［插播］答讀者問：嘩，買TLT高位都輸近一半喎。美債喎。咁大風險，咁點解仲要買債？講埋60-40 組合。以及4% rule (Patreon)

GOVT就美債大雜會，AGG就美國債市大雜會（只限IG）

TLT都要跌四成幾喎！又話美債好穩陣？我買債都係想低風險啫

簡單答案：高風險高回報嘛，咁你TLT全部超長債，升得多跌得勁咯

遇上舊年百年一遇嘅情況，最高風險嘅美債ETF高位跌四成，差不多啦

唔想咁刺激嘅？買GOVT買SHY咯，但回報又差啲

講到尾又係最基本問題：好多人就係又要冇風險，又要高回報

但我買GOVT高位都跌20%喎，咁啱我退休要錢用，咪死得？

其實，咩叫風險？係，舊年GOVT 高位跌20%，但，係常態定特例？

2022年股市唔係百年一遇地差，但債市係。你拎嚟判斷未來，合唔合理？

60-40 股債組合，舊年都輸18% - 但之前呢？之後呢？

60-40組合，輸錢年份極少。輸10%十年冇一次，贏就往往可以10-20%

回報就係嚟自風險。你想唔要風險嘅？得，做定期存款，甚至放保險箱。

4% rule 唔係叫你每年做定存收4%息呀小朋友

GOVT就美債大雜會，AGG就美國債市大雜會（只限IG）

1. 上兩篇（第七）（第八）講開第一季債市，同埋啲ETF。原來有隻AGG講漏咗。係咩東西？可能睇名都估到，Aggregate。隻嘢就係追蹤Bloomberg Aggregate Bond Index，美國嘢，一般就真係等於「美國債市指數」，好似美股你睇標普500咁，債市就睇呢個。不過佢同GOVT最唔同嘅地方係：你睇啲Holdings都知，唔止美國國債，有埋其他債的，但只限Investment Grade，信貸評級夠高嗰啲。

TLT都要跌四成幾喎！又話美債好穩陣？我買債都係想低風險啫

2. 好啦，有個讀者問嘅問題幾有趣。佢話：喂，隻TLT高位drawdown原來都要跌四成幾？美債喎！咁咪好搵笨？好似好大風險，同回報完全唔成正比喎。我買債券就係想低風險啫。

3. 呢個問題真係可以好多個角度睇，又可以畀你睇返啲基本嘢。

簡單答案：高風險高回報嘛，咁你TLT全部超長債，升得多跌得勁咯

4. 首先，上篇都講咗，高風險高回報，TLT全部係超長嘅債。咁都寫咗，長債對債息係十分敏感嘅。你食得鹹魚抵得渴啦。

遇上舊年百年一遇嘅情況，最高風險嘅美債ETF高位跌四成，差不多啦

5. 另外，我估都係應該蘋果同蘋果比。TLT雖然都係美債ETF，但並唔係「債市」，你應該拎嚟同個股比，或者同股票行業ETF比。咁你大把大型科技股，高位跌齊七成啦。TLT作為美債ETF入面最高風險嗰隻，遇上舊年百年一遇嘅情況（陣間解），四成幾，差不多啦。定你以為係啲價係唔會郁的？咁睇少啲，咪冇咁擔心。

唔想咁刺激嘅？買GOVT買SHY咯，但回報又差啲

6. 唔想咁大風險？得，咁你睇GOVT，大雜會嘅，高位drawdown就「只係」兩成，咁肯定少過股市啦。

7. 都係嫌太大drawdown？咁SHY咯，短債。咁你見到高位只係跌6%—但反彈力度又差好多了。低位先升嗰3%。你睇隻TLT，低位升返兩成喎。咁你又嫌SHY回報差

講到尾又係最基本問題：好多人就係又要冇風險，又要高回報

8. 所以根本係返返去最基本嘅問題：好多人，就係想唔受風險，但又要回報。而早早已經叫你唔好嘥氣，你嘅回報就係嚟自你承擔風險，唔係你以為嚟自乜？

9. 所以，就係大原則，你買GOVT咪drawdown細好多。你要一注獨贏買TLT就食得鹹魚抵得渴，因為你全部買晒長債。而我幾時都講大原則係分散。

但我買GOVT高位都跌20%喎，咁啱我退休要錢用，咪死得？

10. 但你話，喂，唔係喎，GOVT 高位drawdown都20%，都好甘喎。如果我退休要錢嗰時佢大跌，或者我轉完做債券佢大跌，我咪大鑊？

11. 於是，亦都帶到去另一個問題：分！段！轉！

12. 分段買就不用講，講到我都嫌自己煩。但到你退休之時，都係分段沽—即係分段轉。咁你就唔會出現「最高位買最低位沽」嘅問題　—　亦即係，你唔會變SVB。但人地係因為存戶擠提要錢所以焗沽，你走去一次沽晒就係你問題

13. 我上次篇文，肯定寫得好清楚：你係慢慢，每年甚至每季每月咁，將你嘅配置由100%股票慢慢wind down落去。有邊隻字唔清楚？如果你係咁做，咁你就唔會咁黑仔食晒嗰20% drawdown。

14. 但你話，唔係喎，買GOVT都20% drawdown，我接受不了喎。又話債券好低風險。

其實，咩叫風險？係，舊年GOVT 高位跌20%，但，係常態定特例？

15. 仲可以補充少少嘅係：就真係哲學101問題，咩叫風險？唔使答我，我都不可能用兩三千字講完。但，得閒你可以思考下，咩叫風險。

16. 舉個反面例子畀你：2020年，雞犬皆升，買股票賺錢極易，係咪？但你會唔會同人講，股票好低風險甚至冇風險？我當你2020年3月先買股票，你年尾會唔會同人講，「我買股票咁耐未輸過，邊有風險」？

17. 你應該唔會咁講唔會咁諗。但點解？可能你都知，「因為只係一年之嘛」

18. 咁咪係咯，讀者針住「債市drawdown」嘅嘢，其實亦只係一年啫。你睇風險回報係咪睇一年呢？你睇2022年嘅，咁買乜都輸錢，以後乜都唔使買啦（更搞笑係，你睇今年第一季，買乜都升，咁又即乜都冇風險？）

19. 一年極好嘅股市回報，唔代表年年都好，當然係睇長期。正如一年債市好差嘅表現，不代表年年都差，都係睇長期。最簡單，咪睇歷史數據。係咪又有人想拗過去不代表將來？我下篇同你慢慢解，但你可以溫返書，早排寫過「羅素雞」，自己去index搵（但我發現好多人係唔會去搵，平時又唔睇。我明你忙，但就唔好鬧我冇講過了）

2022年股市唔係百年一遇地差，但債市係。你拎嚟判斷未來，合唔合理？

20. 而2022年，就真係債市百年一遇最差。留意股市唔係百年一遇地差，股市啲跌幅係多，但唔係冇見過。但債市就史無前例地跌得多。呢啲東西我舊年都有寫過，你係有睇嘅當然會明。

21. 好啦，睇數字好未？舊年，10年美債嘅債價，跌咗17%。有幾差？根本就係史上最差。係史上！近百年最差。咁你拎住呢個情況去判斷將來嘅世界，係咪合理呢？

22. 但，舊年11月12月時堆心法文都寫過，好多人嘅通病：只係以過去一排發生嘅事，就以為歷史上全部係咁，仲以為將來都全部係咁。偏偏投資係掉轉，跌得多就往往升，升得多就往往跌，因為估值（其實嗰堆文好好睇）

23. 亦都同樣地，你可以見到，所謂「理想」嘅60-40組合（佢呢度係用標普指數 + 10年美債，其實應該可以係計環球股市ETF加GOVT或者AGG），舊年一樣要輸18%。呢個亦係史上第三差嘅回報，近九十年最差！

60-40 股債組合，舊年都輸18% - 但之前呢？之後呢？

24. 咁但，呢個最差嘅年份，係常態定特例？你話呢？舊年都講過，聯儲局史上近乎冇試過咁快手地加息。OK，將來冇人知。但聯儲局會唔會今年或者下年仲好似舊年咁快手加息？怕且冇乜可能，係咪？

25. 事實係，你見到60-40組合，過去N咁多年，絶大多數年份都比到你OK嘅回報。我甚至覺得退休人士都啱用，不過我唔會公開講，費事又畀人鬧話我仆街死財演點人買股票

26. 你可以慢慢計，可能我遲下又寫一篇．但我整理幾個重點：首先，負回報嘅年份相當少。另外，真係負回報時，都唔會輸得極勁，你話會輸到10%嘅，十年都冇一次。當然仲有更要嘅係：正回報嘅年份，回報都唔錯，好多時都有十幾二十巴仙　—　根本我賺呢啲年份，之後有年差嘅，輸返10%，有乜所謂 ？「但你全部高位買然後低位沽就梗係出事」

60-40組合，輸錢年份極少。輸10%十年冇一次，贏就往往可以10-20%

27. 但你話，都係唔係喎，我買債券就係想不能輸錢喎。咁即係，又返返去要回報唔要風險呢個問題，你話得唔得？梗係唔得。幾時都係有取捨，好難有一個萬能嘅方案。換個講法，唔通你覺得買債嗰啲又係傻仔？

28. 又或者你可以諗下，你覺得60-40都係唔好嘅，咁你有乜高見？認真諗，仲有乜其他選擇？我可以話你知，係冇乜嘅。至怕係啲風險隱藏在啲你唔知嘅地方。煤氣會大跌，領展會供股，長江基建年年加派息高位都跌一半，買樓一樣可以輸大錢。

回報就係嚟自風險。你想唔要風險嘅？得，做定期存款，甚至放保險箱。

29. 因為，再三強調，你嘅回報就係嚟自風險。你想唔要風險嘅？得，再低啲嘅回報咯。做定期存款，甚至放保險箱。但，其實咪一樣每年蝕畀通脹。

30. 當然，如果你真係儲到上幾億先退休，咁你就真係可以退休後零風險。不過，其實你只係將個風險推前到後生啫　—　其實都係得的，因為後生你有收入又有時間，係可以受多啲風險。但，要碌上幾億，你估咁易？

31. 順帶講埋，以前舊文都寫過「4% rule」，即係每年你拎個老本4%出嚟做生活費，就可以永續，咬到死。掉轉計，即係你一年要用40萬生活費嘅，咁你碌夠1000萬就可以上岸（有人話將來可能高通脹，3% rule穩陣啲，咁就要碌上1300萬）

4% rule 唔係叫你每年做定存收4%息呀小朋友

32. 嗰時有讀者話，唔係喎，有個好大嘅bug，「通脹呢？」　—　大佬，我似唔似咁低水平？事實亦唔係我提出，人地當然有計埋，就係話你啲開支跟住通脹上，你都維持到。

33. 但，條數點計？有啲人以為係我儲夠1000萬然後每年銀行收4厘息，一年40萬咁。首先，年年銀行收4厘息，應該係做唔到嘅。但我當你做到都好，一年4厘，但你點追通脹？

34. 所以，人地4% rule，肯定唔係預你100%定期存款的！都係要股債混合，咁你一年嘅回報先有「通脹＋4%」，咁而你見到，60-40，應該係做到嘅。齋買債券？就唔得了。

35. 呢個課題實在太有趣，聽日再講多啲。冇錯，個第一季回報寫到五月都似，但有何不可？而你係要睇冧把嘅，扯，咪話你知LVMH 愛馬士 Unilever Visa Nvidia 中移動 日清 都一年新高咯，咁你之前有冇跟買丫？跟左咪坐定定，有幾複雜？但你有冇買？冇嘅，總有啲原因，係咪？所以幾時都係睇文改變自己想法最重要