速評市況　＋　答讀者問：日本股ETF，HEWJ 同 EWJ，係咪HEWJ好啲？（下） (Patreon)

速評：美國通脹數據大致合預期。但，幾時減息？

過去一三五年，都係HEWJ跑贏嘅。咁係咪HEWJ好啲？係咪之後都會？

HEWJ跑出，係2021年中後段嘅事。當時發生乜事？

其實兩隻嘢嘅分別，就真係exactly日圓嘅變動

HEWJ嘅歷史比起EWJ短好 – 佢面世之後，其實日圓冇乜點升過，只有跌

過去一兩年，係日圓史上其中一次最大跌幅。拎嚟project之後，得唔得？

不過HEWJ仲應該有一個好處

但其實：你買HEWJ都好，日圓匯率都係會影響啲公司本身盈利股價嘛！

EWJ好多都汽車股電器股喎，點解？有冇其他選擇？

速評：美國通脹數據大致合預期。但，幾時減息？

1. 快手可以講埋市況，剛剛出嘅美國CPI數字，大約符合預期。所以你見債息回落少少，美股又有啲反彈。不過都真係只係少少，因為個數字真係同預期差不多一樣。好難話係好好嘅消息。

2. 但相當肯定嘅係，就應該冇乜人再估6月中會加息，全世界都估按兵不動，相信都會係咁。7月尾呢？就言之尚早。仲係有人估減息，但已經少咗。當然仲有兩個幾月，可以睇下各樣嘢點發展。

3. 而暫時我相信，今年內都唔會減息，亦唔會再加。不過下年年頭就有機會減。但當然，仲有大半年，太多嘢可以發生。不定時會update你

過去一三五年，都係HEWJ跑贏嘅。咁係咪HEWJ好啲？係咪之後都會？

4. 延續返上篇，讀者問日本股ETF。HEWJ有對沖日圓，EWJ冇。咁而過去一年三年五年，都係HEWJ跑贏嘅。咁係咪HEWJ好啲？係咪之後都會？

5. 答案當然係：唔知。視乎日圓走勢。上面有圖。

HEWJ跑出，係2021年中後段嘅事。當時發生乜事？

6. 你睇返呢個五年圖，其實之前幾年，兩隻嘢表現根本差不多。HEWJ跑出，係2021年中後段嘅事，到2022年就更加拉開咗。咁2021年中後段發生咩事？正係日圓開始大跌！

7. 咁所以，你在今日睇，梗係見到一年三年五年都跑贏大市啦。因為呢兩年拉開晒。但之後會點？就唔知了。

其實兩隻嘢嘅分別，就真係exactly日圓嘅變動

8. 再睇詳細啲，睇返呢個表（唔使貼個Excel上嚟啦）。你見到，當然係日圓升嘅年份就EWJ強啲，日圓跌時咪HEWJ強啲咯（2019年點解咁奇怪？因為日圓個變動太細啫，年頭年尾之類嘅問題）

9. 唔止，其實兩者嘅回報分野，差不多剛好就係日圓嗰年嘅升幅跌幅。所以就話你知，HEWJ嘅玩法，就係等於你買幾多日本股，就沽返咁多日圓。事實佢嘅目標亦係100% 對沖。

HEWJ嘅歷史比起EWJ短好 – 佢面世之後，其實日圓冇乜點升過，只係有跌

10. 另外可以補多筆。你見到，HEWJ嘅歷史比起EWJ短好多。HEWJ係2014年頭推出嘅，但EWJ係1996年。

11. 當然不一定話歷史長就好啲，況且HEWJ都近十年。但有一個重點：

12. 由HEWJ面世以嚟，其實日圓一路都近乎冇一個大升浪。

13. 等我貼多次呢個圖，而家你明白點解我嘅數係由2014年拎起了。

14. 好啦，所以你睇Google Finance或基金嘅fact sheet之類，同你睇頭五年，咁HEWJ梗係靚，過去五年根本日圓連一個大升浪都冇出現過（條線向下先係日圓升）　—　就係除咗舊年年尾升過一浸—但因為派咗息，扭曲咗的。而我唔知係咪就咁「加返」12蚊上去。你可以研究下加返又點。

15. 再睇返，HEWJ 2014年頭面世，都係日圓跌。唯獨係有一浸見到2015年中後段開始升過一陣（但同2021年之後嘅跌幅冇得比）

16. 咁，你可以睇返個Excel，我有計兩隻嘢由2014頭嘅回報。咁你會見到，開頭都係HEWJ跑贏，日圓跌嘛—　但去到2015年中後，就真係見到give up 晒呢啲領先，仲一度跑輸返　—　再然後就真係去到2021年分別先最大

17. 當然，唔係話你知之後幾年就一定HEWJ會跑輸。但旨在說明，其實真係日圓跌咪HEWJ跑出，日圓升就EWJ跑出咯。上面我講2015年嗰浸，因為真係HEWJ面世以後比較少數嘅一個日圓升浪（同埋2022年尾，但派咗息，唔知點計）

過去一兩年，係日圓史上其中一次最大跌幅。拎嚟project之後，得唔得？

18. 你去睇過去一兩年HEWJ嘅表現，但唔好忘記之前一兩年係史上美金其中一次最大嘅升浪，日圓其中一次最大嘅跌幅。你拎呢兩年去 project將來，我就好有保留。情況有啲似你拎住舊年啲美債ETF嘅情況嚟講—咁舊年係百年難得一見嘛

19. 特別係匯價應該都係比較接近cyclical，你好少見到幾十年長升。你話日圓而家好弱，但咪其實返返去98年咁嘅位原地踏步—　咁但，同期日經指數都升咗成個開了。日本低通脹又之前泡沫爆破，都尚且如此，你拎美匯美股比更加唔使比。

不過HEWJ仲應該有一個好處

20. 不過話說回頭，如果你對日圓走勢完全no idea，其實EHWJ有一個好處—就係個「風險」應該低啲。我呢度講嘅風險，正係上次risk and return所講嗰種standard deviation。即係volatility。我冇極細心去計，但望落應該係，官方個3年standard deviation都係　—　雖然換咗唔同年期可能好唔同　（而之前講股票standard deviation高過債券，就應該差不多所有年期都係）

21. 咁而，HEWJ嘅管理費，又冇特別比EWJ貴。所以你話想「買個安心」，冇話唔得嘅。

但其實：你買HEWJ都好，日圓匯率都係會影響啲公司本身盈利股價嘛！

22. 不過，最後都係要話你知　—　實情日圓變動，直接打擊咗你啲公司嘅盈利同股價度啦。就算你在日本賺日圓買日本股，一樣有呢啲「匯率風險」。以前咪寫過咯，你買美股，蘋果微軟一樣受強美元拖累的。唔會因為你用港紙買美金買就冇「匯率風險」。

EWJ好多都汽車股電器股喎，點解？有冇其他選擇？

23. 好啦，最後快答。另外個讀者話，EWJ好似好多都係汽車股電器股，有冇啲消費航空股？首先，買到日本股，仲要特定搵個sector，我係有啲保留嘅。我亦不覺得汽車股電器股就一定唔得。記住，分散嘛。

24. 另外，當然EWJ拎住呢啲股票，係有原因的！因為日本最大嘅公司就係呢啲公司嘛。咁你EWJ都係跟指數，就梗係呢啲大嘢。雖然EWJ唔係跟日經唔係跟東證Topix，係跟MSCI日本—　咁但，咪又係Toyota Sony Keyence　—因為日本最大就係呢啲公司。仲要係冇乜科技股嘅

25. 你搵其他ETF，其實都係差不多。不過需要講嘅係，日本嘅指數相對地係分散嘅，你見EWJ，最大持股Toyota都只係4%，十大持股之外，仲有好多其他公司嘅

26. 相反，你睇SPY，一隻蘋果就佔咗7%啦（定你以為標普500所以就分得散過日經225？唔係的！）．盈富基金就往往一隻匯控或一隻騰訊佔你8%

27. 咁你話仲想搵其他，都係有嘅。例如美股有日本小型股嘅ETFSCJ，甚至有日本小型股高息ETF（DFJ），但我就全無研究，唔少公司係聽都未聽過嘅　—況且，我嘅偏見係，日本係咪一個有利細公司嘅地方呢？

28. 要再玩偏啲？如果你直接買日本股嘅，大把古靈精怪ETF。呢度你可以慢慢揀。日經，東證，乜都有。甚至Food ETF都有。持股：味之素 Asahi 麒麟 益力多 明治 日清 三得利 東洋水產—　不過最大持股係「日本煙草」。留意唔係壽司郎之類，所以我特登講Food，唔講飲食股。

29. 當然了，全無研究。拿目測今年表現幾好的，跑贏大市添。33000 yen一股，但可以一股一股咁買。管理費又好似唔係好貴。但我只係舉個例，唔係叫你去買。望落極少成交的，有時一日都冇一股。再慢慢發掘下其他吧。

30. 不過，我就寧願買EWJ或者日經東證嘅ETF，然後搭啲個股算。你睇好航空消費股嘅，咪EWJ + Donki + 全日空。「我而家都係咁上下」