今日寫三樣嘢：聯儲局幾時減息？美國小銀行繼續狂瀉，香港銀行加最優惠利率 (Patreon)

幾時減息？睇下歷史數據。睇下最後一次加息，同第一次減息，隔幾耐？

我估好多人都係低估咗聯儲局可以有幾快「掉頭」

星期三四美股都跌，但聯儲局有放鷹咩？冇噃

而家市場又估幾時減息？

我嘅直覺（係！直覺！），又估幾時減息？

KRE跌到新低，早早叫你唔好買。但，會唔會令聯儲局加快減息？

香港銀行加prime，樓市爆煲未？「供樓負擔大升喎」

好啦，P加到5.75厘。知唔知由幾多厘加起？

同期美國又加咗幾多息？「點解香港冇跟足？」—邊條傻仔話會跟足的？

既然冇跟足美國加，會唔會第時減香港唔跟足？會唔會人地唔加香港加？

1. 繼續廣告，賣埋聽日就完，忍耐下。報咗名未收到通知嘅，到時照樣嚟都得了，甚至星期六忽然改變主意想嚟都應該OK嘅。星期六免費實體講座，在灣仔，2至4點。報名呢度，詳情呢度。

2. 免費嘢當然係因為有人代你出咗錢，所以大家可以去長橋開返個戶口。有著數拎，另外經我開嘅會另外多100蚊禮券，詳情睇圖。掃QR Code可以，或者用呢條link都得。

3. 跟進少少市況，我諗值得講嘅，有三樣嘢。另外你亦可以望下蘋果嘅業績，不過星期四收市先出，我寫時未出。

幾時減息？睇下歷史數據。睇下最後一次加息，同第一次減息，隔幾耐？

4. 首先講講聯儲局加息之後嘅餘波，話晒係最後一次加息，仲有好多嘢值得講。例如你最關心嘅「幾時減息」之類。我就會在星期六嘅講座詳細講（否則又要寫幾篇文）　—　當然你嚟唔到或者在海外嘅，有機會我之後都會講返，但我都係建議你星期六去聽下。

5. 不過唔好話我吊你癮，你想聽短答案嘅，可以睇下歷史數據，自己數都唔係太難。聯儲局停加息，亦即係最後一次加息後（你可以當今次係），一般幾耐再減息？你可以估下。

6. 真係估下，我即時開估，睇下你嘅直覺準唔準。

7. 答案，都真係次次唔同，但平均，講緊半年左右。快嘅，兩個月都試過（估唔到呢？所以唔好以為聯儲局唔會U Turn），耐嘅，都甚少超過一年，唯獨係有一次15個月。記住啦噃。

我估好多人都係低估咗聯儲局可以有幾快「掉頭」

8. 我相信呢個數字係比好多讀者估嘅要快。應該多數人估嘅「冇咁快減息」，係指一兩年？但實際上多數一年之內就減。但當然，投資者善忘，同埋多數人都冇耐性。

9. 詳情會在講座講。

星期三四美股都跌，但聯儲局有放鷹咩？冇噃

10. 講返幾樣相關嘅嘢。首先，星期三晚議息後美股跌，星期四美股再跌。固然好多人又覺得「放鷹」。但都講過唔好畀個市況影響返你嘅判斷，佢升你就覺得「鴿」跌你就覺得「鷹」。其實可能只係因為小型銀行風暴影響，再加埋唔少profit taking。永冇人知「點解」跌

11. 睇真啲，星期三晚，出完議息結果，美股轉升。但到尾段轉跌。好似都唔止一次係咁。咁你見媒體講嘅「理由」，當然係narrative，fit story，「開頭聽到停加息好開心」。但之後主席講話通脹前景展望唔支持減息。但其實主席，咪又係重覆返3月嗰時講嘅嘢，任你演繹。

而家市場又估幾時減息？

12. 比較得意嘅係，你可以睇利率期貨市場嘅反應。首先，就完全冇人再估加息，5月就已經係最後一次，見晒頂，唔使拗。

13. 至於6月嗰次（唔貼圖了），絶大多數人就估按兵不動，唔加又唔減。

14. 重點嚟啦喎，7月呢次，已經六成幾嘅人估會減。

15. 9月呢次，差不多所有人都估減。

16. 亦即係話，市場估應該7月減，7月唔減9月都減。即係三四個月後就減息（7月9月會都係月尾）。咁上面咪講過，平均都要六個月，所以似乎市場係有啲進取嘅。

17. 但當然，似乎局方係暗示今年唔會減。咁市場亦可以錯。所以之後又會陷入一個拉鋸嘅情況，又睇下局方會唔會強烈指引返市場期望了。

我嘅直覺（係！直覺！），又估幾時減息？

18. 我嘅直覺？就係下年年頭減。咁局方就自然唔使轉口風話今年減，而亦都同歷史上嘅相距時間差不多。當然呢啲只係我呢刻嘅直覺，可能下星期就變。

19. 要循例講嘅係：的確歷史唔一定可靠。之前貼啲標普指數，成百年嘅歷史，都有人覺得「可能下年唔同」。咁事實係加息周期，史上都唔係好多次，sample size係唔太多嘅。

20. 而且當然了，市場又好，局方又好，而家好大程度都係要睇通脹數字做人。之後幾個月，出啲通脹數字反彈嘅，自然市場就唔會再估七月九月減。

KRE跌到新低，早早叫你唔好買。但，會唔會令聯儲局加快減息？

21. 第二點要講嘅，當然係美國啲小型銀行嘅風暴，怕且都唔使我點再重覆。自己睇圖。

22. KRE跌到一年新低。唔明咩叫一年新低？即係任何位買你都輸錢。之前諗住買KRE嗰啲，唔該自己去續返最貴嘅一年會藉，甚至直接入錢畀我都得，PM我問你拎戶口冧把

23. 比較值得講嘅係，呢啲銀行問題，會唔會影響聯儲局加減息嘅決定？

24. 短答案係會。但實際上並唔係一個最重要嘅因素（但都有一定重要性）。

25. 因為雖然加息並唔係堆銀行嘅直接死因，但都算係有一定嘅「功勞」。存款流失，唔多唔少都同加息有啲關係。正所謂買美債都4厘（而家冇了），做乜要放錢在FRC SVB（嗰堆銀行嘅存款利率相當低）

26. 至少我相信，聯儲局5月就已經停加息，唔多唔少因為成堆銀行出事。冇錯係5月仲係加，但我估已經係「妥協」咗。亦即係話，唔係3月成堆銀行爆煲，可能會係加多一兩次先停。當然呢啲只係我估。

27. 咁但，暫時呢，似乎呢啲銀行爆煲，未真係造成好大嘅糸統性風險。所以不見得可以咁快「威脅」到聯儲局減息。亦都講真，減息未必有好大嘅幫助　—　你減0.25，對於造成堆銀行嘅種種問題，好似冇乜分別。

28. 而當然，而家嘅通脹數字都係比較高。所以去到呢個位，停手，唔再加，但又唔減，睇定啲，似乎係唯一嘅選項。

香港銀行加prime，樓市爆煲未？「供樓負擔大升喎」

29. 最後，well，香港幾間銀行都「加咗息」。關於香港有一大堆「息」，啲人撈到亂晒呢啲，不再重覆。今次就真係加咗個P（Prime），不過只係加0.125厘。

30. 有人會問，對樓市有乜影響？好似之前都講過，答案係零影響。香港嘅樓市過去N年都同利率近乎冇關。

31. 唔好聽啲咩「供樓負擔上升啲人會供唔起會斷供」，明顯唔係呢回事。唔係話樓價唔會跌，事實之前跌咗唔少啦！但呢啲都同加唔加息完全無關。

好啦，P加到5.75厘。知唔知由幾多厘加起？

32. 以匯豐為例，加埋今次係5.75厘。知唔知由幾多厘加起？答案係5厘。即係累計加咗0.75厘。咁即係，加0.75厘就已經「供唔起」嗰啲，你估有幾多人？唔好忘記，聽聞係要過壓力測試的。固然有啲人造假（但其實都幾難，因為銀行唔會同你癲，拉坐監的），亦可能你買完樓失業。但你估有幾多人係加0.75就供唔起？

同期美國又加咗幾多息？「點解香港冇跟足？」—邊條傻仔話會跟足的？

33. 咁問下你，同期美國加咗幾多息？「一次都0.75厘啦！」，答案係，美國加左5厘息（自己慢慢數）

34. 好啦，點解「跟唔足」？以前都寫過。短答案：邊個話你知要跟足？問多你一次，呢個錯誤嘅concept，邊個教你的？你可以反省下。你話港紙拆息要跟美金拆息，都大約有個理據。但邊位話你知Prime要跟Fed Fund Rate？一向都唔跟！之前都係！

既然冇跟足美國加，會唔會第時減香港唔跟足？會唔會人地唔加香港加？

35. 如果你夠聰明嘅，亦可以問：咁既然加都冇跟，會唔會第時減都唔跟？當然係會咁啦，人地減兩三厘息，Prime點會減咁多？

36. 同樣地，你話會唔會之後美國停加息，但Prime反而升，「追加」？—呢個就好問題啦。答案係，理論上係會嘅。但實際上，相信機會不太大。最多可能美國停但香港prime再加0.5好未？（雖然呢樣嘢發生機會都不太大）

37. 畀你知呢啲，就等你了解個世界。但你問我，對樓市有乜影響？近乎零。早早講過，對樓價最大影響嘅，不外乎係移民潮，同埋大陸人嚟香港買樓。

38. 話明寫少少，變咗都多多。咁唯有再之後一日先繼續我地嘅第一季回顧。