點解成日都貼「XXX又新高」？都有五個原因　＋　第一季回顧（十）：新興市場ETF。點解明明歷史上停加息美金弱對新興市場有利，但EEM VWO跑輸成條街？ (Patreon)

微軟 蘋果 CRM FB IDEV NVDA Shopify 內銀 Panasonic 日清 全日空 新高

點解成日都貼「XXX又新高」？都有五個原因

繼續第一季回顧：新興市場ETF

特登留返 VWO EEM EMXC 三集今篇講，因為特別有趣

成個第一季，甚至去到今日，絶大多數嘢都係炒同一個主題

傳統上美金弱就喪炒新興市場股市，亦有大把理論支持　—　但今次唔係

示範直線思維，「如果咁就會咁所以我咁」嘅問題

點解最強係歐洲日本，最落後係新興市場？答你唔到。

IWD破晒頂，但VWO EEM年頭坐到而家，近乎原地踏步

EMXC新興市場走中國，就好少少，但依然係大幅跑輸已發展股市

美國停加息，美金回落，我all in 新興市場　—　唔係好言之成理咩？

你唔使每樣嘢都有意見。

「因為Ａ，所以會B，之後就C，所以我買D」　—　好多時第一步己經錯啦

1. 市況靜返啲，等我盡快寫埋個第一季回顧。當然記住留意星期三美國通脹數據。

2. 另外，我十分高興嘅係，近來有唔少讀者問嘅問題，都問得相當好。但正係因為問得太好，有啲我都未必識答，都要思考下（你估我股神咩，都係學習中，交流下）。另外，亦因為問得太好，要開幾篇長文答，所以等下吧。但我有mark低的。你地問啲好嘅問題我最開心，因為我唔使諗寫乜。不過呢刻積埋太多嘢要寫。

微軟 蘋果 CRM FB IDEV NVDA Shopify 內銀 Panasonic 日清 全日空 新高

3. 另外，都提返堆嘢。美股微軟，蘋果　CRM，Facebook，Shopify都係極強勢，創晒一年新高。港股呢？正係早排提嘅內銀繼續有力，幾隻都見一年新高（中國人壽仲勁，但我冇買，只得平保）。日本股呢？除咗早排貼嘅日清同Panasonic，而家全日空都一年新高了。

點解成日都貼「XXX又新高」？都有五個原因

4. 至於點解成日在Facebook貼？好多功能。首先Facebook拉客，自high。二來證明我啲選股部份還不錯（一年新高喎）。三來有啲人信「破位」就會再升就要追，我係唔信嘅，但我幫你監察埋。四來叫做畀你知道呢排有乜股強勢。但最重要其實係第五：畀你睇返，過去12個月，大把機會。而我係有買嘛！你又有冇？如果你冇執到啲好嘢，甚至舊年第三季走去沽嘅，咁應該再反思下，不停問「時機」，但最好時機出現咗嗰時，又有冇買落去？冇的話，又點解？（有嘅話，咁你應該幾開心）

5. 上篇太興奮，寫IDEV歷史新高，係錯的，只係一年新高。但照計你一路平均買嘅，應該多數係在水面上的（正如我啲匯控同盈富基金都在水面上）。如果未回家嘅，咁可能較高位買咗又之後冇再買（長期讀者應該知道我好抗拒用「溝貨」呢個字眼，因為本質真係唔同，啲人溝貨頂多溝一兩次，但我買嘢係長期累積），等下吧，相信唔會太耐。

繼續第一季回顧：新興市場ETF

6. 第一篇開場白，第二篇強積金同港股，第三篇美股，第四篇歐洲，同埋所謂嘅匯率風險，第五篇亞洲，日韓台灣星馬泰。第六篇印度印尼越南金磚四國，包埋一大堆環球ETF。第七同第八講開第一季債市，同埋債ETF。第九篇講咗一堆我買或有留意嘅股票ETF，今篇繼續

特登留返 VWO EEM EMXC 三集今篇講，因為特別有趣

7. 肴留意到嘅係，有買同冇買都好，上篇我講咗一大堆ETF，但特登留低EMXC（有買有寫過），同埋VWO EEM呢三隻未寫，留返今篇寫，當然係有啲特別。三隻都係新興市場。

8. 呢個季度回顧寫咗一大堆嘢，其實要快真係可以兩三句講完。成個第一季，甚至去到呢刻都好，絶大多數嘢，都係同一個主題，好可能你都知。

9. 係乜？就係：通脹受控，經濟開始冷卻甚至有機會衰退，銀行爆煲，美國停加息甚至減息，債息落，美金回落。

10. 我估就算你唔係好留意股市甚至唔係投資咗太耐，都可能聽過，甚至自己識講以上嘅嘢。咁係咪真係因為咁？我相信都係真嘅。

11. 亦可以特別留意，好大程度就係舊年嘅故事掉轉。舊年就係美國通脹，狂加息，債息狂升，美金強。係咪？

成個第一季，甚至去到今日，絶大多數嘢都係炒同一個主題

12. 咁所以你睇返，第一季（甚至去到今日），表現最好嘅嘢，基本上都係同呢啲主題有關。納指，大科企，唔使講啦，估值高嘛，Duration 長嘛（之前講債講過咩係Duration，股票都可以有呢個概念，在股票嘅層面你亦可以話Duration長即係估值貴），一唔加息甚至炒減息，翻生啦。

13. 另外仲有好多嘢都係。Bitcoin啦，ARKK啦（咪又係科技股）。仲有，美債ETF啦，債息跌咪債價彈返，增長股IWD啦，大型股啦（咪即係QQQ或SPY，所以你見VB冇運行），都係相當簡單嘅。

14. 咁而講真，美國今年會停加息，通脹會見頂，美金會見頂，呢啲亦唔係極之難估嘅嘢，你見我舊年都一路有講，亦唔係得我先估到。但當然你要估去到邊個點啲人先「信」就難好多，同埋之前你受嘅痛苦亦唔係講笑（睇返舊年第三季你咪明）

傳統上美金弱就喪炒新興市場股市，亦有大把理論支持　—　但今次唔係

15. 以上種種，在呢個系列最後埋單summary 時我會再講一次。但上面呢堆嘢，真係唔係好難明，甚至可能有讀者又鬧我做乜咁長氣。

16. Except one thing．到你睇唔同國家嘅表現，就會有啲問題。

17. 好啦，美國停加息美金回落有利股市，好多人都知好多人都信，我都冇反對。咁但，「應該」買邊個股市？呢度就易出事啦。

18. 事實係，上面呢條問題，好可能舊年下半年都好多人問，好多讀者其實都信美國會停加息，美金會回落，咁股市應該2023年會好。咁但，「買邊個國家好？」

19. 大家都知道我嘅標準答案：係答你「唔知」。又或者，「度度都買啲」。聽落行貨，但十分真心。因為，你亂咁去捉，就好易會中伏。因為，「美金回落會有利邊啲股市」，你以為易答，實情係極難答嘅一個問題。你點估？

20. 如果你睇「歷史」或者睇啲經濟分析，甚至你睇我寫嘅文都好，好多人都會話你知，美金回落就有利新興市場啦。反正舊年個講法係美金強資金流出新興市場班師回朝返美國嘛

21. 呢個「外資撤離」講法，我唔係完全信服的，但我都信美金回落會有利新興市場。因為以前都係，亦有好多理論可以支持呢點。

22. 「不過今次就唔係！」

示範直線思維，「如果咁就會咁所以我咁」嘅問題

23. 而極多人嘅一種想法，就係「通脹見頂—＞美國停加息—＞美金回落—＞會有利新興市場股市」—偏偏就冇發生。

24. 而留意，我唔止係針對呢一個例子，而係in general，好多人嘅思考都會係咁。我不能話「錯」，但話畀你知你往往高估自己，低估咗股市嘅「唔講道理」

25. 仲有，但記住容許你自己有出錯嘅空間，又係萬能嘅嗰句：「如果你錯呢？」

26. 你見到了，美國通脹回落，中丫。美金回落，中丫。有利股市，都中！

點解最強係歐洲日本，最落後係新興市場？答你唔到。

27. 但有利嘅係咩股市？首先係納指，咁你都服。但，另外最強嘅，係歐洲同日本。咪話IDEV創新高，而歐洲股市跑贏晒港股美股（話知你計唔計匯率啦）。日本股市都好強。

28. 借問聲，點估？我就真係估唔到了。當然你事後可以用好多嘢去解釋，但，咪只係事後咯。事前邊個估到？近乎冇，包括我都估唔到。

29. 咁但，我估到嘅係一樣嘢：我估到有啲嘢我係會估唔到。股市就永遠係咁。所以，記住要分散。

IWD破晒頂，但VWO EEM年頭坐到而家，近乎原地踏步

30. 相比之下，如果你堅持諗「美國停加息所以美金會回落所以我重注新興市場」，咁就出事啦。你見你買新興市場嘅ETF，VWO EEM之類，第一季跑輸晒美股歐洲，渣到而家甚至係原地踏步。

31. 好啦，你話係中資股拖累。其實都係，至少二三月你見到中資股又再大幅跑輸（但近期又好返）。咁所以，你話買EMXC，新興市場走中國，是OK的，就好過EEM VWO，亦係好早有同大家提嘅一樣嘢。特別係好多人本身都滿手港股，就當然應該分散下，EMXC都係唔錯嘅嘢。

EMXC新興市場走中國，就好少少，但依然係大幅跑輸已發展股市

32. 不過，即使係唔計中國，你都見到新興市場股市，今年大幅跑輸。原因？我都唔知。你當然事後可以搵好多原因，但肯定事前好難估。

美國停加息，美金回落，我all in 新興市場　—　唔係好言之成理咩？

33. 換個角度講，如果有啲人，自作聰明，之前估美國停加息，美金回落，我all in 新興市場　—　唔係好言之成理咩？係。但股市唔係睇你係咪言之成理。你買晒EEM嘅，今年原地踏步，照計唔會太開心。買EMXC嘅好少少，但都係跑輸不少。

34. 所以點避免？十分簡單，咪就係唔好all in 一樣嘢。至於你話「但中咗我upside大好多喎」，呢種想法嘅問題，早幾篇講risk and reward咪講咗，風險呢？

35. 而仲有另一個問題：其實自己啲眼光，有幾準呢？如果都唔係太準嘅，就更加應該諗下「如果我錯呢」嘅情況發生，會點。

36. 咁可能有人反駁，話以上嘅講法都明。咁但，例如我提倡100% invested，亦都係有唔少往績同理據支持，咁但，「如果我錯呢？」

37. 呢個問題都問得幾好。咁但，就真係睇你「信」乜了。同埋睇你嘅信念有幾強了。你總要搵啲嘢信，包括你唔信聽日會核爆所以你仲會起身返工。

38. 講實在啲，如果股票未來幾十年都係長跌，咁我嘅做法，應該都會幾大件事，係咪？咁但，就真係睇你有乜嘢去信，同埋有幾重信念。

你唔使每樣嘢都有意見。

39. 咁同時亦帶到一個問題：你唔使每樣嘢都有「意見」，都有「信念」。你問我好多嘢，其實我都係唔知。烏克蘭打仗你問我對股市又會點，沙特伊朗建交又問我對股市會點有乜好買，日韓修好又問我有乜好買　—　我當然可以答到你，我以前嘅工作就係做呢啲嘢。但，你睇我自己買嘢，我真係完全唔care。我買IDEV 買VOO買蘋果，幾時得閒研究烏克蘭會點？

40. 講白啲，你問我點解信股票長升，我當然可以同你講幾日，有好多嘢支持，所以我信，亦都重注落呢個信念。但掉轉，你話「我估美國會停加息，有利新興市場，所以我去買孟加拉股市」—　聽落都言之成理，我亦不能話你錯。但好坦白，你對孟加拉股市嘅認識同信念，怕且冇乜可能強過我對資本主義嘅認識同信念，係咪？

41. 於是乎，再講一次。呢種「直線思維」，係好累人嘅。我偏見地，特別發現讀書叻嘅人容易有呢個問題。因為佢地好多時以為就係「A->B->C」嘅思維。自然科學嘅固然係咁，加熱到100度就會水滾。讀經濟讀歷史嘅亦好多時會咁，因為咁，之後咁，所以咁。

42. 但股市真係唔係咁運作，而最危險係，事後啲人都係會用返呢種邏輯去解釋。

43. 記住，呢種「因為Ａ，咁所以會B，之後就會C，所以我買D」嘅諗法，首先係每一個位你都可以錯，甚至錯到七彩。仲有，有時亦唔止係對話錯，而係個機率嘅問題，可以參考下「以訛傳訛」呢個遊戲，你每步爭少少，最後就兩回事。

44. 況且，例如上面嘅例子可以畀你見到，你每一步都啱晒，都可以最後一步錯。估中晒通脹見頂，美國停加息，美國債息回落，中晒咁多步—「然後我買新興市場」，呢步就出事了（另一個哲學問題：其實到底「通脹見頂　美國加停息　美國債息回落」呢度，係一步定三步？你可以慢慢諗。你鍾意將呢個過程拆咗十幾步都得。正如「整蛋糕」一樣，到底有幾多個步驟？）

「因為Ａ，咁所以會B，之後就會C，所以我買D」　—　好多時第一步己經錯啦

45. 況且，其實有好多人，根本係連第一步都錯。例如我不厭其煩舉嘅例子：2022年，通關無期，零售重創，冇自由行，商場冇人，租金收入跌，飛機又冇得飛，「所以我沽空太古」。然後太古2022年升咗六成。你可以諗下，係第一步已經錯，定最後一步先錯？根本通關無期己經錯啦！

46. 點解決？分散。但當然啦，其實你齋買美股，過去N年，你發現都冇乜死錯人。「不過2000-2010年美股又係迷失十年」，當時又係新興市場跑出。而我見絶大多數人都係極短視極冇耐性。唔好話十年，迷失半年甚至一個月，你已經又喊又鬧又問乜事了。你可以想像下，你在2000年買美股坐足十年先回家（買納指就坐足十年仲輸三四成！），你可以有幾大忍耐力　—　而最仆街嘅當然係：2010年後美股就忽然脫胎換骨，跑贏晒全世界幾條街。

47. 你當年一樣有好多理由講美股點解一路跑輸。但之後嘅事，又點估？

48. 我最後想講嘅係：呢篇講嘅嘢其實非常之深。最好你唔好太快以為自己明白，我寧願你思考下。我未必一定啱，但可能你連我想講乜都未清楚。問問題甚至質疑可以，但最好諗多陣先。你係咪肯定真係知我想表達乜？（唔係你理解力差，係呢個課題太深！）。

49. 肯定嘅係，我唔係叫你唔好買EMXC！甚至唔係叫你唔好買EEM！始終都係贏錢，總好過你乜都唔買

50. 不過過去我真係見得太多人，就係用呢種「因為咁，所以咁，我就咁」嘅方法去投資。不過往往都會出問題。特別係，配合理啲人一注獨贏，市況最亢興時瞓落去，就變成大問題。

51. 而講真，自2008年以後，最近15年嘅投資，我都好似冇乜出過好大嘅問題。跑輸當然有，個股輸到total loss都有，但睇整局，我就真係從冇犯過咩大錯誤。最錯就係有幾次要用錢沽咗貨，除此以外，好似冇。

52. 因為我先唔會走去諗「世紀疫情所以全世界有排冇運行所以我沽晒啲股票佢」