［101文］債券之七—　明明加息債券會跌銀行要輸錢保險公司要輸錢，做乜話加息有利？債息升銀行係咪真係「輸錢」？咩叫輸錢？睇幾長？到尾根本你係收返晒嘛！邊有蝕錢？加息只係有利銀行息差。但唔一定有利盈利。又未必有利股價。三樣嘢！ (Patreon)

明明加息債券會跌銀行要輸錢保險公司要輸錢，做乜話加息有利？

首先，銀行嘅資產，唔只係債券嘛

但你會問，唔係喎，存款都要加息喎

債息升銀行係咪真係「輸錢」？咩叫輸錢？睇幾長？

到尾根本你係收返晒嘛！邊有蝕錢？

神奇嘅係，去到埋尾，無論出面加息減息，債價都會係升返嘅！

債價開頭跌我輸錢，但到期我收返晒，即係後期會贏錢。咁係乜力量？

如果張借據剩返1日呢？半日呢？咁出面咩息，仲有乜分別？

買完債，之後出面加息。係會帳面輸錢嘅。但，去到尾段，必然會升返

Duration：長期嘅債，對息口好敏感。得返兩日嘅，who cares？

買咗債，出面勁加息，係蝕章。但唔係真係蝕錢！

廿年放曲奇餅罐，跑輸通脹，購買力跌喎。in real terms，係咪即係蝕錢？

加息只係有利銀行息差。但唔一定有利盈利。又未必有利股價。三樣嘢！

1. 繼續講，上篇係第六篇（！），應用篇嘅第一篇，同大家重溫咗SVB。當係一個應用練習，相信大家啲基本功都合格啦。

明明加息債券會跌銀行要輸錢保險公司要輸錢，做乜話加息有利？

2. 於是乎，答你問題：明明加息債券會跌銀行要輸錢保險公司要輸錢，做乜話加息有利銀行？定根本加息唔係有利銀行？

3. 一如以往，咁簡單嘅問題，係要複雜化，因為世事就係好複雜。

4. 首先，「加息」，係加乜息先？咁一般我地講聯邦基金利率先啦，美國一年開8次會嗰味。

首先，銀行嘅資產，唔只係債券嘛

5. 第一樣嘢，銀行嘅資產，係乜東東？現金以及借咗畀同業或放在央行嘅錢（差不多係同一樣嘢，銀行其實唔使放好多「銀紙」），貸款，債券。銀行嘅負債係乜？主要就係存款，仲有可能發債，或者問同業借錢。

6. 先講同業或放在央行嘅錢，好簡單，聯儲局一加息，呢啲息就自然跟加。一般反映得快，咁你銀行總唔會全部拆出街都拆一年。就算真係咁騎呢，咁都係等一年就反映啫，大家識計數啦，炒預期嘛。唔使等你真係夠一年先知會收多啲錢。

7. 咁貸款方面，一樣。你貸款係浮息嘅（例如閣下供樓，或者借孖展買股票），分分鐘一個月就同你反映啦。當然因為某啲原因，美國啲按揭好多定息，後話。

8. 咁然後你會問，喂，存款呢？存款都要加息喎。咁就有啲唔同啦。首先，其實銀行係可以不對稱加息嘅，我可以貸款加息但定期唔加畀你。雖然在香港唔太常見。

但你會問，唔係喎，存款都要加息喎

9. 不過留意兩樣嘢，首先，好長時期，銀行有好多存款都近乎係零息嘅儲蓄存款（近一年先多返少少息），亦都好多時你要存返一舊大錢先有高啲息

10. 仲有，以前低息嘅年代，銀行係好惡搞嘅。貸款我收3厘息，儲蓄零息。但聯儲局再減息呢？我貸款又要再減，但存款冇得再減喎，所以低息就好煩。加返息就會好返。

11. 不過你見我講咗咁耐，都未講重點：債券丫嘛。而家講。

12. 記住，債券多數係定息嘅，所以先出現「加息債價會跌」呢個問頭，因為你「蝕章」（早排先講過！），明明出面加晒息，你就一早鎖死咗。（浮息債其實都有呢個問題，但冇咁嚴重）

13. 於是都係返返去嗰個問題，明明加息，債價會跌，唔係銀行輸錢咩？點解仲對銀行有利？

14. 首先，你銀行唔會啲債全部都10年後先到期嘛。正常梗係有啲短有啲長（分散！！！），咁到你短嗰啲到期返嚟，你再借出街，做貸款又好買債又好，咪會高啲息

債息升銀行係咪真係「輸錢」？咩叫輸錢？睇幾長？

15. 另外，其實債息升銀行係咪真係「輸錢」？睇你睇幾長。你睇一年可能係，但最後埋單呢？

16. 只要你唔係搞到SVB咁要賤價沽（等於股災畀人追孖展斬倉咁），而你啲債仔又正正常常，你嘅「蝕錢」只係數字遊戲，到尾根本你係收返晒嘛！邊有蝕錢？（亦可能因為咁，先有AFS呢個機制，唔會令銀行啲盈利大上大落）

到尾根本你係收返晒嘛！邊有蝕錢？

17. 舉實例時間。我銀行2022年頭買咗100萬美債，2023年尾到期。舊年會發生乜事？當冇沽先啦。HTM咪乜事都冇，但如果AFS同FV當然會輸錢啦！FV就在profit and loss，AFS就直接去股東權益。

神奇嘅係，去到埋尾，無論出面加息減息，債價都會係升返嘅！

18. 但，今年又會點？固然你話，今年炒放慢加息，債息跌返債價升返。但神奇嘅係，其實無論出面加唔加息都好，呢100萬美債，都係會升返的！我一定會賺返錢嘅。

19. 點解？因為你諗下，舊年我呢100萬美債，輸錢喎，可能只係值93萬咁啦。但，明明去到今年年尾，我就會收得返嗰100萬嘛。咁你一定要有個「力量」，去幫我賺返錢喎，因為我over the course應該根本冇輸到錢嘛！我拎100萬出去，收返100萬，點會輸錢？咁舊年輸咗錢，應該係今年某個位我要賺返先啱喎—無論出面發生乜事，都應該係冥冥中有個力量喎。

債價開頭跌我輸錢，但到期我收返晒，即係後期會贏錢。咁係乜力量？

20. 咁神奇嘅？咩回事？

21. 好簡單，睇返呢條式（怕數字嘅都唔怕，下面唔用式解多次）

22. 十分明顯地，去到今年稍後，例如下半年，你條式應該只係剩返最後一期嘅票息（如有）同埋個本金，係咪？右邊成條式得返第一項。

23. 所以，你個債價，根本就變咗　債價= 100/（1+i）^n．而個n係剩返幾耐，用年份量度（因為你個利息都係年份），剩返半年咪0.5，剩返1個月咪0.08，剩返1日咪0.003。

24. 數學唔好嘅，唔緊要。你可以玩下計數機，當你個N去到咁細嗰時，你個債價，點都係接近100，1厘息定10厘息，冇乜分別。

25. 唔用數字解？都一樣。重覆一次，出面加息，你債價跌，因為蝕章。以前我覺得借99蚊出去年尾收返100好抵，但如果出面加晒息，我咪覺得唔抵。你90蚊賣畀我啦。

如果張借據剩返1日呢？半日呢？咁出面咩息，仲有乜分別？

26. 但如果張借據剩返1日呢？半日呢？咁出面咩息，仲有乜分別？總之有票就拎錢啦（順帶一講，如果聽日就收錢，但張票仲只係值90蚊，會點？就會人人仆去買呀！套利呀！貪念呀！供求呀。拿，都話環環相扣）

買完債，之後出面加息。係會帳面輸錢嘅。但，去到尾段，必然會升返

27. 亦即係話，如果你咁不幸，買完債，之後出面係咁加息。咁你係會帳面輸錢嘅，因為債價會跌。但，去到尾段，個債價必然會升返，會慢慢converge返去到100蚊，因為你到期就係收返本金。

28. 再換一個角度解：上次講過Duration。長年期嘅債，對息口係好敏感嘅。我一年就收錢嘅，3厘同4厘嘅債據分別唔大，100/1.03同100/1.04嘅分別，好細，1%。但我20年先收錢？100/1.03^20同100/1.04^20嘅分別喎，爭咗18%。

Duration：長期嘅債，對息口好敏感。得返兩日嘅，who cares？

29. 咁反轉嚟講，啲借據duration短嘅，幾日收錢嘅，其實啲息點變都冇乜分別。所以去到最尾，就會由蝕變賺。

30. 一句講，即係蝕頭賺尾，最後打和。

31. 當然，以上講加息嘅環境。減息嘅環境亦都一樣。

32. 要補充一句，好重要好重嘅係：我買晒啲債，但之後係咁加息。係咪真係「蝕」？就要好嚴謹咁定義。而家可以答你。

買咗債，出面勁加息，係蝕章。但唔係真係蝕錢！

33. 理論上，係「蝕章」。但記住，「賺少咗」唔係叫做「蝕」！即係人人買美股，十年升十倍，你「風險管理」，放晒啲錢入曲奇餅罐。當然你蝕底，但，唔係叫「蝕錢」係咪？正如例如樓價狂升，你冇買樓，咁係「蝕底」，但唔係真係「蝕咗錢」。

34. 如果會計上，上面講咗啦，開頭蝕，後來賺返。所以你都係冇「蝕」的！

35. 最後會有人問，唔係喎，我啲錢廿年放曲奇餅罐，跑輸通脹喎，購買力跌喎。咁其實in real terms，係咪即係蝕錢？

36. 答案，in real terms，係！你可以當通脹係個惡魔，年年扣你3%血咁。你唔郁都係等於輸錢，所以先叫你stay invested，唔郁係必輸。

廿年放曲奇餅罐，跑輸通脹，購買力跌喎。in real terms，係咪即係蝕錢？

37. 咁你話，咁我銀行放100億出去，10年後又收返100億的話，理論上冇蝕錢，但都係購買力低晒啦。In real terms都係輸錢？

38. 答案：係！

39. 但會計嘅數字，從來都只係睇nominal，你唔會見到有講通脹。盈利十年升十倍就係十倍，唔會同你減通脹（我記得中學會計阿Sir好咬牙切齒，好神秘咁話要揭露一個真相：就係一個橙加一個蘋果等於兩個生果。佢就係講會計嘅數字，今年嘅一蚊同舊年嘅一蚊加埋。）

40. 所以，債息升，銀行真係冇「蝕錢」的　—　除非你中途要打靶。

加息只係有利銀行息差。但唔一定有利盈利。又未必有利股價。三樣嘢！

41. 最最最後，補多句。其實，咩叫「有利銀行」（唔係講真係叫「有利」嗰間）。見到冇？簡單問題，認真諗。

42. 上面我講咗N咁多嘢，其實只係答咗你一樣嘢：「加息呢，唔會令銀行啲債輸錢嘅，係有利銀行嘅息差」

43. 係喎，忽然我搬咗龍門。其實寫咗咁多，只係話你知，對銀行息差有利！

44. 咁你話，唔係對息差有利就對銀行有利？Well，Ceteris paribus嚟講，係。其他嘢唔變就係。Marginally睇就係。

45. 不過，好簡單話你知，息口高，你啲貸款收多啲錢，但可能你啲債仔又會壓力大啲，壞帳都升喎。況且，高息的話，貸款需求都低啲，20厘息你都唔借孖展啦，零息就真係借去抽iBond都抵啦。所以拉勻晒，有冇著數，真係冇人知，睇情況。

46. 好似賣土耳其雪糕咁，臨走又畀多個twist你。仲仲仲有喎！即使你嘅結論係加息對銀行嘅利潤有利，都唔代表對銀行有利！

47. 你心諗，你寫乜呀？

48. 好簡單，作為一個短視嘅投資者，其實你最關心嘅，係銀行嘅盈利咩？你最關心乜？係股價丫嘛！

49. 咁所以，盈利升，股價未必升架喎！

50. 唔係喎，埃汾話多數最後股價都係跟盈利上。但講緊長期，好長期喎，十年八年喎。咁你講一年半載，幾日，就係兩回事。

51. 因為，加息，特別係如果令到債息升，往往係會影響估值！以前寫過啦，買美債都10厘嘅，我仲會40倍市盈率買股票？但如果美債零息嘅，我買3厘領展都覺得幾好啦

52. 然後寫文寫過N次，市值=盈利Ｘ市盈率嘛，市盈率即係估值。

53. 咁你加咗息，盈利多咗，但估值低咗，拉勻會點，都真係難講。情況好似話「通脹」咁。通脹對股市嘅最大打擊，往往唔係嚟自盈利，唔少公司都可以將成本轉畀客，通脹下賺更多錢。但往往個「估值」補唔返

54. 明白呢點，你就會開始明，點解加息，明明又話加息有利銀行，但啲銀行都會跌。世界唔係咁簡單

55. 特別係，唔好太過頭腦簡單，見到股價跌，就以為「加息」不利銀行嘅盈利。

56. 當然都話，咩叫「有利」，都睇你係指乜。淨息差？盈利？定股價？三樣嘢。

57. 好，下篇真係實戰，睇下恒生同友邦。舊年輸幾多錢。提示：都好多下。