插播：美國通脹低過預期，但開始驚衰退　＋　第一季回顧（四）：美匯指數，歐洲股市，LVMH愛馬士，仲有好多人對「匯率風險」嘅誤解 (Patreon)

美國通脹低過預期，連跌九個月，可以「確認」回落未？

不過，核心通脹仲係幾高，5月都仲會加息。

「而家又話驚衰退了」

明明9月之後加咗4次息，1.75厘，但美匯指數9月已經見頂

明明好多人話一日仲加緊息一日美金都會強，係咩？

舊年第四季股市就見底，美匯指數見頂。嗰時其實發生咩事？

LVMH愛馬士日日歷史新高，法國股市當然都一支獨秀

其實英國股市一樣創新高，瑞士就差啲，但整體歐洲都強

明明又話歐洲「高通脹」「經濟衰退」「地緣政治危機」「斷氣」「打仗」

再講一次執著於「匯率風險」嘅虛妄

你買LVMH有匯率風險，唔通買蘋果就冇？大家都係做全球生意

匯率風險嚟自公司做邊度生意，收入係乜。而唔係邊度上市，用乜幣交易

美國通脹低過預期，連跌九個月，可以「確認」回落未？

1. 寫之前，同大家插播下。星期三出嘅CPI數字。結果係顯著低過預期嘅。Headline CPI上個月按年升6%，街估5.2%，結果出嚟係按年升5%，連跌九個月了，正路會連跌十個月。已經去到近兩年最低嘅水平。

2. 你睇按月嘅情況都係咁，上次係按月升0.4%，街估升0.2%，結果只升0.1%。留意下個月可能會見到負數。「唔知會唔會到時有人話驚通縮」。

3. 聽落，應該開香檳啦？可以「確認」通脹回落未？

4. 不過，亦都一如所枓，核心CPI係相當頑固嘅，冇乜點落。上次係按年升5.5%，街估今次升5.6%，出嚟嘅數都係5.6%。雖然都合預期，但直頭係「反彈」。

不過，核心通脹仲係幾高，5月都仲會加息。

5. 咁所以，你見到5月嘅加息預期，冇降溫，依然係正路會加0.25。出數字後10年債息亦都冇大跌（尾段就跌，因為另一樣嘢，下面講），你見科技股亦冇乜特別大升。亦都幾合理，因為聯儲局就真係主要睇「核心」（雖然係睇PCE，但同CPI走勢好接近。重點係真係睇核心，冇搬龍門）。

「而家又話驚衰退了」

6. 另外，出咗聯儲局嘅會議紀錄，重點兩個。第一，3月已經有部份官員諗過暫停加息。第二，聯儲局開始預期會溫和衰退。

7. 咁當然大家聽到「衰退」兩個字又會開始驚，何況美股之前都累積一定升幅。提埋你星期五晚又開始出業績，可能都會比較「差」，又或者會見到對個未來展望比較負面。

8. 之前都提過，好快會去到一個turning point，啲人嘅焦點應該由「驚通脹」變到「驚衰退」（事實上每日都有人驚各樣嘢，否則冇人沽股票，唔會有成交）。況且唔好忘記，核心通脹都仲幾高，分分鐘之後可以兩樣一齊驚。

9. 但，照舊，有危有機，睇你點睇。如果股市回落，債息又回落（出完個會議紀錄債息就回落了），股市就會變得雙重吸引。況且幾明顯，即使係會衰退（實情並不重要，真衰退又點？全部沽晒佢瞓身沽空？），都應該會係幾輕微嘅。「唔衰退又點停加息呢」。

10. 所以真係唔使太畀呢啲嘢影響，做好你份工。最好就壞消息買貨，唔得就冇乜消息時買。積晒啲錢，平嗰時又唔買，人人最興奮時先仆入去，先最危險。

明明9月之後加咗4次息，1.75厘，但美匯指數9月已經見頂

11. 好，繼續我地嘅第一季回顧系列，希望去日本前寫得完，去到日本就翻熱話個債息101 + 恒生友邦。

12. 第一季回顧系列，之前有寫過開場白，仲有港股，同埋美股。港美個股我會之後再講。而家睇埋其他股市同個股

13. 講之前，特別留意埋美匯指數。首先記住一樣嘢，貨幣係相對嘅，美匯指數其實係反映「其他貨幣」。你在香港或美國嘅，買港股美股，應該係冇任何匯率風險嘅，美匯指數點郁都同你冇關（除非你堅持聯匯脫勾，另一個課題）。

14. 不過我不厭其煩地講多次，你見今年首季，美匯指數上上落落，最後都要跌少少收場。特別留意嘅係：明明加咗兩次息（每次0.25）。

15. 煩氣都要再講句，美匯指數舊年9月尾已經見咗頂（短期嘅頂，唔好問我幾年後會唔會升返上去，舊文講過匯率都係鐘擺上上落落）。但明明十一月仲加咗0.75，十二月仲加咗0.5（我已經冇計九月尾加0.75）。

16. 呢個係好好好值得你再三留意，了解個世界點運作，睇下咩叫炒預期，點解資產價格永遠行得快過「現實」。

明明好多人話一日仲加緊息一日美金都會強，係咩？

17. 舊年第三季你會聽好多人講，「一日仲加緊息一日美金都仲會強，股市冇運行」。強美元股市多數冇運行呢部份，我大約同意。但，係咪一日仲加緊息一日美金就仲會強？聽落好「合理」，偏偏現實就唔係咁。我任你當時拎100個理由拗都好，現實就畀你睇到唔係咁。

18. 唔係加0.25美金升少少，加0.5就升多啲，加0.75再升多啲—完全唔係咁。實際上，而家都仲未停加息（差不多肯定五月都仲會）—但你見，九月尾，大家開始索到會開始放慢加息（甚至唔係停！），甚至都未真係放慢加（十二月先真係放慢），早在九月尾，美匯指數就見頂

19. 再講一次，好好好重要，記得諗下呢件事背後嘅意思。

舊年第四季股市就見底，美匯指數見頂。嗰時其實發生咩事？

20. 咁正如上面講，一般美金弱對股市都好　—　咪就係九月尾開始股市開始有運行。

21. 好啦，講港美以外嘅「其他股市」。如果你講比較大嘅股市，表現相當不錯，甚至好過美股（除非你計納指）。

LVMH愛馬士日日歷史新高，法國股市當然都一支獨秀

22. 你見我日日在Facebook貼LVMH同愛馬士又創歷史新高，就知法國股市有幾強，LVMH係重磅股，但愛馬士唔係，不過法國股市整體都勁（你睇L'Oréal今年都升兩成幾，有提過，但冇買），事實上屢創歷史新高，早排市值過咗倫敦頭添。法國股市首季升13%。德國呢？好少提，又好似冇乜特別有趣嘅公司，但表現都差不多強。

23. 相對冇咁強嘅係英國股市，甚至跑輸恒指，但至少都仲係正數回報，同埋，都創過歷史新高。英國股嘛，我有買一隻聯合利華（Unilever），但在美股買的（咁正如渣打匯控我都有），呢隻一樣都創一年新高。

其實英國股市一樣創新高，瑞士就差啲，但整體歐洲都強

24. 瑞士股市亦係歐洲中相對差啲嘅，但一樣都有4%回報。關唔關瑞信事？少少。但即使你睇雀巢今年都係麻麻地（但有得升！），至於我唯一一隻買嘅瑞士股，Roche羅氏藥廠，仲要跌。同業Novartis亦都只係好少少。

25. 整體，你可以睇泛歐指數，STOXX 600。STOXX旗下有一大堆指數，唔好搞錯，STOXX 600 就big cap small cap都有，600隻，全歐洲，唔止歐元區，即係包埋英國瑞士丹麥瑞典。你見呢個指數首季都升8%。

明明又話歐洲「高通脹」「經濟衰退」「地緣政治危機」「斷氣」「打仗」

26. 好啦，以上種種，同你聽嘅咩「高通脹」，「經濟衰退」，「地緣政治危機」，「斷氣」，「打仗」，係咪完全唔同？固然你可以事後話俄羅斯冇想像中咁大威脅，個冬天又唔凍。但，歐洲經濟唔掂（有掂過？）係事實，高通脹又係事實　—　呢度嘅教訓係：你講一大堆咩地緣政治經濟好唔好，同股市，係冇乜直接關係嘅。呢個係好多人嘅誤區。特別係講到LVMH 愛馬士 Unilever Novartis，人地做全世界生意，你「歐洲」點，同佢地係咪好大關係？

27. 仲有，好多讀者問，但多數一問我都會皺眉頭嘅係：「匯率風險呢？」

再講一次執著於「匯率風險」嘅虛妄

28. 咁你估都估到，既然美匯指數第一季都仲要跌，咁其實第一季，歐元英鎊瑞士法郎，對美金，都係小升嘅。呢個課題講過多次，只快講一次：我就從來唔擔心咩匯率風險，拉勻一般係打個和，當然你坐得短就寧舍多問題的了。

29. 咁當然你可以話你唔想受呢啲風險，「所以」唔買歐洲股，但呢個邏輯亦係完全錯嘅。就「匯率風險」嚟講，其實你買蘋果，同買LVMH，到底有乜分別？你咪又係做全世界生意！只係蘋果在美國上市用美金報數，你咪「以為」冇影響，實際打咗落盤數度之嘛。你鍾意嘅，買美國上市嘅LVMUY都得（我都係），「你咪自己將佢盤數變做美金」

你買LVMH有匯率風險，唔通買蘋果就冇？大家都係做全球生意

30. 我再講一次，「匯率風險」，係嚟自你間公司嘅資產（同負債）在邊，以及佢在邊做生意　—　而唔係總部在邊，或者用乜貨幣報數，或者在邊上市。中移動941係「香港公司」添（望下最頂寫住乜？），在香港上市添，好似有一期用過港紙定美金報數添 —但唔通你覺得人民幣跌20%對佢冇影響？

匯率風險嚟自公司做邊度生意，收入係乜。而唔係邊度上市，用乜幣交易

31. 無論如何，之前你就擔心賺價蝕匯，今年你見到就賺價賺匯。況且我都未講　—　其實唔少讀者唔係在香港，有啲在英國，甚至歐洲，日本。你嘅「匯率損失」，可能係佢嘅「得益」。長遠嚟講，都係不值得為呢啲嘢煩，反正你間公司做外國生意就一定有呢啲風險—其實唔做外國生意都一樣有，我當你間快餐店冇大陸分店，但難道人民幣大升大跌就對你生意全無影響？

32. 我堅係唔明白啲人做乜可以為啲匯率討論幾日　—　特別係多數人睇匯率嘅往績仲差過睇股票（至少我係）