美國債務危機（上） (Patreon)

美國債務危機：講座有略講，呢兩篇詳講

Chart of the day：4月尾嘅1個月美債債息，3.5厘。而家6厘。玩乜？

同議息完全無關

因為「供求定律」，4月好多人鍾意買1個月美債，而家冇人買。但點解？

美國欠債好多，係事實，但債仔好願意借，又可以印。幾年內冇乜問題

舊債到期，咪新債冚，印多啲之嘛，有乜問題？

「印得多會有通脹」—　但一路係好就住的

「印得多美金會貶值」—借問聲2007年美匯指數幾多，而家幾多？

點解2008印咁多錢，2020更多，但美金仲強過2007年？

咁既然可以新債冚舊債，就住印又唔會通脹，又唔會貶。咁有乜問題？

債務談判，次次都冇事嘅。但，羅素雞喎

1. 問題答咗兩條，市況靜返啲，原本想返去寫返第一季回顧，Risk and Return，債券101等等。不過都係寫埋呢單先。之前少人講，呢排開始多人講。

美國債務危機：講座有略講，呢兩篇詳講

2. 就係US Debt Ceiling，美國嘅債務上限/違約危機。部份我在講座有講，今日補充多啲

Chart of the day：4月尾嘅1個月美債債息，3.5厘。而家6厘。玩乜？

3. 作為開場白，可以玩下Chart of the day．上面呢張圖，係1個月美債債息，過去3個月嘅演化。應該見到，4月頭開跌大跌，4月尾就反彈。去到5月頭就狂升。估下，點解？

4. 提提你，1個月，係相當短嘅債息，就應該同聯儲局嘅聯邦基金利率唔爭太遠。固然會橫跨咗唔同嘅議息日子，但市場會一早「估」加唔加息嘛，反正1個月內，都好易估。例如而家係4厘，半個月後議息，全世界都知加0.5厘嘅。咁1個月嘅息，就會係4.25厘，因為有半個月係4厘，半個月係4.5厘。咁如果大家估一半機會加0.5，一半機會唔加嘅，咁1個月息，就係4.125厘咁上下。因為半個月係4厘，半個月就係「一半4厘一半4.5厘，即係4.25厘」　—　想強調，係唔會忽然去到議息嗰日先大變嘅，正如啲HIBOR LIBOR都係，會計日子，會估機會，條線多數都好smooth，唔會起直角。

同議息完全無關

5. 實際上，多數聯儲局嘅決定，在幾個星期前已經大家都知。你見個圖，3月長期都維持在4.5-4.75厘咁上下。

6. 於是嚟啦喎，4月開始，做乜1個月債息大跌？唔通估5月減息咩，根本4月冇人咁估，係咪？就算有人估減息，都冇乜理由變到3厘幾。同樣地，由4月尾到而家，做乜個1個月債息勁升？去到6厘咁滯（而家聯邦基金利率先5-5.25厘）—而唔好忘記，6月中先議息，根本仲有成個月。即係話，4月尾到呢排嘅1個月債息狂升，冇可能同6月議息有關。

因為「供求定律」，4月好多人鍾意買1個月美債，而家冇人買。但點解？

7. 實情，堆走勢同加息減息完全冇關。點解咁反常？你啲網友最鍾意講嘅，「供求定律」。因為4月嗰時啲人鍾意買1個月美債咯，全部衝入去，債價升咪債息跌。然後到5月頭就冇人鍾意買咯，所以債價跌債息升。

8. Sound so smart，但點解有咁嘅改變？

9. 好簡單：因為，4月中買嘅1個月債，5月尾到期。但5月嘅1個月債，6月到期。分別就係橫跨咗6月1日。

10. 咁6月1日會發生乜事？

美國欠債好多，係事實，但債仔好願意借，又可以印。幾年內冇乜問題

11. 首先，澄清一啲好多人嘅誤解。第一，美國欠債好多係事實。不過至少短期內，幾年內，都唔會睇到有咩問題。有啲人理解做「到期咪印多啲畀你」，「美金任印點會還唔到」，至少短期（幾年）都大約係啱嘅。作為「儲備貨幣」，有美元霸權，大家好樂意繼續借畀佢，或者係根本迫於無奈，呢啲大家都應該聽過，大約都係真嘅。

舊債到期，咪新債冚，印多啲之嘛，有乜問題？

12. 至於「印幾多都完全冇後果」就肯定唔係事實，否則政府使乜收稅？（美國抽稅出名狼死）。

13. 印得太多當然會有通脹，「供求定律」嘛，太多咪唔值錢。錢太多都係唔值錢。

14. 唔多唔少你見到今日啲通脹都係2020年印得太狼嘅後遺症。至於你話點解之前印咁多都冇後果？「乜你覺得之後冇通脹咩」？我不至於話官方數據造假。如果你睇窮人日常品，啲通脹唔太多。但你睇「有錢人」買嘅嘢（名畫，豪宅，仲有……包養明星），就貴咗好多了。再加上你見股票房地產狂升（有錢人買嘅嘢呀！），貧富懸殊呀。

「印得多會有通脹」—　但一路係好就住的

15. 但你見到，美國都係「就住印」嘅，到呢兩年真係見到通脹燒到去民生用品，自然被迫停。始終要同選民交代嘛。

「印得多美金會貶值」—借問聲2007年美匯指數幾多，而家幾多？

16. 然後呢個「印得多錢會貶值」，亦都係錯嘅。請再睇多次呢個圖。2008年（史上第一次比較狠咁「印」）到而家，美金根本係升嘅。請唔好信埋啲傻仔講嘅嘢，稍為睇下數字都知。可見好多人嘅「常識」，就係完全冇常識。

點解2008印咁多錢，2020更多，但美金仲強過2007年？

17. 至於點解會咁？點解印極都升？就又睇你平時有冇聽書。匯率係相對的嘛，零和遊戲嘛。你印我又印，齊齊貶，即係齊齊冇貶（但當然會令股樓升）。

咁既然可以新債冚舊債，就住印又唔會通脹，又唔會貶。咁有乜問題？

18. 好啦，既然「到期就印多啲還畀你」，咁何來有危機？

19. 其實就都係啲……相當麻煩嘅法律嘢。你可以慢慢研究，但我敢講，你都唔會點熟。

20. 簡單嚟講，係美國自己嘅限制，有個債務上限，不能過。過咗會點？咪唔畀你再負更多債。咁理論上，好多嘢就會停，分分鐘會冇錢還美債嘅息同本，就係傳統上講嘅「違約」（default）　（不過又補多句，唔好低能到以為會冇錢出糧畀美軍中共可以打仗，「批咗」嘅budget，係不受此限嘅）

21. 傳統上，就係為咗制約政府同總統權力，亦係限制執政黨不能大花筒收買人心，然後越碌越大後人埋單咁。不過實務上啦喎，呢啲債務上限，幾年就玩一次，最後不停咁補鑊。可能係簽法案暫停佢一排，又或者係提高佢，冇事，然後幾年又玩過（你估到了，甚至有人話不如廢除咗佢，但暫時都唔係太主流嘅意見，兩黨都唔係十分支持，他朝君體也相同嘛）

債務談判，次次都冇事嘅。但，羅素雞喎

22. 實務上，當然就係兩黨會不停「玩嘢」，互抽後腳，你大我我大你咁。都玩咗好多年，次次玩到最尾都臨崖勒馬　—　不過真係難估唔會有一次出事呀下，羅素雞呀下。

23. 好啦，你嘅問題。幾時到上限？如果到咗又冇「達成共識」，有乜後果？係咪真係會違約？咁違約其實即係乜？會有乜後果？

24. 下一篇會講，轉頭出。