［強文推介］睇晒百年美股美債回報。係咪同升同跌？你應該預一年幾多回報先合理？點解4% rule行得通？60-40配置有乜用？咩叫風險？畀埋個Excel你玩 (Patreon)

今次呢篇你就一定要睇啦：過去100年美債美股回報

買TLT 高位都drawdown 一半喎」「買債都咁大風險做乜仲要買」

「六十四十法則」4% rule．仲有答埋你「咩係風險」

畀埋個Excel你，你鍾意自己放港股 內房債都得

「我唔貪心三年想炒上幾倍」- 到底你應該「期望」幾多回報?

回報睇CAGR，唔係平均

六十四十，一年有8%回報，夠你用了

係呀，4% rule 計埋通脹架啦

債券一年4.6%—勉強好過通脹。但總好過你唔投資

到底乜嘢係風險？就係deviation from expected return．Dispersion

咁六十四十，咪回報在兩者中間，風險又在兩者中間，有乜特別？

1. 拿，呢篇你就真係要睇，一定要睇。即係平時你唔會篇篇睇，係肯定嘅。但你一個月睇一篇嘅，就會係呢篇。請你剪存。順便警告埋讀者，好多你地問嘅問題，資產配置嘢，呢篇（或呢幾篇）就有答案。第時你客氣地又問我，我就會畀返呢篇你睇。你冇禮貌地問我，我就會回你「咪寫過咯！講明叫你必睇又唔睇」

2. 不枉我嘔心瀝血，在仙台得部notebook，mon又細又冇雙mon打數字又唔方便，但都整咗呢一個Excel去講解。亦不枉我連個第一季回顧都打斷咗。但照計我只會打斷一篇，因為唔想第一季回顧又講唔完。不過今次呢個系列肯定可以寫好多篇文，之後再算。你亦可以拎個Excel返去玩。

買TLT 高位都drawdown 一半喎」「買債都咁大風險做乜仲要買」

3. 就係同你講過去100年美股美債嘅表現，同埋有乜嘢睇到！亦係回應返讀者嗰個「買TLT 高位都drawdown 一半喎，美債喎，又話債券穩陣？」「買債都咁大風險做乜仲要買」（事實我完全冇買，但第時可能會）。順手講埋呢個「六十四十法則」（六十股票四十債呀下，唔好掉轉），同埋上篇講過嘅4% rule．仲有答埋你「咩係風險」呢類問題。

4. 讀者問得好嘅問題，就可以啟發到我寫啲好文的

「六十四十法則」4% rule．仲有答埋你「咩係風險」

5. 我用美股做例子，但你鍾意放港股落去都係得嘅。就係睇下股票同債券嘅回報，到底係點。你堅持要同我講「過去唔代表將來」嗰啲，咁我冇嘢好拗的，你大可以預測自己每日會贏300%，你點知唔得？「過去唔代表將來」喎。

6. 一切，由呢個圖開始。

7. 留意我已經將啲數入晒Excel計一次，呢度足足係95年（中間我hide咗），照計一睇就明。六十四十嗰度，我有幫你拆開到底六十股同四十債貢獻咗幾多。

畀埋個Excel你，你鍾意自己放港股 內房債都得

8. 留意，美股佢用標普指數，但用咗total return，計埋股息的。債券呢，用咗十年美債嘅價格，一樣total return，所以計埋息。當然，你鍾意用GOVT AGG甚至TLT都係可以的！你咪download個Excel，自己改個column，正如你用納指，用恒指都得。而我當然保留晒所有formula，唔會整個value only畀你咁缺德啦

「我唔貪心三年想炒上幾倍」- 到底你應該「期望」幾多回報?

9. 上面個表，一睇就明。之後係我計嘅數。首先大家最關心嘅係，「我一年應該預有幾多回報」。例如你啲保險經紀sell你，同你講咩退休計劃，都總會有啲假設，甚至你自己做假設。咁你都要諗下，到底幾多回報先叫做合理？你見我日日都寫文恥笑嗰啲話「我唔貪心想三年升幾倍」嗰啲友啦。

10. 亦煩氣講多次，唔好同我講你「預」有幾多回報。太自大又太無知，邊個會care 你「預」有幾多回報？你預年年三成回報？咁點解其他人唔預四成？佢地搵夠晒？你又點解唔四成？五成？不如預一年兩倍？

11. 留意，幾多回報先「合理」，呢個就係同歷史有關。遲下我會再細講，但你見其實你拉得夠長，個年度回報唔會話爭好遠。即係講乜？即係例如近十幾年美股係好強嘅，但你總唔會年年升三四成。換個角度講，呢度我用95年黎計，當然你可以揀最近三十年五十年，會爭啲，但唔會話爭到好遠好遠，你唔會拉到一年有三四成回報的。因為真係冥冥中有個主宰咁（係有原因解釋的，但比較深。但簡單嚟講，你股市回報，總不能長期脫離企業盈利，而你企業盈利總係有個譜的，你樓下間士多年年幾倍增長，應該好快大過美國嘅GDP）

回報睇CAGR，唔係平均

12. 咁，睇晒啲回報，計個平均數咪得咯？錯。嚴格嚟講，係睇CAGR，compound annual growth rate．數學上嚟講，即係睇geometric mean，唔係你平時計平均數嘅arithmetic mean（唔記得係乜嘅就有得佢吧，總之記住CAGR ）。CAGR點計？我Excel有，在右邊一堆hide咗嘅嘢，自己搵下

13. 點解？好簡單。今年你贏100%，下年輸50%。你用平均回報計，25%一年！但實情你係打回頭，回報係0%。呢個咪分別。正如成日講，一隻股票跌咗七成，你唔係要追返七成，係要追幾倍。

14. 好啦，強到爆嘅美股（再講一次，標普指數），百年CAGR，都只係10%左右。冇錯，呢個就係大約應該預嘅數。近十幾廿年係唔止嘅，但你頂多都只係預到十頭，揀股叻啲可能再高少少，但任何預15%以上嘅，已經離地。嗰啲咩想三年贏幾倍嘅，慢慢發夢，因為畢菲特一年兩成多啲，已經係神級。

15. 至於美債（再講一次，十年美債），一年4.6%左右。六十四十？咪兩者中間，8.3%，其實不錯

六十四十，一年有8%回報，夠你用了

16. 拿，呢度已經畀重點你！六十四十嘅，平均我一年8.3%回報。咁即係十分理想地，我冇收入都好，舊錢每年就gen 8%出嚟，變相我係收「8厘息」—但當然唔會係「穩穩陣陣8厘息」，no such thing，拎住六十股票喎。但的確，我一年拎到8.3%回報，然後一年draw 4%出嚟，應該大約係可以永續嘅，啲人都計過數做到

係呀，4% rule 計埋通脹架啦

17. 留意，仲要有埋通脹。你可以話呢度大約容許你一年draw 4% 再加 4%通脹，而睇返史上嘅平均通脹，長期嚟講，假設4%應該夠保守（留意下央行有個2%目標，雖然唔好當佢唔敢反口）。

18. 不過話說回頭，年年8%梗係美好，但當然係有風險的。我好難同你量化個風險有幾大（但陣間我會試下教你量化），但真係有數得計：兩個睇法。苜先，你都仲拎住六成股票喎（而債券亦唔係零風險，邊個話你知係零風險？）。另外，咁咪話股票長期嘅CAGR 10%，咁你知上落大風險大，但你六十四十，都一年有8%回報，同股票回報好似唔係低咗好多（但拉長好多年複利效應就會爭得遠）咁其實都係有一定嘅風險嘅。

19. 所以如果有人問，既然六十四十先8%，股票一年有10%，點解唔買晒股票？「我而家咪係咯」。但，對於冇收入嘅人，我相信即使只買標普指數，個風險都唔係人人接受到　—　講真，大把有收入嘅讀者，股市跌20%已經叫晒救命啦，係咪？

債券一年4.6%—勉強好過通脹。但總好過你唔投資

20. 順帶一提，你睇債券嘅，CAGR講緊4.6%左右，其實真係勉強比通脹好少少咋下。不過總好過你放曲奇餅罐，或者做定存（舊年你就話四五厘息啫，而家仲邊有？之前N年零息添喎。再提一次，唔好咁短視，唔好只用呢排發生嘅事，就以為歷史上都係咁，將來都會係咁）

21. 至於講「平均」，意思未必太大，你自己睇表吧，我不重覆。

22. 另外，下面我計中位數畀你。中位數都係冇CAGR咁重要，但點都好過平均數。大約個意思係話你知，在一個「普通運仔」，唔特別好景唔特別差嘅年份，你會幾多回報。

23. 唔記得乜係中位數嘅，唔緊要，我將啲數字由細到大排，在中間嗰個就係中位數。

24. 中位數美股係14%，美債3.3%，六十四十咪中間。好啦，有冇留意到，個中位數係高過CAGR嘅呢？可以用啲Stat嘢去講「股票回報」嘅distribution，但唔好整到咁深。其實咪就係之前嗰段講嘅問題：你嘅回報　-20%, 10%, 30%．100蚊變114.4蚊，平均回報一年6.7%，中位數回報10%，而CAGR係4.6%。邊個準啲？你話呢？

到底乜嘢係風險？就係deviation from expected return．Dispersion

25. 上面講嘅，都係「central tendency」，個回報大約幾多，你可以話，其實呢個就叫做return，或者expected return．

26. 但風險呢？ Risk是甚麼？呢個問題就夠晒深，但好多人唔去諗，唔去問，甚至自己亂咁嚟。所以都係要讀下書，冇讀書嘅就聽我講吧。

27. 你喜歡不喜歡都好，在投資上，risk就等於講 「dispersion」．即係乜？即係離散程度。即係乜？活生生嘅例子，貧富不均，堅尼系數。兩set數字平均數 中位數都可能一樣，但分配如何？係全部集中在個平均數中位數附近？定好細又有好大又有而根本冇乜人係平均數？大約係咁嘅概念

28. 學術啲講，投資方面，風險，就係deviation from expected outcome．好啦，話股票（或某類資產）一年10%，咁但，到底係差嗰時七八好嗰時十一十二，定係差嗰時負二三十，好嗰時正三四十？記住，個expected outcome 係講個長期平均，唔係你自己「預期一年升三成」

29. 度Dispersion，可以好多方法，我年代會考數學肯定係有教的。最簡單，咪睇個range，最低同最高爭幾多。咁你呢度見到了，股票最差去到負44%，最好可以去到正53%，夠晒刺激。債券呢？最差一年負17%，最好嘅可以正33%。

30. 股票可以一年升五成或一年輸一半，你唔會太意外。但債券（留意係十年美債）都可以一年輸17%，你未必估到。同樣地，原來又可以一年升33%，你都未必估到。不過留意返，呢度係95年嘅數據！當然好多最極端嘅事件（不幸地，債券一年輸17%，就係舊年！史上最差）

31. 至於六十四十，當然不用多講，又係在中間

32. 順手教埋你數學，percentile或者quantile。其實原理同中位數一樣，你堆數字，由細排到大（掉轉都得），中間嘅咪中位數。咁你斬三刀四份（亦即係上半再斬半，下半又斬半），咪會條蚯蚓斷開四截，而有五個點。就係最低，25th percentile（又叫做1st quartile），中位數，75th percentile（3rd quantile），同埋最大。

33. 即係大約乜？即係大約你OK黑仔，四年一遇嘅最差回報，就大約係25th percentile。然後中學數學有教，你用個1st quartile同3rd 相減，有個叫interquartile range嘅東西，亦係用嚟度dispersion

34. 不過，實務上，啲人只係用一樣嘢去度投資嘅風險。都係你中學讀過嘅嘢：Standard deviation。又名SD，標準差，volatility，簡稱叫vol（就咁讀窩），波幅（冇錯引伸波幅implied vol），sigma，σ，都係嗰回事（又，回報就多數叫mu，讀miu，μ）

35. 點計你就真係唔使點知了，用計數機或Excel吧。但簡單嚟講，佢係度個dispersion．

36. 咁一如所謂，股票嘅sigma 大約19.5（但呢個到底係咩意思？好多人都唔知，我試下下篇文解，或者呢度都大約畀你有個概念），美債係8，六十四十咪又係中間，12

37. 睇咗全篇，其實只係講啲好簡單嘅嘢：股票梗係高風險過債券，個sigma大好多，但同時真係高風險高回報啫，個回報又明顯高啲嘛，有辣有唔辣。

咁六十四十，咪回報在兩者中間，風險又在兩者中間，有乜特別？

38. 咁六十四十，咪兩樣中間咯，有乜咁特別呢？就可以下篇再講。梗係唔係咁簡單

39. 預告，關鍵就係個Excel「回報/標準差」嗰一行。預告你知，意思即係，六十四十，犧牲些少回報，但風險細好多，抵玩。

40. 又或者你夠聰明嘅（如果我冇講你都發現嘅，畀個叻自己），你會留意到：六十四十嘅CAGR，就真係股票嘅六成加債券四成。但，佢嘅sigma，係低過股票六十加債券四成的

41. 又或者簡單啲講，六十四十，個風險，係全部股票嘅六折（19.5%變到12.2%），但我個回報，仲保到八成幾喎！（9.8%變到8.3%）

42. 回報就八折，但風險可以六折，係咪好神奇呢！

43. 又，畀啲feedback我。呢個系列我必定會再講，但話我知你想盡快講，定係想我搞掂咗個第一季回顧先（唔好忘記連個恒生都開咗頭未寫完）

44. 呢篇我就十分滿意的