有關借錢投資（一） (Patreon)

Mox跟進：做唔到2厘樓下，就應該唔使理佢了。

但講真，開定個戶口冇壞

供緊樓嘅，咪用唔到咯？但你可以夾你老公老婆嘛

借去投資又話唔好，借去消費又唔好。咁借嚟做乜？清舊債！

唔好借錢投資，但買樓除外。有乜唔同？

之前港樓又長升，股票又長升，但點解買樓賺大錢嘅人多，買股嘅好少？

最大嘅問題，點都係畀人斬倉冇仇報

鍾意買個股，又跌10%叫救命嘅，更加唔好試

當然仲有，心理影響

一隻股票可以升100倍，但只能跌100%—除非你借錢

100萬錢，買300萬Nvivida。佢一晚跌25%，你點算？

股市一年回報先8-10%，你借5厘息，走去讓咗大半。

1. 照舊快講，星期六下午，中環實體講座，內容當然全新（但核心價值不變）。報名呢度。另外，華泰證券贊助，最好去開返個戶口，等我同佢有個交代。當然係因為佢代你出咗錢，你先有免費講座聽。

2. 呢篇都係跟進返Mox嗰個offer，同埋「借錢投資」呢回事。開戶呢度，開咗簽卡簽返500蚊，佢就有現金獎賞500畀返你（同埋我）。齊齊食窮李澤楷（但我又買咗香港電訊同電訊盈科，所以只係拎返自己嗰份）

Mox跟進：做唔到2厘樓下，就應該唔使理佢了。

3. 首先講返Mox，都有讀者反映返，做唔到我貼嗰個銀碼。咁就真係唔知佢嘅「特選客戶」係咩標準。但我估唔係因為我係「大戶」，都話佢應該唔會知我有幾多股票（都唔係好多）或幾多存款（近乎冇），技術上我亦係「冇收入」人士。唯一你可以講，就係我早開戶（所以，一早叫你開！都係有著數嘅）。

4. 同埋可能我還款紀錄好，從來冇欠過一個仙卡數或佢個「即時借」（咪話舊年借咗1萬蚊咁大把，呃埋個世界盃通行證，肯定蝕畀我—當然最後我結果前半個世界盃都唔在香港，就後話）。但講返，我亦唔係咩好大嘅客戶。「即時借」咪話1萬蚊，而平時卡數，講緊多則幾千（有期佢做Donki或外賣平台回贈，但我在佢度嘅卡數每個月從冇過萬），少則幾百。

但講真，開定個戶口冇壞

5. 但我講真的，做唔到都好，開咗個戶口先，冇壞（開戶呢度），又唔使存錢入去。真人真事嘅係，之前有一期佢做「即時借」，我miss咗，咁佢做完推廣又貴返，我就唔幫襯了。點知佢事隔幾個月又有返呢個。所以可能將來都仲係會有其他好嘢的，搶生意嘛

供緊樓嘅，咪用唔到咯？但你可以夾你老公老婆嘛

6. 然後有讀者提返，如果有樓供緊，要申報喎，咁就做唔到呢個價同銀碼。我都冇留意。而我好懷疑上次借1萬蚊時，我好可能根本冇理到。但這是不對的。雖然理論上我估佢真係未必會知或理，但，冇事就冇事咯，有起事就好麻煩，監都有得你坐（詐騙嘛）。

7. 咁你話，供緊樓嘅，咪冇得用咯。又唔係嘅，「叫你老婆老公老豆老母借」（假設佢在銀行紀錄上冇份供）

借去投資又話唔好，借去消費又唔好。咁借嚟做乜？清舊債！

8. 好啦，講「最好唔好借去投資」之前（但其實1.8厘息好吸引呀下，都係睇價）。咁首先講，如果借去投資又唔太好，借去消費又唔好，咁仲有乜用？

9. 答案：還其他錢。如果你有的話。例如乜？上面嘅例子講咗，理論上我最初諗，拎去還按揭都得，反正我都過埋罰息期。照計一般你再平供樓，都未必會平得過1.9厘。而個好處係，供樓你反正都係一定要供，你每個月只係由供樓變咗做還呢個「即時借」，但息低咗。仲撈咗佢4500回贈。

10. 當然你話，你供緊樓就唔會咁平借到85萬喎，「咁搵埃汾太借咪得」。

11. 另一個玩法？我都有諗。實不相瞞，我在IB都係有20萬孖展嘅（但呢啲好似不計落Mox嘅「有抵押貸款」？唔知了。雖然照計佢冇乜可能知）。咁，例如你本身有其他私人貸款呀，稅貸呀，爭卡數呀之類。你用1.9厘做個平債冚貴債，就最簡單。況且，個重點都係：本身你都係要還架啦。

12. 好啦，然後講返，「唔好借錢投資」。一如以往，都係要睇好多細節嘅。最簡單就係，你借嘅係乜東西，幾耐要還，唔還有乜後果，幾多息，同埋你拎去買乜。所以幾時都不能兩句講完。

唔好借錢投資，但買樓除外。有乜唔同？

13. 最簡單，買樓，十個有九個半都借錢，我都係。首先，買樓係咪完全「投資」都可以斟酌下。你買第二層就肯定係，但自住樓呢？一半半吧。仲有，多數人都要借錢買樓，一般原因係因為儲唔到咁大舊錢一炮過，所以根本冇得點揀（但我當年係有嘅，只係唔想沽晒啲股票。而當年我住嗰度只係270萬，呼丕呀下。仲要買得遲，如果學呀語音版助手咁早買，屯門樓，100萬有找啦）

14. 而買樓嘅債，即係按揭，係比較冇咁難搞嘅債。原因之前都講過。首先，正正常常，你個個月供到，負資產佢都唔會理你，你失業佢亦唔會理你（我都失業幾年啦）。

之前港樓又長升，股票又長升，但點解買樓賺大錢嘅人多，買股嘅好少？

15. 你會見到一樣嘢，之前幾十年，香港樓價長升。而股票都係長升（或者你講買美股都得）。但點解啲師奶可以買樓賺到大錢，而你好少聽人買股票可以賺到大錢？正係你會唔會畀人迫你沽貨嘅分別（當然仲有，股票可以一晚跌幾成，樓係唔會嘅）。而所以，買樓個個都槓杆，個回報梗高。買股票你做唔到咁高槓杆的，做到都好，中途就震走。

最大嘅問題，點都係畀人斬倉冇仇報

16. 如果你嘅「借錢投資」係做證券孖展。咁個問題幾時都係畀人斬倉，必定冇仇報，十分靈驗。次次股災都會殺咗呢啲借得太盡嘅人（畢菲特講嘅，唔著泳褲嘅人）。

鍾意買個股，又跌10%叫救命嘅，更加唔好試

17. 雪上加霜嘅係，好多人仲要鍾意買個股。咁就死啦。Nvidia都高位330蚊跌到100，即係跌七成。再霜上加霜嘅係，好多人仲要集中，「我又買Nvidia又買Netflix 好分散」。咁你見到，即使係呢啲咁大嘅公司，都可以高位跌七成。你啲孖展實死的，除非你補到錢啦。即係如果隻嘢真係永不超生爆咗煲，你反而心甘命抵。最慘就係你被迫低位沽走，然後睇埋佢升返上400蚊。對我心理嘅打擊，唔係講笑，甚至令你大半世都懷疑股票（我當然有經歷過類似嘅嘢，2008年嘛，輸晒成球嘢，變零）

18. 咁可能有啲人話，我有閒錢，可以補到孖展—你諗真啲，成件事咪本末倒置咯！你100萬拎50萬出嚟買股票然後做孖展，點解唔100萬買晒落去？至少你唔會畀人斬倉，仲唔使畀息。

19. 反而你話你買指數嘅，高位可能三四成，你啲孖展唔太盡嘅，都仲頂得住　（分散的重要）—　但你嘅心理又係另一個問題（留意，以上我仲要冇同你計啲利息成本）

當然仲有，心理影響

20. 當然仲有，心理上，真係一個好大嘅考驗。而又係得罪講句，大家應該有眼睇，我個「膽」已經算好大。咁嗰啲「埃汾我聽咗你講買LVMH而家高位跌咗10%點算好」嘅，你諗下，你有冇可能承受到做孖展之下佢跌三成？

21. 德國股神科斯托蘭尼講嘅名句，請大家再三思考：「一隻股票最多只能跌100%，但卻可以升1萬倍」（真係認真思考下，然後你就會知道，根本不存在「睇淡」，長淡必輸。仲有，例如忠實讀者隻Nvidia，可以升10倍，20倍。冇錯佢真係冇「止蝕」，可能你會有啲嘢會成間玩完。是的，但針冇兩頭利。冇錯你唔止蝕，真係會total loss。但我贏嘅贏得夠多咪得。一隻嘢賺10倍，可以抵銷好多個出錯嘅投資（況且，唔會隻隻都total loss啩）．相反，你永遠10%又止賺，10%又止蝕嘅，根本冇可能搵到大錢。況且我都唔知Facebook一晚跌25%咁你可以點止蝕）

22. 講遠咗，正路地，股票係「只能夠損失全部本金」。有啲人聽落覺得廢，但明顯佢地可能冇玩過其他嘅「工具」，你有啲東西，係可以輸突嘅，例如你去賭期指。

一隻股票可以升100倍，但只能跌100%—除非你借錢

23. 仲有，股票最多只能輸100%。你話供股？咁你唔供嘅，願意畀人攤薄嘅，冇人迫到你。總之你最初買咗1萬蚊，冇人可以要你再拎更多錢出嚟。

24. 但，有咩情況下會輸突？好簡單。借錢咯。

25. 正如買樓，正常都係應該不能輸突（夾錢大修之類另計）。但，點解可以有負資產？因為借錢嘛。唔借錢嘅，就不存在負資產的（留意呢度唔係話你知有可能負資產所以叫你唔好借錢買樓，唔好聽一半唔聽一半，上面咪講咗買樓嘅唔同）

26. 股票嘅，係可以輸突的。好簡單嘅例子，100萬本，買咗300萬等值嘅Facebook，「唔過份啦」。佢升你當然好爽。但跌呢？畀個真實例子你，佢一日跌25%嘅，你一晚輸咗75萬，即係75%。

100萬錢，買300萬Nvivida。佢一晚跌25%，你點算？

27. 都唔好討論到底你嘅券商會唔會已經幫你斬埋（應該會吧？），我甚至唔討論你點去「止蝕」。我只係想你代入一樣嘢，去到呢個位，你會諗乜？

28. 2008年時，我面對類似嘅情況，諗嘅係：「而家斬咗，我都仲有少少錢拎返。陣間佢再跌多啲，我輸清之餘，仲要爭佢錢。去邊撲水？」。我估多數人都係咁諗，搞到爭人錢撲水，是十分麻煩的。

29. 咁當然啦，我打完靶後，個市就升返。

30. 個重點係，你唔做孖展嘅，照計都仲可以「守」，最多我輸晒，但冇人可以要我再拎錢出嚟。但你做咗孖展嘅，變咗你爭人錢。去到呢啲位，分別就好大了。

31. 而講到呢度，我都只係計死數。都未講，在呢啲咁嘅情況下，你可以想像下對你嘅精神健康有幾大影響。我包你食飯冇心機，返工都分心，性生活都不如意。然後一般情況下，精神壓力大，做啲決定就更差。

股市一年回報先8-10%，你借5厘息，走去讓咗大半。

32. 呀仲有，好似都未同你講，孖展係要息嘅。實際息口我唔肯定，但點都要五六厘啩？Fed Fund Rate都五厘幾啦。好啦，咁講過，股市回報，長期嚟講，一年都只係8-10%。你就已經讓咗大半出去，就好似冇乜著數嘅。

33. 亦因為咁，所以我都仲係等還晒IB啲孖展，先會再買啲新嘢。雖然月供啲嘢我係有繼續嘅，都係有啲矛盾的。當然好似都講過，原本我嘅如意算盤係夾埃汾太去台灣幫我拎返啲錢返嚟（百幾萬港紙呀），然後就海闊天空。咁但，佢就總係「行唔開」。呢啲人為因素，就有啲難控制。

34. 至於點解會有個IB孖展？其實係因為……「交稅」。都話舊年一鑊交咗30萬。而我呢啲自僱人士，借稅貸係好難嘅，分分鐘貴過IB孖展息，咁就費事煩了。上面都講咗，原本係想借Mox的。點知有得借時我又以為冇需要，到想要時佢就冇做推廣了

35. 留意呢篇，都只係講孖展。但你借個Mox去買股票，又有啲唔同。下篇解。仲有傳說中嘅，「借1.9厘然後去做定期都有4厘」「借1.9厘然後去買高息股有6厘」，認真光怪陸離。你話得唔得？