美國債務危機系列（中）　（下集大結局，講股市債市黃金美金） (Patreon)

幾時到上限？就好易答。一早到咗。

6月1日，就大限將至。亦都解釋咗呢排啲1個月美債做乜郁得咁勁

真係到大限，又唔Extend，有乜後果？可以買定花生

「違約」？1979年試過啦。冇人話你知咩？

去到債務上限，都未傾掂，乾晒塘，係咪就違約？都唔一定嘅

美國「違約」，你可以估下CDS有冇得賠。「咁瑞信AT1有冇得賠丫？」

美國嘅CDS Spread，升咗四倍，而家仲衰過希臘巴西。

CDS有冇得賠都好，係咪真「違約都好」，美國遲一個月找數，天下實大亂

Shitty idea 1：整個10000億白金銀仔，得唔得？你話呢？

係呀，可以發行任何面值嘅銀仔。係呀，銀仔唔當債務。但，你估會點？

「係咪而家沽晒啲股票？」—太遲啦下話

1. 美國債務上限危機系列，上篇講咗啲背景，同埋常見誤解。今篇講你最關心嘅嘢，幾時到上限？如果到咗又冇「達成共識」，有乜後果？係咪真係會違約？咁違約其實即係乜？會有乜後果？係咪要一早沽晒股票？定飛入市？今篇會寫，有可能有埋第三篇，但三篇內一定完。

幾時到上限？就好易答。一早到咗。

2. 幾時到上限，就好易答。2021年調高嗰次，其實今年年頭已經到咗。不過啟動咗啲緊急機制（係咪好化學呢，明明到咗又有緊急機制，即係最後通牒後又再有最後，一二又有二個半咁）

6月1日，就大限將至。亦都解釋咗呢排啲1個月美債做乜郁得咁勁

3. 不過呢，都真係有「最後」嘅最後的。耶倫就警告，分分鐘6月1 日就到「大限」。（英文叫X-day）．係喎，佢都講唔實。但係咪靠嚇？怕且唔係。出面都係估大約6月7月咁上下

4. 於是乎，亦解釋咗上一篇文嗰張圖。點解4月時啲1個月債息反常地低？因為人人仆晒入去，唔會想買3個月美債，只買1個月，泊住啲錢，到時再算。點解5月啲1個月美債債息狂升？因為冇乜人想坐過6月1日。Just in case

真係到大限，又唔Extend，有乜後果？可以買定花生

5. 到時真係到大限，又冇extend？有乜後果？就唔知了。可以買定花生。

6. 出面普遍都話會「違約」—但，其實係咪真，都真係好難估。分分鐘最後拎上法官研究一大輪。常識話你知冇晒錢咪還唔到，政府就要「違約」，但亦有人話冇咁嘅legal basis，甚至話「還錢」呢個義務可以override 個債務上限嘅約束

「違約」？1979年試過啦。冇人話你知咩？

7. 仲有，真係「違約」，咁會點？理解上好似話仲可以有30日寬限期，有時搞夠90日。你冇錢供樓都唔係即時收你樓罰你息啦。而事實上，1979年美國曾經試過「技術違約」（應該冇乜人話過你知），但一般講法都話「唔計」。我覺得都合理，就真係好似唔記得入錢供樓咁啫。

去到債務上限，都未傾掂，乾晒塘，係咪就違約？都唔一定嘅

8. 當然另一個問題就係，咁如果真係「違約」，會有乜後果？我都唔知。因為就真係從來未見過（除咗1979年嗰次）

美國「違約」，你可以估下CDS有冇得賠。「咁瑞信AT1有冇得賠丫？」

9. 其中一樣嘢，以前都講過，有樣叫CDS（Credit default Swap）嘅東西，人地違約就有錢賠咁。好似買保險咁，我1蚊買保險，到時佢真係違約你就賠100蚊。唔違約？咪冇錢賠。咁你估到了，啲友仔越大機會違約，個CDS就會升到越高，保險嘛。

美國嘅CDS Spread，升咗四倍，而家仲衰過希臘巴西。

10. 咁而好花生嘅係，美國嘅CDS spread，近期都勁升，甚至升到高過希臘巴西墨西哥。嘩。咁你睇啲親中傳媒就會講「美國信用仲衰過墨西哥希臘巴西」—呢個並唔完全係事實，咁但不過，你見之前中國CDS spread勁升嗰啲，你啲網友咪一樣講中國好有機會違約。

11. 可以講嘅係：美國違約嘅機會，由好好好好好細，變到好好好好細。大約係咁。仲有可以講嘅係，美國嘅CDS市場，成交係好少嘅，即係好似冇人會買蘋果下年執笠咁。所以，只要有少少錢去買，就好易踢高。CDS市場嘅訊息，就要打個折扣，因為成交少易扭曲易操控。

12. 順帶一提，真係違約都好，CDS係咪有得賠？拿，我都唔敢講。「唔係寫明架咩？」—唏，經過瑞信AT1嘅嘢，你仲信政府？我就真係好懷疑到時真係違約有冇得賠。可能到時話你知份合約第173頁用font size 6有個remark入面第三十條有條link然後上網有個網頁最底有用印第安語寫明有例外情況咁。

CDS有冇得賠都好，係咪真「違約都好」，美國遲一個月找數，天下實大亂

13. 不過，CDS有冇得賠都好，當唔當「違約」都好，只要美國真係一個月還唔到本金同利息，我估都會令市場大亂。

14. 照計都唔太難估，你就諗下你係公務員，政府遲出糧，會有乜後果？咁你旨意佢架嘛，點諗到佢會拖數？可能你31號出糧，1號就供樓，2號就還tax loan，3號過錢畀老婆，4號畀二奶，5號就仔女交學費　—　忽然間遲出糧，咁咪全部大亂？

15. 而你想像到，好多企業同金融機構，都會拎住啲短期美債。當好似現錢咁，又可以用嚟抵押借錢。忽然間清晒零，個連鎖反應都幾係嘢。

16. 最後講下，你有機會在媒體上，見到有兩個「解決辦法」。基本上都係shitty idea，唔work的。

Shitty idea 1：整個10000億白金銀仔，得唔得？你話呢？

17. 第一個可能比較多人聽過，叫做「鑄金幣」，hashtag  #MintTheCoin．即係點？即係鑄幣局整個1 Trillion面值嘅白金金幣（任你寫啫），然後放畀政府，得咗。

係呀，可以發行任何面值嘅銀仔。係呀，銀仔唔當債務。但，你估會點？

18. 咁都得？咁諗出嚟嗰個，都唔係完全冇腦嘅。當中有兩三個關鍵。首先，鑄幣局的確可以發行任何面值嘅白金硬幣。另外，硬幣同「銀紙」，係受唔同法律規管嘅。原因都係歷史問題，以前覺得貴金屬就真係有價，但銀紙係「法幣」，本身冇價值，所以多啲法律限制。咁兩樣嘢夾埋嘅副作用就係，可以整個超級硬幣，而硬幣係唔計入「負債」嘅，自然唔受債務上限限制。得咗。

19. 得唔得？理論上，好似未必完全唔得。實際上，就梗係會拎上法庭搞一輪。咁再實際啲，其實只要市場覺得流流地，有機會畀法庭推翻，就已經即時世界大亂啦！仲使等你班法官慢慢傾咩！記住市場第一原則：炒預期。

Shitty idea 2：發行一張超10000億高息美金債，得唔得？你話呢？

20. 然後仲有第二個shitty idea：有人話，聯儲局可以發行一張超高利息嘅10000億美金債，例如100厘咁。點解要超高利息？因為，債f券係計隻債嘅市值，唔係面值。你隻嘢100厘息，自然好低價（拿，債券101有講呀下，唔好又話冇用又話悶）。咁就唔會咁易整爆個債務上限，買到啲時間。

21. 得唔得？同超級金幣嘅情況一樣。「好心唔好成日諗埋啲屎橋啦」。一係暫停個上限，一係提高佢，冇其他解決方法。官方一早講咗呢啲方法只係天馬行空，根本連討論嘅時間都慳返。

22. 不過啦喎，以上呢啲，全部係學究嘢。我地就好現實嘅。「係咪會股災先」「定有機會入市」。下篇講。

「係咪而家沽晒啲股票？」—太遲啦下話

23. 可以肯定嘅係，唔會叫你而家沽晒啲股票。「因為太遲啦」。好多時啲嘢去到人人都知，已經跌晒啦。事實上，有統計過，次次玩呢啲債務上限，股市之前一兩個月多數都跌　—　而即使最後係真係冇事。

24. 相反地，你亦可以當係一個好嘅入市時機。不過如果真係玩出火，甚至違約，就梗係仲有得跌

25. 下篇解