貨幣基金：乜東西？點解咁多人買？買唔買得過？點買？（二）　—　MMF 規模冈幾大？做乜個個衝入去？歷史上又咩情況下會見到咁？銀行流失存款，因為息低。但有幾低？ (Patreon)

日本股文總結：最緊要你有買。

「又叫人唔好等又叫人分散咪矛盾咯」

Revisit：到底貨幣基金MMF係乜？買唔買得過？點買？做乜咁多人買？

MMF回報高過存款，咁當然風險高啲，唔保本—但都係抵過存款

點解MMF咁多人買？表面因為加息，但亦因為銀行爆煲。甚至互為因果

銀行存款低息，啲友咪提走存款買MMF，銀行就出事　—於是啲人更加走

MMF規模有幾大？走勢點？仲係咪一路湧緊入去？去邊搵data？

近期MMF規模幾時急升？之唔係3月。正係銀行爆煲時

再睇長啲嘅歷史，MMF規模咩情況下會急升？

MMF規模：05年抽上下，08年開始跌。20年頭狂升，之後又跌。點解？

2022年加好多次息，MMF規模都未勁升。今年先嚟料，點解？

回帶：點解銀行爆煲？因為流失存款。點解流失？因為息太低。有幾低？

Fed Fun rate 5厘，MMF4.5厘，唔意外。但存款點解得0.4厘？

1. 會講返貨幣基金MMF，之前寫咗篇開場，個系列都長，好似仲有四篇（！！），前後六篇。但寫完了，呢幾日出晒佢。除咗MMF，又會同你講埋到積金，同埋又重溫一啲投資基本嘢。

日本股文總結：最緊要你有買。

2. 插播咗兩篇日本股（呢篇，同呢篇），好大工程，加上唔太舒服（近排都係咁），所以今日先有文，但照計啲文章數目好足的。

3. 況且，近排日本股都仲繼續升，亦唔係太多人寫，就算有寫嘅都係好罐頭嘅嘢。我嘅文就幫到你，夠及時。

4. 當然最重要係你有買，而我一早就有買亦有叫你買。你不停咁諗買邊樣好，幾時買好，係往往錯失機會嘅。

5. 你話，唔係喎，都係一半半啫，升咗你就覺得錯失機會啫，但如果跌咗咪避免損失，或者係更好位入市咯。資深讀者應該知道我嘅答案：你睇嘅嘢，應該係升多過跌嘅。所以正常係等得太耐，而唔係太急。

「又叫人唔好等又叫人分散咪矛盾咯」

6. 咁然後又會有人問？咁你叫人分散，但又叫人唔好等，「咪矛盾咯」。如果我真係一大舊錢飛入去摸晒頂，咪會出事。你應該問，最初點解你會碌到一大舊錢？往往咪就係因為一路等等等！

7. 當然了，有啲情況，可能你中咗六合彩，賣咗樓搬去英國，或者拎咗舊大嘅遺產，咁就真係不能一下飛入去。呢啲情況下就當然要慢慢分散入市。

8. 但，正常人嘅，咪有錢就去買股票咯。不一定真係要硬性月供（但其實係幫你儲錢），不一定要個個月買，但都唔好話積埋幾年先買咁咯。

9. 講多樣嘢。個人覺得，呢兩值七八十分，有埋舊同事個Excel就值八九十分。請畀個讚。當然，唔同意嘅，亦唔使勉強。

10. 但在我自覺寫完篇好文後，容許我講一句：寫得好嘅，記得讚下。寫得唔好嘅，咁……就唔好出聲。因為你嘅負評，就會影響到我，我心靈係好脆弱的。而當然我唔會同你爭辯。但，覺得唔好睇嘅，咁，咪唔好睇咯。你可以提議，但請注意下你啲用語同語氣。因為我時不時會因為啲負評影響心情，咁就多數會惡性循環，開始冇乜心機寫文，咁就影響好多想睇文嘅讀者。

11. 掉轉，你睇我自high嗰時（例如呢幾篇），就自然有動力寫到更加多好文。

Revisit：到底MMF係乜？買唔買得過？點買？做乜咁多人買？

12. 好啦，講MMF篇開場白，雖然好快畀咗結論（費事畀你鬧），但一大輪哲學嘢，都未入正題（雖然我覺得呢啲比「正題」更重要）。

13. 而家入正題啦喎。到底MMF係乜？買唔買得過？呢篇文後面會詳講。但呢度好快講：就係拎你啲錢去做定期，或者買短債咁咯。咁你收返息，理論上息係可以一路高上去的。但除咗息以外，本金增值嘅機會係零。冇錯，係零。唔會有upside。留意，你買美債買ETF都仲有upside（但當然亦有downside）

14. 咁但，你見，在美國，就真係好過做銀行存款的　—　亦都解釋咗，點解咁多人買！就係因為回報好過存款嘛。

MMF回報高過存款，咁當然風險高啲，唔保本—但都係抵過存款

15. 呢度可以recall返risk and return嘅定律：多數高啲回報，就高啲風險啦。MMF回報高過存款，咁風險係咪高啲？當然係。因為唔保本的（十分重要，一定要講）。但實際上，個risk只係高好少好少，但回報就高一截（特別係呢期）。

16. 所以，至少在美國，啲人唔做存款，買晒MMF，十分合理。你問我我只能答你總好過做銀行存款（香港甚至未好過存款），但兩者其實都係…….長遠必然輸畀通脹。

17. 插一插播一個重點：高啲回報就差不多一定係高啲風險。問題只係個「trade off」，食多少少風險但回報好好多，就去馬。食多好多風險只係回報好少少，就唔制　—當然呢啲講就易，有時啲風險你事後先知。例如乜？例如貪幾厘息買雷曼債。又或者，買內房債都係咁（有啲借埋孖展買添）。最重要係：你以為冇風險，先累事。

18. 而呢個「你食多一個單位風險換嚟幾多回報」，熟金融學術嘅讀者會知，正是Sharpe Ratio嘅概念，你亦可以理解為啲risk and return 圖（例如上面呢個）嘅斜率（rise over run，亦即係change in y/change in x，y per unit x）但遲下先解。

19. 但，亦正係risk and reward系列講，60/40有乜好處，甚至in general 分散有乜好處　—　我50-50嘅，回報係「（股票嘅回報＋債券嘅回報）除二」，但風險係低過「（股票嘅風險＋債券嘅風險）除二」

點解MMF咁多人買？表面因為加息，但亦因為銀行爆煲。甚至互為因果

20. 講返MMF，讀者問嘅時機就好了，的確係呢幾個月好多人買。因為乜？表面因為加息，但實際上亦因為銀行爆煲。甚至你可以話，因為人人買晒呢啲MMF，搞到銀行爆煲—最頂癮嘅係：惡性循環，然後銀行爆煲，令到啲人更加買多啲MMF（不過應該唔會失控嘅）

銀行存款低息，啲友咪提走存款買MMF，銀行就出事　—於是啲人更加走

21. 好啦，睇睇3月 尾嘅報導，MMF規模去到新高，5.2萬億美金。3 月發生咩事？之唔係SVB同Signature Bank爆煲，之後仲有瑞信，FRB之類。

22. 最新係點？都仲係創緊新高的，信報呢篇係五月中 去到5.3萬億，雖然個升幅好似放慢緊。

貨幣基金規模有幾大？走勢點？仲係咪一路湧緊入去？去邊搵data？

23. 去邊睇最新嘅數？ICI會有，每個星期update，有埋Excel（我attach埋），最新去到5.34萬億，仲升緊。睇我呢個土炮圖見到，就係3月開始升得更快。

MMF規模幾時急升？之唔係3月。正係銀行爆煲時

24. 不過，再睇長啲，順手睇埋呢個圖。呢個就FRED（政府嘢），一季先一次，唔太update．但睇返歷史走勢。你應該留意到兩樣嘢

再睇長啲嘅歷史，MMF規模咩情況下會急升？

25. 第一樣，就當然係「印錢」，整體啲規模，都係一路升多跌少，當然啦，錢係越嚟越多的。你睇絶大多數嘢嘅圖都係咁，錢越印越多，去咗唔同地方。

MMF規模：05年抽上下，08年開始跌。20年頭狂升，之後又跌。點解？

26. 但第二樣，應該見到幾明顯，2005年後開始抽上去，去到2008年就跌返，打後幾年冇乜郁。原因？大約估到了，2005年嗰幾年開始加息，去到2008雷曼爆煲後就零息，MMF就冇乜吸引力

27. 不過呢個只係故事嘅一半。放大少少，你可以見到，2020年都狂升咗一浸，然後跌返。然後去到今年開始又再升。

28. 呢度就有兩樣嘢，首先2020年嗰浸，部份係因為「印錢」，但亦因為避險。穩陣嘛。但你見2020年中之後，股市喪升，就冇人玩呢啲嘢。

2022年加好多次息，MMF規模都未勁升。今年先嚟料，點解？

29. 然後你見到，2022年加咗好多次息，但MMF規模都只係慢慢咁。就係去到今年先大升。原因？亦係兩樣。首先，係因為銀行爆煲。另外，亦因為銀行嘅息太低。

30. 好啦，我地回帶諗返，SVB之類嘅銀行，點解爆煲？因為大量存款流失。上面嘅圖係1年，提提你，睇5年又係另一回事。

31. 但去咗邊？除咗去咗大銀行，亦有好多去咗呢啲地方。又或者掉轉講，MMF啲錢邊度嚟？你話完全因為避險？今年股市相當好喎。相信好多錢，就係由啲存款度走出嚟。

回帶：點解銀行爆煲？因為流失存款。點解流失？因為息太低。有幾低？

32. 點解？就係因為銀行利息太低。呢個正係SVB之類嘅死因，正係因為咁，佢地大量流失存款。

33. 銀行有幾低息？講你都唔信。明報呢篇講MMF嘅非常好文好．4月頭嘅數字，Fidelity 隻MMF，行內龍頭，SPAXX，講緊4.5厘息。但銀行存款，講緊0.4厘。

Fed Fun rate 5厘，MMF4.5厘，唔意外。但存款點解得0.4厘？

34. 呢度，就去到一個好有趣嘅問題。覺唔覺得，同你嘅常識唔係好符合？隻MMF有4.5厘息，你未必會太意外，聯邦基金利率都5厘啦。你應該奇怪嘅係，銀行咁低息？

35. 下篇解。好快會出。