第一季回顧 （一）：首季賺錢話咁易！話咁易！話咁易！MPF所有資產類別都升。早早叫你唔好亂咁轉。IQ題：Nvidia舊年4月220，10月低位打靶110沽。而家270。你輸幾錢？ (Patreon)

小版務：債券系列暫停，但應該下星期會再出（冇乜大件事的話）。

因為要寫第一季總結

第一季總續：賺錢話咁易！賺錢話咁易！賺錢話咁易！

好彩四月股市變化唔係好大，否則你又會好多質疑

一般人唔止短視，仲要近視：永遠理解呢個世界就係睇呢幾日發生嘅事

你輸錢嘅，真係十分認真咁檢討下，自己出咗乜問題

印我個圖出嚟，亂掟飛鏢都應該係賺錢。真係掟中蝕錢？「咁掟多幾支」

100萬身家，年頭拎2萬蚊買股，升到3萬　—　你回報係1%，唔係50%

今年強積金，表現唔錯。但最重要嘅一句係：所有資產類別都升

有片為證，舊年11月頭我肯定叫你唔買都千萬唔好沽

IQ題：Nvidia舊年4月220，10月低位打靶110沽。而家270。你輸幾錢？

小版務：債券系列暫停，但應該下星期會再出（冇乜大件事的話）。

1. 好，有個半突發消息，應該都唔係壞事。不過個債券101系列，寫到第九篇，卒之要暫停。我覺得非常有用，提返你，可以上返Index睇，頭幾篇就由乜嘢係債券講起，然後講乜嘢係「債息」，點解加息會令到債息升債價，亦都快手重溫多次點樣影響到SVB。然後又講，點解加息債價跌，但啲人（包括我）都仲話加息有利銀行。之後去到實戰篇，拎恒生同友邦做例子。我就索性教你睇恒生嘅財報，逐個item同你睇，睇下加息有乜影響，啲債價跌又有乜影響，點入數，到底銀行係咩回事，點運作，點解成日爆煲之類。然後打算同你睇埋友邦，同樣地睇下啲債輸咗幾多錢（答案：好多！），會唔會搞到有事，賠唔到畀你，之類。

2. 不過，結果寫到恒生，剛講完啲收入（即係成個系列第九篇），就要斷纜啦。

3. 但點解我仲話唔係壞事？因為只係推遲啲出，其實我已經寫咗大半。至少恒生呢部份一定唔會爛尾（友邦我就唔敢講）。做乜寫咗唔出？好簡單，因為有啲更重要嘅嘢寫，就係今日開始呢幾篇寫嘅：第一季總結，加埋第二季展望（但幾時都係總結重要過展望）。

因為要寫第一季總結

4. 咁寫咗恒生一大半，又唔出，幾時先出？好簡單，如果冇乜大件事（例如又整單SVB咁），就係下星期一開始出。因為我同埃汾太去10日日本（今年都仲未去過呀，基本人權都冇）。所以到時就會出返恒生系列，反正冇乜時效性。又避免到時你幾日冇文睇又嚟鬧，又避免咗我在日本得部碌卜都仲要由零開始寫文。而家等於整定大半，中央廚房，到時加熱就搞掂。

第一季總續：賺錢話咁易！賺錢話咁易！賺錢話咁易！

5. 正題，第一季回顧。一切嘅智慧就在上面呢個圖。Excel都有，Attachment有，自己開嚟睇，可能以後半年或者年結我都用返差不多方式，之後可能直頭可以自動上網拎data（未得閒搞）。圖中有啲嘢你唔知係乜嘅，之後會解。

6. 呢幾篇（可能都會有四五篇），首先我會快手同你講一次啲表現，然後略為解釋下。之後？我就會整體咁講，第一季見到有乜大趨勢，有乜啟示。最後睇下第二季嘅展望咁。

好彩四月股市變化唔係好大，否則你又會好多質疑

7. 好啦，首先第一樣同你分享嘅嘢：我好慶幸，4月第一個星期，市況比較靜，冇乜大上大落。點解咁慶幸？唔係我驚，而係剛好相反，係因為你驚！然後你驚就會搞到我都有啲麻煩。

8. 即係乜？好簡單，例如第一季ARKK大升（舉例，冇叫你買），好啦，咁我照寫，會寫點解，會寫我點睇　—　然後例如我4月頭寫，點知ARKK幾日跌返10%—咁你會點？你又會質疑，係咪轉勢啦，跌返晒啦喎，咁寫嗰啲嘢唔使睇啦。而同樣地，如果再勁升呢？你又會驚「升晒啦喎」，而家仲好冇追入去？

9. 見到冇？都係永恒嘅嗰個問題：升又驚高追，跌嗰時又唔敢買，咁幾時買？（但咁而家既然4月比較靜，仲唔係應該買？否則，升又怕貴，跌又覺得有鑊爆唔敢買，死咕咕時又嫌冇反應唔買，咁真係永世都唔會買）。

一般人唔止短視，仲要近視：永遠理解呢個世界就係睇呢幾日發生嘅事

10. 仲有，另一個更大嘅問題：短視。唔止，仲要只係記得最近幾日發生嘅事。呢類問題，在舊年11月嗰堆心法文有寫過（記得搵嚟睇）。即係點？即係，例如啲嘢第一季升咗30%，然後呢幾日跌返10%，你又彷佛覺得之前嗰一季嘅理由係假嘅，唔再成立。但唔覺得有問題？點解幾日嘅走勢，就否定晒之前更大嘅趨勢（如有）。即係A隊上半場領先10球，但你下半場先開電視，B隊攻入返3球，但你總不可能覺得B隊勁過A隊好多啩？（除非半場A隊換晒人，打少件等等唔係「其他嘢不變」嘅情況）。個歷史唔係由你觀察嗰幾日開始的。

11. 咁幸好，4月市況係冇乜郁嘅。所以我先可以之前幾日好老定咁再寫債券101，等到而家先一次過寫第一季回顧。但我再強調一次，對我嚟講，4月呢幾日嘅市況，同我寫呢篇嘢全無關係。問題係如果美股在4月連跌5日，你又會質疑我寫嘢嘅價值咁解。

你輸錢嘅，真係十分認真咁檢討下，自己出咗乜問題

12. 好啦，常見嘅錯誤講完，真係講第一季表現。但我只用一句嘢去sum up：賺錢話咁易！再講一次，賺錢話咁易！再講一次，你輸錢嘅，真係十分認真咁檢討下，自己出咗乜問題。2023年第一季，你係冇可能輸錢的。

印我個圖出嚟，亂掟飛鏢都應該係賺錢。真係掟中蝕錢？「咁掟多幾支」

13. 原因？睇我個圖都睇到，根本你買乜都升，呢啲嘢亦唔係我特登揀出嚟。唔少嘢我根本冇買甚至冇寫，但入面已經包括絶大多數常見嘅asset classes，絶大多數你會買嘅嘢我都擺晒（可能除咗英國樓，唔熟，你有可靠嘅報價網站不妨畀埋我）。你可以印呢張圖出嚟，然後拎去掟飛鏢，照計亂掟都係會掟中贏錢嘅。真係咁黑仔掟中輸錢嗰格？例如掟中土耳其或者美團？咁好簡單，「掟多幾支」。而我唔係講笑的，分散投資呀朋友。你掟一支，都仲有機會輸錢。你掟得十支嘅，我諗你輸錢嘅可能近乎係零。

14. 如果你冇心機睇我嘅長文，亦唔緊要。你可以睇我上星期在明報同埋經濟一周寫嘅文，兩篇都只係千幾字，我放咗在Attachment，都係講「賺錢話咁易」「輸錢唔該你檢討下」。

100萬身家，年頭拎2萬蚊買股，升到3萬　—　你回報係1%，唔係50%

15. 特別留意，唔好自欺欺人。你100萬身家，年頭拎咗2萬蚊買隻股票，升到3萬蚊，很好。不過你嘅投資回報唔係50%，係1%。幾時都係計你成副身家嘅增長，所以成日睇啲人講賺咗幾多倍，未必好有啟示。你買得幾多？等於買六合彩你幾百倍都得，但你會唔會買一百幾十萬六合彩？

16. 當然，在呢排仲係相對高息嘅情況，例如你啲錢舊年拎咗去做定期（而家銀行減晒了），咁收嘅息當然都算係回報，但照計你一年頂盡5厘息，一季即係1.25%—咁當然都仲叫做勉強跑贏香港通脹嘅（至少睇官方數字係）

今年強積金，表現唔錯。但最重要嘅一句係：所有資產類別都升

17. 再講一次，今年贏錢話咁易。再畀多個例子你。今年首季強積金，表現相當唔錯。好多人話強積金廢，跑輸大市（都好似係事實），但我目測大多數人嘅表現，就比強積金都不如。

18. 不過強積金首季開局好，都唔係重點，亦唔係講緊好勁嘅回報（除非你買重美國科技股，但我唔會主張，分散呀。舊年輸到趴街時你又諗下你買咗有乜感受？感受差都唔緊要，至怕你又低位換嚟換去）—最重要嘅係呢句：

19. 所有資產類別在3月份和年初至今都錄得正回報

20. 咁你話，係咪合埋眼都贏錢？輸家係咩人？就係舊年第四季「管理風險」「市況好波動增持現金」「等個市靜啲先買股票」「二十大權鬥」「港紙爆煲」「外資撤離」嘅嗰啲友，轉去「保本基金」，聽落好似好醒，實情你睇返，咪就係低位打靶。保本，就係保證通脹食咗你個本。

有片為證，舊年11月頭我肯定叫你唔買都千萬唔好沽

21. 天地良心，舊年我去瑞士之前（即係11月頭），同諗Sir搞咗個免費強積金講座，大字寫明叫你唔買都唔好沽。呢度我都有放返段片上嚟（自己去index搵），你可以去睇返。但一如我所料，在我講嗰日，有啲人係已經低位打咗靶。然後我話件殘忍嘅事你知：你睇騰訊　Tesla Nvidia之類，由當時開始，升咗個幾兩個開。

IQ題：Nvidia舊年4月220，10月低位打靶110沽。而家270。你輸幾錢？

22. 呢度畀條數你計下。舊年呢個時間，Nvidia 220蚊。舊年10月低位，110蚊，輸足一半。10月時又話爆煲又乜啦，咁你「止蝕」啦係咪？你就輸咗110蚊。還好，唔係輸晒丫。不過之後大反彈，都冇計啦，而家Nvidia 270蚊。

23. 好啦，個智力問題係：咁你蝕咗幾多錢？係110蚊？但又有人話唔係，其實係蝕咗160蚊。因為你打咗靶，你就拎返110蚊現金。但冇打靶嘅，去到而家，你就係有270蚊，一來一回，你係輸咗160蚊。160蚊，亦即係你「輸110蚊」同「贏50蚊」嘅分別。

24. 咁到底其實係蝕咗110蚊定160蚊？呢個問題，冇一個絶對嘅答案，視乎你點定義。咁嚴格嚟講，就應該係講「蝕110蚊」合理啲，因為之後隻嘢升更多，好似唔係代表你真係蝕錢，只係「機會成本」，原本有機會賺嘅錢賺唔到。但又不過，如果用呢個講法，咁你永遠唔投資就永遠唔輸錢，但出面嘅嘢貴晒，其他人嘅生活好過你，你又係咪「同以前一樣開心」？我就唔識答了。

25. 下篇正式開始回顧第一季嘅各種資產