日本股揀股（大結局）　—　有乜below book 又 net cash嘅大公司？幫你sort 咗幾十隻 (Patreon)

Nvidia Microsoft Google Facebook SalesForce創一年新高了

日本股：幾時買得？點買？買乜？

日本股主題：Below book嘅公司做回購。咁有乜呢啲咁嘅公司？

東證指數，有幾多%嘅股票今年升？跑贏大市嘅又有幾多%？

唔夠一半公司跑贏指數，咁即係代表乜？

成個東證指數，今年最勁嘅股票，升幾多？最差嘅又跌幾多？你未必估到

首先，踢走唔夠10億美金市值嘅公司，估下剩返幾多？

細公司升得多定大公司升得多？

有一堆10倍book嘅公司，又有堆negative book嘅。「表現都幾好」

仲係太多，不如踢走晒啲above book嘅。死剩234間

係咪越平越好？又唔係喎

咁，再睇埋有邊啲公司net cash—冇錢又點回購？

市值超過10億美金，below book又net cash嘅公司，就跑贏大市啦

最後，睇走埋啲金融公司。點解？你話呢？

市值10億美金，below book，net cash嘅非金融公司，平均回報17.7%

57間，揀邊間？

結論：重要嘅係過程，唔係結論。仲有，記得讚

Nvidia Microsoft Google Facebook SalesForce創一年新高了

1. 快手提你，Nvidia Microsoft Google都創一年新高了，三隻都係我賺超過100%4嘅股票，Microsoft甚至去到300%（其實Salesforce都一年新高，但我仲輸緊錢，不過都差不多回家了。Facebook都係，呢隻水面，但未有一個開，都費事講）

2. 早早買，亦早早叫你買。我就唔明做乜仲有啲人成日好不滿，又話啲嘢唔準又乜。靠嘅係乜？Stay invested，買得大，坐得穩，坐得長。仲有，我知好多人都唔同意，但你見Nvidia 330蚊跌落110蚊我都冇「止蝕」的，而家隻嘢又上返320蚊。半年嘅事。

3. 當然會有人問，點解唔330蚊跌落300蚊嗰時沽走然後110蚊買返。如果你可以買得大又持續做到嘅，就你係股神了。你試過就知有幾難。

4. 昨日有啲數字未找到，所以今日先出篇呢篇文。繼續插播日本股。之後會講返貨幣基金（其實寫好），再搞返掂堆第一季回顧，risk and return，債券101。好似俄羅斯方塊咁越積越高，但至少我係不停有嘢寫的。

日本股：幾時買得？點買？買乜？

5. 之前寫過EWJ同HEWJ（仲有下集），早兩日就寫過日本股市近來創新高，之後都係連升兩日。咁嚟嚟去去你都係想知，而家買唔買得，點買，買乜好。

6. 買唔買得，就當然買得。點買？講咗你可以買美股嘅EWJ同HEWJ，但如果個股就開個IB戶口吧，應該最方便，我都用。用我條referral link，有IB股票送，我又有獎勵收，齊齊食窮佢。

7. 好，上篇講咗日本股市，其中一個近期嘅熱話係講交易所（或政府）推動啲below book嘅公司做回購，係咪真係有成效都係一半半，但至少多個主題多個話題。

日本股主題：Below book嘅公司做回購。咁有乜呢啲咁嘅公司？

8. 呢篇就會詳細講，咁到底我邊度搵啲below book嘅股票出嚟？咁多間上市公司，揀剩都仲有好多。咁我呢篇就真係同你睇晒咁多間！然後揀出嚟

9. 不過再強調，並唔係話啲公司一定會回購，亦唔代表一定升，升亦唔等於一定跑贏。只係多個主題咁解。正如上篇文都有講，我日本股最大持股嘅日清食品，Price to book 3倍，今年一樣強。始終唔同行業嘅公司可以好唔同。

10. 但今篇真係偉大，stock screening．就真係搵咗舊同事（兼呢度讀者幫手），搵晒咁多隻出嚟！

11. 我地直接做東證指數，你會見到有個Excel叫TPX，就係raw data，鍾意自己玩。東證指數，其實應該差不多係等於「全餐」，包晒所有東京主板（以前叫東證1部）上市嘅公司咁滯。

東證指數，有幾多%嘅股票今年升？跑贏大市嘅又有幾多%？

12. 首先，你應該見到有一行係成個「指數」本身。成個東證上市公司總值，56000億美金。香港講緊大約46000億咁上下，但當然啲計法有啲複雜，大約參考下好了。不過日本股市總市值而家大過香港就係真嘅。

13. Price to book呢？講緊1.3倍，冇你想像中咁殘。年初至今（未計呢兩日，計到我寫嗰時），東證指數升咗12.8%，跑贏晒港股美股。

14. 首先玩啲簡單遊戲熱下身，順手睇下你嘅「直覺」有幾準。正題啦喎，東證指數入面幾多間公司？答案係2159間。係咪比你想像中多？

15. 另外，睇回報，今年既然東證指數升13%，咁今年有得升嘅公司，估下佔幾多%？你應該估超過一半啦，都係嘅。答案係1643間，即係76%，係咪比你想像中多？

唔夠一半公司跑贏指數，咁即係代表乜？

16. 再嚟啦喎，既然東證指數升12.8%，咁跑贏指數，即係升多過12.8%，有幾多間？答案係都有872間，40%。係咪畀你想像中少？可能以為一半半？得四成公司跑贏指數，咁一係代表重磅公司表現好啲，或者少數公司升得好多（陣間研究下）。咁好難話「好」或者「唔好」，美股今年扣除十隻八隻大科企直頭要跌添。不過既然得四成公司跑贏指數，咁即係你亂揀都只係得四成機會跑贏（但亂揀而贏錢都仲有七成半機會！），好似都係買ETF好啲？

17. 但話說回頭，埃汾嗰8隻日本股，8隻今年都升，但得3隻跑贏指數（37.5%）—不過因為嗰3隻升得多，所以拉勻都係跑贏指數。

成個東證指數，今年最勁嘅股票，升幾多？最差嘅又跌幾多？你未必估到

18. 另外再可以睇下，兩千幾隻之中，表現最好嘅，升幾多？都只係120%！應該比好多人嘅估計少。兩千幾隻最勁嗰隻先咁咋喎，日本股就似乎唔係畀你搵快錢的。五個月，兩千幾隻，最勁嗰隻都只係升120%，可能好多人失望

19. （有機會我搵下港股最勁嗰隻升幾多，但我估超過120%。至於美股？咪玩啦！Nvidia 今年都升咗120%！超級大股喎。所以日本股真係唔係比你搵快錢）

20. 至於最差？都只係跌40%。又似乎係比美股或港股最差嘅好得多。所以日本股市應該冇咁大風險。當然呢啲只計東證指數入面嘅東西。

首先，踢走唔夠10億美金市值嘅公司，估下剩返幾多？

21. 好啦，真係戲肉啦喎。2200間公司，點睇？咁就當然係Filter。首先，大家應該知道埃汾嘅取向，都係買大公司多，至少唔係啲好細嘅公司。買到日本股仲要個股仲要細公司，唔好啦啩。況且，日本公司雖然應該少啲古惑嘢，但日本細公司應該好難發圍。

細公司升得多定大公司升得多？

22. 大風吹，吹走10億美金市值以下嘅公司。咁就踢走1530間，踢走近七成。留意呢堆公司，平均回報10%，跑輸指數嘅。所以「大公司就郁得慢」係迷思。同樣地，剩返嘅六百幾間大公司，平均回報13%（照計心算都計到），就跑贏大市，很好。所以睇大股。

23. （順帶一提，我買隻Mizuno就明顯係唔夠10億美金市值的，不過信佢個品牌值啲錢咁解。而之前提過另一隻同業，大一截嘅Asics，今年升得仲勁）

有一堆10倍book嘅公司，又有堆negative book嘅。「表現都幾好」

24. 另外，因為一啲無聊嘅原因（想晝個圖靚啲），所以我踢走咗10倍price to book以上嘅公司，總共18間。但，呢18間公司，平均回報17%，大幅跑贏的。你可以在Raw data自己研究。入面都有啲出名公司（我都識嘅咪出名），GMO Payment Gateway （咪做支付，成個GMO集團一大抽上市公司），仲有Oriental Land （東京迪士尼呀。又，京成電鐵係最大股東，渣住22%，呢啲「不務正業」甚至互相持股，絶對係日本特色）

25. 順帶一提，係有一堆負price to book嘅公司的，有幾奇？有線都資不抵債。呢堆公司平均回報都23%，但上落好大，有啲升一倍，有啲跌四成。都冇乜關係，一早踢走咗，因為全部市值都唔夠10億美金。

26. 好啦，嚟到呢個階段，剩返嘅係市值超過10億美金，price to book 細過10倍嘅。

27. 出到嚟，係一個咁嘅圖。十分核突。個關聯性近乎零。千萬唔好拎去交功課或寫報告。所以呢個圖你在Excel都搵唔到的。

仲係太多，不如踢走晒啲above book嘅。死剩234間

28. 咁點？再大風吹吧，直接啲，全部above book 嘅踢走。於是就會剩返市值超過10億美金，而又below book嘅公司，總計234間。留意最低嘅price to book 都有0.24。呢堆嘢，你可以在Topix Edit嘅Excel找到。

係咪越平越好？又唔係喎

29. 可以留意嘅係，呢堆below book嘅公司，平均回報12.3%，略為跑輸大市。仲有，在呢堆below book嘅東西之中，並唔係越平嘅越好，大約睇到條線向右上斜的。

咁，再睇埋有邊啲公司net cash—冇錢又點回購？

30. 然後又點？再諗下。即使係below book嘅公司，想回購，都要有錢先得。於是乎，我就決定再在呢234間公司入面，再睇下有幾多間公司係net cash嘅。

31. 答案係得返85間，我已經 sort 咗去最頂。

市值超過10億美金，below book又net cash嘅公司，就跑贏大市啦

32. 而呢85間，市值超過10億美金，below book又net cash嘅公司，回報13.6%，跑贏大市的。Bingo，至少初步落望都生性

33. 不過，仲有一個問題：我地除咗睇net cash銀碼，仲睇埋相對於佢市值。好合理啫。你10億市值有1億net cash，同你1萬億市值得1億net cash，當然係兩回事，前者做嘅回購應該對股價影響大啲（理論上）

34. 咁你見我再將堆公司，依照net cash as % of 市值排。

最後，睇走埋啲金融公司。點解？你話呢？

35. 你會見到一樣嘢：排最頭嘅，全部係銀行。「咁即係買銀行」？錯，至少唔係因為呢個原因。銀行當然有好多”cash”，而銀行唔似電力公司或電產商咁多loan—因為銀行嘅「負債」係存款。

36. 簡單嚟講，就咁拎嘅data，成堆銀行都好似strong net cash的，但實情當然不代表佢地可以不停回購。

37. 所以，最後一腳，我踢走晒所有銀行，為求「保險」起見，保險公司我都踢走。另外有啲你見個名未必知係銀行，但可能其實係金融控股公司嘅，一樣踢走。例如日本郵政，當然就係日本郵儲銀行嘅控股公司，所以踢走。

38. 踢走嘅公司，我冇delete，只係在Excel油咗黃色，同埋hide晒。

39. 踢走埋啲金融公司，卒之去到終點：

市值10億美金，below book，net cash嘅非金融公司，平均回報17.7%

40. 市值10億美金，below book，而仲要net cash嘅非金融公司。得返57間。

41. 最開心係乜？最開心係，呢57間公司，平均回報17.7%。望落靚仔。搞掂。收得工。

42. 呢57間公司，我save咗在一個叫final list嘅公司。我就唔係好識再去揀啦。不過我嘅提示係，入面都有唔少大公司，你會識嘅公司，甚至你都有興趣嘅公司。如果咁啱你有興趣嘅公司都在個名單度，就去馬吧。

43. 個哲學亦都同之前講嘅差不多，我唔會只係因為隻嘢平，殘，甚至跌好多而買。除非之前我都有留意開。

44. 如果玩一大輪數字，然後sort出嚟嘅公司，你完全唔識嘅，但照仆去買，好似本末倒置咗咁。

57間，揀邊間？

45. 如果你睇net cash as % of market cap，最高嗰堆之中，可能睇日本石油資源開發，或者大正製藥，另外好多都唔係好熟嘅，好可能你熟過我。

46. 如果睇返呢個名單上面，比較大嘅公司，咁其實都有唔少大家好熟嘅公司。Toyota，京瓷，Z Holdings（即係Yahoo Japan，呢隻有買）都係相當大嘅公司。留意仲有不少電器或汽車公司。不過我個人嘅偏好，反而係食得落肚嘅固力果（江崎GLICO），冇乜點解，純粹貪品牌。

結論：重要嘅係過程，唔係結論。仲有，記得讚

47. 兩大個，首先，重要嘅係過程，唔係結論。我就應該唔會走去買大正製藥或者日本石油資源開發嘅。成篇文，主要係示範個screen process。我畀咗raw data你，你大可以用自己嘅準則去玩。例如最簡單，你信momentum嘅，你大可以搵邊幾隻升得最多再追入去。或者你搵邊個range市值嘅公司升得最多，然後在入面搵隻最落後嘅搏追落後，又得。有冇根據就你自己先知，但重點係你可以咁去做，我亦畀咗啲資料你。

48. 不過整體，我都係寧願係有堆公司本身留意本身鍾意，然後你搞一輪filter後見到佢都榜上有名，雙重安心。而唔係一無所知，見到揀邊隻出嚟就買邊隻。

49. （話說回頭，如果睇Money Ball嘅知道，人地個玩法就反而係純數據，純睇數字，就係鍾意嗰條友樣衰或者人人憎佢，咁會代表佢underpriced。不過打捧球就真係齋講數據，但股票不能只睇數字）

50. 至於第二嘛。自覺呢兩篇文寫得相當不錯，照計你在第度搵唔到，特別係仲要幫你整埋個Excel Filter甚至畀你自己坃呢下。所以呢，覺得好就讚下。呀仲有，最好就續個年費。咁我就拎啲錢去請我舊同事食飯，因為冇佢就冇呢篇文了。

51. 呀當然，記住用我嘅link去IB開返個戶口

52. 之後會繼續寫返貨幣基金。