［101文］債券之八實戰篇．同你睇埋銀行保險公司嘅財報。恒生同友邦做例子 佢地點賺錢？有乜收入開支？ 渣幾多債券？加息債價跌又有乜影響？爆煲未？ (Patreon)

同你睇埋銀行保險公司嘅財報。恒生同友邦做例子

佢地點賺錢？有乜收入開支？

渣幾多債券？加息債價跌又有乜影響？爆煲未？

「怕銀行爆煲嘅，放在曲奇餅罐咯」「但保單就唔知點算好」

銀行保險公司有冇輸錢？梗係有！輸得有幾甘？點睇到？會唔會陸續有來？

銀行嘅非利息收入，有啲乜？又有幾多？

銀行非利息收入，佔得最多嘅係乜？

點解銀行咁鍾意非利息收入？

點解香港嘅銀行可以賣保險賣基金炒股票？你返大陸睇下得唔得？

「銀行息差賺唔到你錢，咪其他地方昆返你」

咁但，非利息收入咁好，點解只係佔銀行收入一成多啲？

仲有，非利息收入，多數嚟自散戶。咁會有乜影響？

估下銀行係個人客生意大，定企業客生意大？

同你睇埋銀行保險公司嘅財報。恒生同友邦做例子

1. 債券系列，去到最後幾篇，同你真係睇實戰。記住之前溫好書呀下。

佢地點賺錢？有乜收入開支？

2. 唔止，寫寫下，直頭變咗我幫你解埋銀行同保險公司點運作，話畀你知有乜收入有乜開支，個Balance Sheet有乜，點去睇。但當然我地嘅重點係會睇下佢地渣幾多債券，點入數，同埋之前美國加息有乜影響，爆煲未。

渣幾多債券？加息債價跌又有乜影響？爆煲未？

3. 加息，美債跌價，SVB爆煲嘛，買美債都死？咁其他銀行都買好多喎，即係銀行危機陸續有嚟。出面係咁講，但又錯唔晒，就正係因為錯唔晒先多人信。早兩篇我寫過個真相，SVB之死主要因為擠提。

4. 不過加息，美債跌價，真係事實。銀行渣好多，又真係事實。所以難免有人好擔心啲銀行有冇事。又或者驚保險公司有事。再加埋啲咩港紙爆煲，你真係恨不得聽日就拎晒啲錢放在屋企呀（不過早排有單咁嘅新聞）。「不過保險單就唔知點算好了」，「又冇理由斬咗佢」，「但又驚保險公司賠唔起」

「怕銀行爆煲嘅，放在曲奇餅罐咯」「但保單就唔知點算好」

5. 認真，錢梗係放銀行。仲有，其實根本唔應該咁多現錢。但不過，保險單，就似乎應該係美金單好啲，幾廿年嘅嘢，真係可能港紙脫勾。雖然，我嘅睇法係保險只係保障，根本唔係你投資嘅一部份，但凡啲乜春儲蓄乜春投資保險，都係搵笨。

6. 再認真答，香港就真係有存款保障嘅，五十萬。同樣地，保險公司啲錢，都有相當嚴格嘅監管。咁所以就唔使擔心乜嘅，除非你堅信啲數全部係假嘅，全部一早運晒上北京，全部auditor夾埋大陸政府呃你嘅，咁就唔使討論的，你去日日沽空恒生友邦咯。（但港紙唔脫勾就從來冇人保證，不過，邊個話脫勾實跌？我唔係話一定升，但，咪講過俄羅斯盧布嘅例子）

銀行保險公司有冇輸錢？梗係有！輸得有幾甘？點睇到？會唔會陸續有來？

7. 咁但，到底啲銀行保險公司有冇輸錢？梗係有！輸得有幾甘？點睇到？會唔會之後再輸？會唔會有問題？畢竟雖然話有存款保證，但搞到做苦主要登記要嚇餐飽都唔係幾好。就算唔係咁杞人憂天嘅，咁識多啲嘢都好嘛，係咪？

8. 所以，同你睇下。兩個例子，銀行我用恒生，保險公司我用友邦。點解用呢兩間？除咗因為兩間我都有買，亦因為呢個課題我好早已經搵資料，呢兩間係比較早出業績嘅

9. 兩間公司嘅業績，恒生呢度，友邦呢度。Attachment我亦都有埋PDF，自己開住嚟睇。另外我留意我係冇整過Excel嘅，得閒先

10. 仲有留意，我下面講嘅「頁數」，係你在PDF Reader睇到嘅頁數，唔係份嘢入面寫住嘅。應該會方便大家。

11. 先睇銀行，恒生份業績呢度，亦有attach埋。另外，年報會有好詳細breakdown，年報我都有attach埋。但我呢度主要講業績份嘢。點解？因為最初整理嗰時未出年報。仲有，友邦到而家都未出，費事煩。

銀行嘅非利息收入，有啲乜？又有幾多？

12. 記住，睇返恒生份業績。首先26頁，好快同你睇下個Profit and loss，銀行有乜收入有乜開支。最頂嘅，利息收入（貨款，拆畀同業，買債券），減利息開支（畀你嘅存款利息，發債券，問同業拎錢，出存款證（CD））。就係淨利息收入，講過啦，銀行係一個賺息差嘅機器。

13. 順帶講，所以你討論銀行嘅「收入」甚至「純利率」，冇乜意思，因為我都唔知你計利息收入，定減完利息開支嘅淨利息收入。爭好遠喎

銀行非利息收入，佔得最多嘅係乜？

14. 淨利息收入下面，係非利息收入，或者所謂嘅服務收入。就係唔係利息嘅嘢。例如乜？19頁有breakdown．好簡單，你買賣股票嘅佣啦，匯款抽嘅佣，賣基金賣保險畀你抽嘅佣啦。而其實最大舊係信用卡！非利息收入，減走相關嘅開支（銀行都要畀佣其他人嘛），就係淨非利息收入。留意減嘅係同呢啲非利息收入相關嘅開支，唔係員工啲人工。

點解銀行咁鍾意非利息收入？

15. 呢度可以講兩樣嘢：首先，以前講過，銀行嘅貨款或投資（即係資產），係受制於個資本充足率（CAR）。人話講，即係你嘅槓杆有限制，不能1蚊股東權益做100蚊貨款。

16. 咁但，服務嘅收入，就冇乜限制了。你啲客夠狼嘅，話知你100萬股東權益，但收佢地炒股幾億佣。監管當局唔會理。

17. 咁所以，銀行當然係想不停咁擴展非利息收入。因為唔使「消耗」資本。亦因為咁，你見銀行不停咁sell你基金保險。

點解香港嘅銀行可以賣保險賣基金炒股票？你返大陸睇下得唔得？

18. 而仲有，其實唔係咁多地方嘅銀行可以賣保險賣股票賣基金，例如在大陸就係唔得嘅，你應該不能行入去農行櫃枱買股票。

19. 至於點解香港嘅銀行可以做呢啲嘢？又係有故事講，係因為遠古年代（其實唔係好耐之前，2005年實行），銀行係有利率協議，即係差不多係合謀定價，唔會有價格戰，唔會鬥高息搶存款，唔會鬥平借錢。好似油公司咁（雖然油公司唔認）。

20. 咁你大約估到，撤銷走後，當然係消費者受惠（在呢方面金管局居功的，我貼條link就係任志剛自吹自擂），存款嘅息口高咗，借錢嘅成本平咗。

21. 咁但又即係，銀行賺少咗啦喎。你估會唔會咁順攤？當然有利益交換，政府（港英年代開始傾）為咗銀行就範，就交換條件，畀佢地賣股票。咁當然到啲證券行嘈，但呢班人係冇牙力嘅，所以冇人理。

「銀行息差賺唔到你錢，咪其他地方昆返你」

22. 咁實際嘅結果即係：「銀行利息賺唔到你錢，咪其他地方賺返你咯」。咁但在金管局嘅立場（任志剛篇嘢有講），係最關心啲利息（包括拆息之類），因為同聯匯或匯價之類有關。咁而金管局又可以出嚟領功話幫你爭取到存款高啲息借錢平啲息。「咁至於銀行賣基金昆你賣雷曼債券昆你就另一回事啦」，冇渣住支槍要你買喎（事實亦係咁）。

咁但，非利息收入咁好，點解只係佔銀行收入一成多啲？

23. 不過，你見到，雖然銀行當然係想做多啲非利息收入。但淨服務收入，51億。淨利息收入？290億。始終都係所謂「冇肉食」嘅淨利息收入，仲係主菜（術語叫bread and butter）。

24. 點解唔拓展多啲非利息收入？大佬，話咁易咩。好大競爭嘛。賣股票賣基金賣保險，間間都係咁賣架啦。你會睇乜呀？睇邊間平咯，鬥搶客。咁例如股票，真係去晒富途啦。早排有個朋友去匯豐開股票戶口，個哥哥仔直頭趕客，暗示叫佢唔好開，「我地自己都係用富途啦」，如是我聞。

仲有，非利息收入，多數嚟自散戶。咁會有乜影響？

25. 仲有一個問題。有錯你可以指正我，但目測，非利息收入嘅，多數係嚟自散戶，呢啲人係比較price sensitive嘅，而反正銀行唔會提供乜服務畀你。自己上網trade啦，唱外幣都用機啦。咁，你真係睇價啫。

26. 咁你話，難道bread and butter就唔只係睇價？某程度上唔係完全睇價。

27. 應該咁講，非利息收入嘅，絶大多數就係個人客。但你利息收入嘅，就真係有大企業客，幾十億嘅loan，咁就唔係只係靠價，仲要講啲「售後服務」呀，飲茶灌水呀，個RM識人面點呀之類．

估下銀行係個人客生意大，定企業客生意大？

28. 其實有數你睇，睇19頁你會見到。恒生有拆開唔同嘅segment。利息同非利息都好，「個人」先係最大收入來源，唔係「企業」（香港人真係好有錢！！！）。但，相對地，利息收入有唔少嚟自企業，非利息就好少了　—　你企業客唔會開個股票戶口在你度炒股票，唔會成日同你買基金，唔會出信用卡（我知會有，但個量冇得比）

29. 埋下數先，淨利息收入290億，加淨非利息收入51億，咁就341億啦喎，但仲有其他嘢。估下有乜？下篇講