星期六講座最後召集。美國小銀行反彈，點解？買得未？蘋果業績後又大升。Shopify低位升200% 不過我仲輸緊錢。微軟資助AMD，玩乜？內銀股好強，升乜？讀答者問：內房債ETF，點睇？最壞情況係咪已過？ (Patreon)

最後召集：星期六下午2至4點灣仔免費講座

美國地區銀行反彈，點解？買得未？

蘋果業績：明明話冇創意冇人用

護城河：人地就可係可以「冇新意」都一路搵到錢呀，明冇？

Shopify：低位升返200%—但我仲輸緊錢。

AMD：微軟出錢資助佢，搞邊科？

大師冇點你：內銀股1年新高—炒乜？

大陸股嘅兩大原則

答讀者問：內房債ETF又點睇？

明明最壞情況已過（我同意！），咁點解內房債ETF今年跌一成？

「救存戶唔救股東」2.0 ：內房唔死，等唔等於買債嘅唔死？

最後召集：星期六下午2至4點灣仔免費講座

1. 繼續廣告，最後一次，星期六免費實體講座，在灣仔，2至4點。報名呢度，詳情呢度。報咗名未收到通知都可以嚟，甚至未報名都可以walk in嘅。

2. 免費嘢當然係因為有人代你出咗錢，所以大家可以去長橋開返個戶口。有著數拎，另外經我開嘅會另外多100蚊禮券，詳情睇圖。掃QR Code可以，或者用呢條link都得。

3. 呢個就星期六之後都有效嘅，多幾個人開戶，咁我就容易啲R其他券商再贊助講座。

4. 原本想講返第一季回顧，不過港美股都升，所以快講下啲市況。又，應該讚下我呢兩個月啲文就出返好足了，主要係調整到啲題目安排。

美國地區銀行反彈，點解？買得未？

5. 首先你見美國啲地區銀行股反彈，原因任你講，但好可能同呢兩單嘢（呢個，呢個）有關。都幾好笑，查沽空啲細銀行係咪操控市場。大佬呀，你政府擺明救存戶唔救股東嘛，咁股價梗係跌。最好笑話明明基本因素好啲人仲去沽空好可疑。非常好笑，雷曼爆煲前啲資本充足率都夠架。中國經濟夠一路增長咪又有人沽空，不如去禁埋？可見官嘅嘢。

6. 咁但當然官字兩個口，唔多唔少啲人就可能short cover—　咁但，咁樣係咪可以死頂住啲股價呢？歷史見到多數都唔係好得。係呀KRE反彈，不過我都唔會叫你買。你買賺到錢就你叻仔。

蘋果業績：明明話冇創意冇人用

7. 另外，蘋果業績相當強，股價大反彈。作為重磅股，亦都帶動返美股反彈。亦都為業績期劃上句號（其實間間唔同年結，一路keep住出，但傳統上都係用銀行做開頭科企做尾），見到美股整體業績都普遍好過預期，股價亦普遍升，之前又擔心業績走樣嘅，又錯失咗機會。實情不能咁驚嚟驚去，否則你永遠都唔會買，市場幾時都有風險，你「以為」好安全嗰時先最危險。

8. 蘋果一路係我核心持股，買咗多年從冇沽過，你見真係唔使搞咁多嘢。呢個又話人冇新意嗰個又話冇人用，又話大公司冇增長，又話Steve Jobs死後公司就會唔掂，股價唔呃你。

護城河：人地就可係可以「冇新意」都一路搵到錢呀，明冇？

9. 人地就係可以在冇乜新意下不停咁搵到錢呀，明冇？呢啲就係「品牌」啦。正如我應該又差不多換部新iPhone，而家呢部用咗3年，疫情前出，都算耐—但你問我部新機有乜分別？好似都乜。

Shopify：低位升返200%—但我仲輸緊錢。

10. 另一隻就搞笑啲，Shopify。呢隻嘢係之前科技股洗倉重災區之一，高位170蚊，低位見過24蚊！趺足85%。我都有買，輸得都勁。結果業績又係意外地好，股價兩日狂彈到1年高位。其實低位升咗成200% —但我都仲輸緊錢！可見我買嗰時真係好貴（冇錯係2020年尾大家最興奮嗰時）。亦可見買得太貴真係極難翻身（升200%我都仲要輸）—不過，好彩我唔係買得太多。亦好彩我冇低位打靶。

AMD：微軟出錢資助佢，搞邊科？

11. 另外，可以留意下AMD。之前業績後大跌，其實業績根本係好，頂多話個展望差。不過，最新呢單嘢夠奇怪，話微軟會資助佢研發AI晶片。

12. 可以點解讀？都幾簡單。而家嘅AI晶片，就差不多係NVIDIA天下（所以股價咁強，一早叫你買了）。咁對於用家（微軟Google甚至百度）嚟講，一間公司獨大，幾時都唔係好事。一來對方一定在定價上有bargaining power，二來你有乜事停產，或者出唔切貨，我咪坐喺度？所以微軟想扶持多間公司，十分合理。仲要係自己出錢，咁好可能係供應自己優先。

大師冇點你：內銀股1年新高—炒乜？

13. 仲有，港股方面，有返啲起色。見到係啲中資金融股反彈。除咗因為北水重開外，亦都見到啲內銀幾好力，幾隻都去到1年新高。上個月尾都有講過下。留意返，你睇業績，係完全唔得嘅。

大陸股嘅兩大原則

14. 但，嚟啦喎，記住兩大原則。首先，股價係炒預期嘅。冇錯業績係唔得，但正係因為唔得，之後會得返。即係點？你見啲淨息差收到好窄，但正係因為去到好窄，低過傳統講嘅警戒線，影響盈利。咁會點？之後就會放寬返！反正好大程度係阿公決定。實務上點做？就係畀佢地下調啲存款息（亦即係懲罰啲存戶），咁咪改善個息差。

15. 咁而呢啲做法，就係原則二：記住啦，中國嘅嘢，咁多年好多嘢變過。但，有樣嘢真係三四十年唔變：一放就亂，一亂就收，一收就死，一死就放。而家，又再由一收就死去到一死就放嘅地步啦！

16. 仲有，同以上類似嘅，就係大陸有一種「吵鬧的孩子有糖吃」嘅文化。往往係邊個叫救命，就救邊個，往往就犧牲另一個。經典例子係發電廠同煤廠，煤價高時煤公司搵大錢發電廠叫救命，玩得咁上下就限煤價，咁就到電廠賺大錢煤公司輸錢，於是就又畀煤價升，然後又返到起點　—　呢個亦某程度上解釋到點解中資股成日都係輪流炒，但整體係冇乜升幅。

17. 內銀嚟講，增長亮點是冇的。但勝在派到高息，而且「應該」可見將來維持到—但記住冇得保證，而且股價可以跌，人民幣亦可以跌，世界上係冇穩穩陣陣7厘息的。咁而家加埋話停加息啦，啲人搵返啲有高息嘅嘢，幾合理。

18. 不過照舊，分散。唔好全部買晒內銀然後跌30%又問我點算好又話我老點你。

答讀者問：內房債ETF又點睇？

19. 仲有啲篇幅，答下讀者問題。第一季回顧系列，講債市都只係講美債同美債ETF，頂多只係去到AGG，但都仲係投資級別。想買垃圾債（或者好聽啲，「高息債」）嘅，另外有其他ETF，不過我好少講

20. 例如有人問內房債，話「最壞情況應該已過」。咁係咪應該買？

「最壞情況已過」—我同意，「所以良機已經錯過咗」

21. 你可以話「最壞情況已過」，我絶對同意　—　但，「咪就即係未必好值搏咯」。講過N次最基本嘅嘢，最值搏一定係個個話爆煲嗰時買，壞消息未過晒時買。你話到你都知「最壞情況已過」，唔敢話冇得升，但值搏率已經低好多，就你諗你了。

22. 一個好簡單嘅例子：中國海外688。舊年大陸房地產市場夠大鑊啦係咪？又話集體斷供又話爛尾欄。但，中海外舊年股價升12%，跑贏港股美股成條街。到你今年先話「照計最壞情況已過」，就沒戲唱啦，今年股價就仲要跌，跑輸大市。

23. 另一個例子，你睇太古（19）（我知唔係內房），根本一樣。舊年零售死晒商場寫字樓冇人租飛機冇人坐，但股價升足六成。你話到今年等「壞消息已過」「開關啦」先買？今年隻嘢就又係要跌，跑輸大市

明明最壞情況已過（我同意！），咁點解內房債ETF今年跌一成？

24. 見到冇？你係想time market嘅，係應該「壞消息未過晒」嗰時買入去，唔係「壞消息過晒」買。但要「壞消息」買係極考驗人性的，所以一路都叫你有錢就買，定時買。

25. 讀者問嗰隻內房債ETF 3001，你見今年一樣係輸錢，要跌10%，跑輸晒其他嘢。計一年回報亦係輸超過兩成。就由讀者上次問我（應該4月中定尾）開始計，你見都係不停跌。

26. 呢位讀者可以去join返最貴年費，因為我又幫你慳返唔少錢。

27. 但至少事後睇返，有冇機會贏錢？甚至贏大錢？都係有嘅。但應該幾時買？冇錯就係舊年10月尾滿天壞消息講到中國玩完嗰時。嗰時買，低位反彈你執近200%。但你話而家先諗，就唔係嗰回事。

28. 嗰時先真係「最壞情況未過」，而家就「已過」，仲有幾多空間？

29. 別人恐懼時我貪婪，又一個經典示範。當然，10月時你要買，就要啲勇氣，同埋要上少啲網，仲要冇乜朋友。

「救存戶唔救股東」2.0 ：內房唔死，等唔等於買債嘅唔死？

30. 仲有，你買內房債或啲ETF，仲有一個好大嘅問題：間公司唔死，唔代表你唔死。呢個同之前講聯儲局「救銀行唔救股東」異曲同工。

31. 你間內房可能唔使死，但好多時都玩債務重組，原本隻債100蚊可能收返10蚊—　咁除非你係佢垂死邊緣5蚊買入去嗰啲（正如唔少對沖基金早排買瑞信隻AT1—搏可能瑞士政府敗訴，或者庭外和解買你怕係咁意賠返少少）。

32. 無論如何，我就唔多建議人買呢啲東西嘅。不過呢個例子又示範到差不多所有投資工具都係有同樣嘅性質：炒預期，同埋「壞消息未過」時買。但你估有幾多人做到？你就真係要精神分裂兼冇朋友仲要唔好睇電視唔好上網唔好同人Whatsapp，因為全世界都同你對著幹　—　但一次又一次畀見到，多數人，就多數係錯嘅。

33. 係架，壞消息時買，好大風險，點知會唔會真係爆？但，你要高回報咪要高風險—呢隻嘢低位升200%。受唔到高風險嘅，冇問題，就唔好玩呢啲「人人恐懼時我貪婪」嘅time market遊戲—至怕係歌舞昇平，你以為「冇風險」　—　嗰時先最大風險。再講一次，2021年嘅教訓。