插播：美國又一間銀行爆煲。JPM 升到差不多一年高位。叫咗唔好買KRE。行業整合。仲有新Excel玩 (Patreon)

FRC 最後都被接管，股東total loss

講咗好多次叫你唔好買小型銀行股架啦

「Don’t catch a falling knife」同「別人恐懼時我貪婪」嘅分別

KRE？五十步笑百步啦，一樣叫你唔好買

但大銀行，就真係唔使太驚。「瑞信夠爆煲啦」「點同呢」

危機就梗係行業整合，JP Morgan差不多一年新高了

冇錯，大公司都可以執笠，所以要分散

迷思：大公司唔會大升。教主死後蘋果再升N倍。我買微軟JPM執幾倍

KRE，美國地區銀行（有個Excel玩）

KRE今年跌三成，納指就升兩成。一來一回跑輸幾多？

我當你3月撈底都好，根本都冇乜點彈

點解上星期FRC大跌，但KRE仲有得升？

1. 其實我唔覺得好值得寫，但呢排成日都Risk and Reward，債券101，第一季回顧，咁可能讀者都會想有時聽啲時事嘢。即管講下。

2. By the way，記住星期六下午灣仔有個實體講座，完全免費。記得嚟支持下。報名呢度。

FRC 最後都被接管，股東total loss

3. 話說，都傳爆煲多時嘅First Republic Bank（FRC），卒之都係被接管。最後賣畀JP Morgan（JPM，本人美股倉好似唯一一隻美資銀行股）

4. 留意，今次FRC收檔，就係美國史上第二大嘅Bank Failure。打破咗Silicon Valley Bank（SVB） 3月嘅紀錄。至於第一並唔係雷曼，係Washington Mutual（WaMu）。而點解冇Silvergate？呢啲可能在Facebook Page花生文解下

講咗好多次叫你唔好買小型銀行股架啦

5. 你需要知嘅，兩樣嘢。第一，苦口婆心咁，叫咗你唔好走去撈啲細銀行。

6. 你睇FRC，之前係四成四成咁跌，你點撈都變倒錢落海。唔好做啲咁低能嘅嘢。別人恐懼時我貪婪唔係咁用的。

7. 因為我寫過，呢期監管當局擺明話你知「救存款唔救股東」，第一次你中招仲情有可原，但玩咗幾次你仲唔理嘅，當然係你問題

「Don’t catch a falling knife」同「別人恐懼時我貪婪」嘅分別

8. 亦都講過，好多時「Don’t catch a falling knife」同「別人恐懼時我貪婪」嘅分別，兩句都好似啱，「一般睇你事後贏錢定輸錢」。但，我覺得有個好大嘅分別：就係你之前都想買間公司，定係你只係見到佢跌就手痕。

9. 之前好似寫過，粗俗嘅比喻：係你鍾意嗰個女仔/男仔甩咗拖，你乘虛而入？定你之前根本都睇唔上眼，只係見到人地甩拖你覺得食得唔好嘥？就兩回事。

10. 在股票上，即係例如有讀者（真人真事）一路想買麥當勞，或者愛馬士，或者微軟。咁佢會想「等佢跌返一兩成先買」。等唔等到係另一回事（嘻嘻），到時真係跌一兩成佢敢唔敢買又係另一回事，但至少佢係一路想買。

11. 相反，我估除咗住美國嘅讀者外，九成幾人今年前都未聽過咩SVB FRC。咁，人地大跌，你飛入去，你就似係原本睇唔上眼嘅扒都飛埋去嘅人了。

KRE？五十步笑百步啦，一樣叫你唔好買

12. 你話買KRE（一隻地區銀行ETF）？其實原理都係差不多。當然冇輸咁多嘅，「咁但你低位彈又冇咁多」。不過，活學活用啦。買KRE，咁總好過你做勇士去撈個股，特別係你都唔知邊隻打邊隻　—　雖然兩者都係衰。因為我估九成人3月前都冇聽過KRE。有關KRE，之後第一季回顧都會再提。但其實真係把托的，低位先彈幾個巴仙。

但大銀行，就真係唔使太驚。「瑞信夠爆煲啦」「點同呢」

13. 好啦，但另一方面，例如有讀者問我TD Bank（加拿大嘢，多倫多道明），讀者話驚驚，見沽空好大—其實因為呢間嘢投資咗落去Charles Schwab（嘉信，美國券商，而嘉信本身都因為SVB爆煲引起小小連鎖反應，但頂得住）—咁讀者話想股東大會前沽咗佢（而我開頭以為係業績，我就唔多明同股東大會嘅關係）

14. 無論如何，你問一間我完全唔熟嘅公司，係有啲難答，但結果我都答咗。固然我不能保證佢一定冇事，正如我不能保證聽日唔會射核彈。但望落係正正常常，大銀行，唔見得真係有好大問題。

15. 咁End up見到，TD Bank嘅股價，唔見得好差，係咪？當然，如果本身冇買甚至唔知係乜嘅，就唔使買。但既然讀者買開，我覺得唔使特別驚。「好多人沽空」並唔係一個好好嘅沽貨理由，正如好多人買不等於你應該買。（話時話，啲對沖基金沽空科技股都輸入肉，唔好以為「沽空」嘅好叻）

16. 事實你見，匯控今年表現好好，渣打都還好（近排差啲），JPM直頭差不多新高（陣間詳細講），之前成堆美國大銀行業績都係勁的。

17. 好啦，然後係咪有人反駁，「瑞信夠大啦」。的確如此，但嗰時都有同你講唔好撈。瑞信呢啲，之前不停蝕錢，長期病嘛。

危機就梗係行業整合，JP Morgan差不多一年新高了

18. 第二樣嘢，你見JPM大升，差不多去到一年高位（雖然今年表現都係麻麻，跑輸大市，但至少有得升）。

19. 因乜？當然係「執平貨」，食咗FRC。當然你可以質疑「會唔會消化不良」「大把手尾跟」。例如你見匯控食SVB嗰時，好似股價反應麻麻地（但我好懷疑係咪「因為」驚有手尾跟）。

20. 可以見到嘅係，JPM往績好。你話同監管當局打籠通又好，佢小心又好，乜都好。總之我地睇結果。

21. 你可以睇下Facebook Page篇文（呢篇有啲營養）。上次金融海嘯，JPM就係食咗WaMu，同埋貝爾斯登Bear Stearns．

22. 想講嘅係，但凡呢啲危機，就實係行業整合（Industry consolidation），大食細，變得更大。

23. 大把例子係咁，例如BlackRock都係因為Barclays唔掂先食咗iShares，李嘉誠亦係因為人地財困先執到唔少好嘢。甚至你見舊年內房爆鑊，但中海外同華潤置地就大升，亦係咁原因。

24. 因為，但凡呢啲行業危機，都係行業整合。

25. 亦因為咁，你見我其實買親都多數係大公司。未必係最大嘅公司，但多數都唔會太過細。

冇錯，大公司都可以執笠，所以要分散

26. 當然好多人認為，大公司唔抵買，因為未必升到好多倍。不過首先，細公司可能可以升得多，但風險呢？甚至可能成間冇咗，而你睇好多統計數字都有呢種survivorship bias：你見小型股表現好似好，但好多間中途死咗嘅，你有冇計埋？定今日已經見唔到所以你唔知？

27. 咁當然，大公司都係可以執笠嘅。所以點都係要分散，甚至買ETF就冇咁煩，就係幫你揀最大嘅公司。

迷思：大公司唔會大升。教主死後蘋果再升N倍。我買微軟JPM執幾倍

28. 另一個迷思當然係以為大公司冇得再大升。真係？成日講嘅例子，Steve Jobs死時，蘋果已經係無人唔識嘅大企業—不過佢死後十幾年，再升多十幾廿倍咁解。

29. 正如你見JP Mogan我都賺200%，Microsoft 都賺300%—買嗰時都已經係巨企了。但當然，呢啲200% 300%，係超過五年嘅事。咁例如你要而家嗰啲最大嘅公司，一年升幾倍，就真係相當難的。

30. 不過，照計五年升200%，都「夠」晒啦？（雖然唔係隻隻都係咁，有啲仲會輸錢。而正係咁，所以贏嘅要贏幾倍）

KRE，美國地區銀行（有個Excel玩）

31. 見仲有少少篇幅，講埋隻KRE。咁到聽日後日再寫第一季回顧時，就唔再寫KRE了。順帶一提，有個新Excel，遲下先慢慢解，但你可以自己玩住先。

32. 果時啲人問KRE，我都係話唔好。正係因為「救存戶唔救股東」。好多人以為「銀行有事政府實會救，「所以我應該買啲大跌嘅銀行」」，就係諗錯呢樣嘢。所以，真係唔好自作聰明。

KRE今年跌三成，納指就升兩成。一來一回跑輸幾多？

33. 你睇銀行係獲救，但KRE，第一季跌咗25%。計年初至今，輸30%。完全係浪費金錢。唔好忘記，納指今年升咗兩成，標普指數都升一成。一來一回，你跑輸幾條街

我當你3月撈底都好，根本都冇乜點彈

34. 當然， to be fair，應該冇人係年初買的。多數係見到3月開始爆鑊，但又估死唔去，所以先想買嘛。所以年頭計起未必合理

35. 咁但，再睇圖，我當你真係3月大跌完買都好—打後都係跌多升少。我就當你捉到中間嗰一兩日反彈，但10%都冇。講真，真係浪費人生浪費時間的。你可以睇下同期納指　Facebook Nvidia Microsoft 之類升幾多？然後而家KRE離今年低位都只係2%

點解上星期FRC大跌，但KRE仲有得升？

36. 順帶一提，你見上星期FRC已經連續幾日大跌。但KRE嗰時都仲要升的。有冇人知點解？

37. 原因好簡單：因為FRC大跌後，市值得返好細，在個ETF入面佔比極細，根本點大跌大升都唔會影響KRE了（但亦即係就算FRC升幾倍對KRE都冇乜用，當然最後冇發生）

38. 想知KRE仲渣住乜？實情上網一搵就有。

39. 咁另外，你見我個Excel都有mon下啲地區銀行股嘅股價。咁你話表現點？