答讀者問：日本股ETF，HEWJ 同 EWJ，係咪HEWJ好啲？（上）（下集即時會出埋） (Patreon)

近排多咗讀者問題，亦都問得好，絶對係好事，陸續會答

讀者問題：EWJ HEWJ，邊隻好啲？對沖咗日圓係點回事？

材料兩個：HEWJ 同EWJ 股價歷史。仲有日圓匯價歷史圖

既然過去一年三年五年都跑贏，我當然唔會反對你買HEWJ

至怕乜？至怕你以為佢萬能，一路會跑贏，

你大可以買1球日本股就上FXCM沽返咁多日圓。但好少人咁做

你話你係日圓專家，好有信心道繼續跌。Fine，「咁你齋炒外匯咪得」

「其實唔難」，日圓跌嗰時，咪買HEWJ．日圓升時，咪買EWJ。

匯市嘅嘢，都係cyclical 啫，信不信由你

HEWJ 一年三年五年都跑贏，「但Google唔係咁講」—讀者是對的

如果EWJ一定跑輸嘅，執咗笠啦，唔會仲有100億AUM

近排多咗讀者問題，亦都問得好，絶對係好事，陸續會答

1. 拿拿拿，最好讚下我。答問題了，用好多時間的。會盡量得閒抽空答下問題

2. 見到呢排多咗讀者問題，我估都係好事。你見我有時冇答，咁就多數係因為—問得太好（當然有啲問得太差就唔答或唔識答）。問得好嘅，咁好可能我要寫一大篇文，甚至成個系列去答（成個債券101系列都係因為一個讀者問咗條問題）。

3. 不過笠定頭盔，好多時太深嘅問題，我都未必識答。我都係常人，都係學習中。有啲嘢我唔熟，要時間去由頭睇。有啲根本唔識。況且就算我以為我熟我識嘅都可以錯　—　由我自己主動寫嘅都仲好，太唔熟嘅我唔會寫。但你地問嘅，就會出現呢個問題。所以有錯或唔啱聽嘅，唔好咁惡。即係舉例你係孟加拉人，你熟孟加拉多過我，有幾出奇？

4. 仲有，有時讀者已經有自己答案，甚至你已經買咗好多，然後問我點睇。咁我嘅意見未必啱你。

5. Anyway，問得好嘅問題，我好願意答嘅。特別係態度比較好嗰啲（態度唔好嘅，可能本身都唔太鍾意我啲文，我答完你咪仲憎我。況且可能我答完你下個月都唔訂，甚至到我答時你都unsub咗—咁我不如花啲時間答啲忠心讀者問題啦）

讀者問題：EWJ HEWJ，邊隻好啲？對沖咗日圓係點回事？

6. 言歸正傳，今次讀者問題都係問日本股。日本股嘅嘢，雖然唔係太多人買，但總有一班忠實支持者。

7. 今次讀者問嘅問題，係EWJ（呢隻我貼過）同埋HEWJ嘅分別。一隻冇Hedge一隻有（有H字嗰隻咪有）。咁有乜分別，係咪HEWJ好啲，之類嘅問題。

8. 另外仲有另一個，認為EWJ比較多汽車電器股，有冇第啲選擇，例如航空股消費股咁（如果我答「汽車電器股都係消費股」可能畀人問侯）。今篇講下。

9. 再講一次，啱睇記住讚下，唔啱睇都唔好鬧。因為我仲有N咁多篇文想寫未寫。但中間就答一答讀者問題吧，等你地知道係會答的。

材料兩個：HEWJ 同EWJ 股價歷史。仲有日圓匯價歷史圖

10. 好啦，講之前，材料兩個，我幫你預備埋。首先Excel一個，入面有EWJ同HEWJ咁多年嘅股價。你用Desktop開就識自動update．用手機嘅？咁…….咪唔識update咯。

11. 仲有，日圓匯價圖一個。在個Excel入面都有，十分重要。自己save低個圖。另外你可以估下，點解係由2014年開始計。之後開估。

12. 最後，留意我篇文入面嘅用字。我講日圓升，就係你理解嘅「升」，6算上到7算就係升。點解咁無聊都要強調？因為日圓傳統上用inverse quote，USD/JPY（包括我Excel都係），而當然個USD/JPY數字越大，係代表日圓跌（因為一美金換到多啲日圓）。總之我講日圓升，就係升值，亦即係個USD/JPY跌咗。

既然過去一年三年五年都跑贏，我當然唔會反對你買HEWJ

13. 不如講咗結論先。首先，讀者指出話，過去一年三年五年都係HEWJ跑贏喎。你可以諗下你揀出面啲基金，你都一定係揀啲跑贏嘅，冇人揀啲跑輸嘅（呢個其實係謬誤，但人之常情）。咁固然過去唔等於將來（呢度我係十分認真講的），但我唔會反對人買HEWJ的。

至怕乜？至怕你以為佢萬能，一路會跑贏，

14. 至怕乜？至怕你以為佢萬能，一路都會跑贏。掉轉頭諗，如果EWJ咁一無是處，仲有人買？（事實EWJ嘅AUM同成交都大好多好多，之後解）

15. 另一樣嘢，讀者講返我提到「匯率風險冇得管理」—　可能我當時寫得唔夠清楚啦。咁但，嗰時我肯定有寫，「你買完100萬港紙日本股驚日圓跌，大可以上FXCM之類去沽返等值嘅日圓」。咁咪「管理」咯，係架。但呢個係咪你想要嘅嘢？先係最大問題

16. 嗰時寫過，問題係，邊有咁著數，邊有得舔到盡？如果你咁做咗（同時沽日圓），日圓跌，你啲日本股換做港紙少咗錢，但外匯嘅動作贏返啲。咁但如果日圓升嘅，你呢個動作就輸錢。可能日本股換做港紙多賺嘅錢，都未夠呢邊跌嘅損失，甚至又可能股票又跌日圓又升（即係雙重輸錢）。當然，亦可能雙重贏錢。但，邊個知？

你大可以買1球日本股就上FXCM沽返咁多日圓。但好少人咁做

17. 實則上，你見比較少人做呢啲嘢。我好少見人真係走去買幾多日本股之後走去沽返咁多日圓去「對沖」。正如我好少見有人買完歐洲股去short Euro．我更加近乎冇見有人買完中資股走去沽返人民幣。點解唯獨係講日圓，啲人特別關心？可能只係因為日圓之前跌得勁。

18. 不過，你買HEWJ，實情就係做緊以上嘅「對沖」咯。佢幫你做埋咁解啫。咁事實HEWJ就係買返EWJ！只係同時做埋日圓遠期合約咁解

19. 咁其實十分明顯地，你買HEWJ嘅，日圓跌，咪著數。日圓升，咪唔著數。唔使解啦。咁而過去幾年你都見到日圓跌，所以HEWJ當然係跑出啦！但，之後呢？

你話你係日圓專家，好有信心道繼續跌。Fine，「咁你齋炒外匯咪得」

20. 你話你係日圓專家，好有信心知道會繼續跌，fine．但又容許我講一句，我目測一般人估匯率嘅準確度，應該差過估股市，至少我都係。唔信？平時打牙較冇用，你去旅行唱平咗啲亦都冇代表性。你落場炒幾年咪知。再殘酷啲講，股票長期贏錢嘅讀者，應該有唔少。但，如果你真係認為你睇匯率咁準，「咁其實你過去幾年大單邊市沽日圓都應該搵好多」，照計唔使討論甚麼HEWJ．

21. 正如我會話你知，我對股市（特別係美股）長遠走勢有信心，但對估匯率就乜信心　—　所以我咪齋會買股票，唔會去炒外匯。

22. 所以，不妨諗下，你估日圓係咪真係咁準。你堅持覺得我上面講嘅嘢唔合理，只係我水皮，你好肯定日圓一路落嘅。咁你大可以覺得EWHJ一定會跑贏。

23. 再轉一個角度講。其實HEWJ vs EWJ，你近乎咩都唔使睇，反正入面都係嗰啲嘢，發行商同一間，追嘅指數又一樣，根本HEWJ就係渣住EWJ。就只係有冇沽日圓咁解。

「其實唔難」，日圓跌嗰時，咪買HEWJ．日圓升時，咪買EWJ。

24. 咁可以好肯定嘅話一樣你知：如果日圓跌，就應該買HEWJ。如果日圓升，就應該買EWJ。

25. 問題係：鬼唔知咩。上面嘅講法好似好smart，實情上係廢話。

26. 即係話你知，如果升市我應該long期指，如果跌市我應該沽期指—咁但，點知幾時升幾時跌呢？同樣地，點知日圓幾時升幾時跌？

匯市嘅嘢，都係cyclical 啫，信不信由你

27. 當然你可以好多理論，由明治維新講到吸移民。但以前寫過，股票就應該長升嘅（至少你睇環球指數係），secular嘢。但匯率係cyclical，週期上上落落。我甚至寫過，外匯根本唔係投資。

28. 以前解過，唔信或唔明嘅，你拎個標普指數50年或100年圖，再拎個美匯指數50年或100年圖。然後遮住個title，你估下我分唔分到邊個打邊個？

HEWJ 一年三年五年都跑贏，「但Google唔係咁講」—讀者是對的

29. 好啦，唔咁虛，講實際啲。首先，讀者最初講「HEWJ一年三年五年都跑贏」，我第一件事，當然係double check下。但偏偏我見到唔係！

30. 睇圖，藍色EWJ黃色 HEWJ，你見到，明明唔係咁。甚至你睇我Excel啲數字都同讀者講唔同。

31. 不過，其實讀者係啱嘅。咁即係，我圖（Google Finance呀下）係錯嘅，Excel拎啲數都係錯嘅（Microsoft呀下）

32. 點解有分別？你睇圖見到，我個圖同Excel之中，舊年12月頭，HEWJ忽然間大插咗一嘢。睇真啲，一日跌咗三成，極之反常。

33. 然後我再睇真啲，原來派過息。呢啲就真係好易中伏，我要花唔少時間去睇。

34. 然後你細心再諗下，派息會一日跌三成？係喎，佢一日派咗三成嘅升！派咗12蚊！（隻嘢除淨前差不多40蚊）。我其實都唔係好知咩事。固然一路有派息，但一向都係少少。做乜忽然派一大舊息？我就未研究到

35. 你仲可以留意，佢派息嗰時，正係12月頭，而嗰時係日圓急升嘅。我懷疑兩樣嘢係有關的。亦都因為咁，令到呢幾個月啲數扭曲晒。

36. 無論如何，如有懷疑，最簡單你睇官網，即係iShares．因為官網啲數字如果錯，就實畀人鬧實畀人告。（雖然嚴格嚟講，不能話Google錯，除淨丫嘛）

37. 咁你睇官網，睇返HEWJ同EWJ，應該發現，佢冇「除淨」，因為計埋你收到嗰舊錢，而HEWJ個圖唔會忽然一棍插咗落去。咁你有埋兩隻嘢嘅回報比較，就正如讀者講，HEWJ係一年三年五年都跑贏EWJ

38. 咁你心諗，喂，一年三年五年都跑贏喎，仲唔係擺明好啲？

如果EWJ一定跑輸嘅，執咗笠啦，唔會仲有100億AUM

39. 咁但，掉轉方向睇，如果係咁嘅話，仲有人買EWJ？現實係，EWJ嘅AUM講緊100億美金（其實好大，唔計美股應該冇乜邊隻國家ETF有咁大），HEWJ講緊只係2億。當然不能話AUM大就好，但我想講嘅重點係：如果擺明EWJ任何情況都會跑輸，咁仲有人買？應該不停流出啦。但你見到唔係。

40. （呢度順帶一提，隻HEWK，2億美金AUM，都係比較細。不過你睇成交都可能十萬八萬股，咁而家30蚊左右，即係一日兩三千萬港紙成鈫，咁你買幾皮嘢，應該冇乜大問題。仲有，睇個買賣差價，都係窄的，30.24 30.26咁）

41. 實情HEWJ點解一路跑贏？好簡單！因為日圓一路跌嘛！Save低咗個日圓圖啦嘛？咁你就明白，近幾年日圓大跌，過去十年都係跌多升少，所以HEWJ咪跑出。但之後呢？冇人知。

42. 下篇繼續。即時會出埋，唔使等。