［101文］債券之九實戰篇．恒生淨利息收入290億，淨服務費收入51億。睇下仲有乜其他嘢？估下？「以公平價值計入收益表之金融工具收入」—輸4億幾，係乜嚟的？金融投資的收益減去虧損」。7500萬。又係乜？啲友以為銀行買好多股票 –不如睇下一年股息收入幾多？有人話銀行好多物業收租。真係咩？睇下恒生一年收幾錢租？炒房「交易收入」，個數在邊度見到？又有幾大？到底炒乜？ 恒生2022年交易收入仲高過2021，點解？唔係2022股債匯三殺咩？恒生一年收入500億—同十間曼城差不多，多過所有球會好多倍 (Patreon)

恒生淨利息收入290億，淨服務費收入51億。睇下仲有乜其他嘢？估下

「以公平價值計入收益表之金融工具收入」—輸4億幾，係乜嚟的？

輸4億，好少錢啫。不過舊年贏43億喎，一來一回就好係嘢

「金融投資的收益減去虧損」。7500萬。又係乜？

啲友以為銀行買好多股票 –不如睇下一年股息收入幾多？

有股息入收入，咁債息收入呢？

做乜恒生會有兩個保險收入？坐莊同抽水嘅分別咯，邊樣好？

「underwrite」，有時譯做承保，有時譯做「包銷」，其實即係乜？

保險收入206億，開支192億。咁係咪「淨執」14億？

有人話銀行好多物業收租。真係咩？睇下恒生一年收幾錢租？

炒房「交易收入」，個數在邊度見到？又有幾大？到底炒乜？

恒生2022年交易收入仲高過2021，點解？唔係2022股債匯三殺咩？

恒生一年收入500億—同十間曼城差不多，多過所有球會好多倍

1. 提多次，篇文主要會引用恒生業績份嘢，另外亦有機會參考個年報（因為再詳細啲）。Attachment 亦都有呢兩個東西，記得開住嚟睇。仲有，呢篇文講嘅「頁數」，係指個PDF嘅頁數，唔係份嘢入面印嘅數字。

恒生淨利息收入290億，淨服務費收入51億。睇下仲有乜其他嘢？估下

2. 上篇講咗恒生最大兩味收入，淨利息收入290億，淨服務費收入51億，上次好詳細睇咗係乜。咁我地睇埋啲「其他」嘢，你可以估下仲有乜。

3. 睇返業績第19頁（save低呢張圖都得），淨利息收入同淨服務費收入，下面仲有乜？之後有個「以公平價值計入收益表之金融工具收入」嘅嘢，輸4億幾。

「以公平價值計入收益表之金融工具收入」—輸4億幾，係乜嚟的？

4. 呢個係乜？如果睇英文，就寫得好清楚（所以有時睇英文好）。就係我地之前啲文嘅講，FV unrealized gain/loss（但英文原名都好長，所以我就咁叫FV）！中文有名你叫，「公平價值」（即係mark to market）計入收益表，咪就係FV要計入profit and loss嘅嘢！你啲債同股票，半年mark to market，冇沽都好，FV嗰啲，賺蝕就在呢度見（沽咗嘅呢？再有第二度）。

輸4億，好少錢啫。不過舊年贏43億喎，一來一回就好係嘢

5. 咁你見至少對恒生嚟講，似乎好少錢啫。之前兩味最主要收入都341億，FV輸返4億嘢，散紙。　—　不過留意返，2021年就係賺43億，一來一回少咗50億，都幾係嘢，業績當然受影響。所以你話有冇影響？

金融投資的收益減去虧損」。7500萬。又係乜？

6. 再落去睇，有個「金融投資的收益減去虧損」。7500萬正數。又乜東東？估下？既然上一行係講冇沽嘅債券（或股票）嘅MTM gain/loss，呢度就係有沽到嗰啲，記唔記得之前講過，賣咗就當然埋單計賺蝕，就係呢度。咁你見到，係打個和嘅。

7. 唔係好信我講法？咁年報有詳細列（不幸地業績冇），年報259頁。下面嗰行賺8500賣嘅，就係沽咗啲AFS（於其他全面收益計量嘛，即係AFS，係好煩的）。上面嗰行個輸1000萬，乜鬼「攤銷成本」嘅，就大約係HTM嘅東西。

啲友以為銀行買好多股票 –不如睇下一年股息收入幾多？

8. 仲有，股息收入，兩億幾，散紙。唔使問我咩叫股息啦可？呢度證明咗一樣嘢：銀行係買好少股票嘅。收息先兩億幾，同上面啲數比，散紙嚟。當然你可以拗係咪佢買埋啲唔派息嘅科技股嘅，稍後我地睇Balance Sheet可以再睇。另外留意，冇上市嘅證券，都可以派息的。上面個圖有。

有股息入收入，咁債息收入呢？

9. 然後有冇人會問，咁買債券收嘅票息呢？冇嘅？答案：在最上面計咗啦！利息收入咪計咗。記住，債券派嘅票息（如有）係利息（interest），但股票派嘅嘢，係股息（dividend），所以以前我係鍾意貼英文版的。

10. （有冇人問：咁優先股嘅股息呢？Er……我都唔係好肯定！但好似係當利息而唔係股息的）

做乜恒生會有兩個保險收入？坐莊同抽水嘅分別咯，邊樣好？

11. 再落去，好大舊數喎。就係一啲唔係間間銀行有嘅東西（雖然而家幾間上市嘅大銀行都好似全部有做）：保費收入。恒生保險，206億嘢收入呀呢度。

12. 不過再下面你會見到保險嘅「開支」192億。有啲人（例如我）就會將呢兩個數夾埋，當係一個「淨保險收入」，但官方盤數就冇嘅。保險有乜開支？好簡單，主要就係賠錢畀你，仲有啲撥備—總不能到你死嗰日先一次計（至於啲友出糧另計，唔係呢度扣）。

13. 另外留意，保險公司（在呢個情況即係恒生銀行，因為恒生保險係佢子公司）拎咗你啲錢，仲會拎去投資嘛。呢啲收入應該在上面啲利息收入見埋了。

14. 如果你心水好清嘅，又會問一個問題：喂，唔係最初服務費收入已經有計保險啦咩？做乜呢度又保險？而且上面非利息收入中，「保險」先佔4.8億（貼返個舊圖畀你參考），做乜呢度變咗206億收入出嚟？

15. 好簡單。「服務費收入」嘅「保險」，係佣金，幫人地賣，抽佣。同賣基金一樣。但呢度你見到大大舊嘅保險收入，係恒生自己嘅收入。

16. 有乜分別？好易想像啫，抽水同坐莊嘅分別。幫人賣嘅，當然只係摸籮柚（銀行嘅核心價值），過河濕腳，抽小小水，但個客交嘅保費唔係你收入，亦冇得拎去投資（你拎個佣去投資就得）。但勝在摸完就算，之後賠到死都唔關你事，投訴亦多數唔關你事。

「underwrite」，有時譯做承保，有時譯做「包鎖」，其實即係乜？

17. 自己坐嘅，咁當然收多好多錢，可以拎去投資，仲唔使畀佣出面。咁但要養啲真係做保險嘅人啦（而唔係只係普通sell產品嘅人，例如你點都要整幾件精算師），另外，自己坐即係「underwrite」，自己上身，計錯數嘅賠死你。咁就有辣有唔辣。

18. 順手講埋，underwrite有時譯做「包銷」（新股，或供股），有時叫做「承保」—其實underwrite，就係「assumption of risk」，即係「上身」。保險嘅咪條友炒咗車死咗你要賠，新股供股嘅亦即係出面唔足額你要攬上身。

保險收入206億，開支192億。咁係咪「淨執」14億？

19. 保險收入206億，開支192億。咁係咪「淨執」14億？又不能咁簡單。首先啲員工成本都未計。仲有，保險公司最重要，就係拎咗你舊錢去投資嘛，咁呢啲投資收益，係撈埋晒在最頂嘅淨利息收入嗰度。好似冇分開出嚟。所以，好難計。但由銀行咁落力sell你買嚟講，應該係幾好賺嘅

有人話銀行好多物業收租。真係咩？睇下恒生一年收幾錢租？

20. 再落去，有項「其他」，輸13億。估下銀行仲有乜其他收入？睇第33頁有講。主要係「長期保險」（即係人壽）嘅保單價值變動。唔知係乜？好正常，有得佢，好難解。仲有就係賣固定資產，可能當廢鐵賣咗部櫃員機之類。

21. 但有個好有趣嘅item：租金收入。3億唔夠。記住，唔好聽出面啲傻仔講。銀行並唔係「持有好多物業收租」，至少恒生唔係。3億嘢咋喎。記唔記得兩大主要收入講緊341億？3億租，散紙嚟啫

22. 不過話分兩頭，收租就冇乜相關開支，「利錢」相當高。仲有，銀行如果多自置物業，舖位寫字樓嘅，咁變相唔使交租，其實你可以話係隱性嘅「租金收入」

炒房「交易收入」，個數在邊度見到？又有幾大？到底炒乜？

23. 最後一個問題，好多人平時聽人講「炒房」（埃汾本人當年做銀行正係做炒房）。咁銀行有交易收入（trading income）肯定係事實。但，做乜我地睇晒咁多收入都冇提過？而到底呢啲交易收入有幾大？

24. 答第一個問題先，照計答案好易估：咁當然係因為隱藏在上面提過嘅嘢某個地方。留意，未必間間銀行都係咁樣分類，甚至同一間銀行十年前同十年後都可以唔同。可以係轉咗會計師，可以係會計條例轉咗，可以只係銀行自己決定。所以要睇細節，就咁估估唔到，但斷估唔係淨利息收入，又唔係淨服務費收入，應該係今篇討論嗰堆嘢。

25. 幫你睇下，你在業績PDF search「交易收入」就得。第32頁，啲交易收入，就係在嗰個「以公平價值計入收益表之金融工具收入」。即係乜？即係啲FV嘅unrealized gain loss，上面我地話輸少少，只係4億，其實係撈埋啲交易收入入去！（順手講埋，堆「交易收入」，主要係嚟自炒外匯，亦都有炒債券。FV而又「沽咗」嘅債券就會在呢度見到）

26. 睇圖。埋單就好似FV unrealized gain loss只係輸4億幾，但有交易收入18億—即係FV unrealized gain loss「本身」輸22億。留意，主要係保險方面嘅嘢，應該主要係債券跌價。

27. 點解跌價？咪我地之前講，美國加息債息升債價跌咯。咁你話對恒生有冇影響？當然有，咪輸咗20億。不過你有其他收入頂住晒嘛。

恒生2022年交易收入仲高過2021，點解？唔係2022股債匯三殺咩？

28. 然後睇下2021年，交易收入16億左右，少過2022年嘅。唔係話2022年股市債市差？但好奇怪地，多數係波動市銀行嘅交易收入會好（不過啲FV unrealized gain loss輸大錢咁解）。

29. 仲有，2022年FV unrealized gain loss呢度輸廿幾億，但2021年係贏廿幾近三十億（債息跌嘛！債價升）。一來一回，都爭好遠。當然拖累業績

30. 不過唔好忘記，呢篇文我地只係睇咗FV嘅unrealized gain loss，同埋真係沽咗嗰啲債券損失。仲有「AFS unrealized gain」，都未討討，好可能先係戲肉。點解未討論？因為未見到。點解未見到？咪話AFS unrealized gain唔會在income statement 見。之後同你掘出嚟

31. 但總之，呢兩篇我地就講完晒恒生嘅「收入」。之後？我地會睇埋開支（唔使講太耐），然後睇埋個Balance Sheet（耐少少）。

32. 然後再睇埋一個叫statement of comprehensive income嘅怪雞嘢，以及睇埋個statement of change in equity 嘅怪雞嘢　—呢啲係好多人都唔會睇嘅嘢。你啲AFS unrealized gain，就係在呢度出現。

33. 又睇下恒生輸咗幾錢。提示：都多多地。

恒生一年收入500億—同曼城差不多，多過所有球會好多倍

34. 最後總結一樣嘢：銀行真係大生意。你睇恒生，如果你唔減保險賠錢嘅，收入532億港紙。減埋嘅，都有340億。如果我計利息收入，唔係淨利息收入，仲誇張。

35. 冇乜概念？咁比較下。全世界最高收入嘅足球會（收入，唔係講利潤，蘋果同蘋果比），曼城一年收入，7.3億歐元，60億港紙多啲，真係得恒生嘅十分一咋！（其實應該係另一個角度睇：球會嘅收入好低，咪話巴塞收入不及一間維他奶）