插播：美國CPI，加息預期，業績期展望　＋　第一季回顧（三） (Patreon)

如無意外美國通脹會連跌九個月

但，舊年美國通脹幾時見頂？七月。美股幾時見底？唔係七月。點估？

納指好過標指，標指又好過道指。但最強係納指100

咁納指100同納指有乜分別？邊隻好啲？

點解好少有追蹤納指嘅ETF？

舊年七月見通脹見頂飛入去，到十月輸突，以為「落空」—然後就真反彈

嚟緊美股業績，應該係2020年第三季以嚟最差

如無意外美國通脹會連跌九個月

1. 再寫第一季回顧前（應該仲要寫多幾篇），都提提你。好大程度上第一季嘅「賺錢話咁易」，係因為估停加息或者減息（分別不大）。咁所以呢排出啲數據，一路都會影響呢種預期。剛剛出嗰啲就業數據就好似幾勁，所以而家一般都預5月頭嚟緊呢次都會再加0.25，呢個預期過去半個月不停升溫。問題就不大嘅，你見呢期美股都唔係特別差（但第一季好勁嘅科技股明顯呢排差啲）

2. 咁另外，星期三晚亦都會出個CPI通脹數字，議息前最後一次。又係快手去Trading Economics（TE）睇下。Headline CPI上次按年升6%，街估5.2%，TE估高少少，估5.3%。但都會係放慢嘅

3. 按月嘅CPI升幅呢？ 上次係0.4%，街估升0.2%，TE又係估高少少，估升0.3%，但都係放慢嘅

4. 不過核心CPI方面，上次係按年升5.5%，街估升5.6%，TE就估升5.5%。咁你見到「核心」通脹（扣除食品同能源）都仲係幾頑固嘅。的確減息冇咁早，但呢個係好多人想當然嘅謬誤　—從來冇話要等到減息先會升。甚至唔使等到停加息。市場開始估將來會停加息，自然就升。一定係炒預期，錢郁得最快，貪念最快，股市走在所有「現實」之前。

5. 不過，呢個「市場開始估將來會停加息」嘅「將來」係幾耐，就係好值得研究嘅問題。你見我一般都話你知，可能三個月至半年咁上下啦。去到一年之後啲人就真係覺得太遙遠。但又唔會等到一個月咁近。證據？你睇第一季嘅表現咪知，根本冇人估三四月停加息，事實都冇，但已經升定先。

但，舊年美國通脹幾時見頂？七月。美股幾時見底？唔係七月。點估？

6. 另外可以留意一樣嘢，上面講過，正路地今次出嘅CPI數字，5.2%或5.3%左右，再比上一個月回落。考考你，其實連續回落咗幾多個月？睇圖，答案係舊年六月出嘅數9.1%（留意六月係出五月嘅數）就見頂，之後七月出嘅數回落，一路連跌咗八個月，應該會連跌九個月。

7. 但呢度你應該問嘅問題係：咁美股，係幾時見底反彈嘅呢？係咪七月？係咪通脹回落美股就見底？

8. 答案：唔係！你見美股十月中先見底反彈。雖然，其實七月嗰時都真係升過一浸。

9. 好啦，你事後睇數嘅，可以話見到。CPI按月跌幅，十月就見頂。會唔會係睇呢個？但呢個原因似乎唔多充份。因為你見七月時直頭係零添。唔止，今年一月二月反彈添，但美股照升不誤

10. 最後，你睇核心CPI，就真係十月開始連跌五個月。咁可能呢個係原因。但亦有可能，其實都係因為息口預期（不過，息口預期到頭嚟係聯儲局有好大話事權，而聯儲局一向係睇核心通脹，所以你可以話核心通脹同息口預期差不多係一樣嘅嘢）

11. 講呢個例子，無非話你知：市場係好複雜嘅。舊年之前一路係擔心「通脹升」所以股市大跌，應該冇乜人反對。但你見即使「通脹回落」嘅七月，美股都係未見底的。你飛入去可能又摸一摸頂，仲要係十月時跌穿年內低位，包保你覺得灰心，「炒停加息預期落空」　—　但到十月呢次反彈就夠強了。點估？

12. 當然如果真係只睇一樣嘢，睇息口預期好似簡單啲。雖然，都可能只係「呢幾年」嘅情況係咁，市場係會不停變。以上嘅例子主要係教你點思考。唔好墮入嗰個「通脹見頂市場就即升」嘅陷阱　—　係呀，即升，不過之後嘔返晒出嚟。況且，其實舊年係擔心通脹，定擔心加息？差不多嘅嘢，但你見就有幾個月嘅分別，因為啲人講通脹好多時睇headline，但息口預期似乎真係睇核心CPI。

舊年七月見通脹見頂飛入去，到十月輸突，就以為「落空」—然後就真反彈

13. 更唔好講，你七月嗰時因為覺得「通脹見頂」而買入去，到十月時輸突，除咗灰心，仲會開始聽人講話「通脹仲係好高所以股市冇得升」—　不過十月後Nvidia之類就升咗一兩個開。

14. 所以，市場好複雜。而你網上見到啲友講嘅嘢，多數係錯。因為多數人，就多數係錯嘅。否則你唔會見到貧富懸殊，唔會見到股市明明升多過跌，但輸錢嘅人多過贏錢嘅人。

嚟緊美股業績，應該係2020年第三季以嚟最差

15. 另外，不經不覺又再去到業績期。上一個業績期（即係年頭）美股表現相當唔錯，但唔多唔少因為再之前一年嘅低基數（2022年年頭嗰次業績期就揭開科技股狂跌嘅序幕，就係嗰時Facebook可以一日跌咗26%）

16. 照舊，慎防新讀者唔知，業績時間表，睇Zacks吧。亦都照舊，由堆大銀行打頭陣，星期五就會出。科技股就慣常係最尾，去到月尾先出。

17. 相信我都未得閒寫，但幾大機會你會聽到人講，今次啲業績好差。睇圖，似乎都會係咁，街都係咁估，整體分析員估啲盈利跌8%，2020年第三季（疫情高峰）以嚟最大跌幅。

18. 但首先，業績嘅嘢，一般唔係睇好定差，係睇同預期比。另外，上次（年頭）嘅業績「好」，當然係因為低基數。咁而今次「差」，亦唔多唔少因為高基數（睇返圖）。

19. 好消息係，照計呢季就會係最「差」嘅，之後就好轉。而股市當然係睇預期。仲有，啲公司對未來幾季嘅展望，就比本身出嘅數更重要。

20. 當然其實最重要都可能係債息，加息預期之類嘅嘢。以前都寫過好簡單嘅一條式：　市值＝盈利Ｘ市盈率。市盈率就係估值，就受情緒以及加息債息之類影響。而一般見到，估值嘅波動，係大過盈利好多嘅。

納指好過標指，標指又好過道指。但最強係納指100

21. 返返去我地嘅第一季總結。上篇講完港股，今篇到美股。三大指數表現都幾分化，你見道指反而最弱，零回報，所以唔好信咩「油價升舊經濟股勁」—皆因科技股仲勁。當然，一般比較公平用標普指數睇，升7%，都係相當不錯。而帶動標指嘅，就主要係科技股。你見納指係升足17%，至於納指100更勁，一季升咗21%！

22. 咁之前都講咗了，納指100一季升21%，你同我講「熊市反彈」，我覺得真係唔好浪費時間討論。仆街，牛市嗰時都大把人一年贏唔到21%啦（成副身家喎），而家納指100一季升咗21%。

咁納指100同納指有乜分別？邊隻好啲？

23. 順帶一提，你會問納指100同納指有乜唔同，咁顧名思義，納指100就真係100隻（其實唔止，標普500都唔止500隻，但大約啦）。納指就兩千幾隻。

24. 咁納指100好啲定納指好啲？長答案：都唔係好肯定。由於納指100就只係最大100隻，咁當然更加集中在大公司，咁就好睇嗰期係大公司跑出定細公司跑出。今年就明顯係大公司跑出，所以納指100就勁啲。但以往呢？就都係一時時。

25. 短答案：其實納指100好啲定納指好啲，都唔係好關你事。因為反正你好少會買到納指嘅ETF。你多數買到嘅，都係追縱納指100。例如QQQ同QQQM。咁你見兩隻今年都跑贏納指。

點解好少有追蹤納指嘅ETF？

26. 點解冇乜ETF追縱納指？可能因為成份股太多。「咁嗰啲咩羅素3000又點搞？」，我都答你唔到，但可能因為如果只追100隻就可以壓到個成本好低，易啲吸到錢，有數圍吧。要追晒咁多隻冇話唔得，但開支比率高啲，可能投資者都寧願買平啲而只追100隻嗰款。