貨幣基金：乜東西？點解咁多人買？買唔買得過？點買？（最終回！）—MMF 點買？港股有冇得買？美股呢？拎到幾多回報？點解我唔買？結論。 (Patreon)

MMF最後一篇，遲下仲有番外篇講強積金。但記住，強積金唔好買MMF

MMF似存款，但冇得鎖定個息。如果繼續加息鎖定咪笨，但你估之後點？

咁，其實MMF可以拎到幾多回報？

拉勻，其實一年咪2厘回報，必定跑輸通脹

睇埋隻MMF嘅ETF

點解唔買MMF？好簡單，差不多必然跑輸通脹

點買MMF？（雖然我唔買）

有啲券商可以自動幫你啲錢轉MMF，但佢地啲frd底信唔信得過就你嘅事

港股都有MMF ETF！

比個簡單結論你，下篇畀個半篇文結論

1. MMF系列呢篇係第六篇。結論在第一篇，第二篇講多咗規模，第三篇就離咗題少少，第四篇就相當緊要，兼講埋長線投資，第五篇都緊要，講有乜情況會輸錢，兼再講risk and return．今篇第六篇，短期叫做完。

MMF最後一篇，遲下仲有番外篇講強積金。但記住，強積金唔好買MMF

2. 不過另外我仲有兩篇外傳會講強積金。係，強積金可以揀MMF，千萬千萬唔好揀。任何情況下都唔好。講完。

MMF似存款，但冇得鎖定個息。如果繼續加息鎖定咪笨，但你估之後點？

3. 上篇最尾講到，MMF雖然似存款，但你冇得好似定存咁鎖定息。MMF嘅息，係不停變嘅，否則仲得了？所以你MMF嘅4.5厘息（而家可能有5厘？），就只係valid for…….今日。

4. 實情上，就係日日變嘛，佢拎你啲錢去買短債做定期，有幾多息收到，咪畀返晒你。係唔會「保證」任何嘢的。咁佢收嘅息少，你咪收少啲。近排MMF嘅息係有時偏高嘅，點解？舊文有講啦，咪話啲短期美債債息抽咗上去，驚債務上限嘛。

5. 但，嚟緊如果睇減息嘅，照計你MMF啲收益就跟住減。或者就算唔減嘅，咁你MMF啲息都唔會再高。

6. 總之都係一句：你個息，就係鎖定一日。呢個亦係MMF同定期存款最唔同嘅地方。我當我今日去做定期，做4厘，都可能可以鎖一年。但你買MMF嘅，今日就5厘，但可能只係收幾個月，一個唔該9月減息，你啲回報咪跟住落。有辣有唔辣，所以你想要「鎖住」嘅，要知道一年幾多回報嘅，就只能做定存（或者買債都得，債券嘅債息咪就係你一年嘅回報）。

7. 所以某程度上，你買MMF，等於短期存款不停咁續咯

8. 另一角度睇，如果一路加息，咁鎖定咗定存咪蝕底（亦係同一原因，所以加息債價會跌！債券101講過），買MMF就一路跟升。

9. 不過，去到呢個位，你估之後仲有幾多加息空間？事後睇，最值得買MMF嘅時間係：2021年尾。

咁，其實MMF可以拎到幾多回報？

10. MMF可以拎到幾多回報？隨手搵，呢隻係Fidelity 其中一隻美金MMF，照計其他都大同小異。咁你見，每年都係多則2厘，小則近乎零。今年就應該會比較好，你見年初至今都1.5%，拉勻全年應該超過3厘。所以咁多人衝入去。

拉勻，其實一年咪2厘回報，必定跑輸通脹

11. 但3厘係咪常態？拉長少少，由佢隻嘢面世開始，1995年。一年就2%左右。當中經過不同嘅加減息周期了。當然之後十幾廿年嘅息口，就任你估。而我估都冇乜人真係買咁耐嘅。都係見呢排好似5厘息所以飛入去啫，但照計唔會拎到好耐（再講一次，定期你都可以鎖一年，呢啲就冇嘅）

12. 留意返同系仲有兩隻MMF，不詳解有乜分別，我上面嗰隻已經係最好回報。仲有，其實呢啲係feeder fund，即係……你買咗落去佢再去買其他嘢咁。但總之，個回報就係減走咗開支了

睇埋隻MMF嘅ETF

13. 睇多隻，都係Fidelity嘅，有隻ETF，SPAXX，應該差不多係同業中最大。 咁你見，回報都係咁上下．留意睇Total Return，佢就長期一蚊，不過個個月有息派．讀者有補充話香港嗰啲好似可以碌上去，咁理論上好啲嘅，但我就認為，你2% 3%咁碌上去，都係有點多餘。

14. 當你3%碌足咁多年都好（照計唔會有），都要24年先一個開。好似都幾好？仲要冇風險喎。但24年前啲嘢幾錢？你有咁嘅耐性，更加應該買股票啦！

點解唔買MMF？好簡單，差不多必然跑輸通脹

15. 好啦，然後返返去一個重點。我唔會買MMF，原因好簡單，同我唔做銀行存款一樣。因為，差不多係保證跑輸通脹的。

積金局話你知：MMF一年回報，0.6%。

16. 上面好簡單，係積金局嘅數據。你見到拉長嚟計，MMF一年都係0.6%咁上下，已經經過好多周期，差不多必然跑輸通脹。今年我唔知，可能好啲，但都話睇長線，一年做得好，改變唔到MMF差不多必然跑輸通脹。諗真啲都合理，因為近乎無風險就可以年年贏通脹？似乎唔係好合理嘅事。

17. 再講一次，唔好咁短視！唔好用一年嘅數就以為之後係咁。其實往往相反，一年差，往往下年會好，相反都係。

點買MMF？（雖然我唔買）

18. 好，繼續落去。雖然我唔買，但你問我都答你。點買MMF？都其實，有唔同嘅方法。

19. 首先，上面都有講，ETF。一大抽。美股有一大堆，好難答你邊隻最好，不過都應該留意下管理費。你啲MMF分分鐘一年先可能2%回報，咁有啲食咗你0.4%就都幾係嘢。

20. 另外，你個戶口係咪隻隻買到都係一個問題。我冇買過亦唔打算買，就不能幫你隻隻睇。例如上面講嘅SPAXX，我在IB見到，但都唔係好肯定買唔買到，好似搵咗隻係加拿大紙嘅。仲有，到底佢當係「基金」定「ETF」咁賣畀你，又係一個問題（唔明講乜？咁應該聽過買iBond都可以有得當債券咁買定係當股票冧把咁買）

21. 我目測，最尾嗰幾隻，符號三或四個字母嗰啲，就比較容易好似普通股票咁買。BIL，SGOV，CLTL之類，就富途都會買到。

有啲券商可以自動幫你啲錢轉MMF，但佢地啲frd底信唔信得過就你嘅事

22. 另外，其實唔少券商，都可以極之快速咁將你戶口啲錢放入去MMF。每間唔同，自己研究下。但例如富途嘅，直頭可以搞到自動化，有錢就自動幫你轉去MMF，例如你收咗股息呀，沽咗貨自己唔記得呀，都會幫你自動轉。係幾方便嘅，而且你要用錢時（無論係要買股票定提錢），都好快拎得返錢，可能一日。咁但當然了，佢嘅MMF唔會有晒所有選擇，當然係自己友嘅MMF，咁你怕唔怕中資管理人嘅MMF會呃晒你啲錢走佬，呢啲問題就唔好問我了。（不過話說回頭，你開得中資券商，唔驚你啲貨，反而去驚MMF，好似完全本末倒置。我就話你知我成球嘢在富途，冇驚過）

港股都有MMF ETF！

23. 另外，港股都有MMF嘅ETF買。至少南方東英有隻3053（我同佢地識，但冇收任何物質或非物質利益）。不過呢，我覺得麻麻地（證明真係冇收利益），除非你冇美股戶口吧。

24. 首先最初講過，如果係港紙嘅，MMF好似吸引力不大，做定期息都夠高，而且港紙MMF回報好似唔太吸引。自己睇文件。咁你見，之前幾年都係兩厘唔夠。今年會好啲嘅，年初至今都1.3%，全年可能去到近3厘？但都係低過美金啲MMF。原因？其中當然係因為港紙拆息低過美金。留意開支都差不多0.3%一年，但上面啲回報當然係扣除開支之後了。

25. 佢地亦同時有出美金MMF3096，咁你冇美股戶口都買得。年初至今都有近1.7厘呀下，全年照計可以超過3厘啩。開支去到0.43%

26. 另外，你可以睇埋佢地到底買乜，都有公開嘅。亦都有返兩三成係現水，應付你啲贖回需要，就唔會有乜問題嘅。

比個簡單結論你，下篇畀個半篇文結論

27. 其實仲有一個最最最後嘅結論，但都要寫千幾字，留返下一篇講半篇。兼講埋Nvidia，星期三晚出業績

28. 不過都比個極速結論你：美金MMF就好過美金存款（至少在美國係），但港紙MMF就唔見得有乜吸引了。仲有，MMF就似銀行存款，而risk return tradeoff好似好啲，所以應該好過存款。不過，why not 兩樣都唔揀？最後，你估一路加息，就當然係MMF著數過做存款或買債，不過，仲有幾多加？點都尾聲啦？就算你話唔加都冇咁快減，可以維持高息幾多年？一年？三年？投資講十年八年起碼喎。而強積金，就更加更加唔好買MMF

29. 我聽過有人講，「因為唔睇好股市」「因為風高浪急」，所以拎去park住啲錢先。但呢個往往就犯咗time the market嘅大忌，而多數人嘅timing都係差，正如多人舊年10月轉晒啲錢去保本基金。錯得很。低位沽咗股票，升返好多你唔覺啫，但諗真啲你輸多咗幾多錢？

30. 大原則，正係多人唔睇好股市，正係風高浪急，先往往最應該買股票。仲有，真係風高浪急？今年差不多買乜股都贏錢，日本德國美股，全部近雙位數回報。係，港股跌，但買港股贏錢都唔係極難（「仲有息收喎」）