插播長文：大師冇點你，日本股市近40年新高。點解？仲買唔買得？有乜好買？ (Patreon)

日本股市創近40年新高！

HEWJ就當然面世後新高，不過歷史唔長。EWJ就只係一年新高。

雖然我堆日本股今年跑贏大市，但我都係覺得應該買多啲 ETF

嚟緊好多人會同你講日本股，因為啲人鍾意升晒先仆入去的。

本人就2021年已經寫日本股

有人話近40年新高，即係40年前頂位買都仲坐艇—但冇人叫你all in嘛！

日本股「迷失四十年」？你分段買嘅，一早回咗家啦

順境贏多人少少，逆境輸少過人少少，幾個周期，自然拉開晒

而家大把「理由」話日本股點解升　—但當初咪又講經濟差　人口老化

下年東證指數升多一倍，唔通日本就幾千萬個B出嚟？啲友返老還童？

好啦，具體嘢：而家買唔買得？買乜好？

Always kiss the girl：如有疑問，買咗先算。因為多數人係買得太少股票

唔想買ETF，堅持要個股，咁點呀？冧把幾個

畀你抄下功課：我啲日本股，今年隻隻升。平均都跑贏晒日經東證

「唔好日日都日清食品Panasonic啦，好悶，有冇啲未升」—好呀，畀你

幫你睇下啲Below book嘅日本股

不過，係咪真係　price to book 低嘅升得多？又做下實驗

結語

1. 極速插播先，介紹返，Microsoft 同Nvidia 又再一年新高。記住，要坐得穩。

日本股市創近40年新高！

2. 另外，個MMF系列，冇爛尾，我寫完咁滯，會分開四五篇出（！）。不過唔係今日即出，因為要講講，日本股市創咗近40年嘅新高！

HEWJ就當然面世後新高，不過歷史唔長。EWJ就只係一年新高。

3. 至於HEWJ，歷史唔太長，2014年先出現，但好明顯係創咗面世之後嘅新高（留意你在報價上未必見到，因為派咗舊好大嘅息，舊文講過）。

4. EWJ呢？歷史夠長，1996年面世，但只係創咗一年新高，同佢嘅歷史新高（應該係2021年）仲有相當距離。點解？次要原因係EWJ追MCSI日本指數，而唔係東證指數。但主要原因，就當然因為匯價啦，之前幾年日圓大跌嘛。

5. 至於買EWJ定HEWJ嘅問題，舊文寫咗。似乎一般人都係傾向買HEWJ（因為過往表現好，人性就係睇呢啲），同埋好似波動應該細啲。

雖然我堆日本股今年跑贏大市，但我都係覺得應該買多啲 ETF

6. 我就冇乜特別偏好，不過，最緊要係你有買！我就……只係買咗個股。其實照計應該買返多啲HEWJ或者EWJ。

7. （另外有讀者問過，點解我唔齋買指數ETF算，好似以前都討論過。即係好似你問我點解仲要打邊爐唔日日食草跑幾個鐘咁。主要係：悶。仲有，有啲就係年少無知買落太多，你見而家新錢我都少買個股。仲有，買個股先多啲嘢寫，同埋多啲嘢學到。不過如果你好抵得悶嘅，真係齋買指數好可能係最好選擇。）

8. 事實係，一年新高，亦即係一年之內任何位買你都贏錢。

嚟緊好多人會同你講日本股，因為啲人鍾意升晒先仆入去的。

9. 照計你好快會聽到有人講日本股，甚至之後有更多人同你講，唔知會唔會興起新嘅一波日本股熱潮。因為啲人永遠係啲嘢升晒先去關心，然後再搞一輪，多數係升到唔值博時先飛入去（我冇話而家唔應該買日本股呀下）

本人就2021年已經寫日本股

10. 但你見本Patreon，就真係好早已經寫日本股，如果冇記錯係2021年已經寫。唔止係認叻，而係講返個重點：嘢係靠你平時學，股票靠你未升時買。人人仆入去嗰時，往往係比較貴，而你得到嘅「資訊」亦都會有偏差　—　呢個唔係你嘅問題，而係人性，人人都會，我都會。我亦都會在股票好貴時買落去。不過我就唔會「大多數」錢都在最貴時買，程度有分別。

11. 講返日本股，近40年新高，係以東證指數計啦。之前寫過東證指數同日經指數嘅分別，好難話邊個「好啲」，但似乎東證係比較「科學化」啲，比較有代表性。正如講美股，你話未來幾年道指勁啲定標普指數勁啲，答你唔到。但一般認真討論，講美股都係講標指，正係因為科學化啲，代表性好啲。順帶一提，日經同道指都係歷史長，東證同標普指數都係歷史短啲—十分正常，因為人類知識，科技，計算工具等等嘅進步，所以新指數應該係好過舊指數（但不代表一定之後跑贏）

有人話近40年新高，即係40年前頂位買都仲坐艇—但冇人叫你all in嘛！

12. 好啦，近40年新高，咁固然係即係仲未返到40幾年前，但亦代表過去40年內，你任何位買都贏錢。咁當然個問題係：冇人叫你40年幾前嗰個高位全部買落去。

13. 你得閒嘅可以自己上yahoo finance，download返40幾年嚟每個月嘅日經指數（時間關係我幫你download埋了，attachment有），然後當你每個月拎10萬去買（暫時唔好理匯價住，我地講指數都係講當地貨幣啫），咁你可以計，幾耐回家。

14. 唔得閒自己玩嘅？咁等我遲下寫文．

15. 預告定，我在MMF個系列都會順手講埋強積金，講埋恒指，你見到一樣好有趣嘅嘢：恒指十年跌咗超過10%，但啲港股基金，絶大多數都係贏錢，最衰嗰隻都冇十年跌10%。點解？你估下？

日本股「迷失四十年」？你分段買嘅，一早回咗家啦

16. 無論如何，強調返好多人嘅偏頗。日本股所謂「迷失三十年」，你分段買嘅，好早已經回咗家。但你鍾意all in 40幾年前嘅高位一下買晒，就冇人幫到你，係抵你死的。

17. 正如美股早兩年創歷史新高，但總係有啲人不停係在高位追入去然後低位打靶（講得好聽係「止蝕」）。咁當然與人無尤，亦都話到畀你知，個股市好，都大把人賺唔到錢。正如個市唔好，你都未必一定輸錢

順境贏多人少少，逆境輸少過人少少，幾個周期，自然拉開晒

18. 唔好誤會，我唔係講咩逆市發圍逆市造淡。當然過去N年買美股係易賺錢過港股好多好多。但我只係講一樣嘢：在一個好好嘅市（無論係地域定係時代），係傻仔都贏錢，但你可以贏得比其他人多。掉轉，一個好差嘅市，蛇都死，股神都輸錢，但你可以控制到輸得少過其他人。幾輪牛熊交替，分野就會好大。當然前提係，你買得夠大。買幾皮嘢嘅，話知你執300%啦。

19. 呢個亦好似係我寫文（唔一定金融）講嘅嗰個核心價值：順境時贏得多其他人，逆境時輸得少過其他人，幾個周期，自然乜都拉開晒。

而家大把「理由」話日本股點解升　—但當初咪又講經濟差　人口老化

20. 唔講咁虛，講返日本股。Again，你可以睇到好多「理由」而家講點解好。明報篇文有，信報篇文都有，但對我嚟講多數都只係廢話。好多因素，一路都存在架啦，頂多可能「畢菲特入市」令到市場重估（即係：人人跟風）係「新」嘢。但，都唔係佢入市後即升啦。嗰時見兩星期唔郁，啲人又覺得冇料到啦。

21. 長期讀者一定知，呢啲所謂「利好因素」，在我心中多數係廢話。唔係話錯，例如估值平肯定係一個因素，但你解釋唔到平咗好多年點解忽然有人有興趣（可能就係跟風）。升咗，你咪拎呢啲因素出嚟。唔升，就好似不存在咁。

22. 同樣地嘅係，過去幾年，我買唔少日本股（都係覺得未夠多，可恨唔夠錢）。但你聽到唔少人質疑，同我講「日本經濟唔掂呀迷失三十年呀」，「老化冇人消費呀」，「人口萎縮呀」，「匯率風險呀」—again，呢啲所謂嘅「不利因素」，幾時都存在。我話你知東證下年升多一倍（舉例），呢啲因素都存在，唔通下年啤多幾千萬個B出嚟？啲老人家返老還童？

下年東證指數升多一倍，唔通日本就幾千萬個B出嚟？啲友返老還童？

23. 我個人嘅偏見，呢啲咁嘅pros and cons，只係畀你返工用。甚至好多人係讀者時就養成呢啲習慣。但講到投資，成套機制根本係唔同。美股升足咁多年，一樣有人話美元霸權玩完帝國末路狂印銀紙遲早爆煲。

好啦，具體嘢：而家買唔買得？買乜好？

24. 不過，講返啲具體啲嘅嘢。首先，買唔買得？梗係買得，聽朝八點就買得（有時差呀喂），啲人成日當我玩膠，但我係十分認真的。點解唔買得？況且，好似講座都講過，如有懷疑，掙扎買唔買股票，就買吧（當然唔係叫你借錢買）。一般嚟講，多數人都係買得太少股票，而唔係太多。所以如有十五十六嘅，買咗先算（正如多數人，老咗都係後悔自己當初冇同心儀嘅男神女神表白。所以，如果掙扎講唔講嘅，講吧！）

Always kiss the girl：如有疑問，買咗先算。因為多數人係買得太少股票

25. 另外，買乜？咁好似都講過，諗唔到嘅，HEWJ咯，或者EWJ。仲要掙扎邊樣好啲嘅，「咁你每樣買一半啦」。總之，睇多一次上一段。你冇買，就講乜都假。而多數人都係買得太少股票，唔係太多。

26. 係喎，包括我都係。講座有分享，仲有百幾萬港紙在台灣。點解冇fully invested？嗰時搞移民，開公司，鎖死咗嘛。咁但，其實搞完啦。但做乜唔拎返啲錢？因為疫情呀，埃汾太又唔肯搞呀之類咯。其實諗真啲，係真係應該同佢大炒一場迫佢去搞　—　嗰時我係真係諗住買晒台股的，唉。

27. 順帶一提，如果你好care咩「匯率風險」嘅，咁你可以買HEWJ，買咗安心啲。咁事實你買個股好難做到咁。我係冇見過有人買完20萬Donki股票然後上FXCM沽返20萬遠期Yen的

唔想買ETF，堅持要個股，咁點呀？冧把幾個

28. 好啦，你堅持唔想ETF，覺得行貨，想要個股，咁點呀？首先，你可以參考下我買嗰啲

畀你抄下功課：我啲日本股，今年隻隻升。平均都跑贏晒日經東證

29. 咩話？你唔知我買咗乜日本股？仲話忠心讀者？咁放心，而家再貼。順手留意一樣嘢：隻隻都升。唔止，拉勻都係跑贏日經同東證嘅。滿意未？（實際上隻日清日品佔得比較多）

「唔好日日都日清食品Panasonic啦，好悶，有冇啲未升」—好呀，畀你

30. 但另外，總有啲人係不停要問，「升晒啦喎，仲有啲乜？」「畀啲新意啦唔好成日都LVMH 日清食品」。咁好呀，都仲有啲畀你捽到出嚟嘅。

31. 明報篇文有講，近期其中一個熱點，就係講公司回購。特別係啲below book嘅公司，即係price to book 細過一，亦即係市值低過公司淨資產（又名帳面值）嘅公司。

幫你睇下啲Below book嘅日本股

32. 唔知政府定交易所，特別希望推動呢啲公司做回購，咁有啲真係做，就升唔少。信報篇文用嘅例子，就係JVC Kenwood。

33. 咁所以，你大約估到了，「我去搵啲price to book 細過一嘅公司」，然後望落正正常常唔會唔開胃嘅，又夠大間唔會執笠嘅，應該有得諗？

34. 係！

35. 但，點搵？

36. 好啦，兩個方法。第一，等兩日。我叫咗舊同事（兼呢度讀者），上Bloomberg搵，咪同你搵晒日經225，甚至東證成份股（即係差不多成個東京股市所有公司），邊啲夠平，又夠大。當然個前提係佢得閒同佢睬我。

37. 第二個方法？土法，自己嚟吧。其實上Yahoo Finance 都有。呢堆咪就係我買嘅日本股。咁你可以如法炮製，睇啱幾隻，咪整個咁嘅portfolio，睇下邊啲price to book 細過一

不過，係咪真係　price to book 低嘅升得多？又做下實驗

38. 不過，最後，又係警告你。上面呢啲，係相當動聽嘅故事（唔好忘記我係做分析員的），但，係咪真係會好有效？講得再白啲，信報或明報舉嗰啲例子，係個別例子定普遍？

39. 都有啲難答，但不如睇下以上呢個表。以上就係我買嘅嗰堆股票，佢地嘅 Price to book，同埋今年嘅股價表現

40. 你見到關係……唔係太強。真係plot 個scattered plot，咁你勉強見到有啲負相關，好似price to book低啲嘅表現強啲咁。Below book嘅Panasonic 同Mizuno，就係升得最多。但同樣Below book嘅Yahoo Japan又麻麻地。3倍book嘅日清食品一樣好強。

41. 個Price to book同股價表現，好似有少少關聯，但極不太明顯（有興趣嘅可以話你知，個R-squared 係 1%，近乎冇關係）。歸根究底，唔同行業唔同公司嘅情況好唔同。

結語

42. 個人覺得，呢篇文應該值七八十分。等埋舊同事個Excel（如有）就值八九十分。請畀個讚。當然，唔同意嘅，亦唔使勉強