匯控業績。小型銀行危機。繼續第一季回顧：一抽股票ETF。IDEV VB IWD ARKK KRE (Patreon)

繼續推：星期六灣仔免費實體講座

匯控業績：點解勁？勁在邊？

股東會嘅嘢，話你知我估「分拆」同「派息」議案有幾多人支持

小型銀行股繼續大跌：老早叫你唔好買了。

「避開咗損失」唔似「醒咗個冧把你賺到錢」咁爽。

但，避開輸1萬蚊，好似係重要過賺1萬蚊

快手繼續回顧第一季：講下幾隻股票ETF

點解我買VOO唔係SPY，QQQM唔係QQQ？冇乜點解。「但唔好買TQQQ」

IDEV新高添呀，跑贏晒港股美股

IDEV 同 VEA EFA有乜分別？

IWD就跑輸IWF了。預咗啦下話。正如VB都跑輸，唔意外啦

ARKK第一季升三成呀，但其實都係把托

1. 照舊再推，星期六有個免費實體講座，在灣仔，2至4點。同上次11月唔同，今次就唔會貼返段片上嚟。報名呢度，詳情呢度。

2. 咁免費嘢當然係因為有人代你出咗錢（否則我冇咁得閒），所以大家可以去長橋開返個戶口。有著數拎，另外經我開嘅會另外多100蚊禮券，詳情睇圖。掃QR Code可以，或者用呢條link都得。

匯控業績：點解勁？勁在邊？

3. 市況郁郁地，又講下。主要兩壇嘢，第一壇都好快講完。匯控（5）出咗業績，相當唔錯，業績後都大升，同之前成堆美國大銀行嘅情況相若（當然匯控唔係美資，主要業務都唔係美國，但始終國際銀行，情況會似美資行多過中資行）

4. 最主要就係因為息差升，你見好誇張下，淨息差1.69%，舊年同期係1.19%．點解？咪加息！之前講JP Morgan業績時都提過。呢個亦好可能係匯控今年股價咁強嘅原因（你估今日出業績先忽然知道加息有利咩，你頂多話個有利程度結果仲比預期高啲）

5. 另外派息方面都略略有驚喜（街估季度息0.08，而家派0.1，但分析員一向會估得保守啲）

股東會嘅嘢，話你知我估「分拆」同「派息」議案有幾多人支持

6. 嚟緊仲有股東大會，大家可能都知道有班小股東力推「分拆亞洲業務」同「保證派息」兩樣嘢。遲下我詳細講，你見我都有在報紙寫。但，我估兩個議案都過唔到。門檻太高，要75%。而我估應該30%都唔會有，又睇下我眼光點。

7. 「分拆亞洲」呢個，以前寫過（搵舊文吧），我覺得班小股東係有道理嘅，唔敢話實係有利，但我覺得講得通，所以你見我有寫。不過「保證派息」呢樣嘢，絶對係多Q餘，不合情理。所以你見我冇話過會支持。遲下細講，但其實有冇諗過公司嘅派息嚟自乜？派得越多越好？「不如清盤派晒畀你丫」。

小型銀行股繼續大跌：老早叫你唔好買了。

8. 另外，第二壇係小型銀行股風暴。再講一次，叫咗你唔好買KRE同埋呢啲小型銀行，之前真係有讀者問。咁我又幫你慳返唔少錢了。正如之前叫大家，呢啲都係你地嘅得益，雖然「避開咗損失」係唔似「醒咗個冧把你賺到錢」咁爽。但，避開輸1萬蚊，好似係重要過賺1萬蚊（Risk Adverse！有冇聽書？）

「避開咗損失」唔似「醒咗個冧把你賺到錢」咁爽。

但，避開輸1萬蚊，好似係重要過賺1萬蚊

9. 慘況不用多講，自己睇圖。政府擺明「救存戶唔救股東」，你仲去做股東嘅（買股票咪做股東），當然係你問題。

10. 順手畀你睇多次個Excel，成堆嘢年初至今大跌就唔使講。但我就當你係SVB爆煲後，即係KRE急跌後你先去撈。亦即係3月13號買（睇圖），OK？

11. 可以見到，一樣係shitty idea．嗰日到而家跌13%事小（不過同期標普指數彈咗6%，個幾月你跑輸20%），仲要中間係彈都唔彈。

12. 畀埋呢個表你睇，你可以睇埋個別嘅地區銀行。個表昨日貼過，但今日我就由3月13日開始計（留意呢個Excel，黃色嗰格可以改日期，我hide咗）。

13. 由嗰日計起，就當你話有三間有反彈。但最叻嗰間60%，另一間15%，一間打和。其他十一間全部跌　—　拉勻晒明顯都係輸錢嘅。

快手繼續回顧第一季：講下幾隻股票ETF

14. 其實我原本寫咗JPM買FRC，但太長，留返聽日先出。而家快手繼續個第一季回顧先。快手回帶，第一篇開場白，第二篇強積金同港股，第三篇美股，第四篇歐洲，同埋所謂嘅匯率風險，第五篇亞洲，日韓台灣星馬泰。第六篇印度印尼越南金磚四國，包埋一大堆環球ETF。第七同第八講開第一季債市，同埋啲ETF。

15. 今篇同你講一啲股市ETF。上半部係我有買嗰啲，下半部冇買，但係一啲值得講下嘅。留意部份東西在我個Monitor Excel都有，遲下詳解．留意Monitor嘅數就live update，會自動變咗year to date

16. 先講VOO同QQQM，實在冇乜好講，表現咪跟返指數，呢啲東西實貼嘅。VOO咪跟標普指數，QQQM跟納指100。唯一留意返QQQM係跟納指100，而納指100今年都跑贏納指唔少。點解？因為納指100更集中大型股，今年明顯大型科企強（你睇Facebook Nvidia Microsoft已經知）

點解我買VOO唔係SPY，QQQM唔係QQQ？冇乜點解。「但唔好買TQQQ」

17. 至於點解我買VOO唔係SPY，QQQM唔係QQQ，以前解過。唔想搵舊文嘅，快手答你，其實冇乜分別。你鍾意可以在我個Excel加埋QQQ同SPY，應該見到啲表現同VOO QQQM差不多一樣

18. 但就唔好走去買TQQQ，我知今年升六成，但絶對唔值搏，舊文寫過，自己搵Index．

19. 而過去一年我都係主力買QQQM同VOO，都話戥返勻個組合。當然仲有買下面嘅呢堆ETF（上半版嗰啲有買）

20. 順手強調，全部美國上市美金 trade，已經包晒所有匯率變動。

IDEV新高添呀，跑贏晒港股美股

21. 首先想講係IDEV，舊文寫過，已發展市場，但唔包美國。實際上即係歐洲日本。IDEV早兩日先創咗新高！今年跑贏美股港股添呀。

22. 當然唔意外，你見我日日貼愛馬士LVMH新高，法國股市都創咗新高，另外之前講環球股市ETF都有提德國股市都好強。另外之前都寫過，日本股市今年都幾好。咁IDEV強好合理。

IDEV 同 VEA EFA有乜分別？

23. 下面仲有EFA同VEA，都係差不多嘅嘢。有乜分別？舊文寫過，自己搵Index．不過其中一個小分別係包唔包韓國。有啲計已發展市場，有啲唔計。VEA就應該有韓國嘅，其他冇。但話說回頭一來韓國佔得唔太多，二來主要都係三星，而三來韓國同三星今年表現都不錯，所以你見三隻表現分別不大。

IWD就跑輸IWF了。預咗啦下話。正如VB都跑輸，唔意外啦

24. 然後睇啲表現冇咁好嘅，例如IWD，呢隻買價值股。你見同系嘅就係IWF，就係增長股（我冇買呢隻的，下面我會放返在下半版）。咁你估都估到，IWD原地踏步，今年跑輸大市。而IWF就跑贏晒。照計好易估，咪話今年啲大型科技股強，納指100領放嘛。咁IWD梗係跑輸IWF。

25. 你甚至可以問，咁點解唔買IWF？以前解過，因為我已經好多科技股啦嘛。於是亦都會有人問，「咁你又買IWD又買QQQ，其實夾埋咪好似SPY咁」？其實係的！得閒你可以做個統計，不如計下IWD+IWF係咪應該同SPY差不多，我估應該係。

26. 咁但，如果我全部錢買晒SPY，仲邊有咁多嘢寫？你又學少好多嘢了。呢個都係認真的，我作為作者嘅身份，都會令我傾向買多啲唔同嘅嘢，又學習下，留意下，又同你討論下。但你自己，就真係可以齋幾隻ETF坐過世的—抵得悶嘅話

27. 不過亦都要講，由我買IWD嗰期開始，就係美股極貴嗰時，我的確係嗰時睇好價值股會跑出嘅　—　結果呢？都冇錯，舊年價值股真係跑出，跌少過IWF好多—但就只係維持咗一年。今年一講估停加息/開始減息，就變返增長股跑贏。

28. 所以？都係唔好以為自己估嘅嘢一定啱。你當時睇返，我估價值股舊年跑出嘅理據好啱，結果都係啱　—　但只係啱得一年，就其實唔夠嘅。

29. 至於另一隻，VB，主力買小型股，咁你見亦係跑輸嘅（但冇IWD咁大落後）。原因？同上面一樣，咪話大型科企跑出晒咯。而我最初買VB嘅原因，亦同買IWD一樣。

30. 咁有冇人問，「咁做乜你買小型股，唔買大型股？」　—　QQQM VOO 咪大型股！仲有我己渣住啲Big Tech嘛。可見我最後都係將啲嘢戥到唔好同大市爭太遠的。

ARKK第一季升三成呀，但其實都係把托

31. 至於ARKK跑出，梗係，不用多講啦，科技股返生嘛。不過我冇買。但目測第一季都只係升29%，QQQ都21%—但我記得跌落嚟時，ARKK就肯定跌多好多。例如你睇一年，QQQ就持平，但ARKK仲要輸三成。而4月開始ARKK都大跑輸了，從來都唔建議你買呢隻。

32. 至於KRE，呢幾日都成日講，不再重覆。當然唔好買。

33. 有冇留意，EMXC同VWO我冇講到？一隻新興市場走中國，一隻包埋中國。就係重頭戲，留返下一篇講。你可以諗下有乜啟示，或者估下我會講乜