貨幣基金：乜東西？點解咁多人買？買唔買得過？點買？（四）—點解美國存款息咁低，啲人又唔走？點解香港存款冇走？因為存款息高，同MMF息低（但又點解？）。MMF會拎你啲錢買乜？會唔會贖回有問題？會有乜風險？唔保本喎，咁咩情況會出事？仲有，點樣減低風險。點解要長線投資 (Patreon)

點解美國存款息咁低，但香港就好似高啲？點解香港存款又冇流失？

港紙存款冇乜走？因為存款息較高。仲有，港紙MMF低息。但又點解？

點解美國存款得0.5厘息，但啲人之前仲肯存落去？因為，唔止睇息嘅

咁又回返帶，存款大量流失而爆煲嘅銀行，係有共通點嘅：就係大客！

回到最初：咁其實你買咗MMF，會發生乜事？佢拎你啲嘢買乜？點派息？

任何情況，有人話你知派X厘息畀你，你都要問下：咁佢背後拎去做乜？

怕唔怕變SVB？會唔會你贖回時佢要打靶沽債？變咗SVB？

咁MMF，即係「餘額寶」？同你存錢在蘋果收4厘息又有乜唔同？

蘋果畀4厘息你，咁佢賺乜？答案係冇得賺的

MMF高回報過存款，當然就會多啲風險。咁實際上，有乜機會出問題？

老問題：Risk and return，你可以爬到條線嘅邊個位？

如何「管理」風險？唔好諗啲屎橋。畀啲實際方法你

點解長期投資可以減低風險？

0.  呢個系列冲我估暫時呢篇最重要。

1. 繼續講MMF系列（結論在第一篇，第二篇講多咗規模，第三篇就離咗題少少）。

點解美國存款息咁低，但香港就好似高啲？點解香港存款又冇流失？

2. 上一篇（第三篇）用咗唔少篇幅講啲「離題」嘅嘢，講media literacy．但去到最尾，我提出咗個現象：點解美國啲存款息咁低？而香港就好似比較高？

3. 另外，仲有一個現象：因為不少原因，港紙啲貨幣基金回報唔係太高（陣間會講），應該唔會有4.5厘　—　所以，所謂「存款流失去MMF」呢樣嘢，只係美國（或美金）先見到！港紙係冇呢樣嘢的！因為港紙存款相對高息，港紙MMF就相對低息。

4. 而你亦見到，港紙存款係冇乜跌嘅，美國存款就大跌（之前貼過圖），唔通我又話美金爆煲咩。但你見港紙存款跌就好多人講港紙爆煲。又話人人移民拎走晒啲錢，又話外資基金搬走，好好想像力　—　呢啲咪睇得多垃圾嘅後果

點解港紙存款冇乜流失？因為存款息相對高。仲有，港紙MMF低息。但又點解？

5. （順帶一提，港紙MMF息低嘅原因（陣間畀你睇下有幾低），可能包括埋拆息嘅息差，留意之前港紙拆息低過美金成厘都有。亦因為咁原因，你見到早排經常都掂到7.85，就只係因為個拆息低，而唔係乜鬼「外資沽貨」，唔好咁低水平）

點解美國存款得0.5厘息，但啲人之前仲肯存落去？因為，唔止睇息嘅

6. 然後你會諗到嘅第二個問題：點解美國啲存款息咁低？又或者話，點解啲存款息咁低，啲人仲肯存入去？

7. 呢個問題就幾有趣。不過首先，任何地方嘅存款，都唔止淨係睇息口。否則唔會有咁多近乎冇息嘅儲蓄戶口同往來戶口，你啲資金靈活性都好重要。

8. 仲有一個講法（唔知你地睇唔睇到呢篇），唔知係咪事實，但應該個方向係啱：我之前嘅文都有寫，你留意到SIVB，Signature Bank，FRB之類，都係有個共通點的：就係存款集中。亦係呢樣嘢，解釋到「加息」唔係最大死因，債價跌都唔係最大死因（明明今年第一季升返啦），點解一樣咁嘅宏觀環境，但其他銀行冇事，佢地死先。

咁又回返帶，存款大量流失而爆煲嘅銀行，係有共通點嘅：就係大客！

9. 點解呢啲「大戶」甘願收咁平嘅利息都存錢？好多原因。有話係FRB之類服務特別好，我相信都有啲感情因素，或者其他表面未必睇到嘅嘢。例如SVB堆大戶，講過啦，初創企業。最初係冇大銀行肯做佢地生意。咁唔知係因為交情好丫，定係轉去第間銀行太花時間丫，定本身friend底。總之，SVB FRB之類，就之前用好低嘅存款利息，都留得住啲客

10. 咁但，講感情都要計錢嘅。可能因為啲初創公司都唔掂又好，最後發現出面啲MMF越嚟越吸引又好。一個走就個個走都可能係原因。總之去到某個位，啲存款就流失晒去MMF了　—　然後，都講咗，惡性循環，啲人見銀行爆煲，就有時更加會將啲存款拎走去買MMF　—　反正媒體又有講。計落好似風險好似只係多少少，但回報高咗好多（反正呢啲大戶本身啲存款都唔受保障（只保25萬美金），MMF唔保本，存款都唔保架啦）—忍咗多年低息，又聽到咁多人買MMF，仲驚間銀行死，咪走人。

11. 所以，MMF同之前你見到啲銀行爆煲，係十分相關，互為因果嘅。拿，再講一次，啲嘢全部有關的。

12. 亦因為美國嘅情況同香港唔同，所以你見到美國就有呢種存款流失去買MMF嘅嘢，香港就唔多覺（亦因為香港嘅MMF息低，而存款利息又相對高）

回到最初：咁其實你買咗MMF，會發生乜事？佢拎你啲嘢買乜？點派息？

13. 話說回頭，到底MMF係乜？之前提過，即係好似銀行存款同買短期美債咁。實務上，咁你買咗隻MMF，會發生乜事？佢派息畀你，但佢啲錢邊度嚟？（任何情況你都要問嘅嘢：人地啲錢又邊度嚟？）。佢會拎去買乜？會唔會拎去炒股票放貴利？

14. 呢個定律係好基本嘅：即係，你存去銀行先得0.5厘咁話，然後呢條友（MMF）可以畀4.5厘你—但佢又點解可以拎到咁高息，令佢畀完你4.5里你都仲有得出糧交租？

任何情況，有人話你知派X厘息畀你，你都要問下：咁佢背後拎去做乜？

15. 你可以睇invescopedia，但我簡單解你知：就係佢會拎你啲錢，去買返啲短期而又夠流動性嘅嘢，可能係短期美債，可能係拎去做定期（佢大額個價可能靚過你），可能係買存款證。每一隻會有寫買咗乜。

怕唔怕變SVB？會唔會你贖回時佢要打靶沽債？變咗SVB？

16. 留意一定要咁，有限定的，佢不能拎咗你啲錢然後去買長債，甚至拎去炒股票。至少美金嘅MMF，有相當幾詳細嘅限制。例如至少一成要買聽日收得返錢嘅嘢（實際上就係啲repo，之前債券101解過係乜，唔好又話悶又話冇用），至少三成要買一星期內收得返錢嘅嘢。

17. 明報嘅文有好詳細講。所以，應付你啲贖回壓力，就冇問題嘅，唔會好似SVB咁拎晒去買長債，然後被迫沽貨輸錢。就算真係忽然好多人贖回，佢要沽債券　—　咁都係短債啫。而短債啲價唔會好似長債咁發上發落咁勁嘅—寫過架，duration呀！唔好又話冇用又話悶

咁MMF，即係「餘額寶」？同你存錢在蘋果收4厘息又有乜唔同？

18. 有人話，即係好似「餘額寶」，或者蘋果畀4厘息你咁。拿，兩者就有啲分別。餘額寶，就真係MMF了。

蘋果畀4厘息你，咁佢賺乜？答案係冇得賺的

19. 但蘋果嗰款，就唔係好同嘅，受存款保障的。順手講埋，蘋果畀4厘息你，你又可以問：咁佢賺乜？答案係：照計會蝕畀你。不過，人地搶客嘛，到養咗成班人用，慢慢收割就未遲。蘋果用戶出名黏性大。咁你可以話佢拎去買MMF收4.5厘咪得—但，仲有其他開支嘛，況且MMF 4.5厘唔知有幾耐，但佢畀你4厘息係長啲嘅（不過，之後都應該會調低，燒錢吸完客就調低啦）

20. 呢度強調一次。MMF，係唔保本的。即係話，係可以輸錢的。亦即係話，你入面嘅錢，係唔受存款保障的，香港同美國都冇。好合理，因為你啲錢都唔係放咗在銀行。

21. 好啦喎，記住大原則：高啲回報，差不多一定高啲風險。MMF，既然好過放銀行，都係會有多些少風險嘅。上面講咗，唔保本的。

MMF高回報過存款，當然就會多啲風險。咁實際上，有乜機會出問題？

22. 咁實際上，會有咩機會出問題？你可以估下。下篇解。但呢篇文未完，之後仲要講啲重要嘢。

老問題：Risk and return，你可以爬到條線嘅邊個位？

23. 最後，應該唔算大離題，但又講risk and return。唔好自欺欺人 —MMF當然係有風險的！但個風險就真係好細。

24. 幾時都係至怕有風險你當冇，然後瞓身買落去，全副身家旨意領展派息匯控派息供你個仔讀書（咁佢唔派你咪坐響度？）。又或者明明低風險你自己倍大佢，例如啲友借孖展買內房債呀咁。

25. 但另一方面，亦唔好聽「風險」就驚　—　係梗係有風險架啦。你MMF買足成世嘅，都係保證跑輸通脹的。買股票有風險，唔買就仲大風險。因為有通脹。

26. 關鍵係第二篇文有略提嘅，我到底係多少少風險但回報好一截丫，定多好多風險但回報只係多丁碎咁多。亦即係你在條risk and return 線上面，點爬法

27. 固然未必可以量化（但長期就可以！正係risk and return系列文做嘅嘢），但至少明白個原理。例如MMF 同存款比嘅情況，咁幾明顯就係多少少風險，但回報好一截，值得諗（但，只係MMF同存款比嘅情況　—　你問我，就係兩者都唔要）

28. 於是可以返返去最high level嘅資產配置，其實就係爬條線嘅問題：你全部放銀行嘅，風險極低，但回報肯定低，明啦？咁我100%債券（例如包埋企業債）嘅，風險多少少，但回報又再好少少。50-50，一半債一半股嘅，風險再高啲回報再高啲。100%股嘅，當然風險回報更高。仲唔夠？其實可以再爬！即係點？借錢買股票咯（唔好試）。金融計數上，就即係 -10 : 110，甚至 -50：150。

29. 問題嚟啦喎，要爬到去邊個位？當然因人而異，亦同你年紀有關（之前講過退休嘅情況啦）。但畀啲例子你，大家都會同意，你100%存款，風險夠低但回報實唔夠。

30. 其實我主張嘅100%股票，就係一般人可以承受到嘅極限—甚至我發現好多人都未必得，但我得。Risk and return文有寫過，100%股票，咁你長期預8-10%一年，應該還好。

31. 但大家知啦，100%股票，都唔係人人做得到，明嘅　—　但我想講個問題：既然100%股票你都受唔到，咁真係唔使問我點解唔好借錢買股票！全副身家買股你都受唔住啦，仲要150%？

32. 最後，再講一次，唔好諗埋啲異想天開嘅嘢去「管理風險」，絶大多數都唔work．例如你講日本股，你買HEWJ係對沖咗日圓風險，但針冇兩頭利，日圓升嗰時你就大跑輸。

33. 同樣地，好多啲「管理風險」都係呃神騙鬼。我就畀個問題你：你當我100%買晒Nvidia，咁點「管理風險」？唔通我去買put option？定去沽空佢？呢啲叫「對沖」？

如何「管理」風險？唔好諗啲屎橋。畀啲實際方法你

34. 實際上，比較可行嘅方法，我寫過：分散！唔好買晒Nvidia，咪降低咗風險。仲有，唔好只係美國股，咪降低到。或者你唔好100%股，咪降低到（但回報會低啲）

35. 不過仲有一個，講極都唔會有人聽嘅方法：坐得長。

點解長期投資可以減低風險？

36. 如果你唔信坐得長可以減低風險嘅，睇上面嘅圖。投資年期長期長短，同埋每年回報嘅分佈。例如坐一年嘅，最叻可以升54%，最差可以輸43%。但你坐十年嘅，最叻可以一年20%（係一年！唔係十年加埋），最差都只係輸1.4%。

37. 坐廿年嘅（肯定畀你噓），根本冇試過輸錢，最差都有3%。最好呢？18%。仲有，呢度嘅中間數，就大約係8-10%一年。

38. 如果你都唔明嘅，我都冇乜嘢好講，可能你唔明咩叫風險？明明見到個圖嘅一碌碌柱越縮越窄，咁咪即係風險越低咯！Dispersion嘛！deviation from expected outcome嘛！之後risk and reward系列再寫。

39. 對於上面個圖，歡迎你畀啲意見我，甚至challenge 下，因為我覺得呢個圖好震憾。話畀你知點解要坐得長，點解我唔會短炒，同埋話你知點樣可以減低風險—　但十個有九個都唔信的，點解？