［Risk and Reward系列］一大堆嘢一年新高，你做嘅嘢好簡單。好啦，講到尾，點解要分散？點解唔可以食多啲風險？點解高回報就往往係高風險？「其實即係點解靚女高竇，叻人就有脾氣咁」 (Patreon)

中移動（941），Nvidia，VISA，LVMH，愛馬士，微軟，Facebook，日清Unilever呢堆嘢，全部都一年新高了

你估美股三十年升三百倍，難啲。但你話三十年後會得而家一半，更加唔信。

reward and risk，即係central tendency and dispersion，mean and SD

Risk：但講到尾，點解老嘢要買債？又甚至，點解要分散？

迷思：分散，避開咗輸大大鑊，但一樣限制咗唔會贏得多。咁點解要做？

點解要分散？首先，輸得多難翻身。另外，多數人高估自己嘅膽量。

但，其實有冇諗過，點解高回報伴隨住高風險？

首先，你唔信高回報伴住高風險嘅，我畀證據你

點解高回報會高風險？因為「供求定律」。因為一啖砂糖一啖屎

正嘅餐廳，就梗係貴啲。貴而唔正嘅，就冇人去啦。

如果買美債都30厘回報，仲有人買股票一年賺15%？

Return係砂糖，人人愛。但risk係咪真係屎？係咪人人唔要？定有人好鍾意？

首先廣告時間，下星期六在灣仔2-4有個免費講座，歡迎大家報名。詳情睇Facebook Page。完全免費，兼且有Q&A。記得嚟支持下，報名呢度。

1. 好快講市況，就係相當不錯，特別係美股。兩樣嘢，首先經濟數據麻麻地，個GDP數字低過預期，似乎係當係「好消息」。5月頭（其實係下星期）加息0.25全無懸念，但相信6月好可能會停。當然應該仲有兩次CPI出，但冇乜太大意外的話，6月就停加息。然後你可以睇下，啲科技股低位好多都彈一個開以上，你仲去等「確認減息」，真係蚊瞓，摸頂機會大。

2. 第二，就當然係業績強。記得打頭陣嘅銀行股普遍強，而家守尾門嘅科技股都普遍強（就只係爭蘋果未出，下星期）。你見微軟同Facebook 都係業績後爆升上一年新高的。若果你之前又話咩「驚衰退」，或者「等回下先」，又係錯失晒。

中移動（941），Nvidia，VISA，LVMH，愛馬士，微軟，Facebook，日清，Unilever呢堆嘢，全部都一年新高了

3. 不妨煩氣重覆一次，中移動（941），Nvidia，VISA，LVMH，愛馬士，微軟，Facebook，日清，Unilever呢堆嘢，全部都一年新高了。你做嘅嘢都十分簡單，就係早早買，然後等成果。就唔使今日又驚烏克蘭打仗，聽日就驚加息，後日又怕二十大權鬥，之後又怕美元霸權玩完，又怕衰退又怕通脹。你見我啲文幾時會同你分析二十大權鬥？

唔好再不停問我「而家買唔買得」。又或者「仲有冇第啲」。已經揀咗唔少比較好嘅公司，而你見表現係得嘅（當然唔係間間得），但至少都有一堆可以一年新高，算係咁。你跟得幾隻嘅，應該總有隻中。冇咁多錢或唔想分咁多隻股嘅，咁你咪QQQ　—　納指100今年都升兩成啦。而IDEV/VEA/EFA 之類就幫你食到歐洲日本股市嘅浪。

4. 幾時都係全世界人甚至你自己都覺得唔應該買時，就最值得買，但當然係違反人性的。所以想買就買吧，始終股票都係升多過跌嘅。

你估美股三十年升三百倍，難啲。但你話三十年後會得而家一半，更加唔信。

5. 無論如何，上次嗰篇Risk and Reward，請大家一定要睇。你唔得閒而家睇唔緊要，但搵日得閒睇咗佢。十分重要。再講一次，你第時問嘢我就會叫你睇返。或者你第時態度惡劣嘅我就會媽你做乜最初唔睇。

6. 溫書，上篇搞咗堆數字，我諗最主要嘅，就係話你知美股同美債嘅平均回報。當然每年同平均可以爭好遠。下年美股可能升幾成，或者跌幾成。但你計劃任何長期嘢，未來十年，廿年，你就應係大約睇返個長期數字，唔會爭太遠。直接啲講，你覺得美股三十年會升三百倍（其實即係一年兩成），應該難啲（個股就會有啲得），但你覺得美股指數三十年後會得而家一半，我就真係唔信。

7. 亦唔好以為「三十年」真係遙不可及。我目測呢度讀者年紀中位數同我差不多，四十中。而我買股票都近廿年，仲要開頭交好多冤枉學費。我當你而家四十中先開始買，但你應該都仲有四十年命。

reward and risk，即係central tendency and dispersion，mean and SD

8. 再溫書，另外我仲講咗乜嘢係「風險」，都有讀者再問，我遲下會再答，因為真係好大嘅課題。但，簡單嚟講，就係deviation from expected outcome．我預「平均」8%一年，但我出亂子，偏離目標嘅機會有幾大？有啲嘢偏離細啲，都係六點幾九點幾，有啲偏離好大，可能由負數去到正數幾十巴仙。呢啲就係「風險」

9. 數學上，扯，reward and risk，即係central tendency and dispersion，mean and standard deviation（SD）．唔記得點計唔緊要，九成人都唔記得，我估畢菲特陸東都唔記得。但要知道代表乜。

10. 咁而文中數字，我係十分直接地畀你睇到，點解股市回報高啲，但風險高啲。債市就回報低啲，風險低啲。你唔信嘅，睇數字咪知。股票平均回報實好過債，但發上發落嘅程度亦大好多，輸時可以一年輸一半，升時又可以一年四五成，債就唔會咁誇。

11. 有晒一百年歷史，自己慢慢玩。而基本上唔使同我拗「今次唔同」，呢一百年間發生過幾多事？世界大戰都打過。（不過認真講，你可以話1971年前嘅數未必可比，因為以前有金本位，1971年後冇。之後我地會研究係咪真係好唔同。金本位云云，早兩年寫過了。）

12. 另外我仲提過下4% rule之類，但另一個好大嘅課題，不在呢度細講。

13. 不過都仲未答晒，讀者最初問嘅一個問題：「點解TLT一年高位都可以輸一半，都仲要買債？買債唔係穩陣咩？」。之前我大約答咗：首先TLT唔係成個債市，咁你買長債ETF當然係高回報高風險。另外，你淨係拎舊年嚟講，就當然唔公平，因為舊年係債市百年一遇嘅大災難（反而股市唔係）

但講到尾，點解老嘢要買債？又甚至，點解要分散？

14. 不過，講到尾，點解人老咗要買債，又或者，點解平時我成日講分散？除咗避免你輸得太慘外，係咪仲有其他原因？因為好多人都可能諗，咁你分散，避免咗輸得太大鑊嘅風險，但又同時封咗賺到極大錢嘅門啫。例如上面我都有提，未來三十年，你估美股升一千倍，我估近乎冇可能。但你有隻個股升一千倍，係相當可能嘅（爭你扑唔扑得中）。咁你可以話，你買美股指數，咪就係封咗呢啲大upside．

15. 既然分散避咗輸大錢，但又限制咗贏大錢。聽落都係一個取捨啫，但咁點解成日仲講分散係好？

迷思：分散，避開咗輸大大鑊，但一樣限制咗唔會贏得多。咁點解要做？

16. 分散會避開咗輸大錢，但又限制咗贏大錢，就係嘅。問題係，你係咪要咁大嘅upside？高回報就高風險。咁更深嘅問題係，應該受到幾多風險？

17. 點解要分散，可以由三個層面講。頭兩個易解啲，以前都解過，快講。首先，輸得太多係好難翻身嘅。你輸到九成，要贏返十倍，在座邊位試過有股票買得夠大而贏十倍？（幾千蚊買隻輪嘅唔好講啦）。

點解要分散？首先，輸得多難翻身。另外，多數人高估自己嘅膽量。

18. 第二，輸得多，你一定嚇死。影響你工作，影響你股票以外嘅嘢，影響你同朋友屋企人感情，影響你性生活（我是講真的）。而目測絶大多數人都高估自己承受風險嘅能力。大家可以諗下，過去幾年，無數大跌嘅日子，我都好淡定，一股都冇沽，但你已經好驚青，係咪？輸得太多，好多人就低位打靶，然後見隻嘢升返，自此心理更加唔平衡。

但，其實有冇諗過，點解高回報伴隨住高風險？

19. 於是乎，我地可以由一個更簡單嘅問題講起。點解高回報，就往往伴隨住高風險？

首先，你唔信高回報伴住高風險嘅，我畀證據你

20. 唔信？畀圖你睇（但首先你要明白到底點去量度回報同風險，所以之前我講咁多嘢）。

21. 不必深究細節，你會搵到好多唔同嘅圖，但共通點係：個大方向應該係差不多嘅。你畫條線，就係positive slope，左下去右上。你唔會出現一條左上去右下嘅線的。當然你畫條線唔會fit晒，但個關係應該幾明顯。

22. 亦即係，高啲回報，多數係伴隨住高啲風險。

23. 點解？其實，哈哈，就係好多人鍾意講嘅，「供求定律」嘅市場結果。因為大家會揀，大家會trade off．

點解高回報會高風險？因為「供求定律」。因為一啖砂糖一啖屎

24. 用一個粗俗但傳神嘅比喻，即係「一啖砂糖一啖屎」（剩返嘅篇幅會不停講個屎字，有潔癖嘅可以迴避）。有更好嘅嘢，一定係嚟自有啲唔好嘅嘢，否則人人都仆到去啦！

正嘅餐廳，就梗係貴啲。貴而唔正嘅，就冇人去啦。

25. 簡單嘅比喻，好食嘅嘢，就多數貴啲（唔好死拗，你明我講乜）。人人愛好食，好食就係「砂糖」，但大家都唔想畀咁多錢，所以貴啲就係「屎」。係必然會咁嘅。個圖出嚟就係好似上面咁。否則會點？否則，如果貴啲，但唔係好食啲嘅，邊有人肯畀？同樣咁好食嘅，點解我要畀貴啲？你間嘢一係減價，一係執笠。

26. 同樣地，你想食平啲嘅，當然係trade off 咗個質素，如果有得平啲但唔會差咗甚至好咗嘅，咁人人仆到去食啦，「間嘢咪自然貴咗」，「供求定律呀」

27. （我明實務上有好多其他因素，但，明個意思啦！唔好煩。例如你話「型啲」「好坐啲」，咁呢啲都係「砂糖」）

如果買美債都30厘回報，仲有人買股票一年賺15%？

28. 於是乎，risk and reward都係咁之嘛。我當去銀行做定期，3厘息，近乎冇風險（唔係完全冇，會執笠嘛）。咁但，另外有個6厘嘅東西　—　你估下會係高啲風險定低啲？會唔會買美債有6厘息？如果會嘅，咁我仲唔仆到去6厘息？仲邊有人買3厘息？

29. 另一個角度睇，有3厘息有6厘息嘅嘢，咁梗係因為3厘息風險低啲，否則啲人就會仆晒去6厘息．正如有平價餐廳有貴價，咁梗係貴價嘅好食啲啦，否則人人都仆去平嗰間。

30. （你可以反駁：美國銀行啲存款利率好低的，就真係你買美債都好過做銀行存款。是真的。但兩樣嘢：第一，正如講餐廳「好食」嘅例子，咁都有其他因素，好唔好坐，情調好唔好之類。咁在銀行存款嘅例子，方唔方便，買美債入場費高啲，都係理由。而第二，「所以你咪見啲地區銀行出事咯！」—就係啲人拎走晒啲存款去買高息嘅嘢！見到冇？就係「供求定律」）

31. 聽咗呢啲解釋，你大約都會明。不過我想講一樣好關鍵嘅嘢：

32. 我話一啖砂糖一啖屎，你應該明，想食多啲砂糖就食多啲屎。想食好啲就畀貴啲。

Return係砂糖，人人愛。但risk係咪真係屎？係咪人人唔要？定有人好鍾意？

33. 好啦，risk and reward嘅case，reward肯定係砂糖啦。其他嘢不變下，人人都想要高回報，係咪？

34. 但，我以上嘅講法，即係話「risk」係屎啦。因為我話你知，你要多啲return（砂糖）就要受多啲risk嘛。

35. 咁即係，risk係屎啦，正常人想避啦。但，有冇諗過，呢樣嘢係咪真架呢？

36. 再問白啲，你話我想要高啲回報，受多啲風險，肯定係會嘅。但，如果同樣回報呢？係咪同樣回報，人人都想低啲風險？定其實唔係？有啲人真係美債收10厘息，但佢都寧願買一年平均回報10%嘅股票？

37. 呢個問題，下一篇解。

38. 最後畀我講一句：以上呢個比喻，你未必100%同意，但應該覺得講得幾好啦可。好啦，重點係：你發現你讀書時，係冇人咁教你嘅。咁係邊個教我嘅呢？冇！係我自己諗出嚟嘅。

39. 其實你都可能可以諗到，但平時你有冇多思考？再三強調，個Patreon係令你成為一個諗嘢好啲嘅人。否則你只係睇冧把，畀咗你都係冇用嘅。因為你都係會自爆。