廣告：星期六講座。頭盤：已經加咗最後一次息！主菜：JP Morgan 100億買起FRC 2000億資產。咪好著數？梗係唔係咁計。雖然都係好著數（第一季回顧就星期五繼續） (Patreon)

繼續廣告：星期六灣仔免費講座，記得報名

聯儲局議息：講到明停加息了，滿意未？

眾望所歸，6月唔會再加息。今年都好可能唔會

固然有人話「停加息啫又唔係減息」「仲係好高息」—　但股市幾時見底？

「JPM畀106億阿公，就買起2300億資產嘅FRC」。係咪咁計？

有啲仲好笑：「JPM畀106億拎咗人地920億存款」

FRC嘅資產同存款，流失咗幾多？

人地買資產，唔係買晒嘛。正如買負債都唔係買晒。

「摩通則表明不會承擔第一共和的企業債及優先股權」　—　咁都得？

JPM話一年執多5億純利。而潛在虧損就有阿公一齊分。你話著唔著數？

阿公就會輸錢，輸130億。咁你話邊個著數咗？

繼續廣告：星期六灣仔免費講座，記得報名

1. 繼續廣告，星期六免費實體講座，在灣仔，2至4點。報名呢度，詳情呢度。

2. 免費嘢當然係因為有人代你出咗錢，所以大家可以去長橋開返個戶口。有著數拎，另外經我開嘅會另外多100蚊禮券，詳情睇圖。掃QR Code可以，或者用呢條link都得。

聯儲局議息：講到明停加息了，滿意未？

3. 呢篇文寫於星期三晚。之前都都唔記得講，是日聯儲局議息。新鮮滾熱辣出咗加0.25，人人都知，問題係對之後加息路線嘅明示暗示。

4. 原本呢次唔係「大會」，冇經濟數字預測點陣圖（之後6月嗰次就係「大會」）。不過今次都多人留意，因為唔少人之前都認為，今次好可能係今次周期之中最後一次加息。

5. 至少在今次結果出之前，啲人係咁諗。睇圖，張圖係議息結果出之前的。呢個係6月會議嘅利率期貨。5月議息前嘅聯邦基金利率（「current」）係4.75-5，咁眾望所歸加多0.25，議息後就變5-5.25。

6. 好啦，但到6月呢次。75%嘅人都仲係估5-5.25。即係6月唔會再加。當然仲有10%人估再加，15%就估減。

眾望所歸，6月唔會再加息。今年都好可能唔會

7. 同樣地亦都提返大家，上次3月嘅議息，就係「大會」，有官方嘅經濟數字預測。當時官方都寫明，年尾嘅聯邦基金利率，會係5.1厘—即係5-5.25，亦即係加埋5月呢次之後嘅水平。咁所以人人都估5月呢次就停，就好合理嘅。

8. 當然，官方睇法可以改，以前亦改過。但一次會之後就改，仲要唔等到6月「大會」即改。仲要係銀行爆咗鑊，通脹又冇特別高過預期下，無啦啦會變得更進取？就唔多合理嘅。

9. 最後，就真係一如所料咁加0.25。會後議息聲明呢？當然各人有不同解讀。但幾明顯，係暗示咗「短期唔會再加」（或者應該話，「刪去咗暗示短期再加」嘅字眼）。

10. 市場反應最終點？唔知。似乎係正面嘅。但講到尾，唔係話唔好理市場反應，但唔好畀市場反應反過嚟影響你判斷。無論最後美股收市大升定大跌，「短期唔再加息」呢個訊息係好明顯嘅（當然，「短期」係幾短期就好多演繹空間）。

11. 咁固然了，「淡友」可以話，「扯，停加息之嘛都未有耐減」，「唔再加息都好而家都仲係好高」。但至少，一路講嘅「停加息」，已經成真。至於幾時減？可以之後討論下。

固然有人話「停加息啫又唔係減息」「仲係好高息」—　但股市幾時見底？

12. 而再提多你一次：實情，股市唔使等減息，唔使等停加息，甚至唔使等「放慢加息」—而係「開始聞到會放慢加息」已經大反彈，正係舊年年尾嘅事。

13. 當然啦下，如果之後啲通脹數據見到通脹壓力再返黎嘅，聯儲局自然會改變觀點。

「JPM畀106億阿公，就買起2300億資產嘅FRC」。係咪咁計？

14. 今日嘅主菜，可以講講JP Morgan（JPM）買起FRC呢單嘢。你可以睇圖，或者睇原文，或者睇英文。

15. 好啦，睇標題，JPM只係向FDIC（阿公）畀106億，就買起咗FRC。但條數點計？當然好難好仔細，但我會同你指出一啲常見嘅錯誤

16. 首先，FRC有幾大？你在網上搵免費source（yahoo Finance之類），應該只搵到舊年年底嘅數。但如果我冇睇錯，公司係出埋第一季業績先出事嘅，所以用第一季尾（3月尾）嘅數。當然臨死前啲數會郁得好勁，但有個參考。

17. 3月尾時，FRC資產係2300億。然後明報報導有寫，死時都係差不多，可見啲資產1個月內不見得大幅縮水。

18. 嘩，咁咪好著數？畀106億就買起2300億—但大佬呀，負債呢？

有啲仲好笑：「JPM畀106億拎咗人地920億存款」

19. 另外你見有啲更加錯嘅，走去講JPM畀106億，拎咗FRC 920億存款（報導有講），有著數。呢啲完全係概念錯晒，以為拎人地啲存款係拎咗人地啲錢　—　老細，存款係銀行嘅「負債」喎聽講。你「買起」人嘅存款，其實係肩負咗啲責任，人地第時可以提錢走。所以你唔係笠咗人地920億，係有920億嘅存戶第時可以在你身上拎錢走。請大家唔好犯呢啲低級錯誤。

20. （留意FRC份業績就講3月尾有1000億存款，所以其實4月唔係走咗好多。但舊年年尾係1760億！）

FRC嘅資產同存款，流失咗幾多？

21. 上面講過，FRC講緊2300億資產，JPM畀106億買起。咁但，不能咁計嘛，有埋負債嘛。咁你心諗，係咪睇FRC嘅淨資產（股東權益， book value）？

22. 一般情況下，係。固然可能個淨資產由3月尾到而家走晒樣，但叫做有個比較好嘅指標。咁你睇份業績，3月尾時淨資產大約180億。你106億買，好似還好（假設啲「資產」冇太大古惑）

23. 好啦，上面係理論．實際上，睇多兩樣嘢。第一，都話到JPM買嗰時，啲數會郁咗的，未必同3月底時一樣。但更重要嘅係第二：JPM唔係全部嘢買晒！所以不能就咁睇個股東權益—因為呢個係總資產減總負債，但JPM唔係全部食晒

人地買資產，唔係買晒嘛。正如買負債都唔係買晒。

24. 我地再睇落去，睇返報導。報導有寫，JPM主要買起嘅，就係FRC嘅貨款，1730億。再加啲FRC持有嘅證券（搞清楚，唔係FRC嘅股票！FRC嘅股票又點會係佢地自己持有返。呢度證券係FRC買嗰啲美債之類，甚麼AFS HTM嗰啲，記得聽書），就300億。

25. 呢兩味加埋都2000億了。其他資產？唔知有冇買，可能冇。但呢兩樣嘢都佔咗近九成資產。另外留意，呢兩樣嘢嘅銀碼，同睇FRC　季度業績嘅數，分別不太大（最頂有寫有幾多AFS同HTM）

26. 負債？講咗了，FRC嘅920億存款，JPM攬上身，即係FRC嘅存戶變咗JPM存。梗係要咁，否則你咪好著數？拎咗FRC啲貨款同證券，但人地存戶你就唔使還返錢畀人！仲得了？

27. 亦講多次，存款920億，同FRC季度業績講1000億，有啲流失但唔算爭好多（但年尾係1700億！）

28. 好啦，魔鬼在細節。資產（主要係貸款同證券）差不多全部拎晒，存款都攬上身。但，有啲負債就唔攬上身！

摩通則表明不會承擔第一共和的企業債及優先股權。

29. 睇呢句嘢：摩通則表明不會承擔第一共和的企業債及優先股權。

30. 呢啲嘢JPM就唔會攬上身。咁即係，邊個還？冇人會還。亦即係，買FRC債，同埋優先股嘅，基本上就total loss，唔使找數。

31. 實際上JPM食咗幾多淨資產上身，有啲難計。但因為明顯部份負債踢走咗唔使還，呢度就著數了。

32. 仲係唔明？畀個簡單例子你。即係人地間公司100蚊資產，90蚊負債，10蚊股東權益。而家我用5蚊買，然後食咗佢90蚊資產，但我只孭佢50蚊負債。大約係咁。（數字亂作，同JPM呢單未必完全可比）

33. 又，以上呢啲，有關銀行嘅資產責債表呢啲，其實部份在債券101 應用篇講恒生時會講到，我甚至已經寫咗個draft，可能之後又第一季回顧又Risk and Reward咁，希望盡快埋晒尾。

34. 講返，仲有更多東西的．JPM要畀嘅，就係畀106億阿公。好似銀主盤或者拍賣賊贜咁。留意入面有講阿公會提供500億融資，但當然JPM係要還嘅—不過肯定係低息。

JPM話一年執多5億純利。而潛在虧損就有阿公一齊分。你話著唔著數？

35. 仲有？FRC啲資產，可能會有啲有問題嘅嘢。唔一定係好奇怪嘅嘢，咁普通爛帳都會啦。阿公係會承擔保份的！（不過唔係阿公食晒，好似你買保險咁咯，自己都要出啲）。

36. 仲可以留意多嘢，JPM講埋之後兩年會帶嚟5億純利，仲會有重組收益。當然啲數只係大約估，但官方宣佈咁講，總不能作得太大，之後投資者都會睇下你有冇空口講白話。但股價，當然升。

阿公就會輸錢，輸130億。咁你話邊個著數咗？

37. 最後，另一個角度睇：呢壇嘢，阿公就會輸錢，輸130億。

38. 加埋晒，個故事大約係點？大約你可以話，JP Morgan執咗平貨。阿公要蝕賣畀佢。咁但，又不能完全話係私相授受益大行，因為都好似係要入標嘅，但可能JPM 已經係出價最好，冇搵得阿公笨最多（又或者自己有信心食得起，出高啲價，好似投地咁）。

39. 所以，呢啲「救存戶唔救股東」，就係咁回事。阿公固然可以孭起啲存款，但最後都係要搵大銀行埋單。咁大銀行當然精甩邊，點會唔鍊盡啲？反正阿公急之嘛，你不能質我食。而阿公最緊要快啲踢走個波，反正阿公嘅錢，就係納稅人嘅錢　—當然不能完全益晒大銀行，不能完全輸晒納稅人嘅錢，但只求唔好太過賤賣，唔好輸得太多，啲銀行食相唔好太難睇，循例整個投標咪算。

40. 舉一反三，可能大家都聽過，俄羅斯寡頭（包括之前車路士班主艾巴莫域治）。點發跡架呢？就係因為當年蘇聯解體，啲國有資產就大平賣。當然當年更加冇人理，所以更加係超平貨。

41. 講返今次呢單，最後都係納稅人輸咗100億，然後JPM嘅股東著數。所以唔好以為有存款保障，納稅人唔使上身。你可以話正好相反，存戶就冇事，國家埋單。不過話說回頭，納稅人輸100億，就好小事啫。如果啲銀行無序破產，相信大鑊好多。

42. 係有啲難明，但試下睇到明為止，可能仲會有銀行爆煲，或者唔係今次可能係幾年後，十年後。而家理解咗，第時就知發生乜事。