錯失幾多機會？美股可以升好多年都唔見一次股災。你等Nvidia高位跌七成110蚊先買，別人恐懼時我貪婪，而家你執近200% well done— 但我係100蚊樓下買嘅，你可能型啲，但邊個賺得多啲？

37. 第二，呢種玩法，你又可以買幾大？呢個盲點，係好多人忽視嘅。我多次提出，你1000身家萬拎100萬出嚟買隻嘢升五成，你嘅投資回報係5%，唔係50%（你鍾意可以計埋你900萬放MMF嘅，畀多2%你好未?）—而其實你合埋眼買ETF，一年10%，係冇乜難度嘅。