美國債務上限危機（下）　—　2011年，市場點反應？今次又會點？ (Patreon)

違約？聯儲局話美股跌三成，經濟收縮4%，2000萬人失業—即係點？

如果擦槍走火又點？咁就有先例啦。睇下2011年。

你可以估下市場有乜反應？有埋Excel有埋圖畀你

「道指跌2000點咯」

當年玩到調低信貸評級添，兩黨就狂轟。但標普都話知你

2011年8月8，標普指數，一日跌咗7%。你估下用咗幾耐反彈？

「下調信貸評級，借貸成本就會大升」—真係？睇下2011年美債？

2011年7月尾，時限一個月。咁你會沽空美債定狂買美債？

下調信貸評級，就更多人買！吹咩！

「信貸評級跌，大恐慌，人人仆去買美債，美債債價勁升」—一樣得

幾日之間，10年債息由2.6厘跌到2.1厘。

而美金……都係大升嘅！你估真係下調評級人人唔要美金？

仲要美金升金價又升！

結論，應該點操作？

1. 美國債務危機系列，上篇　同　中篇　講咗啲背景嘢。今篇就講市。

2. 首先，如果真係「違約」，市況會點？咁當然會暴瀉。但真係冇人知會點，因為完全冇先例，從未試過違約（除咗1979年嗰次）。

違約？聯儲局話美股跌三成，經濟收縮4%，2000萬人失業—即係點？

3. 聯儲局有啲內部估計，估真係違約，標普指數就跌三成（好多咩？我覺得唔算好多，疫情都一個月跌三成啦）。另外，估美金大跌（我估未必，之後解）。同埋估經濟收縮4%（呢個係好深嘅衰退了），1000萬人失業（比較下，疫情下大約2000萬人失業，但好多只係好短期）

4. 不過，因為真係冇試過違約，上面呢啲估計，都只係估估下，照計唔多可靠，好過冇咁。

如果擦槍走火又點？咁就有先例啦。睇下2011年

但，如果未玩到違約，但摖槍走火呢？咁但有幾次都玩到違約邊緣。其中一定要講2011年嗰次。

5. 嗰次都冇玩到違約，但就玩到標普下調咗美國嘅AAA評級—史上首次，到而家都未拎返AAA。夠杰未？

你可以估下市場有乜反應？有埋Excel有埋圖畀你

6. 不過，智力題嚟啦。你可以估下，到底當時市場有乜反應。我有埋個Excel畀你，十分好玩。

「道指跌2000點咯」

7. 先講股市，在講座我用「道指可能一日跌2000點」做標題黨。但真係咁。2011年下調評級之後，就真係黑天鵝，美股一日跌咗7%。咁你用而家嘅道指去睇，就即係一日跌2000點。驚唔驚？

8. 事實上，當年美股7月已經開始跌，同呢排嘅走勢差不多（而當時高位都跌近20%—一個月喎）

9. 不過，你估到了，係好快收復失地的。因為其實……下調評級，有乜影響呢？其實未必好大實際影響。信貸評級，只係一種意見啫，雖然係一個比較惡嘅意見。

當年玩到調低信貸評級添，兩黨就狂轟。但標普都話知你

10. 順手講埋，下調評級後，美國總統，政府，兩黨，齊齊狂轟標普。來得正好，難得大家有共同敵人，就搵到下台階，然後傾掂數係後話。

11. 不過標普都一樣維持原判。呢度就緊要了，首先你見到政府固然可然好惡，但，都真係總不能上去封咗標普。呢個就係我成日講，美國始終係相當保護私人企業嘅。換著第度我諗未必會發生。另外，「不如諗下中資幾時入股標普」（唔知有冇限制）。

12. 講返，如果今次真係玩出火，記住飛入市。我懶搵標普指數嘅數，但個Excel用SPY，照計一樣。咁你睇圖睇數字，見到7月開始大跌，8月8日真正下調評級後，就一日跌7%。

13. 之後？上上落落，年尾都返唔到7月嘅位，但8月8日嗰棍已經差不多係底，之後差不多冇穿過（10月頭掂咗一次）。

2011年8月8，標普指數，一日跌咗7%。你估下用咗幾耐反彈？

14. 更重要嘅係，SPY在8月5日，120蚊。8月8號跌到112蚊，7%。你估用咗幾耐反彈？幾日。知唔知我諗起乜？又係以前文寫過嘅例子，2011年（又係2011！）日本嘅311地震。冇錯，一樣講到好大件事，日經指數一樣暴跌，但亦係好快收復晒失地。你見史上只要唔涉及金融系統嘅事件（例如911，烏克蘭），好多都係咁（而美國被下調評級呢個，其實都唔涉及金融系統，但當時可能你未必十分肯定，未必覺得就等於911—雖然你都會覺得唔等於雷曼爆煲之類）

15. 不過你見到，嗰幾日嘅標普指數，就過山車咁了，又有大上，又有大落。其實係冇得捉嘅。但你8月8號買落去，就幾明智—雖然9號反彈10號又跌過。

「下調信貸評級，借貸成本就會大升」—真係？睇下2011年美債？

16. 不過，更加有趣嘅，係債市。

17. 「常識」話你知，「下調信貸評級，啲人咪冇信心，你嘅借貸成本咪會升」　—　可惜，呢個並唔係一定啱嘅。再講一次，信貸評級，只係一種意見。亦即係話，理論上，摩根士丹利聽日下調新鴻基評級，佢不一定會跌，係咪？

18. 然後再講一次，早兩篇文先講過，「直線思維」嘅危險。好多時股市唔多講道理，又或者，根本係你自己諗錯。

2011年7月尾，時限一個月。咁你會沽空美債定狂買美債？

19. 時光返到去2011年7月尾，如果你一早知，過幾日美國會畀人下調信貸評級。你會點做？事後睇，可能你應該沽空美股。但我當因為某啲原因唔畀你用股票做工具，又或者你懶醒覺得，既然債券有問題，梗係玩債。

20. 「直線」嘅想法，就會覺得，「信貸評級下調喎」，咁借貸成本咪升，咁肯定冇人信美債啦。肯定債息一定升啦。咁我肯定係去沽空美債，或者沽空TLT啦。

21. 結果呢？

22. 你見我咁估，應該估到。事實上，呢單嘢之後，美債嘅格價，係一路升！亦即係債息一路跌。

下調信貸評級，就更多人買！吹咩！

23. 亦即係話，下調信貸評級，就更多人買！吹咩！

24. 點解？正如上面講，信貸評級只係一種意見。其實同美國本身還唔還到錢，直接關係冇乜。咁但，另一個市場力量就係：全球風聲鶴淚，避險情緒高漲，咪又人人仆晒入去買美債！

25. 呢度我想你再認真諗一次個教訓。

26. 最初可能你以為，「信貸評級跌，借錢成本升，美債債格實跌，我去沽空美債或或者沽空TLT」

「信貸評級跌，大恐慌，人人仆去買美債，美債債價勁升」—一樣得

27. 但最後個故事係「信貸評級跌，全球大恐慌，人人仆去買美債，美債債價勁升」

28. 見到冇？根本開兩瓣，都係「言之成理」的。Narrative嘅嘢。

29. 你見以往，好多例子都係咁。容許我再煩氣講，好多人以為「世紀疫情股票實跌（2020）」「烏克蘭打仗油價糧價實升（2022）」「通關無期太古實跌（2022）」「內房爆煲中海外實跌（2022）」　—　全部都係掉轉行嘅。

30. 你可以再諗下，絶大多數人嘅直線思維，你拎去投資，到底work唔work

31. 睇圖，2011年，美國債息，基本上跌足全年。你7月尾沽空美債嘅，傷亡慘重。

32. 順手講埋，2011年聯儲局冇加過息冇減過息，之後幾年都冇。唔好以為10年債息主要受聯儲局加減息影響。

33. 你睇，幾日之間，10年債息由2.6厘跌到2.1厘。

幾日之間，10年債息由2.6厘跌到2.1厘。

34. 順手睇埋，TLT。畀你睇真係玩ETF嘅價

35. 見到冇？TLT由7月開始，一路都升。點解？因為債息一路跌。

36. 順帶一提，你睇Excel啲數字，可能見到有啲日子係債息跌，但TLT唔升。點解？「因為TLT唔係10年美債嘛，係20年或以上」，所以唔係完全同步，但大方向差不多。況且TLT波幅夠大，個圖比較易睇啲。

而美金……都係大升嘅！你估真係下調評級人人唔要美金？

37. 最後補多兩個圖，不詳解。首先係美金。由債息嘅走勢，你都估到，美金係勁升嘅。你估真係下調信貸評級人人唔信美金？

38. 當然另一個原因，你亦可以話因為同期都爆緊歐債危機。咁咪講過咯，匯率嘅嘢，相對者，zero sum game．

仲要金價升但美金同時升！

39. 仲有金價，當時都係大升嘅。固然你可以話「避險」。但唔好忘記，全年美金係狂升，但金價都仲有得升。

40. 之前讀者問，啲資產走勢甚至數據打晒交，咁點算？答案好簡單。冇得點算，就係咁架啦。啲嘢嘅關係，隨時會變。未必日日變，但唔會係幾十年都唔變。亦好少真係好似舊年咁，真係好「靚」咁解釋到（通脹強　聯儲局加息　債息升　美金強　股市死晒　債又死晒　其他外幣都死晒）。現實就係啲嘢會打交的。

結論，應該點操作？

41. 結論？都好簡單。唔需要研究會唔會真係違約。Most most likely都應該唔會，99.9%都唔會。但，「點保證」？冇得保證。Tail risk，黑天鵝。

42. 唔使而家沽咗啲股票佢，打算買嘅，咪繼續買。

43. 不過，如果真係玩到2011年咁大（下調評級），甚至更大（真違約），咁你又有閒錢嘅，照計可以飛身入去買。買乜？似乎都係趁跌買股票最穩陣。歷史唔會簡單重覆，股票都往往會「唔多正路」，但相對地已經係比較正路。你去玩債應該畀佢玩死，我估真係有啲人走去沽空TLT，死未。

44. 買乜股？仲問！SPY啦。唔使諗咁多。仲要諗「邊啲股票最受害最受惠」嘅，蚊都瞓。有時唔係越仔細越好。

45. 正如搞咁多嘢，「其實我啲日本股好似都係跑輸EWJ嘅」（不過話說回頭，呢兩個月我啲港股同美股好似係跑贏大市的，遲下再講）。