［101文］債券之六—重溫返SVB死因。加息係會債價跌，但點影響銀行保險公司？點入數？睇返SVB，點解舊年債價大跌，但佢季季都賺錢，今年先死？所以你話債價跌係咪死因？ (Patreon)

再驗屍：加息，債價跌，然後SVB爆煲，真的嗎？

美國加息所以債息跌所以SVB蝕錢所以出事—錯唔晒，所以你先更加誤解

債價大跌是真的，銀行渣好多又係真嘅，但點解其他銀行冇死？

銀行渣住嘅美債跌價之後，會有乜事發生？

咩叫輸錢？咩叫蝕錢？係咪一日未沽一日唔算輸？

再溫多次書，HTM，AFS，FV．

邊啲嘢要 mark to market？mark完又會點？

AFS：唔沽都要次次mark to market，「咁同FV有乜分別？」

AFS：唔沽都要次次mark to market，但唔影響盈利，「咁mark嚟把托？」

舊年咪債價狂跌咯，但舊年有冇見其他銀行勁蝕？

再講一次，SVB舊年季季賺錢，輸乜錢？明明舊年美債就大跌。

你話AFS unrealized loss累死SVB？點會今季先忽然爆？

「明明唔沽唔會蝕」—咪就係因為佢沽咯。咁點解要沽？

1. 好啦，真係講啲基本嘢都講咗五大篇（第一，第二，第三，第四，第五）。麻煩大家務必要睇，唔得閒唔緊要，唔使趕，得閒先睇。但記住要睇。都講過幾次，根基打得唔好，之後你理解嘢問嘢諗嘢都係會錯晒。仲有，明咗啲基本嘢，好多時你就唔使再問人，自己諗到答案。

2. 點知道自己係咪真係明？嚟緊呢幾篇，就實戰，應用，入戲肉。自信根基打得好嘅，咁你唔使睇頭幾篇都會明嚟緊呢幾篇。如果你呢幾篇睇唔明嘅，即係未了解，就又返返去睇返101先吧。冇問題的，唔識就慢慢學，我都係由完全唔識學起。

再驗屍：債價跌，然後SVB爆煲，真的嗎？

3. 嚟啦喎，之前預告過，嚟緊幾篇講呢幾個問題：「明明話加息債價會跌，SVB都搞到爆煲，但點解有人話加息對銀行同保險公司有利」。仲有，香港啲銀行同保險公司會唔會有事（相信大家最關心啲存款會唔會有事呀，保單會唔會賠唔到呀之類）

4. 首先，講返SVB嘅故事。詳細嘅自己睇舊文，幾篇驗屍報告。但我話你知，坊間好多誤解。好多人以為，係「因為」美國加息所以債息跌所以SVB蝕錢所以出事。呢個講法最大問題係：錯唔晒！就係呢啲啱一半唔啱一半嘅，先易令大家人中伏。

美國加息所以債息跌所以SVB蝕錢所以出事—錯唔晒，所以你先更加誤解

5. 記住，SVB嘅主要死因，係因為擠提！（Signature Bank同Silver gate Capital都係，瑞信就係長期病，又唔同死法）

6. 睇咗堆債券101，相信你會更理解。而家又我地集中債券角度，又再由頭快講一次，睇下點應用學到嘅嘢

債價大跌是真的，銀行渣好多又係真嘅，但點解其他銀行冇死？

7. 肯定嘅係，聯儲局舊年大力加息，就令到債息大升（睇到的），債價大跌（睇到的，而債價咪即係債息），咁而絶大多銀行都係渣好多美債嘅。（實情仲有啲按揭抵押債，但原理差不多。留意SVB嗰啲唔係垃垃次按嚟的，高質MBS，所以啲機制同美債差不多）

8. 而銀行全部都高度槓杆，又係事實。講得白啲，20倍槓杆，咁你間銀行嘅Asset（「右邊」，主要就係貸款，同埋債券，銀行拎咗存款就係咁用）價值跌5%，你成個Equity（股東權益）就冇晒啦。好似你買樓做9成按揭咁，或者買股做九成孖展咁，層樓跌10%，隻股跌10%，你就即使本金都輸突，below water，負資產啦。

銀行渣住嘅美債跌價之後，會有乜事發生？

9. 問題係，銀行渣住嘅美債跌價之後，會有乜事發生？就值得你細心諗。

10. 呢度亦涉及一啲平時啲人水過鴨背唔諗嘅問題，點先叫「輸錢」？係咪一日未沽一日未輸？係咪一日未take profit 一日都未係贏錢？而呢度我唔同你講哲學層面，講實際嘢。甚至符你可以諗埋，乜嘢叫「輸錢」？乜嘢叫「蝕錢」？唔好以為好易答。

咩叫輸錢？咩叫蝕錢？係咪一日未沽一日唔算輸？

11. 銀行嘅「資產」，不外乎幾類。現金，或者拆咗畀同業嘅嘢，呢啲在盤數上就at cost，100萬就100萬，永遠不變（除非對家爆煲）。貨款，都係at cost，但銀行要年年做「撥備」，係一個有啲複雜嘅過程，遲下解。但總之，固然去到爛帳就會write off，但未爛就爛，都要撥，甚至完全冇穿冇爛，都要撥定啲。

12. 咁仲有啲銀行有物業，咪每次（美國每季，香港每半年）做「重估」，升值咪贏錢，跌價咪輸錢。留意，即時影響你profit

13. 但銀行嘅「投資」呢？同好多人以為嘅唔同，銀行係唔會買好多股票嘅。投行會多啲，但都唔會太多，保險公司就會多啲。但銀行，投行，保險公司，多數都係買債券。

14. 點處理？聽住啦喎，再溫多次書，入帳上分三類．Hold To Maturity（HTM），AFS（Available for sale），FV（Fair value，真實個名好長，簡寫都五六個字母，我簡稱算）。你睇啲財報會見到，SVB都有。遲下我地講嘅銀行同保險公司啲數都有，好易見（我用恒生同友邦做例子，勤力嘅同學可以備定課）。

再溫多次書，HTM，AFS，FV．

15. 首先大原則：你沽咗嘅，就一定埋單計數，影響你賺蝕，在profit and loss（又叫income statement）見到，好合理啫。沽咗都唔埋單計數，幾時先計？

16. 問題就係，unrealized gain and loss，未沽嘅，咁點計數？記住，我講會計上嘅做法，即係法律上嘅做法。你「覺得」你「認為」應該點，係冇人care嘅。

邊啲嘢要 mark to market？mark完又會點？

17. 點處理，涉及一個重要嘅概念：mark to market，MTM。每次埋數（美國每季，香港每半年），使唔使同你睇返隻嘢市價幾錢，使唔使幫你計數，如果要計咁點計（順帶一提，上次講過，「定期存款」就冇「市價」，所以唔使MTM。即係你保險公司1厘息去做定存，出面加到10厘息，都係冇任何事發生嘅）

18. 嚟啦喎，HTM嘅東西，與世無爭，任出面點升升跌跌，唔使MTM，賺蝕冇人理。市價跌好多都好，唔賣就咩事都冇。但賺錢亦係咁。

19. FV嘅，另一個極端，話知你沽唔沽，總之每次埋數，同你睇市值。贏就贏，輸就輸，影響你盈利。順帶一講，股票應該一定要放FV，仲有啲怪雞衍生工具都係。亦都留意，FV嘅東西，其實咪同處理「物業重估」升值貶值差不多（不過又提提你，公司「自用」嘅物業好似係唔使做重估嘅，只有收租物業先要）

AFS：唔沽都要次次mark to market，「咁同FV有乜分別？」

20. 最煩嘅，當然係AFS。你唔沽都好，一樣每次埋單MTM，但唔會計入去Profit and loss．咁你心諗，MTM嚟把托？問題係，你呢啲MTM賺蝕，雖然唔影響個profit and loss，但會直接打落你個股東權益度！

21. 即係話，同樣係啲債跌咗10億，同樣係冇沽到。如果係HTM嘅，冇事發生（除非跌得好勁，auditor就會質疑你）。AFS嘅，你會見到profit and loss冇事，但股東權益直接消失咗10億。FV嘅，你會見到公司蝕10億（我當冇其他嘢），但最後當然呢舊嘢會打埋落股東權益，同AFS一樣，都係個股東權益消失咗10億。

AFS：唔沽都要次次mark to market，但唔影響盈利，「咁mark嚟把托？」

22. 換個講法，放AFS同放FV，結局都係股東權益冇咗10億 。只係FV會經profit and loss，AFS唔經。後者好似「冇輸錢」咁，其實咪一樣！直接同埋間接，多唔多一個步驟嘅分別。

23. 拿，幫你溫咗一次書，呢個系列內唔再講架啦下。唔好隔兩日又問！

24. 咁嚟啦喎，之前都寫過啦。美國幾時開始大手加息呀？舊年第一季，加到而家。債價幾時大跌呀？舊年跌到七彩。咁既然次次埋單，堆FV同AFS，舊年已經輸死銀行啦。HTM嘅當你唔沽冇事啦，照計一般唔多想蝕價沽出去整衰盤數嘛。

25. 咁有冇咁嘅事？我之後可以同你再睇。但，呢個圖貼過啦（就係FV同AFS），舊年梗係輸得甘。

舊年咪債價狂跌咯，但舊年有冇見其他銀行勁蝕？

26. 咁舊年你有冇見啲銀行蝕得好勁？業績都麻麻，但至少舊年你冇特別聽到呢個危機，係咪？

27. 就以SVB為例，你話輸錢？痴線，舊年季季都賺錢！輸乜錢？咁你話，係咪啲AFS大跌，冇在profit and loss反映，但一早食咗個股東權益？你可以咁講，舊年都見到啲AFS食咗唔少。但，有排都未去到爆煲水平喎（仲有，SVB堆債好似近乎冇放FV的，原因不明）

再講一次，SVB舊年季季賺錢，輸乜錢？明明舊年美債就大跌。

28. 100萬嘅問題：咁所以，點解舊年都冇事，今年忽然有事？仲要明明今年債價係升嘅！（睇返早幾日貼嗰個第一季回顧圖咪知）—OK，債價主要係SVB死咗後先升，但即使佢未死之前，今年啲債息真係點都冇可能好似舊年咁誇張。

你話AFS unrealized loss累死SVB？點會今季先忽然爆？

29. 你話FV AFS mark to market累死SVB，完全唔make sense—但出面好多人都咁講。

30. 咁所以不如你諗下，係乜累死SVB？唔係AFS，唔係FV，咪就係HTM咯！！！

「明明唔沽唔會蝕」—咪就係因為佢沽咯。咁點解要沽？

31. 你心諗，喂，明明話唔沽唔會蝕喎。係丫，但咪就係因為佢要沽！

32. 咁點解蝕都要沽？咪就係因為擠提咯！客戶要錢，咁邊度變錢出嚟？唯有沽啲債，咁就乜都同埋單計晒數（咁當然唔會只係沽HTM，AFS都要沽，所以呢個角度你可以話 AFS都有份，但係因為要沽！而唔係因為unrealized loss）

33. 最後兩個問題：點解擠提？講過啦，啲客全部初創，自己都唔掂。而且羊群效應，一個走個個走，而家又有智能電話又有Whatsapp。仲有，啲客全部大客，大客驚唔受存款保障，梗係走，細客反而未必驚。

34. 咁仲有，點解佢啲債沽親都蝕？因為，高買低沽咯！點解高買？因為佢啲存款就係tech boom，2020無限QE後吸返嚟呀，嗰時咪債息最平，即係債價最貴。咁點解要低沽？因為啲客就係債息最貴嗰時（即係今年年頭）提款呀！你咪要呢啲時間沽債。

35. 畀個練習你，睇完呢篇，你試下解畀人地知SVB點解爆煲，同埋畀佢問你問題。你搞得掂嘅，即係真係識了。

36. 不過，大家睇完呢篇後，應該會諗一個問題：如果SVB唔沽啲債（亦即係，如果冇人擠提），係咪就冇事？

37. 答案係：應該係！因為佢啲債，唔係垃圾債嘛，唔係真係買內房債人地債務重組或破產嘛。佢啲美債同MBS，坐到尾，頂多陣，根本就會升返！

38. 你記住呢句嘢，就係下一篇嘅核心思想：買債嘅，個債仔爆煲走數或者債務重組冇得講，實要損手。但如果佢到期還得到錢嘅，咁其實即使你中途出面加息，你只係「帳面」蝕錢咋喎，坐到尾你應該係會收返晒個本嘛，點會蝕錢？

39. 咁你諗下，個機制點樣令你最後「賺返」？

40. 同埋，留意，股票就冇呢回事，股票係冇「到期日」，唔存在你最後拎得返錢的。