美股反彈，但值博率普通。不過，永遠冇得等最好時機。IDEV 歷史新高，微軟蘋果我執幾倍，靠嘅係乜？分分鐘仲會加息，睇實今星期嘅CPI數字。畢菲特都話最好時間已過，但老人家講嘢當然有私心。 (Patreon)

多謝大家星期六嚟講座

美股反彈600點，但成個星期要跌。

而家值搏率，就普普通通了　—　但唔係叫你唔買！

創業又好表白又好乜都好，好多時，係冇得永遠等「最好嘅時機」嘅

IDEV歷史新高，微軟蘋果都一年新高，離歷史新高都不遠—但你又冇買？

蘋果我賺4倍，靠乜？

最後一次加息已過　—　定或者唔係？睇下CPI數字

債息又跌極唔係好落，股票又升咗唔少，當然值博率低咗了

做乜出個勁嘅就業數字，債息又升，美股又會大升？唔係話驚加息咩？

畢菲特都覺得值博率低，但佢當然有私心

講座讀者問日本股，其實好易買

多謝大家星期六嚟講座

1. 首先多謝晒各位星期六有嚟嘅讀者，都有讀者反映個場地唔係太好，我都有同主辦方反映下，不過多數都唔係我控制到。至於講座內容，就不能貼返上嚟，不過部份我都會遲下講返。

2. 同埋照舊，我都係覺得我講得太多，應該用多啲時間Q&A，下次試下預早收集大家嘅問題。因為的確有時有啲問題大家會怕醜問。

3. 開戶反應好我就下次可以R佢地或者其他劵商搞多次。我覺得咁嘅形式幾好，叫你畀一千幾百去聽我估好多人都未必制，亦都合理，因為你覺得Patreon已經畀咗一次錢。咁所以有第三方贊助就比較好，好似免費電視或報紙咁。

4. 煩氣一次，講座成功舉辦當然係多得長橋贊助咗我，仲有場地都係錢。所以大家可以去長橋開返個戶口。有著數拎，另外經我開嘅會另外多100蚊禮券，詳情睇圖。掃QR Code可以，或者用呢條link都得。

美股反彈600點，但成個星期要跌。

5. 又插播講下市況，當然係好。你見道指升近600點，但其實成個星期係要跌嘅。

6. 講座都有略講（或者你望下上面個圖），而家呢啲位，值博率就唔係十分高。歷史上往往由最後一次加息到第一次減息，股市都係普普通通　—　咁但，千萬唔好以為我叫你唔好買。我就係照買的。老規矩，最好嘅時機係舊年十月（但你有冇買？嚟多次又敢唔敢買？），第二好係今日。創業又好表白又好乜都好，好多時，係冇得永遠等「最好嘅時機」嘅

7. 而家呢啲「唔係十分值博」率嘅時機，都係應該買嘅，反正等等等唔知等到幾時，亦唔知會升多幾多。

而家值搏率，就普普通通了　—　但唔係叫你唔買！

8. 冇乜人可以全部錢在「好值博」嗰時買，所以「唔係十分值博」都係OK嘅—反正半杯水，你亦可以話即係「唔係十分唔值博」。你唯一要避免嘅，就係大部份嘅錢在市場最癲嗰時跟風入市，然後又再最市場氣氛最差時低位打靶或止蝕。

創業又好表白又好乜都好，好多時，係冇得永遠等「最好嘅時機」嘅

9. 時機固然重要，但買得大坐得穩都重要。咁多嘢升到一年新高，咁你在過去一年又有冇買到？

IDEV歷史新高，微軟蘋果都一年新高，離歷史新高都不遠—但你又冇買？

10. 例如IDEV（有買）同EFA（冇買），早早買咗，之前都成日講，已經去到歷史新高（歐洲股市都去到歷史新高），就係靠過去一兩年買。Microsoft 呢啲，再創一年新高了，離歷史新高都唔太遠。Shopify都係一年新高，但離歷史高位相當遠，我都仲未回家。

蘋果我賺4倍，靠乜？

11. 蘋果仲強，雖然未到一年新高，但好近，應該爭唔夠1%，分分鐘星期一就掂到。離歷史高位（183蚊）甚至仲近過Microsoft

12. 呢啲都係十分簡單嘅股票，我可以贏幾倍。但靠乜？唔係因為我在呢啲公司做，而係因為坐得穩，同埋時間。幾倍，就當然係用咗幾年的。然後我有賺幾倍嘅股票，咪可以補返一啲輸錢嘅股票！

13. 講開微軟，順手一提，否認咗資助AMD嘅故事。而我係冇買AMD嘅。咁看官就自行決定了，雖然我都係傾向信嘅。

最後一次加息已過　—　定或者唔係？睇下CPI數字

14. 話說回來，雖然星期五美股大升，但成個星期都仲要跌。上面寫咗，最後一次加息去到第一次減息，歷史上股市係麻麻地　—　不過，會唔會可能唔係最後一次加？

15. 係喎，早幾日我先話好好好可能係最後一次—但市場係會不停變的。況且，我都已經比「市場」冇咁進取，啲友估7月9月減息，我都估冇咁快，應該去到下年年頭。

16. 咁話說星期五同時出咗個好強嘅非農就業數字，咁你估到了，當然減息期望消退返啲，甚至有極少數人估6月可能加息（唔足10%，但之前幾日係零）。雖然聯儲局都仲係話言之尚早。

17. 等乜？當然係又係睇通脹數字，都講過，大家都係睇數據做人。所以嚟緊又係要睇實，星期三出。自己睇圖吧，或者睇Trading Economics （TE），Headline CPI嘅，上次按年5%，今次街估5%，TE估4.9%，換句話講應該會維持在差不多嘅位。按月嘅，上次按月升0.1%，今次街估升0.4%，TE估升0.3%，見到會「加速」。扣除食品同能源價嘅核心CPI呢？上次按年升5.6%，街估5.5%，TE估5..6%，都會係差不多持平。

債息又跌極唔係好落，股票又升咗唔少，當然值博率低咗了

18. 在咁嘅情況下，當然唔多支持短期減息。當然可以一路睇多幾個月，但亦唔好忘記唔多唔少舊年下半年開始啲基數變得冇咁高。

19. 仲可以一提嘅你，見到啲債息又再返彈返，都真係唔係幾肯落。呢啲對股市當然唔係特別好嘅消息。指數或股價就反彈唔少，但債息就唔係太落，個相對估值當然係回升咗啲了。相反，如果見到債息又落，股市又落，就應該比較值博。

20. 仲有，美匯嘅情況都差不多，同高倍係跌咗不少，但近排都係跌極唔落。

做乜出個勁嘅就業數字，債息又升，美股又會大升？唔係話驚加息咩？

21. 最後一提，見到雖然減息預期跌咗，債息又升咗，出啲經濟數據強　—　但美股都係大幅反彈。喂，唔係早期好多時都係經濟「好消息」反而股市跌咩？話數字強就唔會減息嘛。做乜而家數字強又升？

22. 答案：係一時一樣嘅。有時「好消息」係「好消息」，有時「好消息」係「壞消息」，你係會講得「任佢講」，但的確係咁。好多呢啲「關聯」，唔係永恒不變嘅。雖然你大約可以feel到嗰期嘅「大調」係乜—早前都寫過，早排啲人普遍係驚衰退多過驚通脹嘅

畢菲特都覺得值博率低，但佢當然有私心

23. 同樣覺得值博率未必太高嘅，係畢菲特。佢覺得美好時光已結束，你見佢睇得幾淡，覺得好似衰退實出現咁。當然佢近年係保守咗好多，以前都寫過，對於佢嚟講，即使舊年十月嘅美股，都稱不上平。但以前都寫過，就算你好有眼光又計得好準又真係執行到，你要等啲嘢好平先買，又唔知等幾多年，可能錯失好多機會（但相反，準則定得太鬆，又會太早飛入去）。

24. 不過在畢菲特嘅情況，當然係有「偏見」—　首先，佢後生嘅年代，係可以有啲好平幾倍市盈率嘅大藍籌。你見四五十年前股市嘅估值，係冇而家咁貴的。咁到底係結構性嘅改變（永遠唔會變返以前咁平）定周期性（會變返以前咁平），都不好說，但我傾向認為係結構性　—　都係多得唔再行金本位制，QE印銀紙之類，亦可以話同債息一路都低有關（即使舊年嘅4厘債息，同幾廿年前比，都係濕濕碎）

25. 而在畢菲特嘅例子，當然都有私心　—　唔係佢冇句真，而係：佢都嗰頭近，又已經乜都有，錢又有，名氣又有。最緊要唔好乜？最緊要唔好晚節不保！留返啲錢擺壽酒好過。所以保守啲合理，佢避免到大跌嘅，就臨死都多一單代表作。相反，佢再賺多啲錢，再一次跑贏大市，對佢「股神」嘅聲譽，其實會唔會多兩分正面影響？近乎冇。而萬一佢摸頂嘅，咪臨老燒鬚—仲要好可能即使佢只係買得太早，之後會追返，佢都未必睇得到，你都只會在佢死嗰刻同佢「埋單論功過」。

26. 所以名人，有錢人，老人講嘅嘢，係要諗下背後嘅私心嘅。

講座讀者問日本股，其實好易買

27. 呀最後，講座有提到日本股（呢度我都成日提啦），咁係有部份有人興趣。但有位觀眾（強調自己係「升斗市民」嗰位　—　埃汾都係「升斗市民」呀下，講座嗰日我都係坐巴士出灣仔，在屯門公路洗滌心靈的），講返話難買日本股，咁想話在MPF買。嗰日我都有提，你MPF如果日本基金，就真係只能放5-10%，不能一個國家集中太多嘛（美股港股你可以多啲嘅，大市場）。

28. 但另外，當然可以開個IB戶口。用我個link，有IB股票送。（嗰日長橋贊助就費事講）

29. 不過，唔開IB嘅，其實你在美股都可以買日本ETF嘅。咪話EWJ，今年都升9%，唔失禮，已經扣除咗個匯率了。