貨幣基金：乜東西？點解咁多人買？買唔買得過？點買？（五）—MMF唔保本，咁有乜機會出問題？試過未？另外留意，多人買MMF之時，往往係經濟差。因為MMF吸引基於短息高，短息高往往代表債息倒掛，債息倒掛往往代表之後衰退　—　不過好重要：唔好因為驚衰退而唔買股票。2017年債息倒掛，之後2020年衰退，但當時到而家，標指升五成納指升八成 (Patreon)

你知MMF拎啲嘢買乜，咪知道有乜嘢會有機會出問題

「銀行爆煲唔係有存款保證咩」— MMF幾十億買落去，點保？

MMF試過Break the buck，投資者輸錢。咩回事？

不過同股票債券唔同，多人買MMF，係唔會影響佢嘅吸引力嘅。

另外留意下，MMF多人講嘅時間，多數都係冇乜好嘢

MMF多人買，多數就係短息高。往往係「債息倒掛」前，亦往往係衰退前

不過，唔好因為擔心衰退而唔買股票！

2017年尾債息倒掛，然後真係2020衰退。當時沽晒啲股票，而家點？

2017年尾債息倒掛，你驚衰退沽晒啲股票。後來真衰退，但美股升咗五成

下篇預告：MMF而家4.5厘啫，但你收得幾耐？唔同定存，冇得鎖一年的

1. 繼續講MMF系列。（結論在第一篇，第二篇講多咗規模，第三篇就離咗題少少，上一篇（第四篇）就相當緊要，兼講埋長線投資

2. 上篇講到，MMF唔保本。咁你要諗下，佢拎你啲錢，都係買短期美債，或者做定期。咁有乜嘢會出事？

3. 好簡單啫。MMF拎咗你啲錢去買嘢，佢買啲嘢出咗事，咪會輸錢！咁你咪會輸錢！例如最簡單，買咗美債嘅，咁然後美國違約喎，咁咪恭喜你，輸錢咯！（亦所以如果美國違約都真係天下大亂）

你知MMF拎啲嘢買乜，咪知道有乜嘢會有機會出問題

4. 咁，當然，美國就真係99.99999%都唔會違約，呢個風險你可以當冇啦，外星人侵略咩，聽日審判日咩。

5. 但，如果MMF啲錢拎咗去做定期（佢地係會嘅，做短期），或者買咗存款證，然後間銀行爆咗煲呢？咁銀行爆煲，就唔係好似美國違約咁外星人啦啩，唔係完全不用考慮嘅可能。你今年都見過幾次銀行爆煲啦

「銀行爆煲唔係有存款保證咩」— MMF幾十億買落去，點保？

6. 你話，銀行存款唔係有存款保障？係咪我買少過25萬美金MMF就冇事？er…..以我所知，在呢個情況，你隻MMF集埋咁多人，幾十億咁放落去，「就只係保頭25萬美金」（美國）。佢係將你地成班人啲錢group 埋落去嘛，受佢存款嗰間只會當佢係一個幾十億大戶。

7. 存錢去銀行都會爆煲？會！今年你都見過啦。但你話呢期啲存款（即使大過25萬美金嘅）全部冇事，係丫。

8. （不過留意返，SVB海外嘅存戶係會清零的，你甚至可以話美帝又過大家一棟，JP Morgan食咗SVB啲資產，

MMF試過Break the buck，投資者輸錢。咩回事？

9. 不過以前就玩過出事啦。邊間？之唔係雷曼咯！事實係咁，當時就出現過MMF Break the buck（睇呢度都有講，嫌長就中文兩句講完。），你隻MMF買咗雷曼嘅債（唔係香港啲師奶嗰啲），咪會有問題。

10. 類似嘅break the buck，以前都試過。咁但，應該每一次政府都會出嚟包底嘅，否則好似真係天下大亂。當然，「過去唔代表將來」，但我相信MMF輸錢嘅機會微乎其微，近乎冇嘅。

11. 好啦，但，針冇兩頭利啦。回報又好過存款好多，風險都係近乎冇。咁但，犧牲咗乜？就當然係冇upside了。冇任何upside的。所以你雖然都係買「基金」，但比較似做存款。再講一次，唔會有任何upside，你嗰一蚊，就永遠係一蚊。咁你留意喎，你買債或買債嘅ETF都有機會有upside，但當然你買債或債嘅ETF又會有downside，而MMF係應該冇嘅.

12. 咁你話，利息呢？哦，利息係有嘅，係會派返畀你的。但正係因為咁，咪唔唔會有upside。而如果我冇理解錯，就真係會派出嚟畀你的，多數唔會在入面滾存，個NAV（Net asset value）一路keep住1美金，即係唔會自動compound 上去（而銀行存款都係會的）—當然你可以收咗啲息再去買嘅。

不過同股票債券唔同，多人買MMF，係唔會影響佢嘅吸引力嘅。

13. 做個小總結，雖然好多人買，但在MMF呢個情況下，唔會影響佢嘅吸引力

14. 所以同股票或者基金甚至債都好唔同。股票多人買當然會貴咗估值貴咗值博率低咗，債券一樣，多人買自然債價升債息跌冇咁吸引。但MMF係冇呢回事嘅，理論上你好多人買落去，回報都一樣（當然你可以拗話我有幾百億幾千蚊美金衝入去，咁佢拎去做定期銀行都食唔到咁多，畀唔到咁高息，會郁到個市。但你明白啦，同股票債券啲價日日變得咁快係兩回事）

15. 仲有，提多句。所以「人人買就會貴你應該避」呢啲原則，應該不能應用落MMF。你細心啲諗咪明。所以唔好有時又話「你明明又話乜乜乜，點解而家又唔係，咪矛盾咯」。首先，投資世界都係有唔少矛盾嘅，法則都會因時而變，唔同資產嘅關係，即使維持咗十年，往往之後會變。另外，有時點解啲法則「唔適用」，只係你未諗得徹底啫。所以咪話唔好背法則，要靠你平時「浸」，了解背後嘅思想。否則你就會陷入「明明埃汾又話別人恐懼時我貪婪咁即係我嗰時應該買SVB啦」之類嘅問題

另外留意下，MMF多人講嘅時間，多數都係冇乜好嘢

16. 可以分享嘅係，以往好少人問MMF，MMF多人講嘅時間，多數都冇乜好嘢。例如幾時多人講？雷曼爆煲時咪多人講。

17. 不過放心，我唔係話嚟緊會金融大災難，「SVB咪爆咗煲」，所以先多人講MMF。

18. 另一個角度睇，正係因為聯儲局舊年咁大力咁加息，啲短息高過長息咁多（債息倒掛呀！你睇3個月債5.3厘，10年債先3.5厘），就令到呢啲MMF近排開始多人買。呢個亦都符合「多人講MMF就冇乜好嘢」 - 咁加息，梗係總有啲嘢出事。雖然事前未必知係美國啲細銀行，好多人係以為新興市場會爆煲先的（某啲國家都出咗問題，斯里蘭卡巴基斯坦之類，但相對細）

MMF多人買，多數就係短息高。往往係「債息倒掛」前，亦往往係衰退前

19. 呀仲有，你亦可以咁樣演繹「多人講MMF就冇乜好嘢」—留意，MMF好大程度就係「債息倒掛」嘅副產品：因為MMF專買短債嘛，咁即係短債債息高時咪多人會買（例如而家），而短債債息相對高，往往就即係「債息倒掛」。咁而以前好多文提過，你可能都聽過，債息倒掛多數都係代表不久之後會衰退

20. （不過，今次債息倒掛咗好耐，舊年3月已經開始，講衰退都講咗好耐，但都仲係未衰。當然，你亦可以話舊年车年中美國GDP連續兩季負增長，根本已經「衰退咗」，只係美國政府唔認。但我都傾向覺得唔算真係衰退。

不過，唔好因為擔心衰退而唔買股票！

21. 呢度我想講多兩句嘅係：唔好聞「衰退」而色變。又要插播，因為至怕你自作聰明，MMF多人買多數即係短息高喎（而家係），多數即係債息倒掛喎（而家係），好可能之後衰退喎（都好多人講，遲下先知），「所以」我唔好買股票（超錯！）

22. 好多人問，可能會衰退喎，咁點？冇乜點。即係你問美國可能違約，咁點。或者中國可能打台灣，咁點。都仲可能要討論下，因為你未見過。但衰退，你未見過衰退咩？有乜咁驚？

23. 首先，你好難估到去到邊個位先衰退。另外，到「確認」衰退（美國有官方宣佈），往往係已經復蘇咗一排。當然仲有，有時啲定義，都係十分彈性（例如舊年年中GDP連續兩季負增長又唔算）。亦有可能講極衰退結果都冇（好似今次咁）

2017年尾債息倒掛，然後真係2020衰退。咁你當時沽晒啲股票，而家點？

24. 再畀多個例子你，2017年都見過債息倒掛，咁亦都估之後會衰退。估下結果有冇預測成功？係有的！之後幾時衰退？正係2020年疫情大爆發時。好啦，但你知道發生乜事啦，2020年3月聯儲局「無限QE」，然後標普指數之後創出歷史新高。

25. 問題嚟啦喎，如果時空倒轉去到2017年年尾，你見到債息倒掛，然後話「喂呢個係衰退先兆喎」，「咁所以我唔好買股票先」。結果中唔中？中呀。真係衰退。雖然等咗成兩年。但問題係乜？標普指數，2017年尾，2700點唔夠。而家，係4200點，升咗超過五成，更加唔好講納指升咗八成。

2017年尾債息倒掛，你驚衰退沽晒啲股票。後來真衰退，但美股升咗五成

26. 於是你見到，「怕會衰退然後唔買股票」會出現乜問題。

27. 一個好簡單嘅例子，又同你示範幾樣嘢：第一，唔好因為「驚衰退」而唔買投資，可能未必衰呢，可能好耐之後先衰呢，最重要係：衰咗退但股票都係遠高過你諗嗰時。第二，「直線思考」嘅問題，「債息倒掛　之後就會衰退　之後就會跌　所以我唔好買」，每個步驟都好似啱，但結果標指升咗五成納指升咗八成。第三，多數人都係買得太少股票，唔係太多。最後，「回顧」嘅重要，「trade log」（或者寫日記）嘅重要：唔係我搵返啲新聞，你照計都未必記得2017年年尾你嘅心情（BTW，2018年就特朗普加關稅，全球股市大跌，你更加唔會買。2020就世紀疫情，真係衰退了，真係股災，你嘅「擔心」成真，又更加唔會買）

28. 下篇繼續，亦唔好怪有時少少離題。往往就係會諗到啲歷史上嘅故事，畀你諗返更多嘢。

下篇預告：MMF而家4.5厘啫，但你收得幾耐？唔同定存，冇得鎖一年的

29. 下篇會講嘅係：你MMF而家話4.5厘息，或者5厘息。但你收得幾耐？佢啲息係日日變嘅。呢個就唔同你去「做定期」啦。你做定期嘅，你做咗一年5厘息，話知聽日世界大戰美國減息減到零，銀行都要畀足一年嘅5厘息你。同樣地，你買美債都係「鎖定」咗回報的，我買隻美債，知道債息，就係我坐到尾嘅回報。固然中途價格可以上上落落，但除非美國違約（你當冇可能啦），否則一定係每半年就畀返咁多票息你，到期就還返個100蚊本畀你，完全「鎖定」嘅

30. 但，MMF嘅息，今日5厘，可能聽日就變返3厘。呢個係一個有啲人忽略咗嘅地方。再講一次，銀行定期就真係可以鎖定半年一年，債券都得。MMF唔得。當然你可以拗，「可能啲息仲有得升呢？」，但現實啲諗，你可以估下美國嚟緊一兩年嘅息口，仲有幾多上升空間？升嘅機會大定跌嘅機會大？

31. 所以你見高息飛入去，有冇諗係咪可以持續？不過放心，買MMF，就唔會好似你買高息股咁中伏嘅。最差你都係之後啲息低啲，基本上冇可能輸到個本金嘅。仲有，你可以隨時走人啫，理論上唔會蝕錢。跑輸通脹或錯失股市升浪另計