小插播：美股業績，微軟新高。嗰堆52星期新高嘅，仲買唔買得？「當初我買LVMH同愛馬士都係新高買」。估停加息成日落空，係咪得個桔？你話呢？睇下Nvidia升咗幾多？ (Patreon)

第一季買乜都升，好大程度因為估停加息。咁呢樣嘢有變咩？

「估減息就升　落空又跌返　沒完沒了」—　係咩？Nvidia升咗幾多？

「股市好消息時升　壞消息時跌」　—　咁但過去N年美股升咗幾多倍？

銀行股打頭陣，業績強。科技股守尾門，業績都強！

微軟　Facebook一年新高添呀！點沒完沒了原地踏步？

你貿貿然問我冇買甚至唔識嘅公司，我都畀唔到啲好嘅答案你

所以就跟「大師冇點你」—但你又會問，「而家仲買唔買得？」

咁但，好多股票我買嗰時，都係新高嘅，「但之後可以再新高」

買完跌十幾二十巴仙好閒，「但要你間公司盈利有增長先得」

我買完愛馬士無耐高位跌一半添，又如何？而家咪又贏一倍

假想實驗：如果而家有錢，我會買乜個股？

1. 回到香港，有啲雜務，停咗兩日冇文，今日出返。對於我嚟講，最大問題係點著咗幾個火頭，而今次真係無論如何唔想爛尾。咁至少都完成咗個第一季回顧先（幸好4月係相當靜嘅），仲有嗰個債券101兼睇恒生友邦業績系列，我都會完成埋佢。

2. 三個火頭中，我決定寫risk and reward系列，點都整多兩篇先，因為讀者反應幾好。（即係上次講美股美債百年回報，60-40，4% rule嗰篇），真係多謝個讀者畀靈感我。

第一季買乜都升，好大程度因為估停加息。咁呢樣嘢有變咩？

3. 不過講之前，都update下市況。短期市況，實情真係比較靜，所以我先有閒情係咁寫專題。大家都知第一季買乜都升，好大程度因為炒停加息。近期你見又好似「有啲」降溫，但用我以前嘅比喻，而家都去到補時，頂多係補上補，停加息呢樣嘢真係冇乜點走雞。

「估減息就升　落空又跌返　沒完沒了」—　係咩？Nvidia升咗幾多？

4. 再強調一次，有啲人覺得「無了期咁等」，舊年年中已經開始估停，估下又一季，估下又一季。有期望時又升，到期望落空又跌返，沒完沒了，得個桔　—　但呢啲narrative聽落合理，實情錯，亦都最危險。

「股市好消息時升　壞消息時跌」　—　咁但過去N年美股升咗幾多倍？

5. 錯在邊？好簡單，等於你講股市，「好消息時升，壞消息時跌」—甚至以前寫過，你計單日，過去一百年，標普指數升嘅日子，甚至六成都冇，五成多少少。但積埋積埋，就升好多了。正如賭場同你對賭大細一樣，每一舖嘅odds只係側向賭場多少少，但一路玩落去，佢就賺大錢，你就輸清光。

6. （股市數字係去到2015，但唔好煩，我可以好肯定話你知計到今日都係咁上下）（當然仲有一個問題係，不能只睇有幾多成日子升，仲要睇升嗰時升幾多，跌嗰時跌幾多，之後研究）

7. 即係點？你望下標普指數，甚至納指，甚至Nvidia Facebook 之類舊年低位升返幾多咯。你睇指數，都仲係叫做穩步上揚。（剛剛FB盤後升多10%，業績很勁）

銀行股打頭陣，業績強。科技股守尾門，業績都強！

8. 另一樣嘢，當然係業績，幾日冇寫。但整體嚟講，都係算係好。勝預期嘅都係比較多，而股價反應正面嘅都係比較多。特別係你睇剛剛微軟 Google嘅業績都強，對大市都好有幫助。

9. 你睇微軟，一年新高添呀！點會係沒完沒了得個桔？你冇買就真係得個桔。而呢啲公司我一路持有一路有講。

微軟　Facebook一年新高添呀！點沒完沒了原地踏步？

10. 事實上你見我啲個股表現不錯，你有留意Facebook會見到我成日貼嗰幾隻，呢度都會有講。LVMH，愛馬士直頭歷史新高。VISA，Nvidia，中移動，日清食品，Unilever呢啲亦都創一年新高。

11. 當然，唔係隻隻都咁掂，但至少你見到有啲股跑出。所以真係唔使不停問我應該買乜股，早早話咗你知，甚至我個第一季回顧嘅Excel都有貼部份（呢度Attach多次）。或者你在index搵「持倉」都會搵到

你貿貿然問我冇買甚至唔識嘅公司，我都畀唔到啲好嘅答案你

12. 掉返轉頭睇，我有買嗰啲都唔敢話好熟，跟得好貼，或者冇試過中伏啦。你問一啲我冇買，甚至未必聽過嘅公司，點睇，買唔買得，我真係未必畀到答案你。但，我答你唔知，你又唔開心，覺得我敷衍你，甚至覺得我冇料到（順帶一提，所以大家笑啲「財演文化」，根本就係啲投資者一手造成，因為佢地覺得應該問乜冧把你都識，坦白同你講唔知嘅就係冇料到）

13. 你心目中嘅理想答案，當然係我應該去「研究」，但咁多市場，成萬隻股票，睇得幾多隻？往往你問得我嘅，你熟過我啦。

14. 所以，如果大家信我嘅，你大約睇住我買乜，跟住去買都應該OK。OK嘅意思唔係實贏（但我冇乜點大輸過錢，甚至冇乜點跑輸），至少有我一齊陪，至少到時你問我我都比較易答到你。

所以就跟「大師冇點你」—但你又會問，「而家仲買唔買得？」

15. 不過都仲有兩個問題：首先，我都買落好多股票，咁的確有機會你買中啲表現唔得嘅。但，有乜辦法？多數事前係未必會知嘅。比較好嘅方法？就係你自己都有想法，然後又見到我都有買，咁你可能安心啲。當然仲有老規矩，分散。你有十萬蚊，我寧願你分十隻買，甚至五隻跟我買五隻自己買　—　好過你一注跟晒我買任何一隻嘢。你買中我最差嗰啲咪出事？

16. 第二，應該好多人不停問，我又不停答，但其實都係冇答案嘅問題：「而家升咗咁多仲買唔買得？」。咁我實答你買得的。但隨住你追問，最後嘅答案都一定會係：「之前你又唔買？」。係架，而家買梗係冇舊年十月十一月買咁好，但當時又好多人睇文都唔想睇，甚至又去鬧我啫。

17. 認真啲答，升咗咁多你先買，就當然係有啲蝕底。但呢啲都只係心理。股市明顯係過咗估值最平嘅時間，但不代表你就無了期咁等等等。所以真係還原基本步，地點夠分散，類型夠分散，時間夠分散。買完落去，即跌10%，又如何？

咁但，好多股票我買嗰時，都係新高嘅，「但之後可以再新高」

18. 我買得夠分散，就完全唔會畏高，唔會經常因為隻嘢升咗好多唔敢買—頂多我買第二心水或第三心水。你可以睇返紀錄，上面一堆呢排創新高嘅股票，我買嗰時都好似係嗰刻嘅新高，甚至我買完即時要輸錢，十幾甚至幾十巴仙都試過。但又如何？你啲公司係夠好嘅，慢慢地個增長就會消化咗個估值。

買完跌十幾二十巴仙好閒，「但要你間公司盈利有增長先得」

19. 講一個極簡化嘅例子，你買蘋果，可能廿倍市盈率先算合理，但你四十倍市盈率去買。咁點？可能之後你輸一半，甚至更多（隻嘢跌到落十倍市盈率）。但長遠地，到佢個盈利升返一倍，而個市盈率又變返「合理」嘅廿倍時，你咪回到家。當然亦可以係佢盈利只係升咗五成，但個市盈率炒到去三十倍嘅「些少不合理位」（正如你買嗰時嘅四十倍「相當不合理位」），你一樣回到家。個前題就係，你有盈利支持，回家易好多，輸極大錢嘅機會亦細好多。亦都因為咁，我好少叫你買啲發夢股，因為輸錢，你啲估值一掉轉，差不多冇得守。

我買完愛馬士無耐高位跌一半添，又如何？而家咪又贏一倍

20. 真人真事，你睇我買LVMH，其實我買嗰時就係當時新高，買完最初一年半都只係升升跌跌（十幾二十巴仙我直頭唔會理，唔通去take profit？），都係近大半年先真正再開車。

21. 同樣地，你睇買愛馬士，我買完後冇耐（2021年4月買），高位跌一半添呀。但又如何？唔通又去「止蝕」？

假想實驗：如果而家有錢，我會買乜個股？

22. 冇錯，近期都冇買個股，買完ETF都冇乜錢剩（但唔好以為我冇買股票，我繼續有錢就買，只係近大半年買ETF多，少買個股，想平衡返啲）。但，假想實驗。如果我有錢，我會買乜股？可能係之前提過嘅台積電。又或者係阿里巴巴，甚至係啲內銀股。遲下慢慢解（但除咗內銀股，其他都解過）

23. 仲有，我在Facebook有講Netflix。半嘩眾取寵。但個故事係咁嘅：微軟如果買Activation Blizzard失敗，聽聞就真係可能會買起成間Netflix．能力絶對係有嘅，故事都講得通，但當然只係畀你得閒過下癮，以前寫過，你好難只係bet on一個潛在可能收購。何況，「陣間買Netflix最後又撻Q咪死？」

24. 但我估，真係有機會發生的。反正我都有Netflix，可以等下（反而至怕佢太平賣咗）