貨幣基金：乜東西？點解咁多人買？買唔買得過？點買？（一）—開場白（放心，好快出埋二） (Patreon)

美國債務上限：你要睇嘅，唔係會唔會玩出火，而係睇2011年嘅教訓

MMF好多人買：咁其實，呢個有時已經係一個唔太好嘅訊號

Metaverse，meme股，BNPL，全部好多人買

不過MMF就唔會有泡沫嘅

「夠好多人買美股啦你又唔買咩」

唔好問我「點解別人恐懼時你貪婪你又唔去買BBBY」-你明知唔同

買唔買得過？你話呢？都話同銀行存款差不多

MMF：短期一定唔輸錢，長期就一定輸錢。

咁但，MMF又真係好過銀行存款嘅。所以我唔會反對人去買

哲學嘢：其實多數人問嘢，都係想搵人認同啫。人之常情。

Good Read 重出江湖：「應該睇啲舊啲嘅書」

KOL，就梗係刻意討好你。呢啲垃圾食物食得多冇益

MMF：想食雪糕，咪食咯，唔通我阻止你鬧你咩。但，長遠都係冇乜益

講返美國債務上限：你要睇嘅，係2011年嘅教訓

1. 寫完個美國債務上限嘅系列（上，中，下），我諗最重要嘅一點：你唔係要去研究佢會唔會玩出火，好多人錯重點。最重要係睇返2011年嘅情況—唔係話一定會再發生，好可能都唔會玩到下調信貸評級（更遑論違約）。但，就係平時睇定，到你臨急臨忙先嚟問先嚟諗就太遲，而且嗰啲情況下做嘅決定質素一定低。2011年嘅情況，其實同好多「危機」一樣，大原則都真係「別人恐懼時我貪婪」，一般市場都係升又升過籠跌又跌過籠。（有人問做乜唔買內房債ETF，有乜分別。好似之前答咗一半，但之後再答。不過，呢個大原則應該只係適用於「成個asset class」，否則你買雷曼買瑞信就多多唔夠輸啦）

2. 另外，另一大原則就係「直線思維嘅危險」。美國被下調信貸評級後，美債係大升唔係大跌，債息係大跌而唔係大升，而美金都係不停升　—　仲有，美金不停升之餘，股市又做得幾好，金價又升。唔好以為你啲「常識」有幾合理，「有排未開關太古就冇運行」，你見到開咗關就真係冇運行。（你可以話啲「大原則」先係更高層次嘅常識）

3. 暫時市況都係比較靜，又答下讀者問題。又係可以一條問題答幾篇。讀者問嘅係貨幣市場基金，Money Market Fund，MMF．

4. 寫埋MMF系列（最多兩三篇啫），就快手寫埋個第一季回顧（仲未完！），目標點都今個月搞掂佢。順手等我月尾去曼谷時有定題目，唔使到時諗寫乜。

5. 讀者嘅問法（大意）：而家好多人轉投MMF，咩東東？如果想買應該點做？

6. 讀者冇問「應唔應該買」或者「你點睇」，但應該都係指定動作。你唔問我都會答的了，反正實有其他人問。

7. 呢個糸列大約講下，MMF是乜東西，點解咁多人買，想買可以點買，應唔應該買。

MMF好多人買：咁其實，呢個有時已經係一個唔太好嘅訊號

8. 留意讀者都有留意到，好多人買—咁其實，呢個有時係一個唔係太好嘅訊號！眾地莫企嘛。記住啦，大原則嘛，別人恐懼時我貪婪，多數人多數都係錯嘅。多數讀者問啲fancy嘢，嗰期多人講嘅嘢，好多我都麻麻。

Metaverse，meme股，BNPL，全部好多人買

9. 有辦你睇，2020至2021年，一大堆咩發夢股，Metaverse，BNPL，全部係咁上下。其中一個原因，當然係「估值」，人人買就貴啦。

不過MMF就唔會有泡沫嘅

10. 不過幸好，MMF就冇乜泡沫嘅，因為唔存在好多人買所以會貴咗（本質上係唔會升嘅！只有收息）。所以唔會接火捧，只係怕你有啲不必要嘅期望。

「夠好多人買美股啦你又唔買咩」

11. 拿，我諗我寫得好清楚，唔好又話「點解又唔同」。就係因為你不能過度簡化啲事情。有時並唔係咁簡單「人人買你就唔買」—「夠好多人買美股啦你又伏唔買走去沽空咩」「人人都話做運動好你又唔做咩」—認真，你應該知道呢啲例子同我講嗰啲fancy嘢嘅分別。

唔好問我「點解別人恐懼時你貪婪你又唔去買BBBY」-你明知唔同

12. 所以，用你嘅腦考下，睇多啲埃汾嘅文，慢慢浸下。冇得速成，冇得只係背金句。唔好問我「點解別人恐懼時你貪婪你又唔去買BBBY」，你明知唔同，或者睇返我之前講嘅女神/男神甩拖比喻。你留意好耐嘅大藍籌股票跌三成，同忽然有間唔知乜銀行一日跌四成你飛入去，係兩回事。我唔敢講我投資成績好好，但你見我真係冇乜點輸大錢或做啲好錯嘅決定。

MMF係乜？「好過放銀徰咯」（但，港紙唔係）

13. 畀個短解釋你，MMF即係乜？「即係同存款差不多，好過銀行存款少少」（美金咋下，港紙唔係）。又或者，同買短期美債差不多（短期呀下，一至三個月）

買唔買得過？你話呢？都話同銀行存款差不多

14. 咁買唔買得過？畀定個短答案你：我嘅答案—唔好買。不過你要買，我又唔會阻止你，我亦都理解嘅。

15. 亦都好快畀結論你。點解我有咁嘅答案？首先，埃汾嘅信念係100% invested嘛。就當你年紀大開始玩60-40都好，咁你嗰40%債，都應該係「中期」嘅債（即係幾多年？等閒研究下，但肯定唔係MMF嗰啲咁短）。咁既然MMF即係同買短期美債或者存錢入銀行差不多　—　咁應該大家都知我係唔存錢在銀行的。

MMF：短期一定唔輸錢，長期就一定輸錢。

16. 再講白啲？好簡單，MMF嘅嘢。表面係「保證唔輸錢」（其實唔保本，唔受存款保障保護，但technically真係應該唔會輸錢）—但實際上，「係保證輸錢」。

17. 講乜？real return 同nominal return嘅分別。即係好似放在曲奇餅罐咁，正路唔會輸錢，但放得十年，廿年，必然跑輸通脹。必然。

18. 你講幾個月就冇得講，但我講長期。唔信？睇上面個圖（遲下再解）。至於短期，係冇乜好討論的。舊年你放曲奇餅罐跑贏所有股票債券添，咁你係咪放一世丫？

咁但，MMF又真係好過銀行存款嘅。所以我唔會反對人去買

19. 不過，我唔會太反對人去買MMF嘅。原因兩個，首先，咁因為各種原因，你未必好似我咁唔放銀行存款。咁而MMF，應該係好過銀行存款嘅（再講一次，美金先係，港紙應該唔係，人民幣我唔知，本文唔深究）。

20. 另外，同啲咩發夢股，Metaverse，BNPL之類唔同。咁買MMF，就真係唔會輸錢嘅。至少nominally唔會—扣埋通脹長線就差不多實輸，慢性毒樂咁咯。食圾圾食物咁，短期，食少少，又唔會有事嘅。況且，你幾個月，就真係未必會跑輸通脹，可能跑贏添。不過長期，扣埋通脹，照計必定輸錢。

21. 咁但，真係你買完唔會一年輸10%的，咪話銀行存款咁，但仲要好少少。所以我唔會太反對嘅。

22. 仲唔明？即係話，你話你放100萬去銀行好唔好，咁我一般梗係話唔好。但我唔會覺得你呢個係好錯嘅決定。

哲學嘢：其實多數人問嘢，都係想搵人認同啫。人之常情。

23. 另外，又講一樣哲學少少嘅嘢。相信好多人都知，啲人問其他人意見時，多數自己都有咗決定。呢個亦係人性，我都經常會，畢竟有啲嘢係要由人地把口講出嚟先易說服到自己。正如唔少人問我應唔應該買某啲東西，咁佢可能都只係想搵人認同。咁但，你問我嘅好處係：我一般唔會特別討好你（你冇睇錯，呢個係好處），特別係，例如你PM問我，咁可能我都會客氣啲。但寫文嘅，我就可以用一個真正「中立」嘅角度講

Good Read 重出江湖：「應該睇啲舊啲嘅書」

24. 於是呢度扯到去另一樣嘢，我建議你睇呢篇文。曾國平寫嘅，免費，好短，但有意思，用字亦都好。睇幾百字都懶甚至唔明嘅，我解埋你知（不過長遠嚟講訓練下睇字嘅能力）：佢話，你睇當代嘅文章，書本，往往視野係好狹窄嘅。佢文中有略提，我都補充：網上嘅東西，就更加係咁。最好，就睇啲舊啲嘅書。唔一定學佢咁百幾甚至幾百年前，但十幾廿年前嘅書，一樣好睇。

25. 如果對我啲核心價值熟悉嘅讀者，對於我鍾意佢呢篇文，唔會太意外。「貼市」（冇錯，幾年內都可以係）讀物嘅問題係：作者必然受到嗰期流行乜影響。早兩年就人人元宇宙，而家就個個去美元化中特估。

26. 點解？因為作者都係呢個時間嘅人嘛，唔通同你講友誼商店講外匯券咩。仲有，作者要吸睛嘛，一定要討好讀者。例子上，當然要用啲近期嘅例子。亦都當然要討好你地嘅口味。

27. 去到社交網嘅年代，更加嚴重。因為你要知，好多資訊（姑姐叫嗰啲做資訊）係免費嘅，咁個問題嚟啦，點賺錢？咁大家都知，KOL有其他方法收返錢。但大原則，就係先要有人氣，流量，viewership，先吸到錢嘛。咁所以，你網上睇嘅好多嘢，都係特登為咗討好你的（亦所以，點解啲一人兩萬蚊提爆中銀論，或者聯匯爆煲論，幾時都咁多人寫，亦幾時都咁多人睇）

KOL，就梗係刻意討好你。呢啲垃圾食物食得多冇益

28. 曾國平稱呢啲，叫做「精神鴉片」，講得幾好。我自己嘅比喻，叫做金融薯片，以前都寫過，我啲Facebook文，寫金融嘅，就會係咁。當然係吸睛搵人落搭，反正免費嘢。咁但在呢度，收得你錢，就唔會畀垃圾你，有老火湯你飲

29. 睇得多，久而久之，你就越嚟越笨。就係圍爐同溫層，人云亦云。

30. 而你睇「舊年」，或者傳統媒體，甚至傳統鬼媒嘅好處．就正如曾國平篇文所講：嗰啲作者唔會特登討好你，Jeremy Siegel識你老鼠。Economist先唔會理你睇完篇文明唔明同唔同意　—　呢啲就係好處。你會聽到啲人地真心分析，而唔係好似相士咁，只係討好你。

31. （我嘅情況就相當有資格講第一身經驗，因為用流量搵錢我又有做，直接同讀者收錢我又有做。我長期都話在Facebook係寫垃圾的，討好讀者嘛。但我在Patreon，你見到我唔會刻意講啲好易入口你好同意嘅嘢。相反，我多數係講啲你唔知嘅嘢，或者你忽視咗嘅盲點）

MMF：想食雪糕，咪食咯，唔通我阻止你鬧你咩。但，長遠都係冇乜益

32. 不過再強調一次：MMF就真係OK的，雖然我就一定唔會買。但冇伏的，所以想買咪買。但，我有責任提醒你：長遠，差不多必然跑輸通脹嘅。正如你想食雪糕，咪食，唔通阻止你咩，但長遠食咁多都係唔係幾好嘅

33. 結果寫足一篇，都只係得個開場白。雖然，結論已經畀咗你。我係特登將個結論放到最前，因為讀者多數冇耐性（討好讀者！）。但，你總唔會以為個結論係重點啩？個過程先重要。

34. 之後兩三篇，同你睇返，MMF係乜東東，做乜呢排咁多人買，做乜我覺得唔好買，想買點買。

35. 最後，其實你諗下，係可以幾個字答完的。乜東東？「咪好似存款/短期美債咁」。做乜多人買？「因為高息」。做乜我覺得唔好買？「因為長期一定跑輸」。想買咁點買？「Google吧」

36. 不過，你總唔會覺得，呢啲「短答案」就幫到你。都話要「浸」的。本人最痛恨啲「懶人包」，就係培養啲又懶又廢嘅人。係喎，大把書大把戲都可以兩句講完，咁點解仲有人拍仲有人睇？

37. 第二三篇好快會出埋，有問題可以諗下先，等埋第二三篇先問