第一季回顧（二）—再講強積金配置。恒指低位升四五成，拗熊市反彈定牛一，完全浪費時間。50%就係50%。同你睇晒世界各大股市，睇埋匯市債市ETF個股商品。兼且資源共享。港股一月升10%，二月差不多嘔返晒出嚟。但三月又升返。問你點估？科指冇特別跑出，點解？ (Patreon)

再講一次強積金配置，實情話咁易，唔明做乜啲人搵嘢嚟煩

咁多年我都冇轉過MPF配置。仲有，收到Statement，我係掉落垃圾桶的

強積金雖有好多不是，但有兩個好處

恒指低位彈四五成，有人話「只係熊市反彈喎」，完全多餘

「冇升穿高位，所以唔係牛市」—咁係咪恒指要跌穿100點先係熊市？

熊市又點，牛市又點？熊市平嗰時唔買，唔通牛市貴一貴先買？

爭拗係「牛一」定「熊市反彈」，更加係浪費地球資源—20%就係20%

今季身家冇幾個巴仙進帳嘅，面對現實，認真檢討下

同你睇晒世界各大股市，睇埋匯市債市ETF個股商品。兼且資源共享。

港股一月升10%，二月差不多嘔返晒出嚟。但三月又升返。問你點估？

但值得留意嘅係，科指並冇特別跑出，同美股好唔同。點解？

騰訊阿里小米就大升，但美團京東快手就大跌，點解？

再講一次強積金配置，實情話咁易，唔明做乜啲人搵嘢嚟煩

1. 上篇文講咗，第一季賺錢話咁易，MPF所有資產類別都升，以及叫你唔好亂咁轉MPF。關於強積金，之後有機會先細講。你想快睇嘅，我在明報今日篇文都有寫，呢度attach埋畀你。但大原則：除非你50歲以上，否則你嘅強積金，當然係100%股票，我真係唔明有乜好拗（50歲以上嘅？唔係叫你全部債券，而係慢慢減少股票比例，但到你退休都唔好減到冇，可能減到一半半吧）

咁多年我都冇轉過MPF配置。仲有，收到Statement，我係掉落垃圾桶的

2. 仲有，唔好成日睇，更加唔好成日轉。我係認真的，我從來都冇轉過我嘅MPF配置，一路都係100%股票。仲有，啲Statement，我一收到就掉落垃圾桶的。我唔明睇嚟做乜，睇咗會表現好啲？呢啲都係心理作怪，配置做得適當，根本唔使睇（你估到了，我玩啤牌係唔會慢慢「甩」睇係乜牌，正如當年考會考考A level我都唔會遮住一行一行睇字母。唔好浪費人生啦）

強積金雖有好多不是，但有兩個好處

3. 你見但凡股市跌時，就好多人轉去保本，然後到市旺嗰時，就飛返入股票。咁咪就係保證咗你會摸項。強積金雖然有好多不是，但佢有兩個好處：第一，迫你儲錢（雖然個個口講「我係成年人自己識儲錢」，但不幸地現實係如果冇強積金，好多人係連嗰一百幾十萬都唔會有）。第二，自動地幫你分段入市。既然都被「強」咗，就應該在有限空間下盡做

4. 仲有一樣嘢，上篇文講過Nvidia嘅例子，低位升返一兩個開，呢個亦係好多人日日不停拗「熊市反彈」嘅虛妄。絶對係浪費生命時間。你話我只係特別拎 Nvidia做例子？但幾隻大型股都係咁，即使你睇納指低位都彈兩成，恒指更加彈咗四五成。

恒指低位彈四五成，有人話「只係熊市反彈喎」，完全多餘

5. 你見我都寫過多次。納指低位已經彈超過兩成，但啲「熊市反彈」論者話唔係牛市，只係「熊市反彈」，我就唔知佢地點自圓其說。因為明明之前跌20%，佢地就話係熊市。點自圓其說？佢會話你知，因為未升返去之前嘅高位，所以唔係牛市。都低能，咁我話你知，恒指跌到10000點都唔係熊市，跌到1000點都唔係熊市，因為冇跌穿「之前」嘅低位（係100點）。

「冇升穿高位，所以唔係牛市」—咁係咪恒指要跌穿100點先係熊市？

6. 你見到呢種邏輯嘅荒謬之處未？更唔好講，「股市長遠係升嘅」，根本冇所謂「牛熊對決」，呢啲只係啲短視嘅小朋友幻想出嚟嘅嘢。股市係屢創新高嘅多，定不停創新低嘅多？所以再講一次，拗埋啲咩熊市牛市，絶對浪費生命。呢啲友仔，拗嘢冇輸過，但仙都唔仙。牛市又點？熊市又點？熊市平一平唔買，唔通大牛市貴一貴先買？當然佢會話你知，應該等「確認」見底先買　—　而我唔知講呢句嘢嘅人，有幾多係舊年10月嗰時瞓身家，或者係2020年3月時買。九成九都係一股都冇買。

爭拗係「牛一」定「熊市反彈」，更加係浪費地球資源—20%就係20%

7. 至於爭拗係「牛一」定「熊市反彈」，更加係浪費地球資源。好簡單，20%就係20%，Nvidia 升一個開就係升一個開。我10萬變20萬，就係10萬變20萬，難道你定義係「牛一」呢10萬會好洗啲？你話係「熊市反彈」我啲錢會臭啲？無論你叫佢係乜，你嘅身家升兩成就係兩成。我唔明啲人浪費青春去拗嚟做乜。

熊市又點，牛市又點？熊市平嗰時唔買，唔通牛市貴一貴先買？

8. 正如無論你覺得「合唔合理」都好，今年第一季，美國爆咗三間銀行，SVB仲要係美國第十六大，而SVB爆煲係美國史上第二大嘅銀行倒閉，仲要瑞信都香埋，但一樣係買乜都升。所以，你年頭去估會唔會有金融危機，估到又點？順帶一講，第一大係邊間？唔係雷曼。因為雷曼根本唔係「銀行」。你有冇見雷曼個名有寫「銀行」？第一大，係Washington Mutual

今季身家冇幾個巴仙進帳嘅，面對現實，認真檢討下

9. 再講一次，今季都輸錢，或者打個和嘅，真係要檢討下。表現差本身唔係問題，唔正視先係一個問題。講過多次啦，不停跑輸大市，梗係有啲原因。搵佢出嚟，然後對症下樂。成日都摸頂買摸底沽嘅，好簡單，就唔好不停time the market，分散入市。好地地美股升港股升歐洲都升，但你買著個國家跌嘅，亦好簡單，分散你嘅地域。大市升但你買嗰啲股票跌嘅（例如啲銀行股），咁亦好簡單，唔好股神上身，買多啲指數ETF，個股適可而止。

同你睇晒世界各大股市，睇埋匯市債市ETF個股商品。兼且資源共享。

10. 好，入正題。我地先睇世界各地股市，仲有，同時間睇埋匯率。咁你可以直接睇埋計及匯率後嘅變化。照舊，Attachment有個Excel

11. 小小技術細節，首先，黃色嗰格係計及匯率嘅變化。但為求方便，我係用對美金，唔係對港紙，就差咗0.6%咁大把，因為港紙對美金首季跌咗0.6%。另外，港股嘅我就唔計匯率了，你真係住美國用美金買港股自己扣返0.6%。同樣地，美股我亦都唔會同你計匯率，你在香港買美股嘅，鍾意嘅自己加多0.6%

12. 第二，以前都寫過，嚴格嚟講，例如我買歐洲股，咁股價升咗20%，然後歐羅對港紙又升咗10%，咁我獲利幾多？答案係32%，唔係30%。因為嚴格嚟講係(1+20%)*(1+10%) – 1。不過一兩季嘅分別真係好細，純學術討論。

13. 第三，關於睇環球股市回報，上次貼過呢個網。但見佢啲數唔夠update。介紹另一個畀你，應該幾好用，有埋匯率。當然如果公司有Bloomberg 或Reuters之類更好，或者等我遲下得閒可以在Google Finance或者在Excel直接整

港股一月升10%，二月差不多嘔返晒出嚟。但三月又升返。問你點估？

14. 好，睇表現。講到極廢嘅港股，1月係威係勢，升10%，近2000點。但2月都幾差，差不多跌返晒出嚟（但唔好忘記舊年11月12月都強）。不過3月又好返啲。又再升返3%。

15. 至於點解？你問我都冇乜得解。啲解釋都只係事後fit story，解唔到畀你知點解一月升二月跌三月又升返啲。我唔知一月三月有乜利好因素係二月忽然消失咗，我亦唔知二月有乜負面消息係一月三月消失咗。可見啲人講咩「利好消息」「利淡消息」，多數係廢話。仲有，連一個月嘅走勢都咁難解釋，你走去日日睇股市點解升跌幾百點，亦係浪費青春。

16. 最後埋單恒指升3%。你嘅回報如果差過呢個數，就真係唔好再當自己股神了。

但值得留意嘅係，科指並冇特別跑出，同美股好唔同。點解？

17. 不過值得留意嘅係，一向比較high beta（升又升得多跌又跌得多）嘅科指，表現未見突出，只係同恒指差不多。呢個都比較有啲意外，特別係你見美股就完全唔同情況。不過真係半杯水，你可以話科技股冇特別起色，但亦可以話相對地仲值搏。

騰訊阿里小米就大升，但美團京東快手就大跌，點解？

18. 就咁好片面睇呢，騰訊第一季都升18%，阿里巴巴都有13%，小米都升8%。但隻美團係跌18%，京東跌22%，快手都跌18%，你可以話呢幾隻嘢拉低咗科指（可以參考下科指嘅比重）。點解表現咁分化，你可以慢慢解，但我相信其中一個原因：你留意下，明顯地騰訊同阿里巴巴係相當賺錢嘅公司，而美團快手呢啲係蝕大錢嘅公司（OK，京東有錢賺股價都差，商湯大蝕股價都勁，但講整體啦下）

19. 下篇會講美股歐洲，同埋其他股市。另外，個股（包括港股美股歐洲日本）我會再之後先講。你睇個Excel張圖會見到