插播：美股業績，銀行股勁，JP Morgan超勁，BlackRock AUM上返9萬億　＋　第一季回顧（五）：日本股，幾隻都有雙位數升幅。韓國三星台灣台積電，仲有星馬泰（主要只係講新加坡，而股市仲差過香港，三大銀行得一間升，不過我買嘅坡股有得升） (Patreon)

美股業績相當強勁，說好了的衰退風險

BlackRock AUM上返9萬億，話受惠於銀行執笠，嘻

大銀行業績間間都好過預期，說好了的銀行危機，「加息債價跌銀行輸死」

JP Morgan 純利按年升五成，收入去到歷史季度新高，說好了的爆煲

JP Morgan 淨利息收入去到歷史新高，仲要調高指引，估下點解？

回顧：日經指數今年升11%，扣埋匯率都肯定跑贏港股美股

大師冇點你：日清，Mizuno首季都升15%

樂天，Yahoo Japan，Panasonic首季都有雙位數升幅

韓股一樣勁，明明又話三星盈利跌九成幾

台股就當然係台積電，舊年第四季有叫你買，有讀者跟咗

搶人才經濟好吸晒資金嘅新加坡，股市當然仲衰過香港

三大銀行股就得一隻升

不過我買嘅坡股就有得升。

1. 首先又係插播，我個人幾鍾意呢個方式，希望大家都鍾意。可以講少少市況，但又可以同時講返長篇連載嘅嘢。

美股業績相當強勁，說好了的衰退風險

2. 插播，當然係講美股業績期。自己睇星期五有邊幾間，但簡單嚟講，幾間大銀行，加埋有買有推嘅貝萊德（BlackRock），以及有講但冇買嘅United Health。

3. 業績？差不多全部都好過預期。最普通已經係富國（Wells Fargo），United Health 都幾好，調高埋全年預測，不過要跌，就不要問我點解，可能太貴或超買或好消息出貨，唔知。

BlackRock AUM上返9萬億，話受惠於銀行執笠，嘻

4. BlackRock都好，直頭話受惠銀行危機，死未，股價一有得升。AUM（Asset under management）上返去到9萬億樓上，好過上季嘅8.6萬億，睇下幾時上返歷史新高嘅10萬億。

5. 特別留意，公司嘅AUM就真係代客泊車，啲資產唔係佢嘅，只係管理，所以你唔會見到佢Balance Sheet 有10萬億資產。但銀行就唔同，雖然都係過河濕腳摸籮柚，但銀行借出去嘅貸款，就真係銀行嘅，而另一邊嘅負債就係你啲存款。

6. 想詳細睇BlackRock嘅，之前有舊文好詳細講過，有埋個好大嘅Excel

大銀行業績間間都好過預期，說好了的銀行危機，「加息債價跌銀行輸死」

7. 更加強勁嘅係花旗同摩根大通JP Morgan，咁我主要講JP Morgan，因為有買。強勁就固然，股價升7%，但有幾勁？講緊盈利升五成。咁可能低基數或者好多一次性嘢？都可能係。但收入更加冇得呃，去到歷史新高，服未？說好了的銀行危機。（咁當然，其實雷曼爆煲之前嗰年，收入都係新高嘅，但情況唔同啦）

JP Morgan 純利按年升五成，收入去到歷史季度新高，說好了的爆煲

8. 主要由乜帶動？你睇到了，就係淨利息收入！一樣去到歷史新高。唔止，仲要調高埋全年淨利息收入嘅指引。點解？當然因為息口升！都話息口升有利銀行股，有冇老點你？呢啲咪我地債券101講嘅嘢。定你真係以為「加息債價跌對銀行不利」？咪話咗嗰啲唔係真係「損失」除非你好似SVB咁被迫高買低沽。會唔會JP Morgan有啲AFS損失食咗落股東權益到未見到？我未得閒睇，你得閒可以望下（搵到的）。但，由出完業績後股價大升，足見市場十分滿意。

JP Morgan 淨利息收入去到歷史新高，仲要調高指引，估下點解？

9. 睇埋其他嘢，存款流失呢？同舊年比係少咗，但呢個係全行現象，亦唔係今日先知。最重要係，今季嘅存款係仲有增長嘅，唔多唔少都有啲係細銀行轉過嚟。

10. 撥備呢？係升咗唔少嘅，好可能陸續有嚟，但至少暫時見到，收入（主要受利息帶動）嘅上升，足以補返呢啲嘢有突。睇實數，只係淨利息收入，按年都多咗60億，而個撥備只係升咗9億左右（當然好可能仲會升）。

11. 當然暫時只係幾間公司，但至少個業績期頭威幾好，可能之前分析員嘅睇法已經夠審慎。至少對銀行股嚟講係，你見普遍都好過預期。

12. 所以，就真係唔好咁懶，只係聽人地講「銀行危機」「經濟衰退」「加息債價跌銀行輸錢」。冇真正數字，冇詳細討論，就只係廢話。所以你明白點解我要講得咁詳細（同埋點解咁憎啲「兩句講完」）

回顧：日經指數今年升11%，扣埋匯率都肯定跑贏港股美股

13. 繼續我地嘅第一季回顧，越寫越長。不過可能好事。之前幾篇同你講咗開場白，MPF同港股，美股，歐洲股市，以及「匯率風險」嘅虛妄。港股同美股嘅個股我會之後再講。

14. 好啦，再落去，睇埋亞洲。今篇主要講東北亞，特別係日本（因為我買得多，而相信讀者都比較有興趣）

15. 講你都未必信，但A股表現係好過港股嘅，死未，亦唔關「匯率」事，首季人民幣對美金大致原地踏步。

16. 仲有你見，日本股市表現都相當唔錯，日經指數首季升7%，東證（TOPIX）都差不多。「但匯水呢？」，YEN對美金首季就仲要跌，不過都只係少少，拉勻後表現都仲好過你買港股（最近仲要五連升）

大師冇點你：日清，Mizuno首季都升15%

17. 事實上，港股美股外，最多我就係日本股，今年表現普遍唔錯。舊年買過兼推過嘅日清食品（2897 JP），首季升咗16%。講過啦，合味道嘛，通脹受惠股。同我舊年比埋差不多升咗四成！但我買個位已經唔係靚，舊年2月時買的。舊年3月時有提，但2月時冇出文，因為嗰時做完手術盲咁滯，隻股票係我聲控埃汾太幫我買的，印象深刻。

18. 另外， 波鞋股Mizuno（8022）第一季都升差不多15%，就係夠殘。Z Holdings（4689）（即係Yahoo Japan）第一季都升差不多15%，都合理，科技股大反彈嘛。Panasonic（6752）都升13%，樂天（4755）就10%。

樂天，Yahoo Japan，Panasonic首季都有雙位數升幅

19. 仲有一堆表現比較普通嘅，Donki（Pan Pacific 7532）今季都有5%。日航（9201）同全日空（9202）今季就麻麻地了。

20. 但至少，成個日本倉，今季差不多隻隻都升。畢菲特都增持日本股了。而我其實唔多明白點解好多讀者都好抗拒買日本股。匯率風險？上篇講咗啦。經濟唔好？邉個話股市關經濟事？日本股市呢兩年都好似跑贏中國。

韓股一樣勁，明明又話三星盈利跌九成幾

21. 韓國呢？因為好難買（除咗三星電子可以買ADR外），少講。但韓股第一季勁強，強過日本，雖然韓圜都跌得多過日圓，但拉勻依然係強過日本股少少。不過升乜？我都唔知。但三星電子第一季都升近15%，明明又話第一季盈利縮水96%（我知四月先公佈，但公佈咗之後依然冇跌）

台股就當然係台積電，舊年第四季有叫你買，有讀者跟咗

22. 台股表現亦都相當強，當然係因為台積電（舊年11月時已經叫你買了，有讀者買咗），整體科技股都強，美國都係，甚至可能韓股強勢都有關，但歐洲就另一回事。

23. 至於點解歐洲貨幣升，但日圓同韓圜就跌？都未必答到你，可能因為日本係都唔肯加息吧。但，我真係覺得唔需要理。

搶人才經濟好吸晒資金嘅新加坡，股市當然仲衰過香港

24. 然後，睇東南亞（東盟），首先就係星馬泰。點解放埋三個一齊講？因為呢三國係東盟比較「富有」嘅，亦係人均GDP 高過東盟平均嘅三國（唔計汶萊啦）。咁你見，完全係唔得嘅。講到點天下無敵吸晒人才嘅新加坡，股市仲差過香港。你仲係咪信經濟好股市就會好？

三大銀行股就得一隻升

25. 留意新加坡嘅金融股，DBS星展同UOB大華銀行首季都仲要跌，大跑輸。倒係華僑銀行OCBC有得升，事後你可以話可能因為私人銀行Bank of Singapore係佢地嘅。

不過我買嘅坡股就有得升。

26. 至於我買嘅新加坡股，得一隻。就係DFI。乜東東？即係牛奶公司。不過以為係香港業務？又唔係，遍佈東南亞。呢隻首季表現都唔錯的，跑贏大市，不過之前就差啲。

27. 至於馬來西亞同泰國，股市雙雙都係跌嘅，匯率就變動不大。冇乜特別關心。

28. 下篇會同大家講「Exotic」啲嘅亞洲，菲律賓，印尼，印度，越南。仲有「金磚五國」嘅另外三個，巴西俄羅斯南非