貨幣基金：乜東西？點解咁多人買？買唔買得過？點買？（三）— MMF 比較能全面反映聯儲局加息．存款就跟唔足（但香港就比較足）。兼講點解＂Good Read＂難重出江湖 (Patreon)

點解Good Read難重出江湖？因為好嘅免費文越嚟越少。

訂個傳統媒體，七八舊水一年，香港人食餐飯都冇咗—但邊樣有益？

「算法」就係毒害你大腦嘅東西—所以我買Facebook Google

唔上社媒都仲得，但你總不能唔用Whatsapp—所以，而家好難做畢菲特

唔好有個心態，覺得「睇唔晒」就蝕咗

舊年第四季，你睇啲股災新聞，對你有乜意義？但有人叫你買就有意義啦

1個月美債6厘，1年美債5厘，存款得0.5厘—啲友梗係走去MMF啦

傳統上，MMF反映九成聯儲局嘅加減息，但存款只反映兩成幾

存款利率跟唔足唔奇，但點解香港又比較足？

1. 好，繼續MMF系列。上星期出咗第一篇，昨晚出咗第二篇。不過今篇會半篇離題補充少少嘢先。

2. 第一篇有提過曾國平篇文，寫得相當好。好多人提過，希望「Good Read」呢個環節可以重出江湖。我好似半年前都話過有機會，但結果都冇。

點解Good Read不能重出江湖？因為好嘅免費文越嚟越少。

3. 個難處係乜？唔係因為冇好文，而係其他原因。首先，平時我已經好多嘢未寫，再寫埋Good Read又會變咗答唔到讀者問題，又唔講市況，又會有啲讀者未必高興。

4. 另外，主要原因係免費而好嘅文越嚟越難搵！即使你講華文媒體，好多時例如信報嘅文，都要訂戶先睇到。Economist Bloomberg之類更加不用講。咁我又總不能成日copy過嚟（雖然偶然都會）。

5. 即係，到時我貼咗幾篇文，但你睇唔到嘅，你又覺得我混吉啫。當然，如果你地多人話冇問題嘅，都係可以嘅。

6. 而我亦都要講一樣嘢：你係應該畀錢訂嘅。呢個同文字有冇價無關，N咁多人搞Patreon，你唔會唔使亦唔應該個個支持。但我指嘅係一啲媒體。

7. Economist Financial Times之類，係貴嘅，啲嘢又有時幾深，你都未必有時間睇，所以我覺得你唔訂情有可原。但例如香港嘅媒體，信報明報之類，七八舊水一年。得罪講句，以香港人嘅消費，食餐飯都冇咗啦。（唔好話我知你有食過七八舊水一餐飯呀，香港地，Playgroup茶點都食Omakase飲十四代啦）

8. 但你諗下個效應爭幾遠？你話冇時間睇晒，甚至有時全日望都唔得閒望，OK架。冇人要睇晒（除咗我咁得閒）。但唔好有個心態覺得「蝕咗」。你偶然有幾日會睇，都值回票價啦。再講一次，七八舊水，你真係食餐飯冇咗。但夠你訂一年嘅傳媒。邊樣對你有益啲？

訂個傳統媒體，七八舊水一年，香港人食餐飯都冇咗—但邊樣有益？

9. 你見我一直批評社交網上嘅東西，多數都係垃圾。好簡單，因為唔使錢，咁一定係會特登討好你，令你上癮，越睇越渴，想睇多啲，必定係圍爐，討你所好。呢啲就係壞習慣。你睇傳統媒體，好處就正如曾國平篇文講，作者面對嘅受眾大，唔使特登討好你。

「算法」就係毒害你大腦嘅東西

10. 況且，絶大多數社交媒體都有一定嘅「算法」，總係會推啲你鍾意嘅畀你，多人睇嘅嘢畀你，而呢啲嘢多數對你冇益。即使你講Whatsapp TG之類，應該冇「算法」，你啲朋友，你啲群組，都係物以類聚，成班都係圍爐架啦，是為「人肉算法」—甚至係你唔想睇嘅嘢，都總有啲炸谷嘅谷友不停send出嚟，冇得避。

唔上社媒都仲得，但你總不能斷網唔用Whatsapp—所以，而家好難做畢菲特

11. 記唔記得成日講：多數人，多數就係錯。舊年10月11月時，你睇親社交媒體，都係哀鴻遍野，你一定會受影響，覺得世界末日—而其他觀點你係睇唔到嘅。況且，你唔上社交媒體都仲得啫，但你總不能Whatsapp TG都唔上啩？咁你自然都係會畀人轟炸到的

12. 以前寫過，點樣唔咁易畀股市波動影響到你情緒，點樣避免高追低沽？好簡單，睇少啲股票，睇少啲新聞。但，你總不能斷網，你唔上社交網，Whatsapp都不停會有人send畀你，甚至tag埋你問你點解。「Nvidia 300蚊跌到100呀，大師點睇呀？仲話睇好？」（FYI 剛剛上返300蚊了）

唔好有個心態，覺得「睇唔晒」就蝕咗

13. 所以最後講埋，唔好話我知「車咁我上社交媒體咪又係睇到傳統媒體啲，　佢地好多嘢放免費添」＝問題係，你已經畀個「算法」騎劫咗。咁應該點做？你唔一定要學我咁拎返實體紙嚟睇（雖然我覺得係最好嘅方法，但後生嘅真係唔會做），但你上網睇嘅，直接上佢地網站　—　個重點係，你去睇，唔係靠「算法」feed畀你—咁你先有機會睇到啲平時未必睇嘅嘢。（而實體報紙雜誌嘅好處，就在呢度：你即使跳嚟睇，都可會掃過某啲嘢，吸咗你埋去。上網站嘅呢？有好多人就只係睇自己鍾意嘅section，我睇完金融就算，「中國」「體育」我係唔睇嘅，咁就永遠接觸唔到某啲嘢。當然如果係社媒就最衰，根本你鍾意嘅section都會好多嘢錯過咗）

14. 順帶一講，鬼媒就真係唔會免費放啲嘢出嚟，Financial Times, Economist, New York Times之類，差不多全部都收費，係港媒先會咁多嘢放免費。雞同蛋嘅問題，唔知係佢地啲料本身唔得冇人肯訂，定香港人唔會去訂養唔起）

15. 對，真係最後一講，社交媒體真係萬惡的　—　所以我買Facebook Google嘅股票，絶對係精神毒品，我拎返佢毒害我嗰份。

16. 講咗大半篇media literacy，當然係為你好。唔係我牙刷，但我成日會講，好多人不停將啲時間同精力留意啲不重要嘅細節，Nvidia放300蚊買好定305蚊買好，想買美股咁5月買好定6月買好—而冇去留意，自己有啲大想法係錯咗嘅，或者冇乜價值嘅

舊年第四季，你睇啲股災新聞，對你有乜意義？但有人叫你買就有意義啦

17. 例如開講座，往往啲觀眾個問題都未問完，我已經知佢係有乜想法，想問乜—因為佢地睇啲嘢，就九成係嗰期多人講嘅嘢。咁其實人人都知嘅，有乜價值？舊年10月11月我同你講多呀，二十大權鬥呀，科技股泡沫爆煲呀，記得換晒啲MPF去保本呀　—　對你有乜意義？你周圍嘅人都咁講啦。但，如果我叫你唔使驚，就有意義啦。不過，現實上，跌市中，人係恐懼勝過一切，所以你只會見到啲人好悲觀嘅睇法。正如到牛市泡沫時，所有你見到嘅故事都係股神，呢個又NFT賺幾錢嗰個又meme股唔使做。

18. 最後（真係最後）補多句，有時我貼明報信報啲文，可能訂戶先睇到，我自己都未必知（亦因為咁我有時都唔敢貼）。咁但你除咗可以聽我引述外，有時你Google下都會搵到成篇文嘅。

1個月美債6厘，1年美債5厘，存款得0.5厘—啲友梗係走去MMF啦

19. 講返我地嘅正題MMF。上篇文有講到，MMF嘅規模，往往係比較壞嘅事件時急劇增長，之後就散水。其實你諗下原因好簡單，因為爆大鑊就往往減息，啲錢就唔會泊MMF了。

20. 另一個上次篇文講嘅問題：點解聯邦基金利率5厘，MMF 都4.5厘甚至更高，1個月美債可以上到近6厘（債務上限危機嘛），1年美債都5厘—但美國銀行嘅存款，低到係0.5厘？真唔真？

21. 答案係：的確係咁。美國嘅銀行，畀嘅存款利息相當低。我唔知係佢地唔興做定期存款定乜。總之，係好低息的，亦即係聯儲局加咗息，啲存款息都唔多跟。

傳統上，MMF反映九成聯儲局嘅加減息，但存款只反映兩成幾

22. 明報篇嘢有寫到個幾有趣嘅現象：聯儲局加減息嘅效應，MMF大約反映到90%，但銀行存款只係反映到25%左右。

23. 前者好合理，因為MMF好多就係買返短期美債（一至三個月），咁而寫過短期債息就會好跟聯邦基金利率。

存款利率跟唔足唔奇，但點解香港又比較足？

24. 後者嘛？銀行存款利息，跟唔足，都唔係好奇怪。但你應該發現，在香港嘅情況，好似冇咁嚴重。至少你仲有啲四五厘嘅定期。到底美國有冇？好似少啲。

25. 好啦，咁點解香港啲存款息好似跟得足啲，冇美國咁低？仲有，點解美國存款息咁低，啲友之前都仲肯放落去？就下篇講。

26. 下篇一定冇咁多離題，雖然我覺得離題嗰啲先最重要